1 Yalishca jipa Jesús cai shimicunata nishca jipa, parlarca paipaj discípulocunaman, shujllangaman, nishpa paicunata: Imata canguna ñucapamanda munanguichi, Taitapaman ñuca rishca jipa?

2 Tucuilla parlarca, ashtahuangari quimsalla na, nishpa: Ñucanchi munanchi runapaj huatacunata causashca jipa, ñucanchi achil yachachina, imapa quiquin ñucanchita cayashcangui tucurijpi, ñucanchi ñapash quiquinbaman shamui ushangapa quiquinba reinopi.

3 Pai nirca paicunaman: Achilyachishca canguichi canguna cai cuzasta munashca cashpa ñucapamanda; chaimanda, canguna canchis chunga ishcai huatacunata charishpa ñucapaman shamunguichi ñuca reinopi; ñucahuan samanata taringuichi.

4 Paicunaman parlashca jipa, quimsacunapaman tigrarirca, paicunaman nirca: Imata rurachun munanguichi cangunamanda, Taitapaman rishca jipa?

5 Paicuna llaquirirca paicunapaj shungucunapi, paicuna manllaita charirca parlangapa ima cuzasta paicuna munarca.

6 Pai paicunaman nirca: Riqui, ñuca yachani cangunapaj yuyaicunata, canguna munashca canguichi cuzasta imata Juan, ñuca juyashca, pimi carca ñucahuan ñuca achil yachachipi, nara ñuca vichai alsashca cajpi Judíocunahuan, ñucamanda munarca.

7 Chaimanda, ashtahuan achilyachishca canguichi, canguna nimaura huañuita malinguichi; ashtahuangari causanguichi ricungapa tucui cuzascunata rurashcata Taitapamanda runacunapaj huahuacunaman, imaura tucui cuzascuna pactashca canga Taitapaj munaimanda, imaura ñuca shamusha ñuca punchapambapi jahua pachapaj ushaihuan.

8 Canguna nimaura huañuipaj nanaicunahuan na llaquichishca canguichi; ashtahuangari imaura ñuca shamujpi ñuca punchapambapi canguna tigrachishca canguichi shuj ñavi sipuripi cai huañunamanda na huañunaman; shina canguna achilyachishca canguichi ñuca Taitapaj reinopi.

9 Cutin, canguna na nanaita charinguichi imaura aichapi causanguichi, llaquitapash na ashtahuangari cai pachapaj juchacunamandalla; tucui cai munai ñuca rurasha cuzasmanda imata ñucapamanda munashcamanda, canguna munashcanguichi runacunapaj almacunata ñucapaman apamungapa, cai pachapi causanajushpallata.

10 Caimanda canguna tucui cushijuita charinguichi; tiaringuichi ñuca Taitapaj reinopi; ari, cangunapaj cushijui junda canga, imashna Taita cuhuashca tucui cushijuita; canguna canguichi imashna ñuca cani, ñuca cani imashna Taita can; Taita, ñuca shujlla canchi;

11 Espíritu Santo testifican Taitamanda, ñucamandapash; Taita cun Espíritu Santota runacunapaj huahuacunaman, ñucamanda.

12 Yalishca jipa Jesús cai shimicunata parlashca jipa, pai tacarirca paicunata shujllangaman paipaj dedohuan, ashtahuangari quimsa maijan saquirinacunata na, shina pai rirca.

13 Riqui, jahua pachacuna pascashca carca, paicuna jahua pachaman apai tucushca carca, ricurca, uyarcapash na parlanalla cuzascunata.

14 Cai na saquishca carca paicuna parlachun; paicunaman na curcapash ushaita parlachun cuzascunata imata paicuna ricurca, uyarcapash;

15 Paicuna na villai usharca, cuerpopi cashca na cuerpopi cashcatapash; paicunapi cai ricurirca shuj transfiguración laya, cambiarishca carca cai aichapaj cuerpomanda na huañuna canaman, chaimanda paicuna ricui usharca Diospaj cuzascunata.

16 Ashtahuangari yalishca jipa paicuna cutin achil yachachirca alpa jahuallapi; shina cashpapash paicuna na achil yachachirca cuzascunamanda imata paicuna uyashca, ricushcatapash, rurachunbacha saquishcamanda imata cushca carca paicunaman jahua pachapi.

17 Cunan, paicuna huañuna, na huañuna cashcata, paicunapaj transfiguración punllamanda, ñuca na yachani;

18 Ashtahuangari caitalla ñuca yachani, tandachishca quilcashcamanda imata cushca cashca—paicuna rirca alpa jahuallaman, achil yachachirca tucui llactapuracunaman, tandachishpa iglesiaman mashna crijcunata paicunapaj yachachishcacunata; paicunata bautizashpa, imashna bautizarishca carca Espíritu Santota chasquirca.

19 Paicuna cárcelman shitai tucushca carca iglesiaman na cajcunahuan. Cárcelcunapash na chari usharca paicunata, caicuna ishcaipi faquirishca carca.

20 Paicuna alpaman shitashca carca; ashtahuangari paicuna chugrichirca alpata Diospaj shimihuan, shinashpa paipaj ushaihuan paicuna cacharirishca carca alpa ucumanda; chaimanda minishtirishca utujucunata na allai usharca paicunata charingapa.

21 Quimsa viaje shuj jornoman paicuna shitai tucurca nima chugrita na chasquirca.

22 Ishcai viaje sacha animalcuna causaj ucuman shitai tucurca; riqui paicuna pujllarca sacha animalcunahuan shuj huahua laya chuchujuj llamaguhuan laya, nima chugrita na chasquirca.

23 Yalishca jipa shina paicuna rirca tucui Nefipaj llactapuracunapi, yachachirca Cristopaj quishpiringapa villaicunata tucui llactapuracunaman alpa jahuallapi; paicuna Apunchijpaman tigrarishca carca, Cristopaj iglesiaman tandanajushca carca, shina chai miraicunapaj llactapuracuna achilyachishca carca, Jesúspaj shimimanda.

24 Cunan ñuca, Mormón, villaicunata tucuchini cai cuzascunamanda asha tiempo.

25 Riqui, ñuca ña quilcagrijurcani paicunapaj shuticunata maijan nimaura huañuita na malina carca, ashtahuangari Apunchij na saquirca; chaimanda ñuca na quilcani, cai pachamanda pacajushcacuna caimanda.

26 Ashtahuangari riqui, ñuca paicunata ricushcani, paicuna ñucata achil yachachihuashca.

27 Riqui, paicuna Gentilcunapi canga, Gentilcuna paicunata na rijsinga.

28 Judíocunahuanbash canga, Judíocuna paicunata na rijsinga.

29 Yalinga, imaura Apunchij ali cajta yuyashpa paipaj yachaipi paicuna achil yachachichun tucui caiman chaiman chajchurishca Israelpaj tribucunata, tucui jatun llactacunata, reinocunata, shimi rimaicunata, llactapuracunatapash, paicunapamanda apamunga Jesúspaman tauca almacunata, paicunapaj munai pactashca canga, Diospaj convincente ushaimandapash ima can paicunapi.

30 Paicuna can Diospaj ángelcunashna, paicuna achil mañajpica Taitata Jesúspaj shutipi paicuna ricuchi ushan paicunamanda maijan runaman ali canaman.

31 Chaimanda, paicuna jatun juyailla ruraicunata ruranga, nara jatun shamui punlla imaura tucui llactapuracuna ciertopacha shayaringapacha Cristopaj ricushpa chasquichina jatun tiarina ñaupapi;

32 Ari Gentilcunapipash tianga shuj jatun juyailla rurai rurashca canga, chai ricushpa chasquichina punlla ñaupa.

33 Canguna charishpa tucui achil quilcashcacunata imata cushca shuj tandachishpa quilcashcata tucui juyailla Cristopaj rurashcacunamanda, Cristopaj shimicunamanda yachanguichi, cai cuzascuna ciertopacha shamungapacha.

34 Ay maijan na uyanga Jesúspaj shimicunata, maijan pai ajllashcacunata paicunapaman cachashca; maijan na chasquin Jesúspaj shimicunata maijan pai cachashcacunapaj shimicunatapash, paita na chasquin; chaimanda pai na chasquinga paicunata chai tucuri punllapi;

35 Ashtahuan alichari canman carca paicuna na nacishca cashpa. Yuyanguichichu na shina cachun saquirita shuj ofenderishca Diospaj alicaita, pimi sarui tucushca runacunapaj chaquicunahuan, chai laya quishpirina shamuchun?

36 Cunan riqui, imashna parlarcani maijan Apunchij ajllashcacunamanda, ari, quimsa picuna apai tucushca carca jahua pachacunaman, ñuca na yacharcani paicuna mapa illa cashcata huañunamanda na huañunaman—

37 Ashtahuangari riqui, ñuca quilcashca jipa, ñuca Apunchijta tapushcani, pai ricuchihuashca minishtirishcapacha can shuj cambio paicunapaj cuerpocunapi, nacashpa minishtirishcapacha canman carca huañuita malina.

38 Chaimanda, paicuna ama huañuita malichun shuj cambio tiarca paicunapaj cuerpocunapi, paicuna ama nanaita, llaquicunatapash charichun ashtahuangari cai pachapaj juchacunamandalla.

39 Cunan cai cambio na igual carca ima canahuan chai tucuri punllapi; ashtahuangari tiarca shuj cambio paicunapi, shinashpa Satanás na ushaita chari ushanga paicunapapi, pai na tentai ushan paicunata; paicuna achilyachishca carca aichapi, paicuna achil carca, alpapaj ushaicuna paicunata na chari ushachun.

40 Cai causaipi paicuna catinga imaura Cristopaj ricushpa chasquichina punllacaman; chai punlla paicuna chasquingapa shuj jatunbacha cambiota, chasqui tucungapa Taitapaj reinopi ashtahuan na llujshingapa, ashtahuangari causangapa Dios-huan mana tucurinacaman jahua pachacunapi.