1 Yalishca jipa chunga pusaj huata tucurinapi chai shuhuacunapaj macanajuj runacuna macanajungapa prepararishca carca, urai shamui callarirca uchilla urcucunamanda ñapash llujshimurca, urcucunamandapash, jichushca pambacunamandapash, shinlli pushtucunamandapash, paicunapaj pacalla pushtucunamandapash, pambacunata mishai callarirca, ishcandi ima urai pambapi cajta, ima vichai pambapi cajtapash, japi callarircapash tucui pambacunata imata Nefitacuna jichushpa saquishcacunata, llactacunatapash imata imapash illata saquishcacunatapash.

2 Ashtahuangari riqui, sacha animalcunallapash na tiarca nacashpa huañuchingapa chai pambacunapi maipi Nefitacuna jichushpa saquirca, shuhuacuna nima huañuchina na tiarca ashtahuangari jichushca pambapilla.

3 Shuhuacuna na causai ushanalla carca ashtahuangari jichushca pambapilla, micuna illaimanda; Nefitacuna paicunapaj pambacunata imapash illata saquishca carca, tandachishca carca paicunapaj ataju llamacunata, paicunapaj huagracunata, tucui paicunapaj minishtirishcapachacunata, paicuna shuj pushtupillla carca.

4 Chaimanda, shuhuacuna imashna shuhuana na tiarca, micunata charingapapash, imashpapash tucui ricujta macanajungapa Nefitacunahuan shamushpalla; Nefitacuna shuj pushtupilla carca, shina taucapacha carca, paicunapaj micunacunata alichishca charircapash, caballocuna, huagracuna, ataju llamacuna paipuralla tandachishca, canchis huatacunata causai ushangapa, chai huatacunapi shuyarca shuhuacunata tucuchingapa alpa jahuallamanda; shina chunga pusaj huata yalishca carca.

5 Yalishca jipa chunga iscun huatapi Giddiani yachaj chayarca cai minishtirishca cajta Nefitacunahuan macanajungapa rina, paicuna causai ushana shuj laya na tiarca ashtahuangari shujpata japishpa, shuhuashpa, huañuchishpapash.

6 Paicuna manllarca alpa jahuallaman caiman chaiman ringapa shinashpa murucunata tarpungapa, Nefitacuna shamushpa, huañuchingamanda; chaimanda Giddiani paipaj macanajuj runacunata rurachunbacha saquishcata curca chai huatapi Nefitacunahuan macanajungapa richun.

7 Yalishca jipa paicuna shamurca macanajungapa; cai carca sujta quillapi; riqui, jatun, manllanayaipash punlla carca imaura paicuna macanajungapa shamurca; paicuna shuhuacunashna churajushca carca; shuj llama carata paicunapaj lomocunapi charirca, yahuarpi javirishcacuna carca, ajcha illa umacuna carca, caicunapaj jahuapi carca uma jirrucuna; jatun, manllanayai ricuri carca Giddianipaj macanajuj runacuna, paicunapaj macanajungapa churajuicunamanda, paicuna yahuarpi javirishcacuna caimanda.

8 Yalishca jipa Nefitacunapaj macanajuj runacuna Giddiani macanajuj runacunata imaura ricushpa, tucuilla alpaman urmarca, caparircapash paicunapaj mañaita Apunchij paicunapaj Diosta, paicunata quishpichichun, cacharichichunbash paicunata napacha ricunayachijcunapaj maquicunamanda.

9 Yalishca jipa imaura Giddianipaj macanajuj runacuna caita ricushpa capari callarirca shinlli shimihuan, cushijuimanda, paicuna yarca Nefitacuna manllaihuan urmashca cajta paicunapaj macanajuj runacunata manllaimanda.

10 Ashtahuangari cai cuzaspica paicuna engañai tucurca, Nefitacuna paicunata na manllarca; ashtahuangari paicuna manllarca paicunapaj Diosta, paita mañarca huacaichichun; chaimanda, imaura Giddianipaj macanajuj runacuna calpamujpi paicuna chimbapurangapa preparashca carca; ari, Apunchijpaj shinllipi paicunata chasquirca.

11 Macanajui callarirca sujta quillapi; jatun, manllanayai carca cai macanajui, ari, jatun, manllanayai carca cai huañuchi, shinashpa cai nimaura na ricushca shina jatun huañuchi tucui Lehipaj llactapuracunapi pai Jerusalénmanda llujshimushcamanda.

12 Masqui manllachicunata, juramentocunatapash imata Giddiani rurashca carca, riqui, Nefitacuna paicunata misharca, shinashpa huashaman tigrachirca paicunapaj ñaupamanda.

13 Yalishca jipa Gidgiddoni mandarca paipaj macanajuj runacunata paicunata catichun carutapacha jichushca pamba manñacunacaman, maijanbash ñanbi paicunapaj maquicunapi urmashcacunataca ama quishpichun; shina paicunata catirca, huañuchircapash, jichushca pamba manñacaman, imaura Gidgiddonipaj rurachunbacha saquishcata pactachingacaman.

14 Yalishca jipa Giddiani, pimi shinlliyarca, na manllaihuan macanajurcapash, cati tucurca pai calpajpi; imashpa irqui cashpa ashtacata macanajuimanda japi tucurca, huañurcapash. Shina Gidiani shuhua tucurirca.

15 Yalishca jipa Nefitacunapaj macanajuj runacuna cutin tigrarca paicunapaj seguro cana pushtuman. Yalishca jipa cai chunga iscun huata yalirca, shuhuacuna cutin macanajungapa na shamurca; ishcai chunga huatapipash na cutin shamurca.

16 Ishcai chunga shuj huatapi macanajungapa na shamurca, ashtahuangari tucui ladocunata shamurca Nefipaj llactapuracunata chaupipi churangapa; paicuna yarca Nefipaj llactapuracunata paicunapaj pambacunamanda jarcashpa, tucui ladomanda chaupipi churashpa, paicunata tucui canllamanda privilegiocunata jarcashpaca, paicunamandallata curichun imashna paicuna munashcahuan.

17 Cunan paicuna ajllashca carca paicunallata cutishuj pushajta, paipaj shuti carca Zemnaríah; chaimanda cai Zemnaríah chaupipi churachirca.

18 Ashtahuangari riqui, cai Nefitacunapaj ali carca; imashpa cai na ushana carca shuhuacuna taucapacha punllacunata chaupipi cana Nefitacunata imatapash rurachichun, paicunapaj ashtaca micunacunamanda imata paicuna alichishcarca,

19 Shuhuacunapaj ashalla micunacunamanda; riqui, paicuna nimata na charirca ashtahuangari aichatalla paicuna causangapa, chai aichata jichushca pambapi tarirca;

20 Yalishca jipa jichushca pambapi tucurirca animalcunata huañuchina shinashpa shuhuacuna yarjaimanda ña tucurigrinajurca.

21 Nefitacuna purishpa catinajurca punllapash tutapash, macanajuj runacunata urmachishpa, huaranga huarangacunata huañuchishpa.

22 Shina cai tigrarca Zemnaríahpaj llactapuracunapaj munai paicunapaj planda saquina, jatun tucuchimanda ima shamurca paicunapaman tutapash, punllapash.

23 Yalishca jipa Zemnaríah paipaj llactapuracunata mandarca paicunamandallata chaupimanda llujshichun, vichai alpacunapaj caru caru pushtucunapi purishpa rirca.

24 Cunan, Gidgiddoni paicunapaj planda yachashpa, paicunapaj na shinlli cajta yachashpa micunata munaimanda, jatun huañuchi paicunapapi rurashca carca, chaimanda paipaj macanajuj runacunata cacharca tutapi, paicunapaj tigramuna ñanda jarcarca, paipaj macanajuj runacunata tigramuna ñanbi churarca.

25 Caita rurarca tutapi, shuhuacunata ñaupashpa rirca, shina caya punlla imaura shuhuacuna purishpa ri callarijpi, Nefitacunapaj macanajuj runacunahuan tuparirca, ñaupapi huashapipash.

26 Shuhuacuna maijan uraipipash carca paicunapaj tigrana pushtucuna jarcashca carca. Tucui cai cuzascunata rurashca carca Gidgiddoni mandajpi.

27 Tiarca tauca huarangacuna Nefitacunaman paicunamandallata prezucuna curirca, paicunamanda puchucuna huañurca.

28 Paicunapaj pushaj, Zemnaríah, japi tucushpa, yurapi huarcushca carca, ari, yura tucuripi pai huañungacaman. Paicuna imaura huañungacaman huarcushpa yurata alpaman shitarca, caparirca shinlli shimihuan, nishpa:

29 Apunchij alchishpa charichun paipaj llactapuracunata ali ruraicunapi, shungupaj achilpipash, urmachingapa alpaman tucui maijan paicunata huañuchingapa munajcunata ushaimanda, pacalla tandanajunacunamandapash, imashna cai runa alpaman urman laya.

30 Paicuna cushijurca cutin caparirca shujlla shimihuan, nishpa: Abrahampaj Dios, Isaacpaj Dios, Jacobpaj Dios huacaichichun cai llactapuracunata ali ruraicunapi, shina imashna paicunapaj Diospaj shutipi huacaichichun mañajpi.

31 Yalishca jipa llujshimurca tucuilla shujlla laya, cantashpa, alabaicunapi paicunapaj Diosta jatun cuzasmanda imata paicunamanda rurashca carca, alchishpa charishpa paicunata napacha ricunayachijcunapaj maquicunapi urmanamanda.

32 Ari, paicuna caparirca: Hosanna Jahua Jahuapacha Diosman. Paicuna caparirca: Achilyachishca cachun Tucui Ushaita Charij Apunchij Diospaj shuti, Jahua Jahuapacha Dios.

33 Paicunapaj shungucuna cushijuihuan junda carca, ashtaca viquicuna taliringacaman, Diospaj jatun alicaimanda paicunata napacha ricunayachijcunapaj maquicunata cacharichimanda; paicuna caita yacharca paicunapaj arrepentimientomanda, paicunapaj humildadmanda cacharichishca carca mana tucurina tucurinamanda.