1 Ne biakalua ne Mukalenga wakampesha mukenji, bua nanku ngakenza bitata bia biamua bua ne nkanunapu miandiku ya bantu banyi. Ne pa bitata bingakenza ngakakanunapu miandiku ya tatuanyi, ne kabidi ngendu yetu mu tshipela, ne mambi a tatuanyi; ne kabidi mambi a bungi anyi nkayanyi ngaka’akanuna pa mutu pabi.

2 Ne ntshivua mumanya to diba dingakabienza ne nempeshibua mukenji kudi Mukalenga bua kuenza bitata ebi; bua nanku, miandiku ya tatuanyi, ne bulondanganyi bua batatuenda, ne tshitupa tshinena tshia bienzedi bietu mu tshipela idi mikanunyibua pa bitata abi bia kumpala bimvua muakula; bua nanku, malu avua menzeka kumpala kua mema ntshiyi muanji kuenza bitata ebi, adi, mu bulelela, mafundibua nangananga pa bitata bia kumpala.

3 Ne kunyima kua mema muenza bitata ebi ku mukenji, mema, Nefi, ngakapeta mukenji ne disadila ne mambi, bitupa binena bia patoka ne bia mushinga biabi, bivua ne bua kufundibua pa bitata ebi; ne malu avua mafundibua avua ne bua kulamibua bua dilongeshibua dia bantu banyi, bâsa mu bulaba, ne kabidi bua tuipatshila tukuabu tua lungenyi, tuipatshila tudi tumanyibua kudi Mukalenga.

4 Bua nanku, mema, Nefi, ngakenza miandiku pa bitata bikuabu, bidi bikala biamba mulubu wanyi bidi bifila mulubu mupita bunena wa mvita ne makokangana ne dinyanguka dia bantu banyi. Ne ngakenza nanku, ne ngakapesha bantu banyi mukenji wa tshivuabu ne bua kuenza kunyima kua mema muya; ne bitata ebi bivua ne bua kufidibua ku lukongu lua bantu lumua ne kudi lukuabu, anyi kudi muambi umua ne kudi mukuabu, tô ne mikenji ya panyima ya kudi Mukalenga.

5 Ne mulubu wa dienza dianyi dia bitata ebi neufidibua kunyima eku; ne pashisha, monayi, nentungunuka bilondeshila ku bindi muamba; ne ndi ngenza nanku bua tshitupa tshinena tshia malu a tshijila alamibua bua dimanya dia bantu banyi.

6 Nansha nanku, ntshiena mfunda bualu nansha bumua pa bitata to amu bikala ne ndi ngela meji ne budi bua tshijila. Ne mpindiewu, bingatupakana, mena muakatupakana ba kala; kabiena ne ndi ndibingisha to bua bualu bua bantu bakuabu, kadi bua bualu bua buteketa budi munda muanyi, bilondeshila ku musunyi, ndi musua kudibingisha.

7 Bualu malu adi bamua bantu bangata ne mushinga munena, bubidi kudi mubidi ne anyima, bakuabu badi bâmona tshianana ne bâdiatakaja mu makasa. Eyowa, mena Nzambi muina wa Isalele bantu badi bamudiatakaja mu makasa abu; ndi ngamba badiatakaja mu makasa abu kadi ndi musua kuakula mu mêyi makuabu—badi bamumona tshianana, ne kabayi bumvuila dîyi dia mibelu yenda to.

8 Ne monayi, udi ulua, bilondeshila ku mêyi a muanjelu, kunyima kua bidimu nkama isambombo katshia ku tshikondu tshiakumbuka tatuanyi ku Yelushalema.

9 Ne ba pa buloba, bua bualu bua malu mabi abu, ne bamumona ne udi tshintu tshia tshianana; bua nanku badi bamukuma mfimbu, ne udi utshitaba; ne badi bamutûta, ne udi utshitaba. Eyowa, badi bamutuila mata, ne udi utshitaba, bua bualu bua kalolu kenda ka dinanga ne bulekelelu buenda kudi bana ba bantu.

10 Ne Nzambi wa batatuetu, bavua bapatudibua mu Ejipitu, mu bupika, ne kabidi bavua bakubibua mu tshipela kudiye, eyowa, Nzambi wa Abalahama, ne wa Isaka, ne Nzambi wa Yakoba, udi udifila, bilondeshila ku mêyi a muanjelu, bu muntu, mu bianza bia bantu bena bubi, bua kubandishibua kûlu, bilondeshila ku mêyi a Zenoke, ne bua kutshiamakajibua, bilondeshila ku mêyi a Neume, ne bua kujîkibua mu lukita, bilondeshila ku mêyi a Zenose, avuaye muakula bitangila matuku asatu a mîdima, ikala tshimanyinu tshia lufu luenda tshipeshibua kudi bâsomba mu bidila bia mu mbuwa abu, tshipeshibua nangananga kupita kudi badi bikala ba ku nzubu wa Isalele abu.

11 Bualu nanku muambi wakakula: Mukalenga Nzambi bushuwa neakumbula nzubu yonsu wa Isalele ku dituku adi, bamua ne dîyi dienda, bua bualu bua buakana buabu, ne ku disanka diabu dinena ne lupandu luabu, ne bakuabu ne makubakuba ne mipenyi bia bukola buenda, ku tshipepela, ku kapia, ne ku muishi, ne ku dibungibungi dia mîdima, ne ku diunzulula dia buloba, ne ku mikuna yajudibua.

12 Ne malu onsu â bushuwa adi ne tshia kulua, muambi Zenose udi wamba. Ne mabua a pa buloba neapanduluka; ne bua bualu bua mikemu ya buloba, Nyuma wa Nzambi neenza pa mutu pa ba bungi ba bamfumu ba mu bidila bia mu mbuwa bua batua tshikemu, bamba ne: Nzambi wa bifukibua udi ukenga.

13 Muambi udi wamba ne: Ne bua badi ku Yelushalema abu, nebanyasudibua kudi bantu bonsu, bualu bua badi batshiamakaja Nzambi wa Isalele, ne babewula mitshima yabu, bikala babenga bimanyinu ne malu a dikema, ne bukola ne butumbi bia Nzambi wa Isalele.

14 Muambi udi wamba ne: Ne bualu bua badi babewula mitshima yabu, ne badi bapetula Wa Tshijila wa Isalele, nebatambakana mu musunyi, ne bafua, ne balua muanu ne muneku, ne nebakinyibua munkatshi mua bisamba bionsu.

15 Muambi udi wamba ne: Nansha nanku, palua dituku adi didibu kabayi kabidi babewula mitshima yabu ku Wa Tshijila Wa Isalele nansha, pashisha neavuluka bipungidi bidiye muenza kudi batatuabu.

16 Eyowa, pashisha neavuluka bidila bia mu mbuwa; bilondeshila ku mêyi a muambi Zenose, Mukalenga udi wamba ne, eyowa, ne bantu bonsu badi bikala ba ku nzubu wa Isalele, nembasangisha kumbukila ku matengu anayi a buloba.

17 Eyowa, ne buloba bonsu ne bumona lupandu lua Mukalenga, muambi udi wamba; tshisamba tshionsu, bisa bionsu, muakulu onsu, ne bantu bonsu nebabeneshibua.

18 Ne mema, Nefi, ngafundidi bantu banyi malu â, bua pamuapa ndi mua kubitabujija ne bavuluka Mukalenga Musungidi wabu.

19 Bua nanku, ndi ngakula kudi nzubu wa Isalele yonsu, bikalabi ne badi bapeta malu â.

20 Bualu monayi, ndi ne ditatshisha mu nyuma, didi dintshiokesha mena ne manungu anyi onsu adi mateketa, bua badi ku Yelushalema; bualu bu Mukalenga kayi ne lusa, mu dindeja bibatangila, mena bu muvuaye muleja bambi ba kala, mvua mfua panyi.

21 Ne bushuwa wakaleja kudi bambi ba kala malu onsu bibatangila; ne wakaleja kabidi kudi ba bungi bidi bitutangila; bua nanku, bidi bikengedibua ne tumanya bibatangila, bualu bidi bifundibua pa bitata bia tshiamua tshia kalabi.

22 Mpindiewu biakalua ne mema, Nefi, ngakalongesha bana betu ba baluma malu â; ne biakalua ne ngakabala malu a bungi kudibu, avua makanunyibua pa bitata bia kalabi, bua bamanya bitangila bienzedi bia Mukalenga mu malaba makuabu, munkatshi mua bantu ba kala.

23 Ne ngakababadila malu a bungi avua mafundibua mu mikanda ya Mose; kadi bua ne mbitabujija bikola bipita kabidi bua kuitabuija Mukalenga Musungidi wabu ngakabadila bivua bifundibua kudi muambi Yeshaya; bualu ngakafuanyikija mifundu yonsu kutudi, bua ne bikala bua tshipeta tshimpa tshietu ne dimanya dietu.

24 Bua nanku ngakakula kudibu, ngamba: Umvuayi mêyi a muambi, nuenu badi bikala tshishadi tshia nzubu wa Isalele, ditamba didi dikala dituka, umvuayi mêyi a muambi, avua mafundila nzubu wa Isalele yonsu, ne afuanyikijayi kunudi nkayenu, bua ne nuikala ne ditekemena momumua ne bana benu banudi batuka kudibu; bualu ku mushindu ewu muambi udi mufunda.