Wase 24

Na Nodra Cakacaka na Marama Yalododonu Edaidai: “Veiqaravi Sega ni Nanumi Koya Ga ena iNaki Lagilagi Oqo”

“E sega ni vakaiyalayala na vinaka e rawa ni ra cakava na noda marama.”

Na Bula nei Joseph Fielding Smith

Ena dua na soqoni raraba ni iSoqosoqo ni Veivukei ena ka 2 ni Okotova, 1963, e kaya kina o Peresitedi Joseph Fielding Smith, “O keimami, na Veitacini iLiuliu ni Lotu, keimami dokai ira ka rokovi ira na ganeda vinaka ena nodra veiqaravi sega ni nanumi ira ga ena inaki lagilagi oqo.”¹

Ena nona tauca na itukutuku oqo, e vosa tiko kina o Peresitedi Smith mai na veika sa kila mai ena loma ni veiyabaki sa sivi. Sa veiqaravi voli ena nona bula taucoko e yasadra na marama Yalododonu Edaidai yalodina. A tekivu na veiqaravi oqori ena mua ni 1880 vakacaca, rauta ni se qai yabaki 10. Ena gauna oya, era dau vakayaloqaqataki na marama Yalododonu Edaidai me ra vulica na veiqaravi vakavuniwai kei na qaravi bula. A muria na ivakasala oqori na marama tinana ka vulica me dau veivakasucumi. E vakavuqa ni dau vakayadrati koya ena lomaloma ni bogi me draivataki koya ena nodratou qiqidreti ena ose ki na dua na vuvale sa vakarau me sucu kina e dua na gone. Ni veiqaravi voli vata kei tinana ena sala oqo, sa raica kina na gonetagane o Joseph Fielding Smith na ivakaraitaki ni igu kei na yalololoma e tu vei ira na marama ena Lotu.² A qai veiqaravi e muri o Sisita Smith vakadaunivakasala ena mataveiliutaki raraba ni iSoqosoqo ni Veivukei.

E dau rokova vakalevu sara na iSoqosoqo ni Veivukei o Peresitedi Smith, ka tukuna ni oqo “e dua na tiki bibi ni matanitu ni Kalou e vuravura.”³ Na ikarua ni watina o Ethel, a veiqaravi vakalewe ni matabose raraba ni iSoqosoqo ni Veivukei ena loma ni 21 na yabaki. E kaya vaqo o Sisita Amy Brown Lyman, ka a veiqaravi vata kei Ethel ena matabose, qai veiqaravi e muri vakaperesitedi raraba ni iSoqosoqo ni Veivukei: “O Sisita Smith e dua vei ira na marama vuku au se qai bau kila. Au raici koya me dau volavola ka gusunivosa vinaka duadua [ena loma] ni matabose.”⁴ Ena itutu oqori, sa dau lako kina o Ethel ki na veikoniferedi ni iteki me veidusimaki vei ira na marama ena iSoqosoqo ni Veivukei. Erau dau lako vata kei Peresitedi Smith ena so na ilesilesi vaka-Lotu, ka rau dau wasea na itutunivunau me rau vakavulici ira na lewenilotu.⁵

Ni mate o Ethel, a qai vakawatitaki Jessie Evans o Peresitedi Smith. E dau lako vata kei koya o Jessie voleka ni veigauna kece e dau lako kina me vakavulici ira na Yalododonu. E tiko vua e dua na domo vinaka ni lagasere, ka dau vinakata tu ga o Peresitedi Smith me dau lagasere ena veisoqoni erau dau tiko kina. E nanuma lesu o Elder Francis M. Gibbons, ka a veiqaravi vakasekeriteri ni Mataveiliutaki Taumada: “Ena veigauna kece e dabe vakatulewa kina o Joseph Fielding, e dau vinakata me lagasere kevaka sara mada ga, me rogoca tikoga kina na domona ni lagasere. Ena dela ni veika oqori, sa vakaikuritaka na vakayalo ni veisoqoni oqori na nona lagata na veiserenilotu tabu oqo ena domona memela vinaka, me vakauqeti ira na vakarorogo, ka laveta cake na nona maqosa ena nona tauca na ivunau. E muri, ena nona veiwali kei na veivakauqeti ni watina, ena so na gauna e dau duavata kei Jessie o Joseph ena dua na domorua ka veiwakitaka kina kei na domoi watina na domona bi rogo vinaka. Ena veigauna vakaoqori, erau na dau dabe vata ena idabedabe ni tabapiano ka tabaka toka o Jessie na ivakatagi veitokani, ka vakarauta toka na domona rogolevu me kua ni ubia na domoi watina.”⁶

Ni Peresitedi tiko ni Lotu, sa dau cakacaka ena veigauna eso o Joseph Fielding Smith vata kei Sisita Belle S. Spafford, na peresitedi raraba ni iSoqosoqo ni Veivukei. A qai tukuna e muri o Sisita Spafford na veika a sotava ena nona cakacaka vata kei koya: “O Peresitedi Joseph Fielding Smith, e dua na turaga yalomalua ka lomani ira vakalevu sara na tamata, sa dau vakaraitaka ena veigauna kece sara na nona kila vakatitobu na nodra cakacaka na marama ena Lotu, ka dau vakadewataka oqori ena vuqa sara na gauna ki na mataveiliutaki ni iSoqosoqo ni Veivukei, e dolava na neimami rai ka dusia vei keimami na sala.”⁷

iVakavuvuli nei Joseph Fielding Smith

E tukuni ena ivolanikalou me baleti ira na marama yalodina era sa vakaitavi oti ena nona Lotu na Turaga.

Eda na wilika beka ena Mataniciva Talei ni sa oti na veika erau a vakavuna o Atama kei Ivi ena lutu tani, a vunautaka o Ivi na ivakavuvuli. E lekaleka ia e sinai na kena ibalebale ka vakaoqo:

“… Kevaka keirau a sega ni talaidredre, ke a sega na luvei keirau, ka keirau a sega talega ni kila na ka vinaka mai na ka ca, io ke keirau a sega ni rekitaka na neirau vakabulai kei na bula tawamudu sa solia na Kalou vei ira kecega sa vakabauta.” [Mosese 5:11.]

“A rau sa vakarokorokotaka na Kalou ko Atama kei Ivi, ia erau sa vakatavulica na ivakavuvuli oqo vei ira na luvedrau.” [Mosese 5:12; vakamatatataki.]

Eda vulica mai kina ni rau a ciqoma o Ivi vakakina o Atama na ivakatakila kei na ivakaro me rau vakavulici ira na luvedrau ena sala ni bula tawamudu.⁸

Eda wilika ena veigauna [taumada] era dau cakacaka vagumatua na marama ni Isireli ka tu na itavi me ra qarava [raica na Lako Yani 15:20; Dauveilewai 4–5].⁹

Ena Veiyalayalati Vou eda wilika kina e dua na wiliwili levu ni marama yalodina era a vakasaqara ka soli ivakasala. E vuqa vei ira era dau muria na Turaga ka qaravi koya [raica na Luke 8:1–3; 10:38–42].¹⁰

A woman and her daughter delivering a basket to another woman in the Philippines. — Ena itukutuku taucoko ni Lotu, era dau qarava na marama na itavi e gadrevi vakalevu sara ena cakacaka ni Turaga ena gauna oqo.

Ena veigauna e muri, era dau qarava na veiitavi bibi sara ena Lotu vakalesui mai nei Jisu Karisito na marama ena iSoqosoqo ni Veivukei.

Ena ika 17 ni siga ni Maji, 1842, a sota kina na Parofita o Josefa Simici kei na vica na marama ena Lotu mai Nauvoo ka tauyavutaki ira ki na dua na isoqosoqo qai vakatokayacataki me “Nodra iSoqosoqo ni Veivukei na Marama e Nauvoo.” … Ni vu mai na ivakatakila na tautauyavu oqo, e sega ni rawa ni vakabekataki. Sa dau vakaraitaki vakalevu sara ena loma ni veiyabaki na dina oqo ia nikua sa vakadinadinataki vakalevu sara na kena yaga kei na kena gadrevi.¹¹

Sa dina sara ni na sega ni taucoko sara na kena tauyavutaki na Lotu i Jisu Karisito kevaka a sega ni vakavotui mai na isoqosoqo vakasakiti oqo. … Ena sega ni taucoko na veivakalesui mai oqo kevaka a sega na iSoqosoqo ni Veivukei ka rawa kina vei ira na marama me ra qarava e dua na itavi lesi vakalou ka gadrevi sara vakalevu ena welefea ni Lotu.¹²

Na “Nodra iSoqosoqo ni Veivukei na Marama e Nauvoo” a tauyavutaka na Parofita o Josefa Simici ena veivuke nei Elder John Taylor. A vakatakila mai na Turaga ni dodonu me ra tauyavutaki na marama ena Lotu ki na dua na isoqosoqo, ni tiko na cakacaka bibi me ra cakava me ra vukea na kena “vakadeitaki na inaki kei Saioni.” [V&V 6:6.] Na nodra cakacaka na marama oqo sa baleta vakatabakidua me ra vinaka, vakayaloqaqataki, ka vakatorocaketaki na marama ena Lotu me ra vakarautaki kina ena veika kecega me dua na nodra tikina ena matanitu selesitieli. A soli talega vei ira na itavi me ra veivuke ena cakacaka ni loloma kei na nodra vukei mai na leqa kei na veivakararawataki o ira na dravudravua, na tauvimate, kei ira era vakaleqai ena loma ni Lotu raraba. Ena loma ni veiyabaki taucoko me tekivu mai na tautauyavu oya, era sa dau dina tiko na marama ena isoqosoqo oqo ki na nodra veikacivi ka ra sa vakalevulevui ira kina ena nodra yalodina ki na cakacaka oya. E sega ni dua na cakacaka e lesi yani me dredre vakalevu; e sega ni dua na itavi me vakawaleni, ia ena nodra veiqaravi era sa vakalougatataki kina e udolu vakaudolu.¹³

Na iSoqosoqo ni Veivukei … sa tubu me dua na kaukauwa ena Lotu. Sa gadrevi dina sara—eda dau tukuna ni dua na mataisoqosoqo, kena ibalebale e dua na liga ni veivuke, ia na iSoqosoqo ni Veivukei e levu cake sara. E gadrevi.¹⁴

Au gadreva meu vakacaucautaki ira na marama ena isoqosoqo cecere oqo ena nodra bula dokai kei na yalodina ka dau vakavotukanataki tiko mai e veigauna me tekivu mai na gauna kei Nauvoo.¹⁵

Sa marautaka na Turaga na nomuni veiqaravi. O kemuni, ena nomuni veiqaravi, o ni sa veivuke ena kena tara cake ka vaqaqacotaki na matanitu ni Kalou. E tautauvata sara ga na kena gadrevi na nodra veiqaravi na iSoqosoqo ni Veivukei ena Lotu me vaka—meu kaya mada?—vei ira ena kuoramu ni Matabete. Eso beka era na nanuma ni sa rui kaukauwa na noqu vakaraitaka tiko, ia ena noqu vakatulewa na cakacaka o ni cakava tiko na ganei keimami vinaka, e vakaimawe ka tautauvata ga na kena bibi ena kena tara cake na matanitu ni Kalou, kena vaqaqacotaki, kena vakatetei, kena vakotori na yavu me rawa ni da tara cake kece kina, me vaka vei ira na turaga era taura tu na Matabete ni Kalou. Ena sega ni rawa ni keimami toso ke sega o kemuni.¹⁶

[O ira na marama ena iSoqosoqo ni Veivukei] era lewena na isoqosoqo ni marama cecere duadua e vuravura, e dua na isoqosoqo ka tiki bibi sara ni matanitu ni Kalou e vuravura ka caka ka cicivaki me vukei ira na lewena yalodina me ra rawata na bula tawamudu ena matanitu i Tamada. …

A tauyavutaki na iSoqosoqo ni Veivukei ena yalo ni veivakauqeti, ka sa dau tuberi tiko mai na yalo oqori [me tekivu mai na gauna koya], ka sa vakadabera ki yalodra na veimarama vivinaka e sega ni wiliki rawa na gagadre oya ni buladodonu ka dau taleitaka na Turaga.¹⁷

A woman teaching in Relief Society. She is using the Gospel Principles manual. — Na iSoqosoqo ni Veivukei na “isoqosoqo cecere duadua ni marama e vuravura, e dua na isoqosoqo ka tiki bibi sara ni matanitu ni Kalou e vuravura.”

O ira na marama ena iSoqosoqo ni Veivukei era veivuke ena kena qarauni na nodra tiko vinaka vakayago ka vakayalo talega na luvena na Kalou.

Ena nona yalomatua na Turaga sa kacivi ira kina na marama me ra veivuke vei ira na Matabete. Ena nodra dau yalomalua, yalomalumalumu, ka yalovinaka, sa raici ira kina na [marama] na Turaga ka solia vei ira na itavi me ra dau qaravi ira na vakaleqai tu kei ira era kune rarawa. Sa dusia o Koya na sala me ra muria, ka solia vei ira na isoqosoqo cecere oqo ka tu kina vei ira na dodonu me ra veiqaravi ena ruku ni nodra veiliutaki na bisopi ni veitabanalevu ka yalovata kei ira na bisopi ni veitabanalevu, ka taqomaka na nodra tiko vinaka vakayalo ka vakayago talega na tamata.

Sa rawa kina vua na Turaga me kacivi ira na noda marama me ra lako ki na veivale ka vakacegui ira era vakaleqai tu, me ra vukei ira era kune rarawa, me ra tekiduru ka masu vata kei ira, ka na rogoca na Turaga na nodra masu na marama ni cabori mai vu ni yalodra ena vukudra na tauvimate, me vaka ga na nona rogoca na nodra masu na italatala qase ni Lotu.¹⁸

E levu tu na inaki kei na itavi ni iSoqosoqo ni Veivukei. … Na tamaqu, o Peresitedi Joseph F. Smith [a kaya vaqo:] “Oqo e dua na isoqosoqo a tauyavutaka na Parofita o Josefa Simici. O koya, sa isoqosoqo qase duadua kina ni Lotu, ka sa bibi duadua kina. E sega ni yaga ga vei ira na dravudravua kei na vakaleqai, ia e dua na tiki ni kena itavi—na tikina levu cake talega—me yadravi kina na nodra tiko vinaka vakayalo na tina kei na goneyalewa kei Saioni; me raica ni sega ni dua e vakawaleni, ia me ra taqomaki kece sara mai na kalouca, mai na veigauna ca, mai na kaukauwa ni butobuto, kei na veika ca e dau yavalati ira e vuravura. Sa nodra itavi na iSoqosoqo ni Veivukei me ra yadrava na nodra tiko vinaka vakayalo o ira kei ira kece na lewe ni Lotu yalewa.”¹⁹

Sa itavi ni iSoqosoqo ni Veivukei, sega walega ni taqomaki ira na lewe ni iSoqosoqo ni Veivukei, ia me tete yani na nodra veiqaravi me sivia na iyalayala oqori. Ena veivanua kecega e vakaleqai tiko kina e dua, gadreva na veivuke, sotava na dredre, tauvimate se kune rarawa, eda na kacivi ira na iSoqosoqo ni Veivukei. … E rawa ni ra cakava e dua na cakacaka cecere ka vakasakiti ena nodra veivakayaloqaqataki vei ira era cidroi, vukei ira, vakabulabulataki ira mai, vukei ira me ra rawā nodra malumalumu se ivalavala ca kei na nodra druka, ka kauti ira mai me ra kila tale na dina. Au kaya tale ni sega ni yalani na vinaka e rawa ni ra cakava na noda marama.

…Au sega ni kila se cava e rawa ni ra cakava na noda peresitedi ni iteki kei na bisopi ena tabanalevu kevaka era a sega na marama vinaka oqo ena iSoqosoqo ni Veivukei me ra vakararavi kina; ka rawa ni ra kacivi ira ena nodra veiqaravi, ena vuqa na gauna, me ra qarava na veika dredre eso, ka baleti ira na turaga, ia ena daumaka cake sara kevaka era qarava na marama. Ena dua na ka vakasakiti sara kevaka me sa taucoko tu na nodra vinaka na lewe ni Lotu kece sara. Ke a vakakina ke sa na lailai sara na noda itavi, na tagane kei na yalewa, ia na gauna oqori se bera ni yaco mai. Era tu na lewenilotu ena kedra maliwa na ganeda era gadreva tu na veivakayaloqaqataki, e dua na veivuke lailai vakayalo ka vakakina vakayago, e sega ni dua e rawa ni cakava vakavinaka cake me vakataki ira na ganeda era lewena na isoqosoqo cecere ka vakasakiti oqo.

Ena cakacaka oqo e rawa ni ra solia na marama na nodra veivuke ena nodra vakayaloqaqataki na cidroi, na dau vakasavuliga, kei na lomawele, me vaka ga na nodra dau kacivi na turaga ena Matabete me ra cakava ena vukudra na cidroi, na lomawele, kei na dauvakasavuliga vei ira na turaga veitacini. Sa dodonu me da dau cakacaka vata kece me rawa kina na buladodonu kei na sasaga me ra vakabulabulataki tale mai o ira era sa kuitaki yani ka vakaweleweletaka tu na itavi ni Lotu.²⁰

Mai na [kena] itekivu malumalumu ena veituvaki dredre, ni se lailai na lewe ni Lotu, eda sa raica na kena tubu na isoqosoqo oqo. … Na vinaka sa rawati ena nodra qaravi na dravudravua, nodra vukei na tauvimate kei na kune rarawa, kei ira era vakaleqai tu vakayago, vakasama se vakayalo, ena sega ni kilai sara vakavinaka. … Na veika kece oqori sa rawati ena yalo ni loloma ka sala vata kei na yalo dina ni kosipeli i Jisu Karisito.²¹

E namaka na Turaga me ra vakasaqara na rarama kei na dina o ira na marama me ra vakaivotavota kina ena lagilagi vakasilesitieli.

E tautauvata na ibalebale ni kosipeli vei ira na marama ka vakakina vei ira na turaga. E tautauvata ga na nodra kauwaitaka me vakataki ira na turaga. Ni sa kaya na Turaga vua na Parofita o Josefa Simici, “Dou vulica matua na ivunau kece sa tu ena ivola oqo, ni sa dina ka dodonu, raica ena vakayacori vakaidina na parofisai kei na vosa ni yalayala kece sa tu kina,” [V&V 1:37] a sega ni yalana walega o koya na ivakaro oqori vei ira na lewe ni Lotu tagane. … Sa ka bibi sara me ra kila na ganeda na Yavu ni Veivakabulai me vakataki ira ga na tagane. Sa gadrevi talega me ra muria na ivakaro. E sega ni dua na marama ena vakabulai ena matanitu ni Kalou kevaka e sega ni papitaiso me baleta na vakabokoci ni ivalavala ca kei na veitabaki ni liga me baleta na isolisoli ni Yalo Tabu. …

…Ni kaya na Turaga e sega ni dua na tamata ena vakabulai ena lecaika [raica na V&V 131:6], au vakabauta ni vakaibalebaletaka tiko o koya vei ira na marama me vaka ga na nona vakaibalebaletaka tiko vei ira na turaga, kau vakabauta ni ra sa vakaitavitaki talega na marama me ra vulica na ivolanikalou.²²

E gadreva na Turaga vei ira na marama, ka vakakina vei ira na turaga ena Lotu, me ra kila na lomana vakalou ka rawata e dua na ivakadinadina veivauci e yalodra me baleta na dina vakatakilai mai ni veivakabulai ena matanitu ni Kalou. A sega ni vakatakila mai na iVola i Momani na Turaga me yaga ga vei ira na Matabete, ia me baleta na yalo kecega ena vakasaqara na dina, era tautauvata ga na tagane kei na yalewa.²³

A woman kneeling at her bed praying. — “E gadreva na Turaga vei ira na marama, … me ra kila na lomana vakalou ka rawata e dua na ivakadinadina veivauci e yalodra.”

E namaka na Turaga vei ira na marama me ra rawata e dua na ivakadinadina ni ka dina me ra kila na ivakavuvuli ni Lotu me vaka ga e gadreva vei ira era taura tu na Matabete. Kevaka eda rawata na bula vakacerecerei, ka da nuitaka tu me da rawata, sa gadrevi me da vakarautaki keda ena kila ka, ena vakabauta, ena masu. Ia ni kaya vaqo na Turaga, “Ia dou vakasaqara taumada na matanitu ni Kalou kei na nona yalododonu,” [Maciu 6:33; 3 Nifai 13:33] a sega ni vosa tikoga o koya vei ira e dua na ilala tagane, e dua na ivavakoso veicurumaki.²⁴

Na marama kece e papitaiso mai ki na Lotu a vakotori ki uluna na ligadra na italatala qase me baleta na isolisoli ni Yalo Tabu me tuberi koya kina na Yalotabu ena veika dina kecega. Na loma ni Turaga me kakua ni dua e sega ni soli vua na veituberi vakalou ka na vakatakila vei ira na dina ka me rawa kina vei ira me ra kila na rarama mai na butobuto ka me ra vaqaqacotaki kina ka soli vei ira na kaukauwa me ra vorata na ivunau lasu, na vakasama, kei na vakabauta lasu kecega, ka ra sa takalevu tu e vuravura nikua.²⁵

E ganiti ira vakalevu sara na ganeda na veivakauqeti ni Yalo Tabu ena vuku ni veika era gadreva me vakataki ira na turaga, tautauvata vinaka. E ganiti ira na isolisoli ni parofisai ena vuku ni veika ena yaga me ra kila. … Ni ra masu e dodonu me ra masu ena yalodina, ka namaka me saumi mai na nodra masu. Ena rogoci ira na Turaga, kevaka era yalodina, ka vakadinata, me vaka ga ena vakayacora ko koya vei ira na turaga.²⁶

Sa yalataka na Turaga vei ira kece, tagane kei na yalewa vakatautauvata, na isolisoli ni Yalo Tabu kevaka era sa yalodina, yalomalumalumu, ka veivutuni dina. Sa gadrevi vei ira me ra vuli ka kila na dina ni kosipeli ka me ra vakarautaki ira ena vuli, kei na vakabauta, kei na talairawarawa ki na ivakaro kecega me ra vakasaqara na rarama kei na dina me kilikili kina kei ira na lagilagi vakasilesitieli.²⁷

Ena vuku ni matabete, sa solia tu kina na Kalou vei ira na luvena yalewa na veisolisoli kece sara vakayalo kei na veivakalougatataki era rawa ni rawata na Luvena tagane.

Au vakabauta ni da sa kila kece tiko ni sega ni yalani ga vei ira na tagane na veivakalougatataki ni matabete. Sa dau sovaraki talega na veivakalougatataki oqori … vei ira kece na marama yalodina ena Lotu. O ira na marama vinaka oqo e rawa ni ra vakarautaki ira, ena nodra talairawarawa ki na ivakaro kei na nodra veiqaravi ena Lotu, me baleta na veivakalougatataki ni vale ni Turaga. Sa vakarautaka na Turaga vei ira na luvena yalewa na isolisoli kece sara vakayalo kei na veivakalougatataki e rawa ni ra rawata na luvena tagane, ni sa sega ni tu duadua ga na tagane me tu tani na yalewa, se tu duadua ga na yalewa me tu tani na tagane ena Turaga [raica na 1 Korinica 11:11].²⁸

Eda kila kece tu ni a tukuna vei Eparama na Turaga ni na tamadra na veimatanitu e vuqa ka na vaka na iwiliwili ni kalokalo ni lomalagi kei na nuku ni matasawa na nona kawa, ia me da kakua sara ni guilecava ni a soli talega vei Serai na veivakalougatataki vata oya.

“Sa kaya talega vei Eparama na Kalou, ko Serai na watimu, mo kakua ni vakatoka na yacana ko Serai, sa na yacana ga ko Sera. Ia kau na vakalougatataki koya, ka solia me sucu mai vua e dua na luvemu tagane, io, kau na vakalougatataki koya, ena tubu talega mai vua na matanitu eso; a nodra turaga lelevu na veimataqali ena tubu mai vua.” [Nai Vakatekivu 17:15–16.]²⁹

Ni vosa tiko na Turaga me baleta na matabete kei na mana ni matabete, kei na cakacaka vakalotu ni Lotu eda dau ciqoma mai vei ira na matabete, a vakakina oqo na ka e tukuna: “Raica sa ilesilesi ni matabete levu me vakayacora na cakacaka kecega vakalotu, ia sa tu kina na kaukauwa me vakatakila na veika vuni ni matanitu, kei na kaukauwa me kilai kina na loma ni Kalou.”

…Meu wilika tale mada oya: “Raica sa ilesilesi ni matabete levu me vakayacora na cakacaka kecega vakalotu, ia sa tu kina na kaukauwa me vakatakila na veika vuni ni matanitu kei na kaukauwa me kilai kina na loma ni Kalou. Ia, na ilesilesi oqo, sa vakatakilai mai kina na kaukauwa va-Kalou. Ia kevaka sa sega na ilesilesi oqo kei na kaukauwa ni itutu vakabete, ena sega ni vakatakilai na kaukauwa vakalou vei ira na tamata; io kevaka sa sega na ilesilesi oqo, ena sega na tamata e raica rawa na mata ni Kalou ko Tamada, me qai bula tiko.” [V&V 84: 19–22.]

Ni da wilika na veika vakaoqo, e dodonu me reki kina na tagane kecega e tu vei ira na matabete ni da vakasamataka ni tu vei keda na dodonu cecere ka rawa kina ni da kila na Kalou. E sega walega ni ra kila tu na dina cecere oqo o ira na tagane era taura tu na matabete, ia ena vuku ni matabete oqori kei na kena veicakacaka vakalotu, ena rawa kina vei ira kecega na lewe ni Lotu, na tagane kei na yalewa vakatautauvata, me ra kila na Kalou.³⁰

Vakatutu ni Vuli kei na Veivakavulici

Taro

Na cava e rawa ni da vulica mai na veika e vakamacalataki ena “Na Bula nei Joseph Fielding Smith”? Na cava soti beka o sa bau sotava e tautauvata kaya?
E tukuna o Peresitedi Smith me baleti ira na marama ena veitabagauna duidui era sa qarava na veiitavi bibi eso ena matanitu ni Kalou (raica na iwasewase 1). Na sala cava soti o sa raica era cau kina na marama ena kena vaqaqacotaki na nodra matavuvale kei na Lotu?
Na sala cava o raica kina na kena “gadrevi ena welefea ni Lotu” na nodra veiqaravi na iSoqosoqo ni Veivukei”? (Raica na iwasewase 2.) Na sala cava era dau cakacaka vata kina na marama ena iSoqosoqo ni Veivukei kei ira na matabete me tara cake na matanitu ni Kalou?
Na sala cava era dau yadrava kina na iSoqosoqo ni Veivukei na nodra tiko vinaka vakayalo na marama Yalododonu Edaidai? Na sala cava era dau vakateteya yani kina na marama ena iSoqosoqo ni Veivukei na nodra veivakauqeti ki na taudaku ni nodra isoqosoqo? (Me baleta eso na kena ivakaraitaki, raica na iwasewase 3.)
E vakabibitaka o Peresitedi Smith ni dodonu me ra kila o ira kece na marama kei na turaga na ivakavuvuli ni kosipeli, vaqaqacotaka na nodra ivakadinadina, ka ciqoma na ivakatakila (raica na iwasewase e 4). Na cava na vuna o nanuma ni bibi kina vei keda kece me da vakasaqara na isolisoli oqo?
E vakavuvulitaka o Peresitedi Smith ni sa “sovaraki…vei ira kece na marama yalodina ena Lotu” na veivakalougatataki ni matabete” (iwasewase e 5). Na cava era gadreva kina na marama na veivakalougatataki ni matabete me ra qarava na nodra itavi e vale kei na Lotu? Na ivakaraitakai cava o sa raica ena nodra ciqoma na marama na isolisoli vakayalo?

iVolanikalou Veisemati

Cakacaka 5:12–14; Alama 32:22–23; V&V 46:8–9

Veivuke ni Veivakavulici

“Ena vukei iko sara vakalevu e na nomu veivakavulici ke mo tekivu vakasamataka sara tiko na lesoni ena tarava mai ni oti na nomu vakavulica na lesoni oqo. O na rairai kilai ira vinaka kina na lewe ni nomu kalasi, na veika era dui gadreva kei na veika era vinakata ni oti na nomu tiko kei ira” (Veituberi, Me iLutua ni Noda Bula, 118).