1 Cunan yalishca jipa Nefitacunapaj llactapuracuna paicunapaj propio pambacunaman tigrarca ishcai chunga sujta huatapi, tucui runacuna, paipaj aillucunahuan, paipaj ataju llamacuna, paipaj jihua micuj animalcuna, paipaj caballocuna, paipaj huagracuna, tucui laya cuzascuna imapash paicunapaj cajcunahuan.

2 Yalishca jipa paicunapaj micunacuna alichishcata na tucuilla micushca carca; chaimanda paicuna tucuillata paicunahuan japirca na micushpa tucuchishcata, tucui paicunapaj paipuralla murucuna, paicunapaj curi, paicunapaj culqui, tucui paicunapaj juyailla cuzascuna, tigrarca paicunapaj propio pambacunaman, paicunapaj charishcacunapash, ishcandiman vichaiman, uraimanbash, ishcandiman vichai pambapi, urai pambapipash.

3 Paicuna pambacunata curca, chai shuhuacuna maijan shuj convenioman yaicushcacuna carca pambapaj sumaj causaita alichingapa, maijan Lamanitacuna cashpa catingapa munashcacuna carca, mashna cajta ricushpa, paicuna charichun, paicunapaj trabajohuan, imahuan causanata; shina paicuna shayachirca sumaj causaita tucui pambapi.

4 Paicuna cutin ali mirai callarirca, jatun caipash; ishcai chunga sujta, ishcai chunga canchis huatacuna yalirca, tiarca jatun orden pambapi; paicuna rurashca carca paicunapaj catichunbacha saquishcacunata pacta canahuan, alicaihuan.

5 Cunan nimapash na tiarca tucui pambapi jarcana llactapuracunata ali mirai catichun, imashpapash paicuna na alita rurajpilla.

6 Cunan cai carca Gidgiddoni, ricushpa chasquichij, Laconeo, maijan pushajcuna cachun ajllashcacunapash, picunami shayachishca carca cai jatun sumaj causaita pambapi.

7 Yalishca jipa tiarca tauca llactacuna cutin huasichishcacuna, tiarca tauca punda llactacuna alita cutin rurashca.

8 Tiarca tauca jatun ñanguna rurashcacuna, tauca ñangunapash, ima aparca shuj llactamanda cutishuj llactaman, shuj pambamanda cutishujman, shuj pushtumanda cutishujman.

9 Shina yalirca ishcai chunga pusaj huata, llactapuracuna sumaj causaita charishpa catirca.

10 Ashtahuangari yalishca jipa ishcai chunga iscun huatapi huaquin plituricuna tiai callarirca llactapuracunapi; huaquin jariyashpa alsaricuna, jariyaicuna paicunapaj ninan jatun charijyaicunamanda, ari, jatun na ricunayachishpa catijcunapash.

11 Pambapi tiarca tauca randishpa jatuj runacuna, tauca abogadocunapash, tauca oficialcunapash.

12 Llactapuracuna ajllari callarirca huajchacunapi, charijcunapi, imashna paicunapaj charijyashcamanda, yachajuita chari ushaimanda; ari, huaquinguna nimata na yachajcunaca carca huajchacuna caimanda, cutishujcuna ninan yachajuita chasquishca carca charijcuna caimanda.

13 Huaquinguna jariyaipi vichai alsarishca carca, cutishujcuna ninan humildecuna carca; huaquinguna tigrachirca napash shina cajta rimajpi chai rimaihuanllata, cutishujcuna chasquirca napash shina cajta rimaita, na ricunayachishpa catitapash, tucui laya llaquicunata, randi na tigrarcachu, cutin na plitushpa, ashtahuangari humildecuna carca Diospaj ñaupapi arrepentiringapa munanajujpash.

14 Shina tiai callarirca jatun na pacta cai tucui pambapi, shinashpa iglesia faquirishca cai callarirca; ari, shinashpa quimsa chunga huatapi iglesia faquishca carca tucui pambapi ashtahuangari shuj huaquinlla Lamanitacunapapi na, maijanguna crijman tigrashca carca ciertopacha feman; paicuna na caimanda anchuringapa munarca, paicuna shinllicuna carca, na shaijujcuna, na cuyurijcunapash, munajcuna Apunchijpaj rurachunbacha saquishcacunata utsialla alichingapa.

15 Cunan llactapuracunapaj cai na ali ruraicunamanda shina carca—Satanás jatun ushaita charirca, llactapuracunata tangachingapa rurachun tucui laya na ali ruraicunata, jariyaihuan punguirichun, inquitashpa mascachun ushaita, autoridadta, charijyanacunatapash, cai pachapaj yanga cuzascunatapash.

16 Shina Satanás llactapuracunapaj shungucunata aparca rurachun tucui laya na ali ruraicunata; chaimanda paicuna sumaj causaita cushijushcarca ashtahuangari huaquin huatacunallata.

17 Shina, quimsa chunga huata callaripi—llactapuracuna tauca huatacunata cacharishca caimanda apai tucushca cangapa ayapaj tentacióncunahuan pai maiman munashcaman, rurachun ima laya na ali ruraicunata pai munashcata—shina caipaj callaripi, quimsa chunga huata, paicuna manllanayai na ali ruraicunapi carca.

18 Cunan paicuna na juchata rurarcachu na yachaimanda, imashpa yacharca Diospaj munaita, cai paicunaman yachachishca cashca carca; chaimanda paicuna munashpapacha na Diosta cazurca.

19 Cunan cai carca Laconeopaj punllacunapi, Laconeopaj churi, imashpa Laconeo paipaj taitapaj tiarinapi carca chai huata llactapuracunata mandajurcapash.

20 Jahua pachamanda ruraipacha nishpa cachamushca runacuna tiai callarirca, llactapuracunapaman shayarimushpa tucui pambapi, yachachishpa, testificashpa na manllaihuan llactapuracunapaj juchacunamanda na ali ruraicunamanda, testificashpa paicunaman jatun causachinamanda imata Apunchij paipaj llactapuracunamanda ruranga, nacashpa shuj shimicunapi, Cristopaj cutin causarina; paicuna na manllaihuan testificarca paipaj huañui, llaquiricunatapash.

21 Cunan llactapuracunamanda taucacuna tiarca maijan ninandapacha fiñashca carca cai cuzascunata testificashcamanda; maijan fiñashcacuna carca ricushpa chasquichijcunapaj yali mandajcuna, maijan sumo sacerdotecuna cashcapash, abogadocuna; ari tucui maijan abogadocuna cashcacuna fiñashca carca maijan cai cuzascunata testificajcunahuan.

22 Cunan na tiarca abogado, ricushpa chasquichij, sumo sacerdote ushaita charij maijandapash ricushpa chasquichingapa huañuiman imashpapash paicunapaj ricushpa chasquichishca firmashca cajpi pambapaj gobernador.

23 Cunan tiarca tauca maijan testificarca Cristopaj cuzascunamanda maijan na manllaihuan testificashca, ricushpa chasquichijcuna japishca pacalla huañuiman churarca, paicunapaj huañui pambapaj gobernadorpaman na yachaj chayachirca paicuna huañushca jipacaman.

24 Cunan riqui, cai carca pambapaj catichunbacha saquishcacunapaj contrario, maijan runapash huañuiman churashca cana imashpapash pambapaj gobernadorpamanda autorizashcata charishpalla—

25 Chaimanda shuj quejari shamurca Zarahemlapaj pambaman, pambapaj gobernadorpaman, cai ricushpa chasquichijcunapaj contra pimi Apunchijpaj achil villachijcunata huañuiman ricushpa chasquichishca carca, na catichunbacha saquishcacunahuan.

26 Cunan yalishca jipa paicunata japishpa aparcapash ricushpa chasquichijpaj ñaupaman, ricushpa chasquichichun imata paicuna rurashcamanda, llactapuracuna cushca catichunbacha saquishcacunahuan.

27 Cunan yalishca jipa chai ricushpa chasquichijcuna tauca rijsicunata charirca, aillupuracunapash; puchucuna, ari, ashamanda tucuilla abogadocuna, sumo sacerdotecuna, paipuralla tandanajurca, chai ricushpa chasquichijcunapaj aillupuracunahuan quimirirca maijan catichunbacha saquishcacunahuan ricushpa chasquichi tucugrinajujhuan.

28 Paicuna caishuhuan chaishuhuan shuj convenioman yaicurca, ari, paicunaman punda cushca chai pactachinaman, ayapaj cai pactachi cushca carca, rurashcapash, ali rurajcunapaj contra tandanajungapa.

29 Chaimanda paicuna Apunchijpaj llactapurapaj contra tandanajurca, shuj convenioman yaicurca paicunata tucuchingapa, cacharingapa maijan huañuipaj culpable cajcunata alicaipaj ushaimanda, imata rurashca cana carca catichunbacha saquishcacunahuan.

30 Paicuna na cazurca catichunbacha saquishcacunata, paicunapaj llactapaj derechocunata; caishuhuan chaishuhuan shuj pactachinata rurarca gobernadorta tucuchingapa, pambapaj shuj jatun mandajta churangapa, pamba ashtahuan ama libertadta charichun ashtahuangari jatun mandajcunapaj munashcahuan saquirishca cachun.