1 Cunan riqui, ñuca cangunaman nini imaura Apunchij ali cajta yuyashpa, paipaj yachaipi, cai nishcacuna shamuchun Gentilcunapaman paipaj shimimanda, shina canguna yachachun ña callarin pactachishca cangapa conveniota imata Taita Israelpaj huahuacunahuan rurashca, paicunapaj cutin apamunamanda paicunapaj chasquina pambacunaman.

2 Canguna yachanguichi Apunchijpaj shimicunata, imata parlashca can achil villachijcuna, tucuilla pactachishca canga; canguna na nina canguichi Apunchij na utsian paipaj shamui Israelpaj huahuacunapaman.

3 Cangunapaj shungucunapi na yuyana canguichi shimicuna imata parlashcacuna yanga can, riqui, Apunchij yaringa paipaj conveniota imata pai rurarca Israelpaj huasipaj llactapuracunaman.

4 Imaura canguna ricujpi cai nishcacuna cangunapaman shamujta, shina canguna ama ashtahuan na ricunayachinguichichu Apunchijpaj ruraicunata, imashpa paipaj alicaipaj espada can paipaj ali lado maquipi; riqui, chai punllapi, canguna na ricunayachijpi paipaj rurashcacunata pai rurachinga cai ña japigrichun.

5 Ay maijan na ricunayachin Apunchijpaj ruraicunata; ari, ay maijan Cristota negan, paipaj ruraicunatapash.

6 Ari, ay maijan negan Apunchijpaj achil ricuchishcacunata, maijan nijcuna Apunchij ashtahuan na ruran achil ricuchinacunahuan, achil villanacunahuan, carashcacunahuan, jallucunahuan, jambinacunahuan, Espíritu Santopaj ushaihuan.

7 Ari, ay maijan ninga chai punlla, charijyangapalla, Jesucristo nima juyailla ruraita ricuchinata na ushan; maijan cai nij chingashcapaj churi layaman tigranga, paipaj na tianga shungumanda llaquina, Cristopaj shimimanda!

8 Ari, ashtahuan na burlaringuichichu, na ricunayachinguichi, nacashpa Judíocunata asishpa ricunguichipash, nacashpa Israelpaj huasipaj nimaijan puchucunatapash; riqui, Apunchij yarin paipaj conveniota paicunahuan, pai ruranga paicunahuan imashna pai jurashcata.

9 Chaimanda ama yuyanguichichu Apunchijpaj ali maquita lluqui ladoman tigrachi ushaita, pai ama rurachun ricushpa chasquichinata pactachichun conveniota imata pai rurashca Israelpaj huasihuan.