Wase 18

Bula ena Vosa kece mai na Gusu ni Kalou

“Na ivakatagedegede cecere ni sokalou oya na muria na ivakaro, na vakamuri ni ikalawa ni Luve ni Kalou, na caka tikoga ni veika ka na vakamarautaki koya.”

Na Bula nei Joseph Fielding Smith

“Au sa vakasaqara tiko na noqu vakabulai,” a vakaraitaka o Peresitedi Joseph Fielding Smith, “kau kila niu na rawa ni kunea walega ena talairawarawa ki na lawa ni Turaga ena muri ni ivakaro, ena qaravi ni cakacaka ni ivalavala dodonu, vakamuri ni ikalawa ni noda iliuliu duabau, o Jisu, na ivakaraitaki ka ulu ni veika kecega.”¹

Me ikuri ni nona vakasaqara na nona vakabulai vakaikoya, a cakacaka vagumatua o Peresitedi Smith me vukei ira tale eso mera cakava talega vakakina. O Elder Francis M. Gibbons, e dua ka veiqaravi vaka-sekeriteri ki na Mataveiliutaki Taumada, a dikeva ni o Peresitedi Smith e “raica me vaka e nona itavi me kaburaka e dua na domo ni ivakasala ni sa yaco mera tasere tani tiko na tamata mai na sala ka toqai tu ena ivolanikalou. Ka sega ni tiko ena nona vakanananu me na biuta vakatikitiki na itavi oya, se vakacava sara na ka e tukuna e dua tale. Na vosa doudou vakaoya a sega ni kilai tani kina okoya ia a sega ni vakayalolailaitaki koya; na nona inaki oya me na kakua ni kilai tani se kilai raraba ena matadra na tamata. Ia a raica ga okoya na nona itavi me vaka e dua na ivakatawa ena vale cecere ka sa nona itavi me na vakarogoya na kaci ni ivakasala kivei ira era tiko e ra ka ra sega ni raica rawa na veika rerevaki sa basika tiko mai.”²

A wasea o Peresitedi Smith e dua na ka a sotakaya ka vakaraitaka na veisau ni yalo e rawa ni curuma e dua na tamata ka tautauri matua ki na kaci ni ivakasala oqo:

“Au a tiko ena dua na koniferedi ni iteki ena vica na yabaki sa oti ka vosa me baleta na Vosa ni Vuku. … Niu a lako ki na imuri ni vale ni soqoni [ni sa oti na koniferedi,] era sa voleka ni biubiu kece na tamata, ia a dodoka mai na ligana e dua na turaga ka kaya::

“‘Baraca Smith, oya na imatai ni ivakavuvuli ena Vosa ni Vuku au sa bau taleitaka saraga.’

“Au kaya: ‘O se sega ni bau rogoca mada eso tale na ivakavuvuli ena Vosa ni Vuku?’

“E tukuna okoya: ‘Io, ia oqo na kena imatai kau sa taleitaka dina.’

“Au kaya: ‘E vakacava ya?’

“E tukuna okoya: ‘Ia, mo raica, au sa muria tiko oqo na Vosa ni Vuku.’”³

iVakavuvuli nei Joseph Fielding Smith

E vakatulewataka vakalawa na Kalou na vuravura kei na lomalagi, ka da sa vakatautaki ki na lawa oya.

E dodonu mera kila deivaki na tamata kece ni me vaka ni vakatulewataka o koya sa Ceceresara na vuravura kei na lomalagi ena lawa sa vakadeitaki, na tamata, o koya ka nona ibulibuli uasivi duadua, me na vakatautaki koya taumada ki na lawa oya. Esa tukuna vakamatata na dina oqo na Turaga ka veivakauqeti talega ena dua na ivakatakila ki na Lotu:

“Raica sa tu na lawa ni veimatanitu kecega;

“Ia sa levu tu na matanitu; io era sa vakasinaita na maliwa lala; raica era sa tu ena veitikina kecega, ia era sa duidui na matanitu lelevu kei na matanitu lalai.

“Ia na matanitu kecega sa tu na kena lawa; ia na lawa kece sa tu na kena ivakarau kei na ka sa vauci kina.

“Ia ko ira kecega sa sega ni muria na kena ivakarau era sa sega ni vakadonui.” (V&V 88:36–39.)

Sa vakadeitaki koya na dina oqo. Ia, sa dodonu ga meda namaka ni na vakatulewataki vakalawa na matanitu ni Kalou kei ira kece era gadreva mera curu kina mera na vakatautaki ira ki na lawa. “Raica, sa virikotori tu na ivakarau kece ni noqu matanitu, ia sa sega ni caka vakaveitalia kina e dua na ka, sa kaya na Turaga na Kalou.” (V&V 132:8.)

Esa solia na Turaga vua na tamata e dua na vosa ivakatakilakila ni lawa ka da vakatoka na kosipeli i Jisu Karisito. Ia me vaka ni lailai na veivakauqeti kei na veituberi vakayalo, era na rairai vakatanitaka na tamata na veilawa oqo kei na kena ivakayagataki, ia ena sega ni rawa ni dua na kena veileti me vaka ni sa vakadeitaki ni tiko na veilawa vakaturi, kei ira kece era qa-ra tiko mera curu ki na matanitu oya mera na vakatautaki ira kina.⁴

E tiko vei keda na dina kece, na ivunau kece, na lawa kece kei na veika e gadrevi, na veiqaravi kece kei na cakacaka tabu vakalotu e gadrevi me vakabulai ka vakacerecerei keda ena lomalagi cecere duadua ni vuravura vakasilesitieli.⁵

Sa ivakaraitaki ni noda lomana na Turaga o ya na noda maroroya na ivakaro.

Sa noda itavi ena Lotu meda qarava vakayalo ka vakaidina na Turaga, ka da sa vakasaqara meda cakava oqo ena lomada taucoko, kaukauwa, kei na vakasama. A tukuna o Jisu: “Mo vakarokoroko vei Jiova na nomu Kalou, ia mo qaravi koya duaduaga.” (Maciu 4:10.)

Eda vakabauta ni sokalou e levu cake mai na masumasu kei na vunau kei na itavi vakosipeli. Na itavi cecere ni sokalou oya na muri ni ivakaro, na vakamuri ni ikalawa ni Luve ni Kalou, na caka tikoga ni veika ka na vakamarautaki koya. E dua na ka na veiqaravi vakavosa vua na Turaga; ia e duatani sara ni rokovi ka dokai na lomana ena kena vakamuri na ivakaraitaki esa mai biuta toka vei keda okoya. … Au rekitaka na madigi meu vakamuria na nona ikalawa. Au sa vakavinavinaka ki na vosa ni bula tawamudu au sa ciqoma, Au sa marau vakalevu ni kaya, ena vuravura oqo, vakakina na vakanuinui ni bula tawamudu ka sa noqu ena vuravura ka na lako mai kevaka meu na dau vakabauta tikoga ka dina me yacova na ivakataotioti.⁶

Jesus Christ standing on a mountainside. A group of men are seated in a circle around Him. Christ is offering the Lord's Prayer. Jerusalem is visible in the background. — “Kevaka dou sa lomani au, dou talairawarawa ki na noqu vunau” (Joni 14:15).

Oqo na lawa kivei ira na lewe ni Lotu, ena vosa ni iVakabula: “Ko koya sa nanuma na noqu vunau, ka talairawarawa kina, sai koya oqo sa lomani au. …” (Joni 14:21.) A tukuna tale na iVakabula: “Kevaka dou sa lomani au, dou talairawarawa ki na noqu vunau.” (Joni 14:15.) …

A sega ni cakava e dua na ivalavala ca na iVakabula se me a kauta voli e dua na vakanananu veilecayaki. A sega ni tiko vua e dua na gagadre ni veivutuni me vakataki iko kei au; ia ena so na sala au sega ni vakasamataka rawa, e a colata o koya na bibi ni noqu cakacala kei na nomu. … E a lako mai ka cabori koya me isoro me saumi kina na nodra dinau o ira vakayadua ka ra sa lomasoli mera veivutunitaka na nodra ivalavala ca ka lesu vua ka muria na nona ivakaro. Vakasamataka mada, kevaka e rawa vei iko. A colata na Turaga na iusausa o ya ena so na sala ka da sega ni kinoca rawa. Au kila oya, baleta niu sa mai ciqoma na nona vosa. A tukuna o koya vei keda na yaluma a lako curuma; sa ka levu dina na yaluma ka vakavuna me kerea kina o koya vua na Tamana ni kevaka e rawa me na kakua ni gunuva o koya na bilo waigaga ka malai: “… ia me kakua ni yaco na noqu lewa, me yaco ga na nomuni lewa.” (Luke 22:42.) Na isau a taura mai o koya vei Tamana, “Sa dodonu mo gunuva.”

E rawa niu vukea noqu lomani koya? Sega, e sega ni rawa vei au. O lomani koya li? Ia mo talairawarawa ki na nona ivunau.⁷

Kevaka eda vukitani mai na ivakaro ni Turaga, eda na sega ni rawa ni namaka meda ciqoma na Nona veivakalougatataki.

Ni da vuki mai na ivakaro esa solia vei keda na Turaga meda tuberi kina ia sa na sega na noda dodonu ki na nona veivakalougatataki.⁸

Na ka vinaka cava ena caka vei keda ni da kerea na Turaga, kevaka e sega ni lomada meda muria na Nona ivakaro? Na masumasu vakaoya esa veivakacacani torosobu ka sa veivakacudrui ena itikotiko tabu ni loloma soliwale. Sa dua na ka meda na doudou ni namaka e dua na isau totoka ke vakaoya na kena ituvaki? “Dou vakasaqarai Jiova ni sa kune rawa, dou masuti koya ni sa voleka tiko: Me biuta mada na nona itovo na tamata ca, kei na nona vakanananu na tamata daucaka cala: ka me lesu mai ko koya vei Jiova, ena yalololoma vua; io vei koya na noda Kalou, ni na gugumatua ni lomana.” A tukuna vakakina o Aisea (Aisea 55:6–7). Ia e sega li ni dau voleka tu na Turaga ni da dau kerekere Vua? E sega vakaidina! A sa tukuna o koya, “Era sa berabera ni rogoca na domona na Turaga na nodra Kalou; a ka oqo sa berabera talega kina ni rogoca na nodra masu na Turaga na nodra Kalou, io sa sega ni rogoca ena gauna ni nodra rarawa. Ia ena gauna ni nodra tiko sautu era sa vakawaletaka na noqu ivakaro; ia, ni ra sa rarawa, era sa qai vakasaqarai au” [V&V 101:7–8]. Kevaka eda toro voleka Vua, ena toro voleka mai o Koya kivei keda, ka da na sega ni vakanadakui; ia kevaka eda sega ni toro voleka Vua, ena sega na ka e yalataki vei keda ni na vukei keda o Koya ena noda vuki tani.⁹

E sega ni rawa ni da masu vua na Turaga ka kaya: “Rogoca mada na neitou sasaga, kauta mai na qaqa kivei keitou, cakava na ka keitou vinakati iko mo cakava, ia kakua ni tukuna me keitou cakava na ka o vinakata me keitou cakava.”¹⁰

Sa dodonu vei keda meda lako voli ena rarama taucoko ni dina, ka sega ni dina vakatikina ga. E se sega mada na noqu madigi meu biuta tani kina eso na ivakavuvuli ni kosipeli ka vakabauti ira tale eso, ka qai nanuma ni sa noqu na dodonu ki na taucoko ni veivakalougatataki ni veivakabulai kei na bula vakalou ena matanitu ni Kalou. Kevaka eda vinakata na bula vakalou, kevaka eda vinakata na vanua esa vakarautaka tu na Turaga me baleti ira na cakadodonu ka dina, sa dodonu meda na lomasoli ni lakova na taucoko ni rarama ni kosipeli i Jisu Karisito, ka muria na ivakaro kece sara. E sega ni rawa ni da tukuna ni so vei ira e ka lailai ka sega ni na vakavotukana ka na yaco me na sega ni kauwaitaka soti na Turaga kevaka eda voroki ira. Eda sa vakaroti meda bula ena vosa kecega sa lako mai ena gusu ni Kalou [raica Na iVakarua 8:3; V&V 98:11]. “Ia ka vakaevei ni dou sa vakatokai au me Turaga, Turaga,” e tukuna o koya, “ka sega ni cakava na ka kau sa kaya?” [Raica na Luke 6:46.]¹¹

A father sitting on a sofa as he reads from the scriptures to two young boys and an infant held on his lap. — E rawa ni ra vukei ira na luvedra na itubutubu mera “lako ena taucoko ni rarama ni dina.”

Ni da sa muria tiko na ivakaro ni Turaga, eda sa donuya tiko na sala meda vinaka sara kina.

E namaki keda na Turaga meda vakabauti koya, meda vakadonuya na nona kosipeli tawamudu, ka bula lomavata kei na nona ituvatuva kei na ivakarau. E sega ni noda yalava meda digitaka ka talairawarawa ki na ivakavuvuli vakosipeli ka da taleitaka oya ka qai guilecava na kena vo. E sega ni noda dodonu ni vakatulewa meda nanuma ni ra sa sega ni vakayagataki tale eso na ivakavuvuli ki na noda bula veicurumaki kei na bula vakavanua.

Era sa tawamudu na lawa ni Turaga, ka sa tiko vei keda na taucoko ni nona kosipeli tawamudu ka sa vauci ni vakadinata taucoko na nona lawa kei na dina ka qai lako vakatautauvata tiko kei ira. E sega ni dua na ka e bibi cake vua e dua na tamata mai na kena muri na ivakaro ni Turaga. E namaki keda o koya meda tautauri matua ki na veivakavuvuli dina, meda vakaliuca ena noda bula na veika ni nona matanitu, ka toso ki liu ena tudei vei Karisito, ka qai qaravi koya ena yaloda taucoko, vakasama, kei na kaukauwa. Ena kena itukuni ena ivolanikalou, tou rogoca na itinitini ni ka kecega oqo: “Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.” (Dauvunau. 12:13.)¹²

Au dau vakasamataka vakavuqa, kau kila ni o iko talega, na ivakavuvuli levu ka totoka oya—na kena levu taudua ka sa bau vunautaki, me vaka na levu ni noda kila—ka da vakatoka me iVunau mai na Ulunivanua. … Ke rawa ni da vakamuria saraga na ivakavuvuli oya, sa na rawa meda lesu tale mai ki na iserau ni Kalou, na Tamada, kei na Luvena o Jisu Karisito.

Au dau vakasamataka vakavuqa na ka esa kena isoqoni vakaidina:

“O koya mo dou qai vinaka sara, me vaka sa vinaka sara na Tamamudou sa tiko mai lomalagi.” [Maciu 5:48.]

… Au vakadinata ni a vakaibalebaletaka na Turaga na ka e a tukuna, ni sa dodonu meda vinaka sara, me vaka ni sa vinaka sara na Tamada mai lomalagi. Oya ena sega ni lako taucoko mai ena dua na gauna, ia na vosa ena vosa kei na ivunau ena ivunau, ivakaraitaki ena ivakaraitaki, ka vaka na kena eliu ka sega ni vaka na balavu ni noda bula tiko ena bula vakayago oqo, ni na yaco meda lako sivita mada na ibulubulu ni bera ni da yacova na bula vinaka sara oya ka rawa ni vakataka na Kalou.

Ia eda vakaduria eke na kena yavu. Eda na vakatavulici eke ena dina rawarawa oqo ni Kosipeli i Jisu Karisito, ena ituvaki ni veivakarautaki oqo, me vakarautaki keda ki na bula vinaka sara oya. Sa noqu itavi, ka nomu talega, meu na vinaka cake nikua mai na kena au a tiko kina e nanoa, ka vakakina o iko mo na vinaka cake nikua mai na kena o a tiko kina e nanoa, ka vinaka cake ni mataka mai na kena o tiko kina nikua. Na cava na vuna? Baleta ni da sa tiko ena sala oya, kevaka eda sa muria tiko na ivakaro ni Turaga, eda sa tiko ena sala oya ki na bula vinaka sara, ka na rawa ni yaco ga oya mai na talairawarawa kei na gagadre ni lomada meda vorata na vuravura. …

… Kevaka eda sa sega ni rawata tiko, kevaka e tiko vei keda e dua na malumalumu, oya na tikina meda na wanonova, vata na gagadre meda vorata, me yacova ni da sa rawa ni walia vakarawarawa ka valuta. Kevaka e nanuma e dua na tamata ni dredre vua me sauma na nona ikatini, ia oya na ka me na cakava o koya, me yacova ni sa vulica o koya me sauma na nona ikatini. Kevaka e Vosa ni Vuku, oya na ka me na cakava o koya, me yacova ni sa vulica me taleitaka na ivakaro.¹³

Ena noda muria na ivakaro, na Turaga ena vakacegui ka vakalougatataki keda ka vakaukauwataki keda me rawa ni da turaga ka marama vakadonui ni rawata na bula vakalou.

Ni da vakalomavinakataka [na Turaga], e sega ni dodonu meda qaravi koya ga ena vakavinavinaka kei na veivakacerecerei, ia meda soli keda vakarawarawa ni talairawarawa ki na nona ivakaro. Ni da cakava vakakina, sa dodonu vua me na solia na nona veivakalougatataki; ka ena vuku ni ivakavuvuli oqo (talairawarawa ki na ivakaro) sa vakayavutaki kina na ka kecega [raica na V&V 130:20–21].¹⁴

Na Kalou esa solia kivei keda na [ivakaro] me rawa ni da tubu voleka kina ki Vua ka taraicake ena vakabauta ka vakaukauwataki. A sega mada ni solia o Koya vei keda ena dua na gauna e dua na ivakaro, me sega ni da rawa vakacegu kina kei na veivakalougatataki. Era sega ni soli vakarawarawa me vakalomavinakataka na Turaga, ia me rawa kina vei keda meda turaga ka marama vinaka cake, ka yaco me vakadonui ki na veivakabulai kei na itikotiko ni bula vakalou ena Nona matanitu.¹⁵

Kevaka eda lako ki na loma ni valetabu eda na laveta na ligada ka veiyalayalati ni da na qarava na Turaga ka muria na nona ivakaro ka maroroi keda mai na veika vakavuravura. Kevaka eda kila vinaka na ka eda cakava tiko sa na yaco na edaumeni me na dua na ivurevure ni veitaqomaki kivei keda ena noda bula taucoko—e dua na veitaqomaki ka sega ni taukena e dua na tamata ka sega ni lako ki na valetabu.

Au sa rogoci tamaqu me tukuna ni ena auwa ni veivakatovolei, ena auwa ni veitemaki, ena vakasamataka o koya na yalayala, na veiyalayalati e a cakava ena Vale ni Turaga, ka ra a vuni veitaqomaki vua. … Na veitaqomaki oqo sa ikoya na vu ni soqoni oqo, vakatikina. Era taqomaki keda ena gauna oqo ka qai vakacerecerei keda ena gauna mai muri, kevaka eda na dokai ira. Au kila ni sa soli na veitaqomaki oqo, niu a sa vakila talega, vakakina na udolu tale eso ka ra nanuma na itavi era vauci kina.¹⁶

Daytime exterior photo of the Tampico Mexico Temple. — Eda veiyalayalati ena valetabu meda na “qarava na Turaga ka muria na nona ivakaro ka maroroi keda mai na veika vakavuravura.”

Na Turaga ena soli iloloma vei keda. Ena vakararamataka o koya na noda vakasama. Ena solia o koya vei keda na kila-ka ena vakaseavutaka na dredre kece ka vakaduavatataki keda ki na ivakaro ka solia vei keda o koya; ena solia vei keda o koya e dua na kila-ka ka na teivaki vakatitobu ki na yagoda me na kakua ni cukiraki laivi rawa, kevaka meda na qara mada ga na rarama kei na dina kei na dei ni vakasama ka yalataki vei keda ka da na rawa ni ciqoma kevaka walega eda na dina ka yalodina ki na veiyalayalati kei na itavi vauci yadua ka semati ki na kosipeli i Jisu Karisito.¹⁷

Na yalayala levu ka sa caka ki vei ira na lewe ni Lotu oqo ka ra sa lomasoli tiko ni tikora na lawa ka muria na ivakaro ni Turaga sa ikoya ni ra na sega walega ni ciqoma e dua na tikina ena matanitu ni Kalou, ia era na taukena talega na veimaliwai ni Tamada kei na Luvena; ka sega ni o koya ga o ya, ni sa yalataka na Turaga ni na soli vei ira na ka kecega sa tu vei Tamana [raica na V&V 84:33–39].¹⁸

Mai na talairawarawa ki na ivakaro ka sa tuvai tu ena Kosipeli i Jisu Karisito, kei na kena tomani vakakina, eda na rawata na tawamate, lagilagi, bula tawamudu, ka vakaitikotiko ena itikotiko ni Kalou na Tamada kei na Luvena o Jisu Karisito, ka da na kilai rau kina vakaidina.¹⁹

Kevaka eda na lako ena salatu ni bula dodonu kei na vakatatabu, ena sovaraka mai vei keda na Turaga na nona veivakalougatataki ki na dua na ivakatagedegede eda a sega ni nanuma ni na rawa. Sa dodonu meda vaka dina sara, me vaka a tukuna o Pita, “nai tabatamata digitaki, a matabete vakaturaga, a matanitu yalosavasava, a tamata sa taukena na Kalou.” (1 Pita. 2:9.) Ka da na yaco meda tamata taukeni ni Kalou baleta ni da na sega ni vakataki ira na tamata tale eso ka ra sega ni bulataka na ituvatuva oqo. …

Me vaka na italai ni Turaga, na noda inaki oya meda na lako ena salatu ka sa tuva tu o koya vei keda. E sega walega ni da gadreva meda cakava ka tukuna na ka ena vakalomavinakataki koya, ia eda qara me da bula ka me na vakataki koya na noda bula.

A vakarautaka o koya na ivakaraitaki vinaka sara vei keda ena ka kecega ka tukuna vei keda: “Dou muri au.” A tarogi iratou na nona tisaipeli na Nifai ka vaka: “… ia a cava na ivalavala sa kilikili kei kemudou?” ka qai sauma: “Au sa kaya vakaidina vei kemudou, mo dou vakataki au.” (3 Nifai. 27:27.)

Sa da vakaitavitaki keda tiko oqo ena cakacaka levu duadua e vuravura. Na kaukauwa kei na veivakadonui ni Turaga vakaikoya esa tiko ena matabete eda taukena tiko oqo; ka sa yalataka o koya vei keda ni kevaka eda na vakalevutaka na noda ilesilesi ka lako ena rarama, me vaka ni sa tiko o koya ena rarama, eda na taukena vata kei koya na lagilagi kei na veidokai ka tawamudu ena matanitu nei Tamana.

Ena vakanuinui lagilagi vakaoya ka sa tu oqo e matada, e rawa li ni da veiqaravi vakalailai ga ena kena vakanadakui na veitovo ca vakavuravura? Meda na sega li ni biuta taumada ki na noda bula na veika ni matanitu ni Kalou? Meda na sega li ni qara meda bula mai na veivosa kece ka lako mai ena gusuna?²⁰

Au vakadinadinataka ni sa vosa mai ena noda gauna na Turaga; ka ni nona itukutuku sa dua na vu ni nuinui, reki kei na veivakabulai; kau sa yalataka vei iko ni kevaka o na lako ena rarama ni lomalagi, ka dina ki na nomu veidinadinati, ka muria na ivakaro, ko na taukena na vakacegu kei na reki ena bula oqo kei na bula tawamudu ena vuravura ka na lako mai.²¹

Muria na ivakaro. Lako ena rarama. Vosota ki na iVakataotioti. Dau dina ki na veiyalayalati yadua kei na itavi vauci, ka na vakalougatataki iko na Turaga me sivia na nomu tatadra mareqeti.²²

Vakatutu ni Vuli kei na Veivakavulici

Taro

Raicalesu na itukutuku ena itini ni “Na Bula nei Joseph Fielding Smith.” Na cava e dau veisau kina na noda nanuma me baleta na kosipeli ni da sasagataka tiko meda muria na ivakaro?
Na cava o vulica mai na veitiki ni ivolanikalou ka vakamacalataki tiko ena iwasewase e 1?
E vakatakila vakacava na noda ivakaraitaki ni loloma vei Jisu Karisito na noda talairawarawa ki na ivakaro? Esa ivakatakilakila vakacava ni vakavinavinaka ki na Nona veisorovaki? Esa ivakatakilakila vakacava ni sokalou? (Raica na iwasewase e 2.)
Vakasamataka vagumatua na ivakavuvuli ena iwasewase e 3. Na cava e cala kina meda namaka na veivakalougatataki ni Turaga kevaka eda sega ni sasagataka tiko meda talairawarawa?
Ena veivuke vakacava vei iko mo kila ni sa sega ni dodonu mo namaka ni o na rawa ni vinaka sara ena duavata ga na gauna se ena bula talega oqo? (Raica na iwasewase e 4.) Vakasamataka na cava o na rawa ni cakava ena siga yadua, ena veivuke ni Turaga, mo tiko kina “ena sala oya ki na bula vinaka sara.”
Ena iwasewase e 5, e tuvana tiko kina o Peresitedi Smith e rauta ni 10 na sala ena vakalougatataki keda kina na Turaga ni da muria na ivakaro. Na cava soti o rawa ni wasea mai na veika o sotakaya ka vakavuna mo rawata kina eso na veivakalougatataki oqo?

iVolanikalou Veisemati

Maciu 4:4; 2 Nifai 31:19–20; Omanai 1:26; V&V 11:20; 82:8–10; 93:1; 130:20–21; 138:1–4}

Veivuke ni Veivakavulici

“Kerei ira na vakaitavi mera wasea na ka era sa vulica mai na nodra vakadikeva na iwasewase vakaiira. Ena rairai veivuke ke rawa ni ra tarai eso na vakaitavi ena loma ni macawa ka kerei mera vakarautaki ira mai ni wasea na veika era sa vulica” (mai na tabana vii ena ivola oqo).