1 Yalishca jipa pai mandarca taucapachacunata achil mañaita saquichun, paipaj discípulocunatapash. Paicunata mandarca shungucunapi ama achil mañaita saquichun.

2 Paicunata mandarca jatarichun paicunapaj chaquicunahuan shayarichun. Paicuna jatarirca, paicunapaj chaquicunahuan shayarirca.

3 Yalishca jipa cutin tandata faquirca caita achilyachirca, discípulocunaman micuchun cararca.

4 Paicuna micushca jipa mandarca paicuna tandata faquichun, taucapachacunaman carachun.

5 Taucapachacunaman carashca jipa paicunaman cararca vinota ufiachun, mandarcapash taucapachacunaman carachun.

6 Cunan, discípulocunapash, taucapachacunapash tandatapash, vinotapash na apashca carca;

7 Ashtahuangari pai ciertopacha paicunaman cararca tandata micuchun, vinotapash ufiachun.

8 Paicunaman nirca: Pai maijan micun cai tandata micun ñucapaj cuerpota paipaj almapa; pi maijan ufian cai vinota ufian ñucapaj yahuarta paipaj almapa; paipaj alma nimaurapash na yarjachinga nimaurapash na yacunayachingapash, ashtahuangari jundashca canga.

9 Cunan, tucuilla taucapachacuna micushca, ufiashca jipa, riqui, paicuna jundasha carca Espírituhuan; tucuilla shujlla shimi caparirca, Jesústa adorarcapash, pita paicuna ricurca, uyarcapash.

10 Yalishca jipa paicuna tucuilla Jesústa adorashca jipa, paicunaman nirca: Riqui cunan ñuca tucuchini rurachunbacha saquishcata imata Taita ñucata mandahuarca cai llactapuracunamanda, maijanguna can Israelpaj huasipaj shuj puchu.

11 Yarichi ñuca cangunaman parlashcani, nishcanipash imaura Isaíaspaj shimicuna pactachishca cajpi—riqui caicuna quilcashca can, caicunata cangunapaj ñaupapi charinguichi, chaimanda caicunata mascaichi—

12 Ciertopacha, ciertopacha, ñuca cangunaman nini, imaurca pactashca cashpa shina pactachishca can conveniota imata Taita rurarca paipaj llactapuracunaman, Oh Israelpaj huasi.

13 Shina puchucuna, picunata caiman chaiman cachai tucushca alpa jahuallapi canga, tandanajushca canga indi llujshij ladomanda, indi huashajuj ladomandapash, uraimandapash, vichaimandapash; paicuna apamushca canga Apunchij paicunapaj Diosta yachanaman, pimi paicunata jatun causachishca.

14 Taita mandahuarca ñuca carachun cai alpata, cangunapa chasquishca cachun.

15 Ñuca cangunaman nini, Gentilcuna na arrepentirijpica achil yachishca jipa imata paicuna chasquinga, paicuna calpachishca jipa ñuca llactapuracunata—

16 Shina canguna, maijanguna canguichi Jacobpaj huasipaj shuj puchu, paicunapamanda richi; canguna paicunapaj chaupipi canguichi picuna taucacuna canga; canguna paicunapapi canguichi shuj león laya sacha animalcunapi, shuj viñaj león laya llama atajucunapi, pimi, chaupita yalijpi sarun, uchillacunapi fitin, pipash na cacharichi ushan.

17 Quiquinba maqui vichai alsaringa tucui llaquichicunapaj jahuapi, tucui napacha ricunayachijcuna huañuchishca canga.

18 Ñuca tandachisha ñuca llactapuracunata imashna shuj runa tandachin paipaj fanga gavillapi.

19 Ñuca rurasha ñuca llactapuracunata pihuan Taita conveniota rurashca, ari, ñuca rurasha quiquinba jirru cachuta, ñuca rurasha quiquinba bronce sillucunata. Tauca llactapuracunata faquichisha; ñuca achilyachisha Apunchijman paicunapaj mirashcata, Apunchijman paicunapaj tucui alpamanda minishtirishcapachata. Riqui, ñuca cani pimi caita rurani.

20 Yalishca jipa, Taita nin, ñuca alicaipaj espada paicunapaj jahuapi huarcushca canga chai punlla; imashpapash arrepentirijllapi paicunapaj jahuapi na urmanga, nin Taita, ari, Gentilcunapaj tucui jatun llactacunapaj jahuapi.

21 Yalishca jipa ñuca llactapuracunata shayachisha, Oh Israelpaj huasi.

22 Riqui, cai llactapuracuna ñuca shayachisha cai alpapi, pactachingapa conveniota imata ñuca rurarcani cangunapaj taita Jacobhuan; cai canga shuj Mushuj Jerusalén. Jahua pachapaj ushaicuna cai llactapuracunapaj chaupipi canga; ari, ñucapash cangunapaj chaupipi casha.

23 Riqui, ñuca cani pimanda Moisés parlarca, nishpa: Shuj achil villachij Apunchij canguna Dios cangunapamanda jataringa cangunapaj huauquicunamanda, ñucapaj laya; paita canguna uyanguichi tucui cuzascunapi pai imata nijta. Cai yalinga tucui alma maijan na uyaj chai achil villachijta llactapuracunapamanda anchuchi tucushca canga.

24 Ciertopacha ñuca cangunaman nini, ari, tucui achil villachijcuna Samuelmanda maijan jipa catij, imashna taucacuna parlashca can, ñucamanda testificashca can.

25 Riqui, canguna canguichi achil villachijcunapaj huahuacuna; canguna canguichi Israelpaj huasimanda; canguna canguichi conveniomanda imata Taita rurarca cangunapaj taitacunahuan, nishpa Abrahamman: Quiquinba cati aillucunapi alpapaj tucui reinocuna achilyachishca canga.

26 Taita ñucatara jatarichihuashca, cachamuhuashca cangunata achilyachichun anchuchishpa cangunata shujllangaman paicunapaj na ali ruraicunamanda; canguna conveniomanda huahuacuna caimanda—

27 Canguna achil yachishca cashca jipa shina pactachishca canga Taitapaj convenio imata pai rurarca Abrahamhuan, nishpa: Quiquinba cati aillucunapi alpapaj tucui reinocuna achilyachishca canga—Espíritu Santota jichangacaman Gentilcunapaj jahuapi ñuca ruraimanda, cai achil yachi Gentilcunapaj jahuapi paicunata ruranga tucuita yali shinllicuna, chaimanda caiman chaiman calpachinga ñuca llactapuracunata, Oh Israelpaj huasi.

28 Paicuna shuj asti canga cai alpa llactapuracunapa. Shina cashpapash, paicuna chasquishca jipa ñucapaj tucui quishpiringapa villaicunata, shina paicunapaj shungucunata ñucapaj contra shinlliyachijpica ñuca tigrachisha paicuna na ali ruraicunata paicunapaj propio umacunaman, Taita nin.

29 Ñuca yarisha conveniota imata ñuca rurarcani ñuca llactapuracunahuan; ñuca conveniota rurashcani paicunahuan ñuca paicunata tandachisha ñucapaj propio punllapi, paicunaman cutin cungapa paicunapaj taitacunapaj alpata paicunapaj chasquishca cachun, imami can Jerusalénpaj alpa, cai can cushapacha nishca alpa paicunaman mana tucurinacaman, Taita nin.

30 Yalishca jipa punlla shamun, imaura ñucapaj tucui quishpiringapa villaicuna paicunaman yachachishca canga;

31 Paicuna ñucapi cringa, ñuca cajta Jesucristo, Diospaj Churi, achil mañangapash Taitata ñucapaj shutipi.

32 Shina paicunapaj cuidashpa chapaj runacuna shinlli caparinga, shujlla shimi tandanajushpa cantanga; paicuna ricunga ñavi ñavi.

33 Shina Taita cutin paicunata tandachinga, Jerusalénda paicunaman cunga paicunapaj chasquina cachun.

34 Shina paicuna cushijui callaringa—Cantaichi tandanajushpa, Jerusalénmanda jichushca pushtucuna; Taita cushichishca paipaj llactapuracunata, pai Jerusalénda jatun causachishca can.

35 Taita paipaj achil rigrata llujchishpa ricuchishca tucui jatun llactacunapaj ñavicunapi; tucui alpa tucurinacaman ricunga Taitapaj quishpichita; Taita, ñucapash shujlla canchi.

36 Shina yalichun apamunga imami quilcashca can: Rijchari, rijchari cutin, shinlli caita churajui, Oh Sión; churajui juyailla churajunacunata, Oh Jerusalén, achil llacta, cunanmanda ashtahuan na shamungachu quiquinbaman incircuncisa, mapallapash.

37 Quiquinllata chaspiri alpamanda; jatari, tiari, Oh Jerusalén; cachariri quiquinba cungapi huatashcacunamanda, Oh huatai tucushcashna Siónpaj ushi.

38 Apunchijca shina nin: Cangunamandallata jaturishcanguichi nimapa, culqui illa jatun causachishca canguichi.

39 Ciertopacha, ciertopacha, ñuca cangunaman nini, ñuca llactapuracuna yachanga ñuca shutita; ari, chai punlla paicuna yachanga ñuca cani pimi parlani.

40 Shina paicuna ninga: Mashna juyailla urcucunapi can chaquicuna pimi ali mushujcunata apamun, sumaj causaita villachin; ali mushujcunata apamun paicunaman alipa, quishpirinata villachin; Siónman nin: Quiquinba Dios reinan!

41 Shina yachachinga: Anchurichi, anchurichi, llujshichi caimanda, ama tacarichi mapalla cajcuna; cai chaupimanda llujshichi; mapa illa caichi maijan Apunchijpaj vasota apajcuna.

42 Ñapash na ringuichi calpaihuanbash na; Apunchij cangunapaj ñaupata ringa, Israelpaj Dios cangunapaj ñaupata cuidaj canga.

43 Riqui, ñuca sirvij runa yachaita ruranga; pai jatun alicachishca canga, alicachishcapash ali jahuapi churashca canga.

44 Imashna taucacuna quiquinda manllarirca—paipaj ricuri shina manllanayai carca, tucui runata yali, paipaj ricuri runacunapaj churicuna yali—

45 Shina pai tauca jatun llactacunaman chispachinga; paipaj ñaupapi jatun mandajcuna paicunapaj shimicunata vichanga, ricunga imata paicunaman na villashcata; imata paicuna na uyashcata yachanga.

46 Ciertopacha, ciertopacha, ñuca cangunaman nini, tucui cai cuzascuna ciertopacha shamunga, imashna Taita ñucaman mandashcapash. Shina cai convenio imata Taita conveniota rurashca paipaj llactapuracunahuan pactashca canga; shina Jerusalén ñuca llactapuracunahuan causashca canga, cai canga paicunapaj chasquina pamba.