1 Cunan yalishca jipa Jesús jahua pachaman vitsiashca jipa, taucapachacuna chajchurirca, tucui runacuna pusharca paipaj huarmicunata, paipaj huahuacunatapash, paipaj propio huasiman tigrarca.

2 Cai ñapash villashca carca tucui llactapuracunaman, nara tutayajllapita, taucapachacuna Jesústa ricushcata, paicunata pai achil yachachishcata, paillata llactapuracunaman caya punlla cutin ricurimunatapash.

3 Ari, tucui tutapash Jesúsmanda villashca carca; shinashpa paicuna llactapuracunaman villarca; tauca tiarca, ari, ashtacapacha tauca carca, ninandapacha trabajarca chai tucui tuta, Jesús llactapuracunamanda ricurishca pushtupi caya punlla cangapa.

4 Yalishca jipa caya punlla, taucapachacuna tandanajushca jipa, riqui, Nefi paipaj huauqui pimi huañuimanda jatarishca carca, paipaj shuti carca Timoteo, paipaj churipash, paipaj shuti carca Jonás, Matoni, paipaj huauqui Matoníahpash, Kumen, Kumenoni, Jeremías, Shemnón, Jonás, Sedequías, Isaíaspash—cunan cai carca discípulocunapaj shuticuna picunata Jesús ajllashca carca—yalishca jipa paicuna ñaupaman rishpa taucapachacunapaj chaupipi shayarirca.

5 Riqui, tandanajushcacuna shina taucapacha caimanda chunga ishcai tandanajushcacunapi chaupirishca cachun cacharca.

6 Chunga ishcaicuna taucapachacunaman yachachirca; riqui, taucapachacunata alpa jahuallapi cungurichirca, achil mañachun Taitata Jesúspaj shutipi.

7 Discípulocunapash Taitata achil mañarca Jesúspaj shutipi. Yalishca jipa paicuna jatarirca llactapuracunata achil yachachirca.

8 Paicuna achil yachachishca jipa chai shimicunatallata imata Jesús parlashcata—nimata na cambiashpa imata Jesús parlashca shimicunamanda—Riqui, paicuna cutin cungurirca Taitata achil mañarca Jesúspaj shutipi.

9 Paicuna achil mañarca imata paicuna munashcatapacha; munarca Espíritu Santo paicunaman cushca cachun.

10 Paicuna shina achil mañashca jipa yacu pataman urai rirca, taucapachacunapash paicunata catirca.

11 Yalishca jipa Nefi yacuman yaicurca bautizai tucurcapash.

12 Yacumanda llujshishpa bautizai callarirca. Pai bautizarca tucui maijan Jesús ajllashcacunata.

13 Yalishca jipa tucuilla bautizarishca jipa, yacumanda llujshishca cajpi, Espíritu Santo shamurca paicunapaman, paicuna jundashca carca Espíritu Santohuan, ninahuanbash.

14 Riqui, paicuna pillui tucushca carca ninahuanshna; cai urai shamurca jahua pachamanda, taucapachacuna ricurca caita, testimoniotapash curca; ángelcuna urai shamurca jahua pachamanda paicunata achil yachachircapash.

15 Yalishca jipa imaura ángelcuna discípulocunaman achil yachachishca cajpi, riqui, Jesús shamurca chaupipi shayarirca achil yachachircapash paicunata.

16 Yalishca jipa taucapachacunaman parlarca, mandarcapash paicunata alpapi cutin cungurichun, paipaj discípulocunapash alpapi cungurichun.

17 Yalishca jipa tucuilla alpapi cungurishca jipa, paipaj discípulocunata achil mañachun mandarca.

18 Riqui, paicuna achil mañai callarirca; Jesústa achil mañarca paita shutichishpa paicunapaj Apunchij paicunapaj Diospash.

19 Yalishca jipa Jesús paicunapaj chaupimanda anchurishpa, asha carullata rishpa alpaman cungurishpa, nirca:

20 Taita, ñuca quiquinda pagui nini Espíritu Santota cushcamanda caicuna ñuca ajllashcacunaman; cai can paicunapaj ñucapi crimanda, ñuca ajllashcani paicunata cai pachapi causajcunamanda.

21 Taita, ñuca quiquinda achil mañani carapai Espíritu Santota tucui paicunaman maijan paicunapaj shimicunapi crijcunaman.

22 Taita, paicunaman quiquin cushcangui Espíritu Santota ñucapi paicuna crimanda; quiquin ricushcangui paicuna ñucapi crijta imashpa paicunata can uyashcamanda, paicuna ñucata achil mañanbash; paicuna ñucata achil mañan ñuca paicunahuan cajpi.

23 Cunan Taita, ñuca achil mañani quiquinda paicunamanda, tucui maijan paicunapaj shimicunapi crijcunamandapash, paicunapash ñucapi crichun, ñuca paicunahuan cai ushasha quiquin laya, Taita, ñucapi cangui, ñucanchi shujlla cai ushangapa.

24 Yalishca jipa Jesús Taitata shina achil mañashca jipa, paipaj discípulocunapaman shamurca, riqui, paicuna catinajurcara, na shaijushpa, paita achil mañashpa; na mirachirca tauca shimicunata, cai cushca carca paicunaman imata achil mañanata, munaihuanbash jundashca carca.

25 Yalishca jipa Jesús paicunata achilyachirca imashna paicuna paita achil mañajujpi; paipaj cushilla asi ñavi paicunapaman rirca, paipaj cushilla ñavipaj micha paicunata punllayachirca, riqui paicuna yuraj carca cushilla ñavishna Jesúspaj churajunacunapash; riqui yurajmi carca tucui yurajcunata yali, ari, nimapash na tianllu alpapi shina yuraj paipaj yuraj laya.

26 Jesús paicunaman nirca: Achil mañashpa catichi; ashtahuangari paicuna achil mañaita na saquirca.

27 Paicunapamanda cutin tigrarirca, asha carullata rirca alpaman cungurircapash; cutin achil mañarcapash Taitata, nishpa:

28 Taita, ñuca pagui nini quiquinda mapa illacunata saquishcamanda maijangunata ñuca ajllashcani, paicunapaj femanda, ñuca achil mañashcani paicunamanda, maijanguna paicunapaj shimicunata crinacunamandapash, ñucapi paicuna mapa illacuna cachun, paicunapaj shimicunapi femanda, imashna ñucapi paicuna mapa illacuna can.

29 Taita, ñuca na achil mañanichu cai pachapaj, ashtahuangari maijanguna quiquin cuhuashcangui cai pachamanda, paicunapaj femanda, ñucapi paicuna mapa illacuna cachun, ñuca paicunapi cangapa quiquinshna, Taita, ñucapi cangui, ñucanchi shujlla cai ushangapa, ñuca punchapamba cai ushangapa paicunapi.

30 Cai shimicunata Jesús parlashca jipa paipaj discípulocunapaman cutin shamurca; riqui paicuna paita achil mañarca na shaijushpa, catilla; paicunata cutin cushilla asirca; riqui paicuna yuraj carca, Jesús laya.

31 Yalishca jipa cutin rirca asha carullata Taitata achil mañarca;

32 Jallu na parlai ushan shimicunata imata pai achil mañarca, runa na quilcai ushanllu shimicunata imata pai achil mañarca.

33 Taucapachacuna uyarca, testimoniota curcapash; paicunapaj shungucuna pascashca carca paicuna entendircapash paicunapaj shungucunapi shimicunata imata pai achil mañarca.

34 Shinapash, shina jatun juyailla carca shimicuna imata pai achil mañarca, na quilcashca caita ushan caicunata runa na parlai ushanbash.

35 Yalishca jipa Jesús achil mañaita tucuchishca jipa discípulocunapaman cutin tigramurca, paicunata nirca: Shina jatun feta charijta ñuca nimaura na ricushcani tucui Judíocunapi; chaimanda ñuca paicunaman na ricuchi usharcani shina jatun juyailla ruraita ricuchinacunata, paicunapaj na crimanda.

36 Ciertopacha ñuca nini cangunaman, paicunapi pipash na tian shina jatun cuzascunata cangunashna ricushca; paicuna na uyashcapashchu shina jatun cuzascunata imashna canguna uyashcashna.