Դաս 28. Ուսուցչի նյութ

Ունենալ հավերժական ընտանիք կազմելու հույս

Բոլորս կարող ենք հույս ունենալ, որ կարող ենք հավերժական ընտանիք կազմել, անկախ նրանից, թե ինչպիսին են եղել մեր ընտանեկան հանգամանքները: Այս դասը կօգնի ուսանողներին ավելի լավ հասկանալ, որ Տերը կօգնի նրանց հաջողության հասնել հավերժական ընտանիք կազմելու հարցում: Ուսանողները նաև հնարավորություն կունենան մտքերով փոխանակվելու և որոշելու, թե ինչպես հետագայում կիրառել այն, ինչ սովորել և զգացել են «Հավերժական ընտանիք» դասընթացին:

Ուսուցման առաջարկներ

Տերը ցանկանում է օգնել մեզ, որ հաջողենք հավերժական ընտանիքներ կազմելու հարցում

Նշում․ Ուշադիր ընտրեք դասի առաջին մասի ուսուցման այն տարբերակը, որն առավել կօրհնի ձեր ուսանողներին: Հետևեք, որ դասի վերջին հատվածի համար մոտ 20 րոպե ժամանակ մնա։

Դասը սկսեք՝ հրավիրելով ուսանողներին խորհել և գրի առնել իրենց մտքերը հետևյալ հարցի շուրջ.

• Ինչպիսի՞ հույսեր ունեք հավերժական ընտանիք կազմելու համար:

Բավարար ժամանակից հետո հրավիրեք մի քանի ուսանողների կիսվել իրենց մտքերով, եթե հարմար են զգում:

Ցուցադրեք հետևյալ ճշմարտությունը երեց Դեյվիդ Ա. Բեդնարի հայտարարությունից, որը գտնվում է նախապատրաստական նյութի 2-րդ բաժնում․ «Տիրոջ օգնությամբ դուք կարող եք ստեղծել հավերժական ընտանիք» (“A Welding Link” [worldwide devotional for young adults, Sept. 10, 2017], broadcasts.ChurchofJesusChrist.org)։

Ընտրեք հետևյալ վարժություններից մեկը՝ որպեսզի օգնեք ուսանողներին ավելի խորը հասկանալ այս ճշմարտությունը և կիսվել նրանով, ինչ սովորել են դասին պատրաստվելիս.

Տարբերակ 1

Հիշեցրեք ուսանողներին, որ նախապատրաստական նյութի 1-ին բաժնի «Գրեք ձեր մտքերը» վարժությունը հրավիրում է նրանց բացահայտել սուրբ գրություններից կամ իրենց ընտանեկան փորձառությունից մի օրինակ, թե ինչպես է Տերն օգնում այն մարդկանց, ովքեր վստահում են Նրան և օգնություն խնդրում Նրանից: Ուսանողներին մի քանի րոպե ժամանակ տվեք` վերանայելու իրենց օրինակները և հարցերի պատասխանները:

Ուսանողներին բաժանեք զույգերի կամ փոքր խմբերի։ Նրանց բավարար ժամանակ տվեք՝ կիսվելու իրենց օրինակներով և պատասխաններով:

Երբ ուսանողներն ավարտեն, գրատախտակին գրեք հետևյալ անավարտ նախադասությունը. Միշտ հիշեք. Յուրաքանչյուր ուսանողի տրամադրեք մի փոքրիկ թղթի կտոր և կպչուն ժապավեն: Հրավիրեք ուսանողներին գրել, թե ինչպես կավարտեն գրատախտակին գրված նախադասությունը և կկազմեն ճշմարիտ պնդում այն մասին, թե ինչպես լիահույս լինել հավերժական ընտանիք կազմելու հարցում: Պնդումը պետք է հիմնված լինի խմբային քննարկման ժամանակ իրենց սովորածի վրա։ Այնուհետև խնդրեք ուսանողներին իրենց թղթերը դնել սենյակում որևէ տեղ: (Եթե ձեր դասարանը փոքր է, կարող եք հարմարեցնել այս վարժությունը՝ հրավիրելով ուսանողներին գրել իրենց պատասխանները գրատախտակին)։

Ուսանողներին մի քանի րոպե տվեք, որ շրջեն սենյակում և կարդան միմյանց կազմած պնդումները: Երբ ուսանողներն ավարտեն, խրախուսեք նրանց գրի առնել լրացուցիչ որևէ ճշմարտություն, որը նրանք ցանկանում են հիշել կամ՝ իրենց ստացած տպավորությունները:

Տարբերակ 2

Բացատրեք, որ ոմանք կարող են դժվարանալ հավերժական ընտանիք կազմելու հույս փայփայել, քանի որ սեփական ընտանիքը չի ծառայել որպես առաքինի ընտանիքի օրինակ։

• Ի՞նչ կարող ենք սովորել Աբրահամ մարգարեի փորձառությունից, որը կարող է մեզ հույս տալ: (Խրախուսեք ուսանողներին հիշել, թե ինչ են սովորել Աբրահամի մասին նախապատրաստական նյութի 2-րդ բաժնում։ Կարող եք միասին կարդալ Աբրահամ 1․2-ը։ Օգնեք ուսանողներին գտնել այսպիսի մի ճշմարտություն. Մենք կարող ենք շրջադարձային կետ լինել մեր ընտանիքի համար և ընտրել արդարությունը՝ անկախ նրանից, թե ինչպիսին են եղել մեր ընտանեկան հանգամանքները)։

• Արդյոք եղե՞լ է ձեր ընտանիքում մեկը, ով կարևոր դերակատարում է ունեցել ձեր ընտանիքում ընտանեկան արդար չափանիշների հիմնադրման (կամ պահպանման) գործում։ Այդ մարդու որոշումներն ի՞նչ ազդեցություն են ունեցել ձեր կյանքում:

Հրավիրեք ուսանողներից մեկին բարձրաձայն կարդալ երեց Դեյվիդ Ա. Բեդնարի խոսքի երրորդ և հինգերորդ պարբերությունները նախապատրաստական նյութի 2-րդ բաժնից։

• Տերն ինչպե՞ս կարող է օգնել ձեզ «ամրություն հաղորդել ձեր շղթային և գուցե վերականգնել կոտրված օղակները»։ (“A Welding Link”)։ (Կարող եք հրավիրել ուսանողներին գրել այս հարցի իրենց պատասխանները, դասարանով քննարկել հարկավոր չէ)։

Հրավիրեք ուսանողներին խորհել ընտանեկան չափանիշների շուրջ, որոնք նրանք ցանկանում են սկսել, պահպանել կամ թողնել (տես նախապատրաստական նյութի 2-րդ բաժինը): Խրախուսեք ուսանողներին գրի առնել իրենց ունեցած մտքերը կամ տպավորությունները:

Մենք օրհնվում ենք, երբ խորհում ենք սովորածի շուրջ և ծրագրում դրանց կիրառումը։

Բարելավել մեր ուսուցումն ու ուսումնասիրությունը

Ուսանողներին մտածելու ժամանակ տվեք։ Ուսանողները կարող են ավելի խորը նպատակ և իմաստ գտնել իրենց ուսուցման մեջ, երբ ժամանակ են հատկացնում մտածելու, թե ավետարանի ճշմարտություններն ինչպես են ազդել իրենց մտքերի, սրտի և կյանքի վրա: Ուսանողների դարձն ավելի կխորանա, եթե խրախուսեք նրանց մտածել, թե ինչպես կկիրառեն այն, ինչ սովորել և զգացել են։

Կարող եք ցուցադրել «Ընտանիք. Հայտարարություն աշխարհին» հռչակագիրը (ChurchofJesusChrist.org)։ Հիշեցրեք ուսանողներին, որ այս դասընթացի ընթացքում իրենք հնարավորություն ունեն ուսումնասիրել ընտանիքի մասին ուսմունքները հավերժական տեսանկյունից։

Ցուցադրեք այս դասընթացի դասերի վերնագրերը կամ հրավիրեք ուսանողներին գտնել դրանք իրենց սարքերում: Ուսանողներին ժամանակ տվեք վերանայելու դասերի վերնագրերը, որպեսզի օգնեք նրանց մտածել այն մասին, թե ինչ են սովորել և զգացել այս դասընթացի ընթացքում: Այնուհետև հրավիրեք ուսանողներին կիսվել իրենց մտքերով: Կարող եք նմանօրինակ հարցեր տալ՝ քննարկումը շարունակելու համար.

• Այս դասընթացն ինչպե՞ս է ազդել ամուսնության և ընտանիքի վերաբերյալ Տիրոջ ուսմունքների ձեր ընկալման և վկայության վրա:

• Ո՞րն է եղել այս դասընթացից ձեր ամենակարևոր ձեռքբերումներից մեկը:

• Ի՞նչ եք սովորել Երկնային Հոր և Հիսուս Քրիստոսի մասին այս դասընթացի ընթացքում: Նրանց հետ ձեր հարաբերություններն ինչպե՞ս են ամրապնդվել։

Ավարտելով այս դասը, կարող եք հրավիրել որևէ ուսանողի բարձրաձայն կարդալ նախագահ Մ. Ռասել Բալլարդի խոսքը նախապատրաստական նյութի 3-րդ բաժնից։ Օգտակար կլինի ցուցադրել հետևյալ հարցերը և ուսանողներին մի քանի րոպե տրամադրել, որ գրի առնեն այս հարցերի վերաբերյալ իրենց մտքերը կամ տպավորությունները։

• Ինչպե՞ս կփոխվի ձեր կյանքը այս դասընթացին ձեր սովորածի և ունեցած փորձառության արդյունքում: Ինչպե՞ս ավելի շատ կնմանվեք Հիսուս Քրիստոսին։

Եթե ժամանակը թույլ տա, կարող եք հրավիրել այն ուսանողներին, ովքեր կցանկանան, կիսվել իրենց վկայությամբ Երկնային Հոր երջանկության ծրագրում ընտանիքի կարևորության մասին։ Կարող եք կիսվել նաև ձեր վկայությամբ: Խրախուսեք ուսանողներին շարունակել հաճախել ինստիտուտ: