Դաս 9․ Ուսուցչի նյութ

Ինչպես միավորել ընտանիքները հավերժության համար

Մեր և մեր մահացած նախնիների համար տաճարային արարողություններ ստանալը մեզ ուժ է տալիս և օգնում է կառուցել մեր սեփական հավերժական ընտանիքը: Ընտանեկան պատմությունը և տաճարային ծառայությունը նույնպես էական նշանակություն ունեն, քանի որ օգնում են մեր Երկնային Հորը միավորել Իր ընտանիքը: Այս դասի արդյունքում ուսանողները կկարողանան բացատրել որոշ օրհնություններ, որոնք մենք կարող ենք ստանալ տաճարային և ընտանեկան պատմության ծառայության միջոցով: Ուսանողները կհրավիրվեն որոշել նաև, թե ինչպես կարող են սկսել կամ շարունակել իրենց ջանքերը, որպեսզի հայտնաբերեն իրենց մահացած նախնիներին և տաճարում նրանց համար արարողություններ կատարեն:

Ուսուցման առաջարկներ

Երկնային Հայրը ցանկանում է զորություն և ուժ պարգևել Իր զավակներին

Դասի սկզբում ցուցադրեք հետևյալ հարցը և հրավիրեք ուսանողներին թվարկել իրենց պատասխանները գրատախտակին.

Որպես ներկայիս աշխարհի չափահաս երիտասարդներ՝ հատկապես ո՞ր հոգևոր զորության կամ օրհնությունների կարիքն ունեք և ինչո՞ւ:

Հրավիրեք մի ուսանողի բարձրաձայն կարդալ ընտանիքի հայտարարության երրորդ պարբերությունը (տես Ընտանիք. Հայտարարություն աշխարհին», ChurchofJesusChrist.org): Խնդրեք ուսանողներին բացատրել, թե ինչ գիտեն Աստծո ծրագրում ուխտերի և արարողությունների դերի մասին:

Ուսանողներին ժամանակ տվեք ուշադիր կրկնել նախագահ Ռասսել Մ. Նելսոնի խոսքերը նախապատրաստական նյութի բաժին 1-ում: Հրավիրեք նրանց կիսվել այն ամենով, ինչ նրանք սովորեցին Նախագահ Նելսոնից՝ քահանայության արարողությունների և ուխտերի մասին: Երբ ուսանողները կիսվեն՝ օգնեք նրանց բացահայտել նմանատիպ ճշմարտություններ. Ստանալով արարողություններ և ուխտեր՝ կարող ենք ամրացնել մեր ամուսնություններն ու ընտանիքները: Երբ մենք ստանում և պատվում ենք քահանայության արարողություններն ու ուխտերը, Աստված օրհնում է մեզ Իր զորությամբ (տես նաև Վարդապետություն և Ուխտեր 109.22):

• Քահանայության արարողություններն ու ուխտերը ինչպե՞ս են զորացրել կամ ամրապնդել ձեզ և ձեր ընտանիքին: (Ուսանողներին հանձնարարել եք խորհել նախապատրաստական նյութի այս հարցի շուրջ):

Դուք կարող եք վկայել այս օրհնություններից մեկի կամ մի քանիսի մասին ձեր և ձեր ընտանիքի կյանքում: Խրախուսեք ուսանողներին առաջ ընթանալ և ստանալ տաճարային արարողություններ, եթե նրանք դեռ չեն ստացել դրանք և չեն պատվել իրենց կապած ուխտերը:

Մեր Երկնային Հայրը փրկություն է ցանկանում Իր ամբողջ ընտանիքի համար

Ուսանողներին բաժանեք փոքր խմբերի՝ հետևյալ վարժությունը կատարելու համար: Յուրաքանչյուր խմբին տրամադրեք հետևյալ թերթիկից մեկ օրինակ։ (Կամ կարող եք պատրաստել նմանատիպ մեկը, եթե ցանկանում եք հարմարեցնել սցենարը՝ այն ավելի համապատասխան դարձնելով ձեր ուսանողների հանգամանքներին): Հրավիրեք խմբերին հետևել թերթիկում տրված հրահանգներին:

Մահացածների փրկագնման վարդապետությունը

Հավերժական ընտանիք. Ուսուցչի նյութ. Դաս 9

Կարդացեք հետևյալ սցենարը և խմբով քննարկեք ուղեկցող հարցերը:

Մեկ այլ հավատքի պատկանող ընկերը վերջերս հաճախեց տաճարի բաց դռների օր: Այնտեղ նա լսեց, որ մարդիկ խոսում են մեր մահացած նախնիների համար արարողություններ կատարելու մասին: Մի քանի օր անց նա հարցնում է ձեզ. «Ինչո՞ւ է ձեր եկեղեցին մահացածների համար արարողություններ կատարում»:

• Ինչպե՞ս կպատասխանեիք ձեր ընկերոջ հարցին: (Այս հարցը քննարկելուց հետո ձեր խումբը կարող է վերանայել նախագահ Ջոզեֆ Ֆ. Սմիթի հայտարարությունը նախապատրաստական նյութի բաժին 1-ում: Կարող եք միասին վերանայել նաև Ա Կորնթացիս 15.29:)

• Մահացածների փրկագնման վարդապետությունը մեզ ի՞նչ է սովորեցնում Երկնային Հոր և Հիսուս Քրիստոսի բնավորության, ցանկությունների և հասանելիության մասին:

© 2022 by Intellectual Reserve, Inc. All rights reserved․

Մահացածների փրկագնման վարդապետությունը

Բավարար ժամանակից հետո հրավիրեք մի քանի ուսանողների կիսվել, թե ինչ են սովորել իրենց խմբային քննարկման ժամանակ։

Միասին կրկնեք Վարդապետություն և Ուխտեր 128․15-ը և քննարկեք հետևյալ հարցերը.

• Ըստ այդ հատվածի, ինչու՞ է կարևոր, որ մենք փրկագնող արարողություններ կատարենք մեր մահացած նախնիների անունից: (Օգտագործելով ուսանողների բառերը՝ գրատախտակին գրեք նմանատիպ ճշմարտություն․ Մեր մահացած նախնիների փրկությունն անհրաժեշտ և կարևոր է մեր փրկության համար։)

• Ձեր կարծիքով, մեր նախնիների փրկությունն ինչո՞ւ է անհրաժեշտ մեր իսկ փրկության և կատարելության համար:

• Մենք ինչպե՞ս ենք ավելի շատ նմանվում Փրկիչին՝ բացահայտելով մեր մահացած նախնիներին և նրանց անունից տաճարներում արարողություններ ստանալով: (Հանձնարարեք ուսանողներին վերանայել նախագահ Գորդոն Բ․ Հինքլիի հայտարարությունը նախապատրաստական նյութի բաժին 1-ում:)

Հրավիրեք ուսանողներին մտորել այն մասին, թե ինչ են զգում Փրկիչի հանդեպ, երբ Նա ջանում է անել այն, ինչ իրենք չեն կարող անել իրենց համար: Այնուհետև հրավիրեք նրանց մտածել, թե մեր մահացած նախնիներն ինչ կարող են զգալ, երբ նրանց համար ստանում ենք փրկարար արարողություններ, որոնք իրենք չեն կարող ստանալ:

Տերը օրհնում է նրանց, ովքեր կատարում են տաճարային և ընտանեկան պատմության ծառայություն

Բարելավել մեր ուսուցումն ու ուսումնասիրությունը

Կատարեք հրավերներ, որոնք խրախուսում են կիրառումը Ուսանողները խորացնում են ավետարանի ուսումնասիրությունը, երբ կիրառում են ճշմարիտ սկզբունքներ և վարդապետական ճշմարտություններ: Հավատքով գործելն օգնում է նրանց դարձի գալ դեպի Փրկիչը և ստանալ օրհնությունները, որոնք Նա խոստանում է հնազանդներին: Երբ պատրաստվում եք դասարանում օգնել ուսանողներին, պատշաճ առաջնահերթություն տվեք այն հարցերին և վարժություններին, որոնք խրախուսում են կիրառումը:

Հրավիրեք այն ուսանողներին, ովքեր կարողանում են օգտագործել իրենց էլեկտրոնային սարքը, այցելել FamilySearch.org կամ FamilySearch Family Tree հավելված: (Կարող եք նաև ցուցադրել կայքը կամ հավելվածը դասի համար կամ առաջարկել, որ առանց սարքի ուսանողները կիսվեն դասընկերոջ հետ, ով ունի սարքը): Միասին ուսումնասիրեք կայքի կամ հավելվածի որոշ հնարավորություններ: Կարող եք օգտագործել «Relatives around Me» գործառույթը՝ օգնելով ուսանողներին տեսնել, թե ինչպես են կապված միմյանց հետ: Հետևյալ հարցերից ո՞րը կարող է օգտակար լինել քննարկելիս.

• Ի՞նչ փորձառություն եք ունեցել ընտանեկան պատմության աշխատանքը կատարելիս:

• Ի՞նչն է ձեզ հետ պահում կամ հետ պահել նախկինում՝ ընտանեկան պատմության աշխատանքը կատարելիս: Ինչպե՞ս եք հաղթահարել այդպիսի խոչընդոտները: Տերն ինչպե՞ս կարող է օգնել ձեզ ձեր ջանքերում:

• Եթե ստացել եք տաճարային արարողություններ ձեր նախնիների անունից, ի՞նչ զգացումներ ունեցաք այդ ժամանակ:

Կարող եք ցուցադրել տեսանյութը՝ «Ընտանեկան պատմության աշխատանքի խոստացված օրհնությունները» (2.42) (որը տրված է նաև նախապատրաստական նյութի բաժին 2-ում):

Խնդրեք ուսանողներին թվարկել որոշ օրհնություններ, որոնք Տերը և Նրա Եկեղեցու ղեկավարները խոստացել են նրանց, ովքեր մասնակցում են տաճարային և ընտանեկան պատմության ծառայությանը:

Հրավիրեք ուսանողներին խորհել հոգևոր զորության կամ օրհնությունների մասին, որոնց կարիքը նրանք հատկապես ունեն այս պահին (հրավիրեք նրանց դասի սկզբում վերանայել գրատախտակին գրված ցուցակը): Խնդրեք ուսանողներին կիսվել կամ վկայել, թե երբ են նրանք ունեցել այս տեսակի օրհնություններ, երբ մասնակցել են տաճարային և ընտանեկան պատմության ծառայությանը:

Մի քանի րոպե ժամանակ տվեք ուսանողներին գրանցելու, թե ինչպես կարող են կիրառել իրենց սովորածը այս դասից: Խրախուսեք նրանց նպատակ դնել, որին, ըստ իրենց, կարող են հասնել՝ կանոնավոր մասնակցելով տաճարային և ընտանեկան պատմության ծառայությանը: Նրանք կարող են նաև գրանցել այն օրհնությունները, որոնք հույս ունեն ստանալ դրանից:

Նշում. Երբ ապագայում հանդիպեք ձեր դասարանի հետ, հնարավորություններ գտեք հարցնելու, թե ինչպես են իրականացնում տաճարային և ընտանեկան պատմության իրենց նպատակները:

Հաջորդ անգամ

Դասի ավարտին կամ շաբաթվա ընթացքում կարող եք հրավիրել ուսանողներին հարցազրույց վերցնել տաճարում կնքված մի զույգից: Խնդրեք ուսանողներին հարցնել զույգին, թե իրենց ամուսնության վրա ինչպե՞ս են ազդել կնքման ժամանակ իրենց կապած ուխտերը, և ինչպես են նրանք միասին ձգտում մոտենալ Աստծուն: