1 Ne biakalua ne tuakâsa kabidi luendu mu tshipela; ne tuakenza luendu pabuipi ne luseka ne batangila ku esete kumbukila ku tshikondu atshi. Ne tuakenza luendu ne tuakapututuka mu ntatu ya bungi mu tshipela; ne bakaji betu bakalela bana mu tshipela.

2 Ne mabenesha a Mukalenga kutudi avua manena bikola, bua ne patutshivua tudia munyinyi mubishi mu tshipela, bakaji betu bavua ne diamusha dia bungi bua bana babu; ne bavua ne makanda, eyowa, mena bu mudi baluma; ne bakabanga kuitaba ngendu yabu kakuyi dinungana to.

3 Ne nanku tudi tumona ne mikenji ya Nzambi idi ne tshia kukumbajibua. Ne bikalabi ne bana ba bantu badi batumikila mikenji ya Nzambi udi ubadisha, ne ubapesha makanda, ne ubapesha njila idibu mua kukumbajila bualu budiye mubapeshela mukenji; bua nanku, wakafila njila buetu patutshivua batudila mu tshipela.

4 Ne tuakatudila mu tshipela bua mutantshi wa bidimu bia bungi, eyowa, mena bidimu muanda mukulu mu tshipela.

5 Ne tuakalua ku bulaba butuvua tubikila ne Buvula, bua bualu bua bimuma biawu bivula ne kabidi buitshi bua muitu; ne bintu bionsu ebi bivua bilongolodibua kudi Mukalenga bua katufu to. Ne tuakamona mbuwa, utuakabikila ne Ileantumu, tshidi mu diandamuna dia miakulu tshiamba ne mâyi a bungi.

6 Ne biakalua ne tuakâsa ntenta yetu ku muelelu wa mbuwa; ne nansha mutuvua bakenga ne ntatu ya bungi ne malu makola a bungi, eyowa, mena bia bungi bua ne katuvua mua kubifunda bionsu to, tuakasanka menamena patuakalua ku muelelu wa mbuwa; ne tuakabikila muaba ewu ne Buvula, bua bualu bua bimuma biawu bivula.

7 Ne biakalua ne kunyima kua mema, Nefi, muikala mu bulaba bua Buvula bua mutantshi wa matuku a bungi, dîyi dia Mukalenga diakalua kundi, diamba: Juka, ne ndâku ku mukuna. Ne biakalua ne ngakajuka ne ngakabanda ku mukuna, ne ngakabila kudi Mukalenga.

8 Ne biakalua ne Mukalenga wakakula kundi, wamba: Newenza buatu, ku mushindu ungakuleja, bua nya ne bantu beba dinsambu dia mâyi â.

9 Ne ngakamba: Mukalenga, kunyi kungaya bua kupeta mabua a kuengulula, bua ngenza biamua bia mudimu bua kuenza buatu ku mushindu uwandeji?

10 Ne biakalua ne Mukalenga wakangambila kumvua ne bua kuya bua kupeta mabua, bua ngenza biamua bia mudimu.

11 Ne biakalua ne mema, Nefi, ngakenza mubanza wa kupupula nawu kapia, ne biseba bia nyama; ne kunyima kua mema muenza mubanza, bua ngikala ne bia kupupula nabi kapia, ngakatûtakaja mabua abidi bua ntemesha kapia.

12 Bualu Mukalenga kavua ne apa mulekela ne tutemesha kapia kavula to, bu mutuvua tuenza luendu mu tshipela; bualu wakamba: Nemvuija biakudia bienu bishema, bua ne kanubilambi to;

13 Ne nengikala kabidi bukenka buenu mu tshipela; ne nendongolola njila kumpala kuenu, bikalabi ne nenulama mikenji yanyi; bua nanku, monsu munualama mikenji yanyi nenulombodibua ku bulaba bulaya; ne nenumanya ne nudi nulombodibua kundi.

14 Eyowa, ne Mukalenga wakamba kabidi ne: Kunyima kua nuenu bafika mu bulaba bulaya, nenumanya ne mema, Mukalenga, ndi Nzambi; ne mema, Mukalenga, ngakanupatuisha ku dibutuka; eyowa, ne mema ngakanupatula ku bulaba bua Yelushalema.

15 Bua nanku, mema, Nefi, ngakenza monsu kulama mikenji ya Mukalenga, ne ngakakankamija bana betu ba baluma bua kuikala ne lulamatu ne dinanukila.

16 Ne biakalua ne ngakenza biamua bia mudimu bia mabua amvua muengulula ku dibua.

17 Ne pakamona bana betu ba baluma ne mvua pabuipi ne kuenza buatu, bakabanga kunnungena, bamba: Muanetu wa baluma udi mupota, bualu udi wela meji ne udi mua kuenza buatu; eyowa, ne udi kabidi wela meji ne udi mua kusabuka mâyi manena â.

18 Ne nanku bana betu ba baluma bakandiwula, ne bakajinga ne kabakuatshi mudimu to, bualu kabakitabuija ne mvua mua kuenza buatu to; nansha kabakitabuija ne mvua mulongeshibua kudi Mukalenga to.

19 Ne mpindiewu biakalua ne mema, Nefi, ngakanyingalala menamena bua bualu bua dipapa dia mitshima yabu; ne mpindiewu pakamonabu ne ngakabanga kunyingaladibua bakasanka mu mitshima yabu, mua ne basankila pa mutu panyi, bamba: Tuvua bamanya ne kuvua makuenza buatu to, bualu bua tuvua bamanya ne kuvua ne bujunguludi to; bua nanku, kuena mua kukumbaja mudimu munena nanku to.

20 Ne udi bu tatuetu, mupambuisha kudi meji masenji a mu mutshima wenda; eyowa, watulombodi pambelu pa bulaba bua Yelushalema, ne tudi batambakana mu tshipela bua bidimu bia bungi ebi; ne bakaji betu bakenza midimu bikola, bikala banena ne mafu; ne badi balela bana mu tshipela ne bakenga bintu bionsu, amu pa kumbusha lufu; ne bivua mua kuikala bitamba bimpa bu bobu bafua kumpala kua kupatukabu ku Yelushalema pamutu pa kukengabu ntatu eyi.

21 Monayi, bidimu bia bungi ebi tuakakenga mu tshipela, tshikondu tshituvua mua kuikala tusanka ne bintu bietu ne bulaba bua bupianyi buetu; eyowa, ne tuvua mua kuikala ne disanka.

22 Ne tudi bamanya ne bantu bavua mu bulaba bua Yelushalema bavua bantu bakana; bualu bavua balama mikandu ne mêyi a Mukalenga, ne mikenji yenda yonsu, bilondeshila ku mikenji ya Mose; bua nanku, tudi bamanya ne badi bantu bakana; ne tatuetu wakabadiwula, ne watulombodi kula bualu bua tudi tumvuila mêyi enda; eyowa, ne muanetu wa baluma udi bu mudiye. Ne ku mushindu wa ngakuilu ewu bana betu ba baluma bakatunungena ne kutudiwulabu.

23 Ne biakalua ne mema, Nefi, ngakakula kudibu, ngamba: Nudi nuitabuija ne batatuetu, bavua bikala bana ba Isalele, bavua mua kumbushibua mu bianza bia Bena Ejipitu bu bobu kabayi bumvuila mêyi a Mukalenga to anyi?

24 Eyowa, nudi nutshinka ne bavua kupatuishibua mu bupika, bu Mukalenga kayi mupesha Mose mukenji ne abapatula mu bupika anyi?

25 Mpindiewu nudi bamanya ne bana ba Isalele bavua mu bupika; ne nudi bamanya ne bavua bedibua bujitu bua midimu, buvua buikala bukola bua kuambula; bua nanku, nudi bamanya ne bivua bikengela kuikala bualu buimpa buabu, ne bapatuishibua mu bupika.

26 Mpindiewu nudi bamanya ne Mose uvua mupeshibua mukenji kudi Mukalenga bua kuenza mudimu munena awu; ne nudi bamanya ne ku dîyi dienda mâyi a Mbuwa Mukunza akabuluka eku ne eku, ne bakapitamu pa malaba mûma.

27 Kadi nudi bamanya ne Bena Ejipitu bakafua mu Mbuwa Mukunza, bavua bikala misumba ya basalayi ya Palô.

28 Ne nudi bamanya kabidi ne bakadîshibua ne mana mu tshipela.

29 Eyowa, ne nudi bamanya kabidi ne Mose, ku dîyi bilondeshila ku bukola bua Nzambi buvua kudiye, wakatûta dibua, ne kuakalopoka mâyi, bua ne bana ba Isalele bakamana nyota yabu.

30 Ne nansha muvuabu balombodibua, Mukalenga Nzambi wabu, Musungidi wabu, uya kumpala kuabu, ubalombola mu munya ne ubapesha bukenka butuku, ne wenza malu onsu buabu avua akengedibua bua muntu kupeta, bakadipapisha mitshima ne bakadifofomija meji, ne kupenda Mose ne Nzambi mulelela ne moyo.

31 Ne biakalua ne bilondeshila ku dîyi dienda wakababutula; ne bilondeshila ku dîyi dienda wakabalombola; ne bilondeshila ku dîyi dienda wakabenza malu onsu buabu; ne kakuvua bualu nansha bumua buenzeka to amu bikala ku dîyi dienda.

32 Ne kunyima kua basabuka musulu wa Yadene wakabapesha bukitu ne ku dipata dia bantu ba mu bulaba, eyowa, tô ne ku dibatangalaja ku dibutuka.

33 Ne mpindiewu, nudi nutshinka ne bana ba mu bulaba ebu, bavua bikala mu bulaba bua dilaya, bavua bikala bipatshibua kudi batatuetu, nudi nutshinka ne bavua bakana anyi? Monayi, ndi ngamba kunudi, To.

34 Nudi nutshinka ne batatuetu bavua bua kusungidibua kubapita bikala bu bobu bikala bakana anyi? Ndi ngamba kunudi, To.

35 Monayi, Mukalenga udi wangata bantu bonsu momumua; udi muakana udi usuibua kudi Nzambi. Kadi monayi, bantu aba bakabengela muaku onsu wa Nzambi, ne bakaboba mu malu mabi; ne tshiwudi tshia tshiji tshia Nzambi tshivua pa mutu pabu; ne Mukalenga wakabatshipila bulaba, ne kububenesha bua batatuetu; eyowa, wakabatshipilabu tô ne ku dibutuka diabu, ne wakabubenesha bua batatuetu tô ne ku dipeta diabu dia bukola pa mutu pabu.

36 Monayi, Mukalenga udi mufuka buloba bua bantu basombamu; ne udi mufuka bana benda bua bâsamu.

37 Ne udi ujula tshisamba tshiakana, ne ubutula bisamba bia bena bubi.

38 Ne udi ulombola bakana kula mu malaba a mushinga, ne bena bubi udi ubutula, ne ubatshipila bulaba bua bualu buabu.

39 Yeya udi ne bukôkeshi mûlu mu diûlu, bualu bua didi nkuasa wenda wa butumbi, ne buloba ebu budi tshitekelu tshia makasa enda.

40 Ne udi unanga bikala nenda bu Nzambi wabu abu. Monayi, uvua munanga batatuetu, ne muenza tshipungidi nabu, eyowa, mena Abalahama, Isaka, ne Yakoba; ne wakavuluka bipungidi biakenzayi; bua nanku, wakabapatula mu bulaba bua Ejipitu.

41 Ne wakabalulamija mu tshipela ne mulangala; bualu bua bakapapisha mitshima yabu, mena bu nuenu; ne Mukalenga wakabalulamija bua bualu bua malu mabi abu. Wakatuma nyoka ya mbûka ya lulengu munkatshi muabu; ne kunyima kua basumibua wakalongolola mushindu wa ne bôndopibua; ne mudimu uvuabu ne tshia kuenza uvua kutangila; ne bua bualu bua bupepela bua mushindu ewu, anyi buteketa buawu, kuvua ba bungi bakafua.

42 Ne bakapapisha mitshima yabu ku musangu ne musangu, ne bakapenda Mose, ne Nzambi kabidi; nansha nanku, nudi bamanya ne bakalombodibua ku bukola buenda budi kabuyi kufuanyikija mu bulaba bua dilaya.

43 Ne mpindiewu, kunyima kua malu onsu â, tshikondu tshiakalua tshiakaluabu bena bubi, eyowa, pabuipi ne ku diboba; ne ntshiena mutuishibua ne lelu kabena pabuipi ne kubutuka; bualu ndi mumanya ne dituku nedilua diabutukabu bulelela, amu pa kumbusha bakesa tshianana, bâpatudibua mu bukuatshibu.

44 Bua nanku, Mukalenga wakapesha tatuanyi mukenji ne aya mu tshipela; ne Bena Yuda kabidi bakakeba bua kuangata moyo wenda; eyowa, ne nudi kabidi bakeba bua kuangata moyo wenda; bua nanku, nudi bashipianganyi mu mitshima yenu ne nudi bu mudibu.

45 Nudi ne lukasa bua kuenza malu mabi kadi lujoku bua kuvuluka Mukalenga Nzambi wenu. Nuamonyi muanjelu, ne wakakula kunudi; eyowa, nuakumvua dîyi dienda ku musangu ne musangu; ne uvua muakula kunudi ne dîyi diteketa dikesa, kadi kanutshivua ne tshiumvuilu to, bua ne kanuvua mua kumvua mêyi enda to; bua nanku, wakakula kunudi bu mudi dîyi dia dikubakuba, divua dinyungusha buloba bu ne buvua mua kuabuluka pankatshi-nkatshi.

46 Ne nudi bamanya kabidi ne ku bukola bua bukitu bua dîyi dienda udi mua kuenzeja buloba ne bujimina; eyowa, ne nudi bamanya ne ku dîyi dienda udi mua kuvuija miaba ya binabina ilua milandakana, ne miaba milandakana neitshibuluka. Ô, pashisha, bua tshinyi bidi ne, nudi mua kuikala ne bapapa nanku mu mitshima yenu?

47 Monayi, anyima wanyi udi mupandika ne dipampakana bua bualu buenu, ne mutshima wanyi udi ukenga; ndi ntshina ne kanulu kuimanshibua bua kashidi. Monayi, ndi muwula ne Nyuma wa Nzambi, mua ne mubidi wanyi kawena ne makanda to.

48 Ne mpindiewu biakalua ne pangakamba mêyi â bakamfîkila tshiji, ne bakajinga kunkupa mu ndondu ya mbuwa; ne bu muakaluabu bua kutua bianza biabu pambidi panyi, ngakakula kudibu, ngamba: Mu dîna dia Nzambi wa Bukitu Bonsu, ndi nupesha mukenji ne kanundengi to, bualu ndi muwula ne bukola bua Nzambi, mena ne ku divingutula dia musunyi wanyi; ne ewu onsu watua bianza bienda pambidi panyi neafubidila mena bu disela diûma; ne nealua tshianana kumpala kua bukola bua Nzambi, bualu Nzambi neamutûta.

49 Ne biakalua ne mema, Nefi, ngakabambila ne kabavua ne bua kunungena kabidi tatuabu nansha; nansha kabavua ne bua kumpala mudimu wabu, bualu Nzambi uvua mumpesha mukenji bua ngenza buatu.

50 Ne ngakamba kudibu: Bikala Nzambi mumpesha mukenji bua kuenza malu onsu â mvua mua ku’enza. Biampeshaye mukenji ne ngamba kudi mâyi â, luaku buloba, nealua buloba; ne bingamba nanku, nebienjibua.

51 Ne mpindiewu, bikala Mukalenga ne bukola bunena nanku, ne udi wenza bishima bia bungi munkatshi mua bana ba bantu, munyi mudiyi kayi mua kundongesha to, bua kuenza buatu?

52 Ne biakalua ne mema, Nefi, ngakamba malu a bungi kudi bana betu ba baluma, mua ne bakapuwishibua ne kabavua mua kukokangana nanyi to; anyi kabakakima kuntua bianza biabu anyi kundenga ne minu yabu to, mena bua mutantshi wa matuku a bungi. Mpindiewu kabakakima kuenza nanku to bua kabalu kufubidila kumpala kuanyi, bualu Nyuma wa Nzambi uvua ne bukola bupita; ne nanku uvua muenza pa mutu pabu.

53 Ne biakalua ne Mukalenga wakamba kundi: Ôlola tshianza tshieba kabidi kudi bana benu ba baluma, ne kabakufubidila kumpala kueba to, kadi nembanyungusha, Mukalenga udi wamba, ne nanku nengenza, bua bamanya ne ndi Mukalenga Nzambi wabu.

54 Ne biakalua ne ngakôlola tshianza tshianyi kudi bana betu ba baluma, ne kabakafubidila kumpala kuanyi to; kadi Mukalenga wakababukula, mena bilondeshila ku dîyi divuaye muakula.

55 Ne mpindiewu, bakamba: Tudi bamanya bulelela ne Mukalenga udi neba, bualu tudi bamanya ne tshidi bukola bua Mukalenga budi butubukula. Ne bakapona panshi kumpala kuanyi, ne bavua pabuipi ne kunkukuila, kadi ntshiakabalekela to, ngamba: Ndi muanenu wa baluma, eyowa, mena muakunyenu wa baluma; bua nanku, kukuilayi Mukalenga Nzambi wenu, ne nemekayi tatuenu ne mamuenu, bua matuku ikala mala mu bulaba buanupesha Mukalenga Nzambi wenu.