Seminare dhe Institute
Mësimi 6: Familja Është Qendrore në Planin e Atit Qiellor

Mësimi 6

Familja Është Qendrore në Planin e Atit Qiellor

Hyrje

Profetët dhe apostujt bashkëkohorë kanë shpallur se “Familja është qendrore në planin e Krijuesit për destinacionin hyjnor të fëmijëve të Tij” (“Familja: Një Proklamatë drejtuar Botës”, Ensign ose Liahona, nëntor 2010, f. 129). Ky mësim do t’i ndihmojë studentët të kuptojnë se duke qenë “më të zellshëm dhe më të përfshirë në shtëpi” (DeB 93:50), ata mund t’i bëjnë familjet e tyre më thelbësore në jetën e tyre.

Lexim Konteksti

  • Robert D. Hales, “The Eternal Family”, Ensign, nëntor 1996, f. 64–67.

  • Dejvid A. Bednar, “Më të Zellshëm dhe më të Përfshirë në Shtëpi”, Ensign ose Liahona, nëntor 2009, f. 17–20.

  • Manuali 2: Administrimi i Kishës [2010], 1.1.1, 1.1.4, dhe 1.4.1 (nëse është në dispozicion).

Sugjerime për Mësimdhënien

Familja është qendrore në planin e Atit Qiellor

Përmendini klasës suaj se nga të gjitha temat e përmendura në konferencat e përgjithshme të kohëve të fundit, familja është mes temave të diskutuara më shpesh.

  • Si mendoni, përse udhëheqësit e Kishës flasin kaq shpesh rreth familjes?

Shkruajeni të vërtetën vijuese nga proklamata për familjen në tabelë dhe kërkojuni studentëve të thonë se çfarë do të thotë ajo për ta:

“Familja është thelbësore në planin e Krijuesit për destinacionin e përjetshëm të fëmijëve të Tij”.

handout iconPër t’i ndihmuar studentët të kuptojnë më mirë se si familja është thelbësore në destinacionin tonë të përjetshëm, shpërndajuni studentëve kopje të fletushkës që gjendet në fund të këtij mësimi. Ndajeni klasën në grupe të vogla. Caktojini secilit grup të lexojë një nga tri pjesët e fletushkës dhe të diskutojë pyetjet që përfshihen. Sigurohuni që të caktohet secila pjesë.

fletushkë, Familjet Tona Para Lindjes, në Vdekshmëri dhe të Përjetshme

Pas një kohe të mjaftueshme, ftoni të paktën një person që i caktohet secilës pjesë të fletushkës, për t’i dhënë klasës një përmbledhje të diskutimit të tyre në grupe të vogla. Dëshmoni për të vërtetën vijuese: Familja është pjesë qendrore e planit të Perëndisë për jetën para lindjes, në vdekshmëri dhe të përjetshme.

  • Çfarë përvojash ju kanë ndihmuar të ndieni rëndësinë thelbësore të familjes në planin e Atit Qiellor?

Doktrina e Besëlidhje 93:39–50

Bërja e familjes një përparësi

Përgatitini studentët të mësojnë nga Doktrina e Besëlidhje 93 duke shpjeguar se ky seksion shënon, mes gjërave të tjera, udhëzimin e Zotit rreth rëndësisë së rritjes së fëmijëve në “dritë e të vërtetë” dhe bërjes së familjes një përparësi. Shkruani referencat vijuese në tabelë:

Doktrina e Besëlidhje 93:39–43

Doktrina e Besëlidhje 93:44

Doktrina e Besëlidhje 93:45–48

Doktrina e Besëlidhje 93:50

Kërkojuni studentëve të lexojnë të paktën një nga referencat (sigurohuni që çdo referencë lexohet nga të paktën një student). Vërini studentët të kërkojnë kujt po i drejtohej Zoti dhe çfarë udhëzimi dha Ai. Pas një kohe të mjaftueshme, kërkojuni studentëve të raportojnë atë që mësuan. Sigurohuni që studentët e dallojnë se katër burrat e përmendur ishin Presidenca e Parë dhe peshkopi i Kishës në Ohajo; si rrjedhim, këto shkrime të shenjta i kujtojnë të gjithë anëtarët e Kishës, edhe ata që janë në pozita drejtuese, për t’i bërë familjet e tyre një përparësi. Ju mund t’u sugjeroni studentëve që ata ta shenjojnë përsëritjen ose modelin që gjendet në këto vargje – anëtarët e Kishës duhet të “vendos[in] në rregull” familjet e tyre (shih vargjet 43, 44 dhe 50).

  • Sipas vargjeve 42, 48 dhe 50, çfarë mund të bëjmë që të ndihmojmë për t’i vendosur në rregull familjet tona? (Studentët duhet të përcaktojnë sa vijon: t’u mësojnë fëmijëve dritë e të vërtetë, të pendohen, të braktisin gjërat e padrejta, të jenë më të zellshëm e më të përfshirë në shtëpi dhe të luten gjithmonë.)

Shkruani në tabelë parimin vijues: Ne ndihmojmë në përmbushjen e urdhërimit të Zotit për t’i vendosur në rregull familjet tona kur jemi më të zellshëm dhe më të përfshirë në shtëpi.

  • Çfarë mund të bëjë një i ri ose e re në moshë madhore për të qenë më të zellshëm e më të përfshirë në shtëpi?

Paraqitni thënien vijuese nga një letër e shkruar prej Presidencës së Parë në vitin 1999 dhe kërkojini një studenti ta lexojë atë me zë të lartë:

“Shtëpia është baza e një jete të drejtë dhe asnjë instrument tjetër nuk mund të zërë vendin e saj ose të përmbushë funksionet thelbësore të saj në çuarjen përpara të kësaj përgjegjësie të dhënë nga Perëndia.

Ne i këshillojmë prindërit dhe fëmijët t’u japin përparësinë më të lartë lutjes familjare, mbrëmjes familjare, studimit e udhëzimit të ungjillit dhe aktiviteteve të dobishme familjare. Sado të denja dhe të përshtatshme qofshin kërkesat ose veprimtaritë e tjera, ato nuk duhet të lejohen të zëvendësojnë detyrat e caktuara hyjnisht që vetëm prindërit dhe familjet mund t’i kryejnë ashtu si duhet” (Letër e Presidencës së Parë, 11 shkurt 1999, e cituar te Manuali 2: Administrimi i Kishës [2010], 1.4.1).

  • Sipas përvojës suaj, cilat janë disa nga “funksionet thelbësore” dhe “detyrat e caktuara hyjnisht” që kryhen më mirë në familje?

Paraqitni thënien vijuese dhe nxitini studentët të marrin parasysh bekimet që vijnë kur çdo pjesëtar i familjes përpiqet t’i përmbushë detyrat e caktuara në mënyrë hyjnore familjes:

“Kudo që të jetojnë anëtarët e Kishës, ata duhet të krijojnë një shtëpi ku Shpirti është i pranishëm. …

Një shtëpi, me prindër të dashur dhe besnikë, është mjedisi ku përmbushen më me efektshmëri nevojat shpirtërore dhe fizike të fëmijëve. Një shtëpi e përqendruar te Krishti, iu ofron të rriturve dhe fëmijëve një vend mbrojtjeje kundër mëkatit, strehë nga bota, shërim nga dhembje emocionale dhe të tjera, si dhe dashuri të angazhuar e të çiltër” (Manuali 2: Administrimi i Kishës, 1.4.1).

  • Si ndihmoni ju që të krijoni një shtëpi të përqendruar te Krishti për familjen tuaj?

  • Çfarë ndryshimi sjell ajo në familjen tuaj?

Shfaqeni thënien vijuese nga Plaku M. Rasëll Ballard, i Kuorumit të Dymbëdhjetë Apostujve, dhe kërkojini një studenti ta lexojë atë me zë të lartë:

Plaku M. Rasëll Ballard

“Vendoseni gjithçka bëni jashtë shtëpisë në varësi dhe në mbështetje të asaj që ndodh brenda shtëpisë suaj. Kujtoni këshillën e Presidentit Harold B. Li që ‘puna më e rëndësishme … që do të bëni ndonjëherë, do të jetë brenda mureve të [vetë] shtëpisë suaj’ … dhe këshillën për çdo kohë të Presidentit Dejvid O. Mek-Kei që ‘asnjë sukses tjetër nuk mund ta kompensojë dështimin në shtëpi’” (“Që të Humburit të Mund të Gjenden”, Ensign ose Liahona, maj 2012, f. 99).

Jepuni studentëve një çast që të shkruajnë disa gjëra që mund t’i bënin për të qenë më të zellshëm e më të përfshirë në shtëpi dhe për ta bërë familjen e tyre një përqendrim thelbësor në jetën e tyre. Nxitini studentët që të vendosin një synim për ta ndjekur ecurinë nga një ide që e kanë shkruar. Dëshmoni se, kur studentët veprojnë sipas synimit të tyre, Zoti do t’i forcojë shpirtërisht dhe do t’i ndihmojë të kuptojnë se si veprimet e tyre gjithashtu i forcojnë familjet e tyre.

Materiale Leximi për Studentin

Handout

handout, Our Premortal, Mortal, and Eternal Families

Familjet Tona Para Lindjes, në Vdekshmëri dhe të Përjetshme

Familja e Përjetshme – Mësimi 6

Familja Jonë Para Lindjes

“Familja shugurohet nga Perëndia. Ajo është njësia më e rëndësishme në kohë dhe në përjetësi. Madje përpara se të lindeshim në tokë, ne ishim pjesë e një familjeje. Secili prej nesh ‘është një bir ose bijë shpirtërore e dashur e prindërve qiellorë’ me ‘një natyrë dhe të ardhme hyjnore’ [‘Familja: Një Proklamatë drejtuar Botës’, Ensign ose Liahona, nëntor 2010, f. 129]. Perëndia është Ati ynë Qiellor dhe ne jetuam në praninë e Tij si pjesë e familjes së Tij në jetën para lindjes. Atje ne mësuam mësimet tona të para dhe u përgatitëm për jetën në vdekshmëri (shih DeB 138:56)” (Manuali 2: Administrimi i Kishës [2010], 1.1.1).

“Ne adhurojmë Perëndinë e madhërishëm që krijoi gjithësinë. Ai është Ati ynë në qiell. Ne erdhëm në jetë për shkak të tij; ne jemi fëmijët e tij shpirtërorë. Ne jetuam me të në jetën para lindjes në një marrëdhënie familjare. Ne e njihnim Atë në mënyrë aq intime dhe aq mirë sa i njohim etërit tanë të vdekshëm në këtë sferë të ekzistencës” (Bruce R. McConkie, How to Worship, Brigham Young University Speeches of the Year [20 korrik 1971], f. 2).

Pyetje për Diskutim:

  • Si ishte familja një pjesë thelbësore e jetës sonë para lindjes?

  • Si është e dobishme të dini se Perëndia është Ati juaj dhe se ju ishit një pjesëtar i dashur i familjes së Tij në botën para lindjes?

  • Si e përfytyroni se ishte ndërveprimi juaj me Prindërit tuaj Qiellorë?

Familja Jonë në Vdekshmëri

“Si pjesë e planit të Atit tonë Qiellor, ne u lindëm në familje. Ai krijoi familje për të na sjellë lumturi, për të na ndihmuar të mësojmë parime të sakta në një mjedis me dashuri dhe për të na përgatitur për jetën e përjetshme.

Prindërit kanë përgjegjësinë jetike që t’i ndihmojnë fëmijët e tyre të përgatiten për t’u kthyer tek Ati Qiellor. Prindërit e përmbushin këtë përgjegjësi duke u mësuar fëmijëve të tyre që të ndjekin Jezu Krishtin dhe të jetojnë ungjillin e Tij” (Manuali 2: Administrimi i Kishës, 1.1.4).

“Perëndia është projektuesi i familjes. Ai kishte si qëllim që lumturia më e madhe, aspektet më të kënaqshme të jetës, gëzimet më të thella duhej të vinin në shoqërimet tona së bashku dhe në interesimet tona njëri për tjetrin si etër e nëna dhe fëmijë” (Gordon B. Hinckley, “What God Hath Joined Together”, Ensign, maj 1991, f. 74).

Pyetje për Diskutim:

  • Në çfarë mënyrash është familja një pjesë thelbësore e jetës sonë në vdekshmëri?

  • Si mund të ishte jeta në tokë e ndryshme nëse do të ishim dërguar në tokë si individë pa marrëdhëniet familjare – pa baba, nënë, vëllezër e motra, paraardhës apo pasardhës?

  • Çfarë përvojash ju kanë ndihmuar të kuptoni rolin dhe rëndësinë e familjes në vdekshmëri?

Familja Jonë e Përjetshme

“Plani hyjnor i lumturisë bën të mundur që marrëdhëniet familjare të vazhdojnë përtej varrit” (“Familja: Një Proklamatë drejtuar Botës”, Ensign ose Liahona, nëntor 2010, f. 129).

“Ndërkohë që shpëtimi ynë individual bazohet mbi bindjen tonë individuale, është po aq e rëndësishme të kuptojmë se ne jemi secili një pjesë e rëndësishme dhe përbërëse e një familjeje dhe bekimet më të larta mund të merren vetëm brenda një familjeje të përjetshme. Kur familjet funksionojnë sikurse u projektuan nga Perëndia, marrëdhëniet që gjenden atje janë më të vlefshmet në vdekshmëri. Plani i Atit është që dashuria dhe shoqërimi familjar do të vazhdojnë deri në përjetësitë. Të pasurit e unitetit në familje mbart një përgjegjësi të madhe të përkujdesjes, dashurisë, lartësimit shpirtëror dhe forcimit të secilit pjesëtar të familjes, me qëllim që të gjithë të mund të durojnë me drejtësi deri në fund në vdekshmëri dhe të banojnë së bashku për gjithë përjetësinë. Nuk është e mjaftueshme vetëm të shpëtojmë veten tonë. Është po aq e rëndësishme që prindërit, vëllezërit dhe motrat të shpëtohen në familjet tona. Nëse kthehemi të vetmuar në shtëpi tek Ati ynë Qiellor, ne do të na bëhet pyetja: ‘Ku është pjesa tjetër e familjes?’ Kjo është arsyeja përse ne japim mësim që familjet janë përgjithmonë. Natyra e përjetshme e një individi bëhet natyra e përjetshme e familjes” (Robert D. Hales, “The Eternal Family”, Ensign, nëntor 1996, f. 65).

Pyetje për Diskutim:

  • Në çfarë mënyrash është familja një pjesë thelbësore e destinacionit tonë të përjetshëm?

  • Cilat janë disa veprime të drejta që anëtarët e familjes mund të ndërmarrin për të ndihmuar që të ndodhë shpëtimi i njëri-tjetrit?

  • Kur ju ka lartësuar ose forcuar shpirtërisht një pjesëtar i familjes në një mënyrë që ju frymëzoi të duronit deri në fund?

© 2015 nga Intellectual Reserve, Inc. I rezervohen të gjitha të drejtat.