1 Cunan riqui, yalishca jipa pambamanda tucui llactapuracuna uyarca cai nishcacunata, caipaj testigo carca. Cai cuzascunata nishca jipa chulunllagu tiarca pambapi tauca horascunata;

2 Shina jatun carca llactapuracunapaj manllari paicunapaj quijaricuna, ayayai nishpa caparicuna saquirirca chingachimanda paicunapaj aillupuracunata picuna huañuchishca carca; chaimanda chulunllagu tiarca tucui pambapi tauca horascunata.

3 Yalishca jipa cutishuj shimi shamurca llactapuracunapaman, tucui llactapuracuna uyarca, caipaj testigo carca, nishpa:

4 Oh canguna cai jatun llactacunapaj llactapuracuna urmashcacuna can, picuna Jacobpaj cati aillucuna can, ari, picuna Israelpaj huasi can, mashna viaje ñuca cangunata tandachishcani imashna shuj atalpa tandachin paipaj uchilla pollogucunata paipaj alas ucupi, ñuca cangunata micuchishcanipash.

5 Cutin, mashna viaje ñuca cangunata tandachishcani imashna shuj atalpa tandachin paipaj uchilla pollogucunata paipaj alas ucupi, ari, Oh Israelpaj huasipaj llactapuracuna, urmashcanguichi; ari, Oh Israelpaj huasipaj llactapuracuna, canguna Jerusalénpi causashcacuna, imashna canguna urmashcanguichi; ari, mashna viaje ñuca cangunata tandachishcani imashna shuj atalpa tandachin paipaj uchilla pollogucunata, canguna na munarcanguichi.

6 Oh canguna Israelpaj huasi picunata ñuca huacaichishcani, mashna viaje ñuca cangunata tandachisha imashna shuj atalpa tandachin paipaj uchilla pollogucunata paipaj alas ucupi, canguna arrepentirijpi, ñucapaman tigramujpi tucui shungupaj munaihuan.

7 Ashtahuangari na cajpica, Oh Israelpaj huasi, cangunapaj causana pushtucuna imapash illajman tigranga taitacunaman cushca imaura conveniopaj punlla pactangacaman.

8 Cunan yalishca jipa llactapuracuna cai shimicunata uyashca jipa, riqui, paicuna cutin callarirca huacai, ayayai nishpa capari chingachimanda paicunapaj aillupuracunata, ali rijsicunatapash.

9 Yalishca jipa shina quimsa punllacuna yalirca. Cai carca tutamanda, yanamanga chingarirca alpa jahuallamanda, alpa chujchui saquirirca, rumicuna faquirinajuj saquirirca, manllanayai ayayai nishpa caparicuna saquirirca, tucui manllanayai culun nijcuna yalirca.

10 Pamba cutin tandanajurca, shinlliyarca; llactapuracuna maijan causa huacaichishcacunapaj quijaricuna, huacaicuna, ayayai nishpa caparicuna saquirirca; paicunapaj quijaricuna cushijuiman tigrarca, paicunapaj llaquiricuna alabanzaman, pagui nishpapash Apunchij Jesucristoman, paicunapaj Jatun Causachijta.

11 Shina cunangaman achil quilcashcacuna pactarca imata achil villachijcuna parlashca carca.

12 Cai carca llactapuracunamanda ashtahuan ali rurajcuna maijanguna quishpirishca carca, cai carca paicuna maijan chasquirca achil villachijcunata, na paicunata rumicunahuan macarca; cai carca paicuna maijan santocunapaj na yahuarta jicharca, huacaichishcacuna carca—

13 Paicuna huacaichishca carca, na huashajushca carca, na pambashcapash alpapi; paicuna carca na langai tucushca jatun mama cochapaj ucu ucupi; paicuna carca ninahuan na rupashca, na huañurcapash llashahuan llapi tucushpa; paicuna carca na apai tucushcacuna acapanahuan; paicuna carca cushni llujshijun samaipaj yanallapapash munaiman na curishcacuna.

14 Cunan, maijan liin, yuyaipi chasquinga; achil quilcashcacunata charishpa, aliguta yachajuichi, ricushpa, ricui tucui cai huañuicuna, tucuchicuna ninahuan, cushnihuan, ushashca tamiacunahuan, acapanacunahuan, alpa pascaricunahuan paicunata chasquingapa, tucui cai cuzascuna nachu pactachingapa can tauca achil villachijcunapaj achil villachishcacunata.

15 Riqui, ñuca cangunaman nini, Ari, tauca testificashca cai cuzascunamanda Cristo shamunamanda, huañuchishcapash carca paicuna cai cuzascunata testificaimanda.

16 Ari, achil villachij Zenós testificarca cai cuzascunata, Zenocpash cai cuzascunamanda parlarca, ñucanchimandapacha testificarca, maijan puchu canchi paicunapaj cati aillu.

17 Riqui, ñucanchi taita Jacobpash testificarca Josépaj shuj puchu cati aillumanda. Riqui, nachu ñucanchi canchi Josépaj shuj puchu cati aillu? Cai cuzascuna imata testifican ñucanchimanda, na quilcashca can cai bronce jirru fangacunapi imata ñucanchi taita Lehi Jerusalénmanda apamurca?

18 Yalishca jipa quimsa chunga chuscu huata tucurinapi, riqui, ñuca cangunaman ricuchisha Nefipaj llactapuracuna maijan huacaichishca carca, maijan Lamanita shutichishcacunapash, maijan huacaichishca carca, paicunaman jatun favorcunata ricuchirca, jatun achil yachishcacunatapash paicunapaj umacunapi jicharca, shinashpa chairalla Cristopaj jahua pachaman vitsiashca jipalla pai ciertopacha paicunapaman ricurimurca—

19 Paicunaman paipaj cuerpota ricuchishpa, achil yachachishpapash; paipaj achil yachachishcapa shuj tandachishpa quilcashca jipalla cushca canga. Chaimanda cunanbi ñuca nishcacunata tucuchini.