1 Yalishca jipa imashna Jesúspaj discípulocuna purinajurca, yachachinajurca cuzascunata imata paicuna uyashca, ricushcapash carca, Jesúspaj shutipi bautizashpa, yalishca jipa discípulocuna tandanajushca carca shujllapash carca ninan achil mañaipi, ayunopipash.

2 Jesús cutin paicunapaman ricurirca, paicuna achil mañanajurca Taitata paipaj shutipi; Jesús shamurca paicunapaj chaupipi shayarirca, nirca: Imata munanguichi ñuca cangunaman cuchun?

3 Paicuna nirca: Apunchij, ñucanchi munanchi villachun shutita imahuan ñucanchi shutichishun cai iglesiata; caimanda fiñanajuicuna tian llactapuracunapi.

4 Apunchij paicunata nirca: Ciertopacha, ciertopacha, cangunaman nini, imashpata can cai llactapuracuna quijarin, fiñanajunbash cai cuzasmanda?

5 Nachu liishcanguichi achil quilcashcacunata, cai nin canguna apana canguichi cangunapaj jahuapi Cristopaj shutita, imami can ñuca shuti? Cai shutipi canguna shutichishca canguichi chai tucuri punllapi;

6 Maijan ñuca shutita apajcuna, catirian tucurinacaman, chaicuna quishpirishca canga chai tucuri punllapi.

7 Chaimanda, imatapash canguna ruranguichi, caita ruranguichi ñuca shutipi; chaimanda canguna shutichinguichi iglesiata ñuca shutipi; mañanguichi Taitata ñuca shutipi pai achilyachinga iglesiata ñucamanda.

8 Imashna cai canga ñuca iglesia canga ñuca shutita apashpalla? Shuj iglesia Moiséspaj shutita apan shina cai can Moiséspaj iglesia; nacashpa cai shutichishca can shuj runapaj shutipi shina cai can runapaj iglesia; ashtahuangari cai shutichishca cajpica ñuca shutipi shina cai can ñuca iglesia, cai shina cajpi paicuna can shayachishca ñuca quishpiringapa villaicuna jahuapi.

9 Ciertopacha cangunaman nini, canguna canguichi shayachishca ñuca quishpiringapa villaicuna jahuapi; chaimanda canguna shutichinguichi tucui cuzascunata ñuca shutipi; chaimanda canguna Taitata mañashpa, iglesiamanda, cai ñuca shutipi cajpi Taita cangunata uyanga.

10 Cai shina cajpi iglesia ñuca quishpiringapa villaicuna jahuapi shayachishca can shinashpa Taita ricuchinga caipi paipaj propio ruraicunata.

11 Ashtahuangari cai na ñuca quishpiringapa villaicuna jahuapi shayachishca cajpi, shayachishca can runacunapaj ruraicunapaj jahuapi, nacashpa ayapaj ruraicunapaj jahuapi, ciertopacha ñuca nini cangunaman paicuna cushijun paicunapaj ruraicunapi asha tiempota, caimanda ashata cashpa tucuri shamun, anchuchi tushcacuna can ninaman shitai tucushcapash, maimanda na tigramui tian.

12 Paicunapaj ruraicuna paicunata catin, cai can paicunapaj ruraicunamanda paicuna anchuchishca cajta; chaimanda yarichi cuzascunata imata ñuca cangunaman villashcani.

13 Riqui ñuca cangunaman villashcani ñuca quishpiringapa villaicunata, cai can quishpiringapa villaicuna imata ñuca cangunaman cushcani—ñuca cai pachaman shamushcani ñuca Taitapaj munaita rurangapa, ñuca Taita chaipa cachamuhuashca.

14 Ñuca taita cachamuhuarca cruzpi vichai alsashca cachun; cruzpi vichai alsashca jipa, tucui runacunata ñucapaman apamuchun, imashna ñuca vichai alsai tucushcani runacunahuan shinallata runacunapash vichai alsashca canga Taitahuan, ñuca ñaupapi shayarichun, paicunapaj ruraicunamanda ricushpa chasquichishca cachun, chaicuna alicuna cajpi na alicuna cajpipash—

15 Caimanda ñuca vichai alsashca cashcani; chaimanda, Taitapaj ushaimanda ñucapaman tucui runacunata apamusha, paicuna ricushpa chasquichishca cai ushachun paicunapaj rurashcacunamanda.

16 Cai yalinga, pipash arrepentirijpi, bautizarijpipash ñuca shutipi jundashca canga; tucuricaman catiriashpa, riqui, paita ñuca charisha inocente ñuca Taitapaj ñaupapi chai punllapi imaura ñuca cai pachata ricushpa chasquichingapa shayarisha.

17 Maijan na tucurinacaman catirian, paimi anchuchishcapash ninamanbash shitashca canga, maimanda ashtahuan na tigramui ushanga, Taitapaj alicaimanda.

18 Cai can shimi imata ñuca runacunapaj huahuacunaman cushcani. Caimanda pai pactachin shimicunata imata pai cushca, pai na llullan, ashtahuangari tucui paipaj shimicunata pactachin.

19 Mapalla cuzas na yaicui ushan paipaj reinoman; chaimanda nimapash yaicun paipaj samanaman ashtahuangari maijan paicunapaj churajunacunata ñuca yahuarpi tajshashcacuna, paicunapaj femanda, arrepentimiento tucui paicunapaj juchacunamanda, paicunapaj ali ruraicunamanda tucurinacaman.

20 Cunan cai can rurachunbacha saquishca: Arrepentirichi, tucui alpa tucurinacaman, ñucaman shamuichi ñuca shutipi bautizarichi, canguna achilyachishca canguichi Espíritu Santota chasquishpa, canguna ñuca ñaupapi mapa illa shayari ushanguichi chai tucuri punllapi.

21 Ciertopacha, ciertopacha, ñuca cangunaman nini, cai can ñuca quishpiringapa villaicuna; canguna yachanguichi cuzascunata imami canguna ñuca iglesiapi ruranguichipacha; ruraicunata imata canguna ricuhuashcanguichi ñuca rurajta cangunapash ruraichi; imata canguna ricuhuashcanguichi chaita ruranguichi;

22 Chaimanda, cai cuzascunata rurashpa achilyachishca canguichi, canguna vichai alsashca canguichi chai tucuri punllapi.

23 Quilcai cuzascuna imata canguna ricushcanguichi, uyashcanguichi, maijan na saquishcatalla na.

24 Quilcai cai llactapurapaj rurashcacunata, imacuna canga, imashna quilcashca can, imacuna ña yalishca can.

25 Riqui, quilcashcacunamanda imata quilcashca cashca, ima quilcashca canga, cai llactapuracuna ricushpa chasquichishca canga, caicunamanda paicunapaj ruraicuna rijsichishca canga runacunaman.

26 Riqui, tucui cuzascuna Taitamanda quilcashca can; chaimanda quilcashcacunamanda ima quilcashca can cai pacha ricushpa chasquichishca canga.

27 Yachaichi canguna ricushpa chasquichijcuna canguichi cai llactapuracunapaj, ricushpa chasquichinamanda imata ñuca cangunaman cusha, ima ali canga. Chaimanda, ima laya runacunata cana canguichi? Ciertopacha ñuca cangunaman nini, imashna ñuca cani.

28 Cunan ñuca rini Taitapaman. Ciertopacha ñuca nini cangunaman, ima cuzascunata mañanguichi Taitata ñuca shutipi cangunaman cushca canga.

29 Chaimanda, mañaichi, canguna chasquinguichi; huajtachi, cai cangunaman pascashca canga; maijan mañaj, chasquinga; maijan huajtachijman, pascashca canga.

30 Cunan, riqui, ñuca cushijui jatun can, tucuillacaman, cangunamanda, cai miraicunamandapash; ari, Taitapash cushijun, tucui achil ángelcunapash, cangunamanda, cai miraicunamandapash; imashpa paicunamanda nipipash na chingashca can.

31 Riqui, ñuca munani canguna entendichu; ñuca nini maijan cunan causan cai miraicunamanda; nipipash na chingashca can; paicunapi ñuca tucuilla cushijui can.

32 Ashtahuangari riqui, llaquirini chuscu miraicunamanda cai miraimanda, paicuna huatai tucushcashna paihuan apai tucushca canga, imashna chingashcapaj churi carca; paicuna jatuhuanga culquipa, curipa, chai imapa polilla huaglichin, ima shuhuacuna utujushpa shuhuan. Chai punllapi paicunata ricugrisha, paicunapaj ruraicunata paicunapaj propio umacunapi tigrachishpa.

33 Yalishca jipa Jesús cai nishcacunata tucuchishca jipa pai nirca paipaj discípulocunata: Yaicuichi quichiji punguta; quichiji can pungu, quichiji can ñan causaiman apan, ashalla can caita tarin; ashtahuangari ancho can pungu, ancho ñan huañuiman apan, tauca can chaipi purij, imaura tuta shamungacaman, maipi pipash na trabajai ushan.