1 Ne biakalua ne tuvua basangisha pamua mishindu yonsu ya mamînu a nkuaminu yonsu, bubidi bua nteta ya nkuaminu yonsu, ne kabidi bua mamînu a mamuma a nkuaminu yonsu.

2 Ne biakalua ne pavua tatuanyi mutshikala mu tshipela wakakula kutudi, wamba: Monayi, ndi mulota tshilota; anyi, mu mêyi makuabu, ndi mumona tshimônyi.

3 Ne monayi, bua bualu bundi mumona, ndi ne bualu bua kusankila mu Mukalenga bua bualu bua Nefi ne kabidi bua Sama; bualu ndi ne bualu bua kutshinka ne bobu, ne kabidi ba bungi ba ku ndelanganyi yabu, nebapandishibua.

4 Kadi monayi, Lamana ne Lemuele, ndi ne ditshina menamena bua bualu buenu; bualu monayi, ndi ngela meji ne ngakamona mu tshilota tshianyi, tshipela tshia mîdima ne bufîka.

5 Ne biakalua ne ngakamona muntu, ne uvua muvuala nkanzu mutoka; ne wakalua ne kuimana kumpala kuanyi.

6 Ne biakalua ne wakakula kundi, ne kundomba ne mmulonda.

7 Ne biakalua ne mumvua mundonda ngakadimona ne mvua mu muaba mutupu wa mîdima ne bufîka.

8 Ne kunyima kua mema muenza luendu bua mutantshi wa meba a bungi mu mîdima, ngakabanga kusambila Mukalenga ne amfuila lusa, bilondeshila ku bungi bua midimu mimpa ya lusa luenda.

9 Ne biakalua ne kunyima kua mema musambila Mukalenga ngakamona mpata munena ne mualabala.

10 Ne biakalua ne ngakamona mutshi, wa tshimuma tshivuabu mua kujinga bua kupesha muntu disanka.

11 Ne biakalua ne ngakaya ne ngakadia tshimuma tshiawu; ne ngakamona ne tshivua tshishema bikola, kupita bionsu bimvua mulabula kumpala. Eyowa, ne ngakamona ne tshimuma tshiawu tshivua tshitoka, kupita butoka bionsu bimvua mumona kumpala.

12 Ne bu mumvua ndia tshimuma tshiawu tshiakuwuja anyima wanyi ne disanka dinena menamena; bua nanku, ngakabanga kujinga ne dîku dianyi ditshidia padi; bualu mvua mumanya ne tshivuabu mua kujinga kupita tshimuma tshikuabu tshionsu.

13 Ne pangakakupa mesu ku mpenga yonsu, ne pamuapa mmona dîku dianyi padi, ngakamona musulu wa mâyi; ne uvua upueka, ne uvua pabuipi ne mutshi wa tshimuma tshimvua muikala ndia.

14 Ne ngakatangila bua kumona kuvuawu uvuila; ne ngakamona mutu wawu katantshi kîpi; ne ku mutu wawu ngakamona mamuenu Saliya, ne Sama, ne Nefi; ne bavua bimana bu ne kabavua bamanya kuvuabu ne bua kuya to.

15 Ne biakalua ne ngakababikila ne tshianza; ne kabidi ngakabambila ne dîyi dikola ne bavua ne bua kulua kundi, ne kudia tshimuma, tshivuabu mua kujinga kupita tshimuma tshikuabu tshionsu.

16 Ne biakalua ne bakalua kundi ne bakadia pabu tshimuma.

17 Ne biakalua ne ngakajinga ne Lamana ne Lemuele balua ne badia pabu tshimuma; bua nanku, ngakakupa mesu ku mutu kua musulu, ne pamuapa ndi mua kubamona.

18 Ne biakalua ne ngakabamona, kadi bakabenga kulua kundi ne kudia tshimuma to.

19 Ne ngakamona mulonda wa tshiamua, ne uvua mudiôlola ku muelelu wa musulu, ne ulombola ku mutshi kumvua muimana.

20 Ne ngakamona kabidi njila mufinakana ne mubumbakana, uvua ulua buludi ne ku mulonda wa tshiamua, mena ku mutshi kumvua muimana; ne uvua kabidi ulombola ku mutu wa mpokolo, mena ku mpata munena ne mualabala, bu ne bivua bikala buloba.

21 Ne ngakamona bisumbu bia bantu kabiyi kubala, ba bungi babu bavua basêsa kumpala, bua kufika ku njila uvua ulombola ku mutshi kumvua muimana.

22 Ne biakalua ne bakasemena, ne kubuela mu njila uvua ulombola ku mutshi.

23 Ne biakalua ne kuakajuka dibungi dia mîdima; eyowa, mena dibungi dia mîdima dinena menamena, mua ne bavua babuela mu njila bakajimija njila wabu, bua ne bakalaluka ne kujimina.

24 Ne biakalua ne ngakamona bakuabu basêsa kumpala, ne bakalua ne bakakuata lusongu lua mulonda wa tshiamua; ne basêsa kumpala mu dibungi dia mîdima, balamata mulonda wa tshiamua, mena tô ne pakaluabu ne kudia tshimuma tshia ku mutshi.

25 Ne kunyima kua badia tshimuma tshia ku mutshi bakakupa mesu bu ne bumvua bundu.

26 Ne kabidi ngakakupa mesu ku mpenga yonsu, ne ngakamona, ku luseka lukuabu lua musulu wa mâyi, nzubu munena ne mualabala; ne uvua muimana bu ne uvua mûlu, kûlu mula kupita buloba.

27 Ne uvua muwula ne bantu, bonsu bakola ne bansonga, baluma ne bakaji; ne mushindu wabu wa kuvuala uvua mupita mushila; ne bavua bamueneka bu bavua baseka ne bafunkuna minu kudi bavua balua ku tshimuma ne bavua bikala batshidia abu.

28 Ne kunyima kua balabula tshimuma bakumvua bundu, bua bualu bua bavua babapetula; ne bakapambuka bua kuya mu njila mikandika ne bavua bajimina.

29 Ne mpindiewu mema, Nefi, ntshiena ngakula mêyi onsu a tatuanyi to.

30 Kadi, mu tshikosu tshia kufunda, monayi, wakamona misumba mikuabu ya bantu isêsa kumpala; ne yakalua ne kukuata ku lusongu lua mulonda wa tshiamua; ne yakasêsa kumpala mu njila wayi, itungunuka kukuata ku mulonda wa tshiamua bikola, tô ne pakaluabu ne kudiupuila ne kudia tshimuma tshia mutshi.

31 Ne wakamona kabidi misumba mikuabu mikala ibabata njila wayi mitangila ku nzubu munena ne mualabala.

32 Ne biakalua ne ba bungi bakafua mu ndondu ya mpokolo; ne ba bungi bakajimina ku mesu kuenda, bikala balaluka mu njila mienyi.

33 Ne minena ivua misumba ivua mibuela mu nzubu muenyiawu. Ne kunyima kua babuela mu nzubu awu bakafunkuna munu wa nsênda kundi ne bavua bikala badia tshimuma kabidi; kadi katuakateya ntema kudibu to.

34 Â avua mêyi a tatuanyi: Bualu bonsu bakabateya ntema bakapambuka.

35 Ne Lamana ne Lemuele kabakadia tshimuma to, muakamba tatuanyi.

36 Ne biakalua ne kunyima kua tatuanyi muakula mêyi onsu a mu tshilota anyi tshimônyi tshienda, avua mikala a bungi, wakamba kutudi, bua bualu bua malu â avuaye mumona mu tshimônyi, wakatshina menamena bua Lamana ne Lemuele; eyowa, wakatshina ne kabalu kumbushibua ku mpala kua Mukalenga.

37 Ne wakabakankamija pashisha ne dinanga dionsu dia muledi muimpa, ne bumvuila mêyi enda, bua ne pamuapa Mukalenga ikala ne lusa kudibu, ne kabimanshi to; eyowa, tatuanyi wakabayisha.

38 Ne kunyima kua yeya kubayisha, ne kabidi kuamba ku Nyuma kudibu bintu bia bungi, wakabalomba bua kulama mikenji ya Mukalenga; ne wakalekela kuakula kudibu.