1 Yalishca jipa tiarca shuj uyari shimi tucui alpapi causajcunapi, tucui cai alpa jahuallapi, caparishpa:

2 Ay, ay, ay, cai llactapuracuna; ay tucui cai alpapi causajcuna maijan arrepentirishcacunalla na; imashpa aya asin, paipaj ángelcuna cushijun, ñuca llactapuracunapaj juyailla churicuna, ushicuna huañuimanda; cai can paicunapaj na ali ruraicunamanda, millanayaicunamandapash paicuna urmashca can!

3 Riqui, chai jatun llacta Zarahemla ninahuan ñuca rupachishcani, chaipi causajcunatapash.

4 Riqui, chai jatun Moroni llactata ñuca huashajuchircani jatun mama cocha ucu ucupi, chaipi causajcunapash ahogarichun.

5 Riqui, chai jatun Moroníah llactata alpahuan quilpashcani, chaipi causajcunatapash, pacangapa paicunapaj na ali ruraicunata, paicunapaj millanayaicunatapash ñuca ñavimanda, achil villachijcunapaj, santocunapajpash yahuar ama ashtahuan shamuchun paicunapaj contra.

6 Riqui, Gilgalpaj llactata ñuca huashajuchircani, chaipi causajcunatapash pambachircani alpa ucu ucupi.

7 Ari, Oníahpaj llactata chaipi causajcunatapash, Mocumpaj llactatapash chaipi causajcunatapash, Jerusalén llactatapash chaipi causajcunatapash; chai pushtucunapi yacucunata churashcani, pacangapa paicunapaj na ali ruraicunata, millanayaicunatapash ñuca ñavimanda, achil villachijcunapaj, santocunapajpash yahuar ama ashtahuan shamuchun paicunapaj contra.

8 Riqui, Gadiandipaj llacta, Gadiomnapaj llacta, Jacobpaj llacta, Gimgimnopaj llacta, tucui caicunata ñuca huashajuchishcani, uchilla urcucunata rurashcani pugru pushtucunapaj randi; chaipi causajcunatapash ñuca pambashcani alpa ucu ucupi, pacangapa paicunapaj na ali ruraicunata, millanayaicunatapash ñuca ñavimanda, achil villachijcunapaj, santocunapajpash yahuar ama ashtahuan shamuchun paicunapaj contra.

9 Riqui, chai jatun llacta Jacobugat, maipi causashca carca Jacob jatun mandajpaj llactapuracuna, ñuca ninahuan rupachircani paicunapaj juchacunamanda, paicunapaj millanayaicunapash, imacuna carca tucui alpapaj tucui na ali ruraicunamanda yali, paicunapaj pacalla huañuchicunamanda, tandanajuicunapash; caimanda carca paicuna tucuchirca ñuca llactapuracunapaj sumaj causaita, alpapaj gobiernotapash; chaimanda ñuca paicunata rupachircani, tucuchingapa ñuca ñavimanda, achil villachijcunapaj, santocunapajpash yahuar ama ashtahuan shamuchun paicunapaj contra.

10 Riqui, Lamánpaj llactata, Joshpaj llactata, Gadpaj llactata, Kishkumenpaj llactata, ñuca ninahuan rupachircani, chaipi causajcunatapash, paicunapaj na ali ruraicunamanda achil villachijcunata llujchishpa cachaipi, rumicunahuan macarca maijanda ñuca cachamurcani paicunaman villachun paicunapaj na ali ruraicunamanda, paicunapaj millanayaicunamandapash.

11 Tucuillata paicuna calpachirca, nipipash na tiarca paicunapapi ali rurajcuna, ninata cachamurcani, tucuchircanipash, paicunapaj na ali ruraicunamanda, millanayaicunamandapash pacashca cachun ñuca ñavimanda, achil villachijcunapaj, santocunapajpash yahuar picunata ñuca cachamurcani ñucata ama caparichun alpamanda paicunapaj contra.

12 Tauca jatun tucuchicuna cai alpaman ñuca shamuchishcani, cai llactapuracunapaj jahuaman, paicunapaj na ali ruraicunamanda, paicunapaj millanayaicunapash.

13 Oh tucui maijan quishpichishcacuna canguna paicunata yali ashtahuan ali rurajcuna caimanda, nachu cunan ñucapaman tigramugringuichi, arrepentiringuichi cangunapaj juchacunamanda, crijman tigranguichi, ñuca cangunata jambingapa?

14 Ari, ciertopacha cangunaman nini, ñucapaman shamujpica cangunahuan charinguichi mana tucurina causaita. Riqui, ñuca shungumanda llaquij rigra cangunapaman chutashca can, pipash shamujpica ñuca chasquisha; achilyachishca canga maijan ñucapaman shamujcuna.

15 Riqui, ñuca cani Jesucristo Diospaj Churi. Ñuca rurarcani jahua pachacunata, cai pachatapash, tucui cuzascuna caicunapi tiajtapash. Ñuca carcani Taitahuan callarimanda. Ñuca cani Taitapi, Taita ñucapi can; ñucapi Taitaca paipaj shutita jatunyachircapash.

16 Ñuca propiocunapaman shamurcani, ñucapacuna na chasquihuarca. Achil quilcashcacuna ñuca shamunamanda pactashca can.

17 Mashna ñucata chasquishcacunata, paicunata saquishcani Diospaj churicunaman tigrachun; shina rurasha maijan ñuca shutipi crijcunaman, riqui, ñucamanda jatun causachina shamun, ñucapi Moiséspaj catichunbacha saquishcacuna pactashca can.

18 Ñuca cani micha, cai pachapaj causai. Ñuca cani Alfa Omegapash, callari tucuripash.

19 Canguna ñucaman ashtahuan na cuhuanguichichu yahuar jichaita; ari, cangunapaj sacrificiocuna, cangunapaj rupachina ofrendacuna saquirishca canga, ñuca na chasquisha nima cangunapaj sacrificiocunata, cangunapaj rupachina ofrendacunatapash.

20 Canguna cunguichi shuj sacrificiota ñucaman shuj faquirishca shungu, shuj cazuj amujlla espíritu. Maijan ñucapaman shamun shuj faquirishca shunguhuan, shuj cazuj amujlla espíritu, paita ñuca bautizasha ninahuan, Espíritu Santohuanbash, Lamanitacunatashna, paicunapaj femanda ñucapi paicuna crij tigrai punllapi, bautizashca carca ninahuan, Espíritu Santohuanbash, paicuna na yacharca caita.

21 Riqui, ñuca shamushcani cai pachaman apamungapa cai pachaman jatun causachinata, cai pachapaj juchacunamanda quishpichingapa.

22 Chaimanda, pipash arrepentirin, ñucapaman shamun uchilla huahua laya, paita ñuca chasquisha, shinacunapaj Diospaj reino can. Riqui, shina caicunamanda ñuca causaita cushcani, cutin japishcanipash; chaimanda arrepentirichi, ñucapaman shamuichi canguna alpa tucurinacuna, quishpirishca caichi.