Wase 19

Tiko e Vuravura ia Sega ni Vakavuravura

“E dina ni da tiko e vuravura, eda sega ni vakavuravura. E namaki vei keda me da vakamalumalumutaki vuravura ka bula me vaka e dua na yalododonu.”

Na Bula nei Joseph Fielding Smith

Ena ika 29 ni Tiseba, 1944, a mate kina o Lewis na luvei Peresitedi Joseph Fielding Smith ni veiqaravi tiko ena Mataivalu ni Amerika. E dina ni sotava na rarawa o Peresitedi Smith, a kunea na veivakacegui ena bula vinaka a bulataka o Lewis. “Kevaka beka a cakava se tukuna e dua na ka ca o Lewis au a sega mada ni bau rogoca,” a vola o Peresitedi Smith ena nona ivolaniveisiga. “A savasava na nona vakanananu ka vaka kina na nona ivalavala. … E dina ni dredre me ciqomi, keirau vakacegu ka marau ni keirau kila ni savasava ka galala tu o koya mai na veika ca ka sinai tu e vuravura ka dau kunei ena mataivalu. A dinata tu o koya na nona vakabauta ka kilikili kaya e dua na tucake tale mai na mate lagilagi, me keitou na duavata tale kina.”¹

Rauta ni oti e 11 na yabaki, erau a raica o Peresitedi Joseph Fielding Smith kei na watina o Jessie na ivakarau ni bula vata oya vei ira tale eso na sotia. Erau a sikova na veitabana ni veiqaravi ni Lotu ena tokalau kei Esia ka sikovi ira talega na Yalododonu Edaidai mai Amerika era veiqaravi tu ena mataivalu. Erau vakauqeti o Peresitedi kei Sisita Smith ena vukudra na cauravou oqo, e dina ni tu na veitemaki ni vuravura, era a bulataka na bula vinaka ka savasava. Ena koniferedi raraba ni Okotova 1955, a tukuna kina o Peresitedi Smith:

“Kemuni na tama kei na tina ka ra veiqaravi tu ena mataivalu na luvemuni, ni cibitaki ira. Era cauravou vivinaka. Eso na noda sotia era saumaki mai ki na lotu, ka ra curu mai ki na Lotu ena ivakavuvuli, na ivunau kei na ivakaraitaki—vakauasivi na nodra ivakaraitaki na lewe ni Lotu era veiqaravi vata ena mataivalu.

“Au sotavi ira e vica na cauravou era kaya vaqo, ‘Keimami curu mai ki na Lotu me baleta na nodra bula na cauravou oqo ka baleta ni ra vakavulica vei keimami na ivakavuvuli ni kosipeli.’

“Era sa cakava tiko e dua na cakacaka vinaka. Ena dua beka se rua era sega tu ni kauwai, ia o ira na cauravou au a sotavi ira, kau vosa vei ira, era na wasea na nodra ivakadinadina ni ka dina ka ra sa lako voli ena yalomalumalumu.

“Ia niu sotavi ira na vakaitutu kei na italatala … , era kaya vakararaba, ‘Keimami taleitaki ira na nomuni cauravou. Era savasava. Era tamata nuitaki.’”²

Sa vakauqeti keda kina na lewe ni Lotu o Peresitedi Smith me da—vakataki ira na sotia gone oqo—“duatani mai vei ira na vo ni kai vuravura.”³ Ena ivunau eso vakaoqori, e dau vosa wasoma kina me baleta na kena vakarokorokotaki na Siga ni Vakacecegu, talairawarawa ki na Vosa ni Vuku, rokova na yacadrau na Tamada Vakalomalagi kei Jisu Karisito, vakaisulu rakorako, ka maroroya na lawa ni bula savasava. E vakadeitaka vei ira na Yalododonu Edaidai ni veivakalougatataki era na ciqoma kevaka era biuta laivi na veika ca ni vuravura ka talairawarawa ki na ivunau, “ena uasivia na veika kecega eda rawa ni vakasamataka ena gauna oqo.”⁴

Ena gauna sara mada ga ni ivalu, e rawa ni da tiko e vuravura ka sega ni vakavuravura.

iVakavuvuli nei Joseph Fielding Smith

E namaka vei keda na Turaga me da biuta laivi na veika ca ni vuravura ka bula me vaka na Yalododonu.

Eda bula tiko ena dua na vuravura ni ca kei na dau caka ca. Ia ni da tiko e vuravura eda sega ni vakavuravura. E namaki vei keda me da vakamalumalumutaki vuravura ka yaco meda tamata yalododonu. … E levu cake na noda rarama mai vei vuravura, ka nanamaki vakalevu cake vei keda na Turaga mai vei ira.⁵

Ena ika tinikavitu ni wase ni Joni—dau dredre meu wilika na wase oqo ka sega ni turu na wai ni mataqu— … na noda Turaga, ni masuta tiko na Tamana ena bibi ni lomana baleta ni kila ni sa yaco mai na gauna me cabori koya kina me isoro, a masulaki ira na nona tisaipeli. Ena masu oqori e kaya kina,

“Au sa sega ni masu mo ni kauti ira tani e vuravura mo ni maroroi ira ga mai na vu ni ca.

“Era sa sega ni vakavuravura, me vaka kau sa sega ni vakavuravura.

“Vakatabui ira ena nomuni vakavuvuli dina: sa ka dina na nomuni vosa.” (Joni 17:15–17.)

Kevaka eda sa bulataka tiko na lotu sa vakatakila mai na Turaga ka da sa ciqoma, eda sa sega kina ni nei vuravura. Me da kakua kina ni okati ki na kena veika lialia. Me da kakua ni vakaitavi ena kena ivalavala ca kei na kena cala—cala ni vakasama kei na cala ni vunau, se cava ga na cala—me da kakua ni vakaitavi kina.

Na noda itavi ga me muri na ivakaro ni Kalou. Sai koya sara ga oqori, me da dinata na veiyalayalati yadua kei na icolacola eda sa soli keda kina ka da colata me noda.⁶

Mo ni kakua ni nanuma mai na veika au sa tukuna niu nanuma ni dodonu me da tawasei keda mai vei ira kecega na tamata era sega ni lewena na Lotu ka kakua ni veimaliwai vata kei ira. Au sega ni tukuna oqori, ia au vinakati keda me da Yalododonu Edaidai tudei, kevaka era lako voli ena butobuto na tamata e vuravura ka ivalavala ca ka veisaqasaqa kei na loma ni Turaga, e dua na vanua me da yalani keda kina.⁷

Ni da mai lewena na Lotu … , sa namaki vei keda me da biuta tani e vuqa na sala vakavuravura ka bula me vaka na yalododonu. Me da sa kakua tale ni vakaisulu se vosa se ivalavala se vakasama mada ga me vaka era dau cakava vakalevu eso tale. E vuqa e vuravura era daugunu ti, kofi, vakatavako, kei na bia, ka ra dau vakayagataka na waigaga. E vuqa era dau vakaveitalia era itovo ca ka ivalavala vakasisila, tawakilikili ka sega ni savasava na nodra bula, ia na veika kece oqori e dodonu me da vulagi kina. O keda na Yalododonu nei Koya Sa Cecere Sara. …

Au bolea kina na Lotu kei ira kece sara na lewena me ra biuta laivi na veika ca ni vuravura. Me da vorata na sega ni bula savasava kei na iwalewale kece sara ni ivalavala dukadukali me vaka eda na vakayacora ki na dua na matetaka …

Me vaka ni da italai ni Turaga, na noda inaki sai koya me da lakova na sala sa virikotora vei keda o koya. Eda sega walega ni gadreva me da cakava ka kaya na veika ena marautaka o koya, ia eda segata me rawa ni vaka na nona bula na noda.⁸

Na Vakatabui ni Siga ni Vakacecegu

Au vinakata meu tukuna e vica na ka me baleta na Siga ni Vakacecegu kei na kena rokovi. A soli na ivakaro oqo ena ivakatekivu, sa vakaroti ira na Yalododonu na Kalou kei ira kece na tamata e vuravura me ra vakarokorokotaka na siga ni Vakacecegu ka vakatabuya—dua ga na siga mai na vitu. Ena siga oqori me da vakacegu kina mai na noda cakacaka kece sara, e dodonu me da lako ki na vale ni Turaga ka qaravi koya kina ena Nona siga tabu. Ia oqo na siga sa vakaroti vei keda me da vakacegu kina mai na noda cakacaka kecega, ia me da qaravi Koya ga sa Cecere Sara. [Raica na V&V 59: 9–10.] Ena siga oqo e dodonu me da cabora kina Vua na noda vakavinavinaka ka vakarokorokotaki Koya ena noda masu, ena lolo, ena lagasere, kei na noda veivakatataki cake ka veidusimaki vakataki keda.⁹

Na siga ni Vakacecegu sa dau yaco me siga ni veilasamaki, vaqara ka ni marau, na ka kecega ka sega ga ni siga ni sokalou, … au rarawataka meu tukuna ni sa rui lewe levu—ke dua mada ga, sa rui levu—na lewe ni Lotu i Jisu Karisito ni Yalododonu Edaidai era sa coko tu ena ilakolako oya, ia na Siga ni Vakacecegu vei ira eso na lewe ni Lotu sa dau laurai me siga ni vaqara ka ni marau, siga ni veilasamaki, ka sega ni dua na siga e rawa ni da qarava kina na Turaga na noda Kalou ena yaloda taucoko, noda kaukauwa kecega noda vakasama, kei na noda igu. …

Oqo na lawa ni Lotu nikua me vaka ga ni a lawa e Isireli makawa, ka so vei ira na noda era dau sosa kina baleta ni ra nanuma na rokovi ni Siga ni Vakacecegu e vakalailaitaka na veika e rawa ni ra cakava.¹⁰

E sega ni dua na noda dodonu me da vakacacana na siga ni Vakacecegu. … Au rarawataka sara vakalevu, ena veitikotiko sara mada ga ni Yalododonu Edaidai, e sega ni dau laurai na ivunau oqo me vaka na kena ivakarau e dodonu me laurai kina mai vei ira eso; ni so vei keda e tu era nanuma ni dodonu vinaka sara tu ga me da muria na ivalavala vakavuravura ena vuku ni ka oqo. Era sa vakaitavi ena vakasama kei na vakanananu ni vuravura ena kena vorati na ivakaro ni Turaga. Ia kevaka eda cakava ena tarogi keda na Turaga, eda sega ni rawa ni vorata tiko na Nona vosa ka qai ciqoma na veivakalougatataki e baleti ira na yalodina.¹¹

Talairawarawa ena Vosa ni Vuku

Na Vosa ni Vuku e dua na lawa taumada. E dusia na sala ka solia na idusidusi veiganiti me baleta na kakana kei na gunu, na kena e vinaka ki na yago kei koya e vakacaca. Kevaka eda muria ena yalodina na veika e volai ena veivuke ni Yalo ni Turaga, ena sega ni gadrevi e dua tale na ivakasala. Na idusidusi vakasakiti oqo e koto kina na veiyalayala oqo:

“Ia na lewenilotu kecega sa nanuma ka vakayacora na veika sa tukuni oqo, ka ra sa muria tiko na vunau, ena ka ni bula ki na nodra vicovico ka vakauto kina na suidra;

“Ia era na vakavukui ka kila-ka vakalevu; io era na kila na ka sa vuni tu;

“Io era na cici ka sega ni ceguoca; io era na lako tiko ka sega ni malumalumu mai.” [V&V 89:18–20.]¹²

E dau vakayagataki e veiyabaki e bilioni vakabilioni na dola me voli kina na gunu ni mateni kei na tavako. Na mateni kei na veika dukadukali e kauta mai ki na matavuvale vakatamata na veika vakasisila oqo ka sa vakamalumalumutaka tiko, sega walega ni bula, ia na suitu saraga ni bula savasava kei na bula vakayalo ni kawatamata.¹³

Sa kakaseresere na veimatavuvale ena kena sa tubu cake tikoga na vakayagataki ni veiwaigaga vakatabui vakalawa kei na vakayagataki vakasausa ni waigaga vakatarai vakalawa.¹⁴

Me da kakua sara ni vakarorogo ki na veivakauqeti kei na kena kacivaki na veika ena vakacacana na yago ka rau sega ni duavata kina na Tamada mai lomalagi kei na Luvena ko Jisu Karisito, ka veisaqasaqa kei na kosipeli erau sa solia mai vei keda. …

E dodonu me savasava na yagoda. E dodonu me savasava na noda vakasama. E dodonu me tu e yaloda na gagadre me da qarava na Turaga ka muria na nona ivakaro; me da nanuma me da dau masu, ka vakasaqara ena yalomalumalumu na ivakasala e dau yaco mai ena veituberi ni Yalo ni Turaga.¹⁵

E vakatakila na Turaga vua na Parofita o Josefa Simici na Vosa ni Vuku me vukei ira na Yalododonu me ra rawata na igu vakayago kei na igu vakayalo.

Rokova na yaca ni Kalou

E dodonu me da taura na yaca ni Kalou ena yalo ni vakarokoroko bibi duadua. E sega ni dua na ka mosimosi se veivakidacalataki vakalevu cake e yalona e dua na tamata vakaitovo, me vaka na nona rogoca me cavuta tu vakasakasaka e dua na tamata sega ni vakaitovo, lecaika, ka dukadukali na yaca ni Kalou. Eso na tamata sa matau sara ga vei ira na vosavosa ca ka voleka ni sega sara ga ni rawa me ra cavuta e dua se rua na iyatuvosa ka sega kina na mataqali vosa—me vaka nodra nanuma—e dua na vosa ni veivakacacani. Eso talega na tamata era nanuma … ni oqo e dua na ivalavala ni tagane me ra raici cake kina mai vei ira na kena vo ni tagane, ni rawa ni ra vakayagataka na vosa ni veivakacacani. … Na dukadukali ena kena iwalewale kece sara e veivakalolovirataki ka vakarusa na yalo, ka dodonu me levei me vaka ni paisoni rerevaki vei keda kece na lewe ni Lotu.

Sa dau vakacacani na veitalanoa vivinaka baleta walega ni ra sega ni kila na dauvolavola na ivakarau dodonu ni kena vakayagataki na veiyaca tabu. Ni biu e gusudra na tamata dokai na malanivosa sega ni veidokai, ena sega ni vakavinakataka na italanoa ia ena vakayalia sara ga na kena yaga kei na kena taleitaki. … Sa dua na ka matalia ni so na tamata, era tamata vinaka sara, era nanuma ni ra vakayagataka eso na malanivosa me tiko kina na yaca ni Turaga, ena vakuria na kena taleitaki, na kena lasa, se qaqa, na nodra italanoa! …

Mai vei ira kece na tamata e vuravura, o ira na Yalododonu Edaidai e dodonu me ra vakatabuya ka vakarokorokotaka vakaukauwa duadua na veika kece e vakalou. O ira na tamata e vuravura era se bera ni tuberi me vakataki keda ena veika oqo, e dina ni ra lewevuqa tu na tamata dina, daulotu, ka savasava e vuravura. Ia e tu vei keda na veituberi ni Yalo Tabu kei na ivakatakila ni Turaga, ka sa vakavulici keda vakabibi sara o Koya ena noda gauna na noda itavi me baleta na veika kece oqo.¹⁶

Vakaisulu rakorako ka rokova na lawa ni bula savasava

O ira na Yalododonu Edaidai me ra kakua ni muria na ivakarau ni isulusulu vovou kei na isulusulu sakuca vakavuravura. O keda na tamata ni Turaga. E namaka vei keda o koya me da bulataka na bula savasava, ka dodonu, me da vakasavasavataka na noda vakanananu kei na vakasama ka yalodina ena kena rokovi na ivakaro kece tale oqo. Na cava me da vakamuria kina na vuravura, na cava na vuna e sega ni rawa kina ni da rakorako, na cava e sega kina ni rawa ni da cakava na ka e vinakata vei keda na Turaga?¹⁷

Niu taubale e gaunisala ena noqu lako yani se lako mai na Valenivolavola ni Lotu, au raici ira na marama gone kei ira na qase, e vuqa vei ira na “goneyalewa ni Saioni,” ka ra sega ni rakorako tu ena nodra isulu [raica na Aisea 3:16–24]. Au kila ni dau veisau na gauna kei na isulusulu. … [Ia] na ivakavuvuli ni rakorako kei na veiganiti e dua tikoga. … Na ivakatagedegede era vakaraitaka na Vakaitutu Raraba ni Lotu sai koya, o ira na yalewa vakakina o ira na tagane, e dodonu me ra vakaisulu rakorako. Era dau vakavuvulitaki e veigauna ena itovo kei na bula e rakorako.

O koya, ena noqu vakatulewa, sa dua na ivakaraitaki rarawataki ni sega ni rakorako na nodra isulu na “goneyalewa ni Saioni. Vakabibi, na itukutuku oqo e baleta na tagane ka vakakina na yalewa. A solia na Turaga na ivakaro ki Isireli makawa vei ira na tagane kei na yalewa me ra dau ubia na yagodra ka rokova na lawa ni bula savasava ena veigauna kece sara.

Au sa vakatakekere tiko kina me baleta na bula rakorako kei na bula savasava kei ira kece na lewe ni Lotu, na tagane kei na yalewa vakatautauvata, me ra bula savasava, savasava ena nodra bula, ka talairawarawa ki na veiyalayalati kei na ivakaro sa solia mai vei keda na Turaga. …

… Na daramaki ni isulu sega ni rakorako, ena vaka beka me dua ga na ka lailai, sa kauta tani e dua na ka mai vei ira na noda goneyalewa kei na cauravou ena Lotu. E na vakadredretaka ga vakalevu cake na kena rokovi tiko na veivakavuvuli tawamudu eda na laki bulataka kevaka me da lesu tale ki na nona iserau na Tamada mai lomalagi.¹⁸

Na veivakalougatataki e yalataki tu vei ira na yalodina e cecere cake sara mai na veika ni marau caca wale ni vuravura.

[A kaya e dua na lewe ni Lotu ena dua na gauna ni] sega ni vakasamataka rawa ni sauma tiko na nona ikatini ka rokova na Vosa ni Vuku, dau masumasu, ka tovolea me talairawarawa ki na ivakaro kece sara e solia vua na Turaga, ia e sasaga vakaukauwa sara me rawata na nona bula; ena gauna vata e vakasausataka tiko kina na Sigatabu na nona itokani tiko voleka vua, au kila ni dau vakatavako ka gunu; e marautaka tiko na veika dau vakatoka o vuravura me dua na gauna totoka, e sega ni kauwaitaka na ivakavuvuli ni Turaga ka iVakabula o Jisu Karisito, ia e sautu ga.

Mo ni kila, ni levu sara na lewe ni Lotu era dau vakasamataka tu e yalodra na veika oqo ka ra taroga se cava na vuna. Na cava na vuna e vakalougatataki tu kina ena veika vivinaka ni vuravura oqo na tamata oqo—ni vaka mada ga, me dau nanuma tu ni vinaka e levu na veika ca—ia ni levu tu mada ga na lewe ni Lotu era sa bau sasaga sara tiko ga vakaukauwa, era cakacaka sara vagumatua me ra bula rawa tiko e vuravura.

Na kena isau e ka rawarawa wale. Kevaka ena dua na gauna, ka niu dau vakayacora ena veigauna eso, au lako ki na dua na qito veicaqe se veitavi se ena dua tale na vanua ni veivakamarautaki, era na dau tu wavoliti au na tagane kei na yalewa era vakatavako se sika se paipo duka. Sa dau veivakacudrui dina, kau dau vakasosataki kina. Au na vuki vei Sisita Smith, kau tukuna vua e dua na ka, ena qai kaya o koya, “Ia raica, o kila tiko na veika o vakavulica vei au. O tiko oqo ena nodra vuravura. Oqo na nodra vuravura.” Oqori e dau kauta lesu mai na yaloqu. Io, eda tiko oqo ena nodra vuravura, e sega ni yaga me yaco me da vakakina.

Io, me vaka ni nodra vuravura oqo, era na sautu, ia, kemuni na taciqu kei na ganequ vinaka, sa voleka tiko mai ni oti na nodra vuravura. …

Ena yaco mai na siga sa na sega kina na vuravura oqo. Ena veisautaki. Ena dua na noda vuravura vinaka cake. Ena dua na noda e buladodonu cake, baleta ni gauna ena lako mai kina na Karisito, ena vakasavasavataka o koya na vuravura.¹⁹

Kevaka eda na vakasaqaqara vagumatua, masu tikoga, tudei ena vakabauta, ka lako vakadodonu, sa tu vei keda na nona yalayala na Turaga ni na rawa vakavinaka na veika kece e baleti keda [raica na V&V 90:24]. E sega ni yalataki eke ni da na galala mai na veivakatovolei kei na leqaleqa ni bula, baleta na bula vakatovolei oqo e kena inaki me da vuli ni da sotava na veigauna dredre kei na veisaqasaqa.

A sega ni nakiti me rawarawa na bula oqo, ia sa yalataka tu na Turaga ni na vakavuna me da vinaka cake mai na veivakatovolei kei na veika dredre eda sota kaya. Ena solia vei keda o Koya na igu kei na kaukauwa me da vakamalumalumutaka kina na vuravura ka tudei ena vakabauta dina ga ni tu na veisaqasaqa. E yalataki kina ni da na kunea na vakacegu e yaloda e dina ni tu na dredre kei na leqaleqa ni vuravura. Ia e uasivia cake sara, sa yalataki kina, ni sa oti na bula oqo, eda na rawata na vakacegu tawamudu ena nona iserau o Koya eda vakasaqara voli mai na matana, ka da rokova na nona lawa, kei koya eda sa digitaka me da qarava.²⁰

Ni da vakaliuca na matanitu ni Kalou ena noda bula, eda sa yaco kina me rarama ka vakotora na ivakarau me ra muria na kena vo.

O ira na Yalododonu Edaidai sa vaka e dua na koro sa tara toka ena dua na delana sa sega ni tabonaki rawa, ka vaka talega na kadrala sa vakararamataki ira kecega sa tiko ena loma ni vale. Sa noda itavi me da vakacilava yani na noda rarama me ivakaraitaki ni buladodonu, sega walega vei ira na tamata eda bula veimaliwai kaya, ia vei ira na tamata kecega e vuravura. [Raica na Maciu 5:14–16.]²¹

Eda gadreva me da raica ni ra sa rawata na Yalododonu ena veivanua kecega na taucoko ni veivakalougatataki ni kosipeli ka tu me ra iliuliu vakayalo ena nodra veivanua.²²

Kemuni na taciqu kei na ganequ, me da talairawarawa ki na ivakaro ni Kalou me vaka era sa vakatakilai mai. Me da ivakaraitaki vei ira na tamata kecega e vuravura, me ra raica na noda cakacaka vinaka, me ra nanuma me ra veivutuni ka rawata na dina ka ciqoma na yavu ni veivakabulai, me ra rawata kina na vakabulai ena matanitu ni Kalou.²³

Au masuta me ra na tudei na Yalododonu ka vorata na kaukauwa kei na veivakayarayarataki ni vuravura; me ra vakaliuca ena nodra bula na veika ni Kalou; me ra na dinata kina na veivakabauti kecega ka rokova na veiyalayalati yadua.

Au masulaki ira na itabatamata gone ka ra tubu cake tiko oqo me ra na vakasavasavataka tiko na nodra vakanananu kei na yagodra—me galala mai na bula dukadukali, mai na vakayagataki vakailowa ni waigaga, kei na yalo ni veisaqasaqa vakakina na vakawaleni ni bula dokai sa takalevu tu e vuravura.

Kemuni na Tamai keimami, ni sovaraka na Yalomuni vei ira oqo na luvemuni me ra taqomaki kina mai na ca ni vuravura ka vakasavasavataki tikoga, me ra tu vakarau kina me ra lesu yani ki na nomuni iserau ka laki bula vata kei kemuni.

Ka me tiko ga na nomuni veitaqomaki ena vukudra o ira kece era vakasaqarai kemuni ka lako voli e matamuni ena veidokai ni yalodra, me rawa ni ra rarama kei vuravura, me ra iyaya ni cakacaka e ligamuni me vakayacori kina na nomuni inaki e vuravura.²⁴

Vakatutu ni Vuli kei na Veivakavulici

Taro

Ni o wilika “Na Bula nei Joseph Fielding Smith,” vakasamataka na bolebole era sotava na itabagone nikua ni ra sega ni tiko vata kei ira na nodra itubutubu kei ira na veiliutaki itabaqase. Na cava e rawa ni da cakava me da vukei ira kina na itabagone me ra yalodina tikoga ena veigauna vakaoqo?
Na cava eso na veivakalougatataki dau yaco mai vei keda ni da talairawarawa ki na ivakaro e tukuni ena iwasewase e 1?
O na vakayagataka beka vakacava na ivakavuvuli ena iwasewase e 2 mo vukea kina e dua e vagolei tani tiko ena veika ni vuravura? E rawa vakacava ni da kunea na “vakacegu e yaloda e dina ni tu na dredre kei na leqaleqa ni vuravura”?
Ena vukei ira vakacava eso tale me ra biuta na sala vakavuravura na noda ivakaraitaki? (Raica na iwasewase e 3.) Na gauna cava beka o sa bau raica kina na mana ni ivakaraitaki dodonu? Vakasamataka mada na ka e rawa ni o cakava mo vakadavora kina na ivakaraitaki dodonu me baleta na nomu matavuvale kei na so tale.

iVolanikalou Veisemati

Maciu 6:24; Marika 8:34–36; Joni 14:27; Filipai 2:14–15; Moronai 10:30, 32

Veivuke ni Veivakavulici

“E rawa ni o vakaraitaka na nomu loloma vei ira o vakavulica ena nomu dau vakarorogo vakavinaka vei ira ka dau kauwaitaka dina na nodra bula. Na loloma Vakarisito e tu kina na kaukauwa me vakamalumalumutaka na yalo ka vukei ira na tamata me ra dau kidava na vakasolokakana ni Yalotabu” (Veituberi, Me iLutua ni Noda Bula [1999], 52).