1 Riqui, cunan yalishca jipa imaura Jesús cai shimicunata parlashca cajpi pai muyundi cutin ricurca ashtacapachacunata, paicunaman nirca: Riqui, ñuca punlla ña caipi.

2 Ñuca yashpa ricujpi canguna na shinllicuna canguichi, canguna na entendi ushanguichi tucui ñuca shimicunata imata Taitamanda ñuca cani mandashca parlachun cangunaman cai punllapi.

3 Chaimanda, richi cangunapaj huasicunaman, aliguta yarichi cuzascunapi imata ñuca nishcani, Taitata mañaichi, ñuca shutipi, canguna entendi ushangapa, cayapa cangunapaj yuyaicunatapash preparaichi, ñuca cangunapaman cutin shamusha.

4 Ashtahuangari cunan Taitapaman ñuca rini, ñucamandallata ricuchiringapapash Israelpaj chingashca tribucunaman, Taitapaca paicuna na chingashca can, pai yachan maiman paicunata apashcata.

5 Yalishca jipa imaura Jesús shina parlashca cashpa, pai muyundi cutin ricurca taucapachacunata, ricurcapash paicuna huacanajujta, paita ricurianajurca ama richun mañangapa munan laya paicunahuan ashagutapash cachun.

6 Paicunata nirca: Riqui, ñuca ali shungu jundashca can llaquinayaihuan cangunamanda.

7 Charinguichichu maijanbash ungushca cajta cangunapurapi? Caiman apamuichi. Charinguichichu maijanbash jangacuna caj, nacashpa ñausagucuna, nacashpa lisiadocuna, nacashpa suchucuna, nacashpa leprosocuna, nacashpa chaqui maqui illacuna, nacashpa na uyai ushajcuna, nacashpa ima laya llaquichishcacuna caj? Caiman apamuichi ñuca paicunata jambisha, imashpa ñuca ali shungu jundashca can llaquinayaihuan.

8 Ñuca yashpa ricujpi canguna munanajunguichi ñuca ricuchichun cangunaman imata ñuca rurashcani cangunapaj huauquicunaman Jerusalénpi, ñuca ricuni cangunapaj fe alipacha can ñuca cangunata jambichun.

9 Yalishca jipa imaura pai shina parlashca cajpi, tucui taucapachacuna, pipash na saquirishpa, ñaupaman rirca paicunapaj ungushcacunahuan, paicunapaj llaquichishcacunahuan, paicunapaj na puri ushajcuna, paicunapaj ñausacunahuan, paicunapaj upacunahuan, paicunapaj tucui ima layapash llaquichishcacunahuan; paicunata jambirca shujllangaman imashna paipaman apamushcapi.

10 Tucuillacuna, jambi tucushcacuna maijan na ungushcacunapash, cungurirca paipaj chaquicunapi, paita adorarca; imashna shamushca taucapachacuna paipaj chaquicunata mucharca, shinashpa paipaj chaquicunata paicunapaj viquicunahuan armachirca.

11 Yalishca jipa pai mandarca paicunapaj uchilla huahuagucunata apamuchun.

12 Shina paicunapaj uchilla huahuagucunata apamurca alpapi tiachircapash paita muyushpa, Jesús chaupipi carca; taucapachacuna ñanda curca imaura paipaman tucuilla apamushca cangacaman.

13 Yalishca jipa imaura tucuilla apamushca cajpi, Jesús chaupipi shayarirca, pai mandarca taucapachacunata alpapi cungurichun.

14 Yalishca jipa imaura alpapi cungurijpi, Jesús paipaj ucupilla huacarca, nircapash: Taita, ñuca cani llaquiyashca Israelpaj huasimanda llactapuracunapaj na ali ruraicunamanda.

15 Imaura pai cai shimicunata nishca cajpi, paillatapash alpapi cungurirca; riqui pai achil mañarca Taitata, cuzascunata imata pai achil mañarca quilcashca caita na ushana can, taucapachacuna paita uyashcacuna testimoniota curca.

16 Cashna laya paicuna testimoniota curca: Nimaura ñavi na ricushca, rinri na uyashca, punda, shina jatun juyailla cuzascuna imashna ñucanchi ricushcanchi, uyashcanchipash Jesús Taitata parlarca.

17 Jallu na tian parlai ushangapa, pi runapash quilcai ushangapa, runacunapaj shungucuna yuyai ushangapa shina jatun, juyailla cuzascunata imashna ñucanchi ricurcanchi uyarcanchipash Jesús parlajta; na pipash yuyai ushan cushijuita imata jundachirca ñucanchi almacunapi imaura ñucanchi uyarcanchi ñucanchimanda Taitata achil mañajta.

18 Yalishca jipa imaura Jesús Taitata achil mañaita tucuchijpi, pai jatarirca; ashtahuangari shina jatun carca taucapachacunapaj cushijui, paicuna dominai tucushca carca.

19 Yalishca jipa Jesús paicunaman parlarca, jatarichun mandarca.

20 Paicuna alpamanda jatarirca, pai paicunaman nirca: Achilyachishca canguichi cangunapaj femanda. Cunan riqui, ñuca cushijui tucuilla can.

21 Imaura pai cai shimicunata nishca cashpa, pai huacarca, taucapachacuna caita testificarca, pai japirca uchilla huahuacunata, shujllangaman, paicunata achilyachirca, paicunamanda Taitata achil mañarcapash.

22 Imaura pai caita rurashpa cutin huacarca;

23 Pai taucapachacunaman parlarca, paicunaman nirca: Riqui cangunapaj uchilla huahuagucunata.

24 Imashna paicuna ricungapa ricujpi ñavicuna jahua pachaman tigrarca, ricurca jahua pachacuna pascarijta, ricurcapash ángelcunata jahua pachamanda uriajumujta nina chaupipishna carca; paicuna urai shamurca chai uchilla huahuagucunata chaupipi churarcapash, ninahuan muyushca carca; ángelcuna paicunata achil yachachirca.

25 Taucapachacuna ricurca, uyarcapash, testificarcapash; paicuna yachan paicunapaj testimonio ciertopacha cajta imashpa tucuilla maijangunaca ricurca, uyarca, tucui runacuna paicunamandallata; yupanapica carca ishcai huaranga picha patsaj almacuna; paicuna carca runacuna, huarmicuna, huahuacunapash.