1 Ciertopacha ñuca cangunaman nini, ñuca cangunaman cuni shuj señalta, canguna yachachun imaura punlla cai cuzascuna yalingrinajunata—ñuca tandachisha, paicunapaj unaita caiman chaiman chajchushcamanda, ñuca llactapuracuna, Oh Israelpaj huasi, paicunapurapi cutin shayachisha ñuca Siónda;

2 Riqui, cai can cuzas imata ñuca cusha shuj señal cachun—ciertopacha ñuca nini imaura cai cuzascuna imata cangunaman villani, imatapash ñuca cangunaman ñucamandallata jipaman villasha, Espíritu Santopaj ushaimanda imata cangunaman cushca canga Taitapamanda, yachaj chayachishca canga Gentilcunaman paicuna yachachun cai llactapuracunamanda picuna can shuj puchu Jacobpaj huasimanda, caimanda ñuca llactapuracuna picuna caiman chaiman chajchui tucushca canga Gentilcunamanda;

3 Ciertopacha, ciertopacha, cangunaman nini, imaura cai cuzascuna Taita paicunaman yachaj chayachinga, Taitapamanda llujshimunga, paicunapamanda cangunapaman;

4 Cai can Taitapaj yachaipi paicuna cai pambapi shayachishca cachun, churashca cachun shuj libre llactapuracunatashna Taitapaj ushaihuan, cai cuzascuna paicunapamanda shamuchun cangunapaj cati aillucunapaj shuj puchucunaman, Taitapaj convenio pactashca cachun imata pai conveniota rurashca can paipaj llactapuracunahuan, Oh Israelpaj huasi;

5 Chaimanda, cai rurashcacuna, rurashcacunapash imata cunamanda chaiman cangunapurapi rurashca canga Gentilcunapamanda shamunga, cangunapaj cati aillucunapaman, na crishpa asha asha chingaringa na ali ruraicunamanda;

6 Cashnami cana Taitapaj munai Gentilcunapamanda shamuchun, pai ricuchi ushangapa paipaj ushaita Gentilcunaman, caimanda Gentilcuna, paicunapaj shungucunata na shinlliyachishpaca, arrepentiri ushachun ñucapaman shamujpi, bautizarishca cachun ñuca shutipi yachachunbash ciertopachata ñuca yachachishcapaj puntocunata, yupai tucushca cachun ñuca llactapuracunapi, Oh Israelpaj huasi;

7 Imaura cai cuzascuna yalijpi quiquinba cati aillucuna yachai callaringa cai cuzascunata—cai paicunapaj shuj señal canga, paicuna yachachun Taitapaj rurashca ña callarishca conveniota pactachingapa imata rurashca can llactapuracunaman picuna can Israelpaj huasi.

8 Imaura punlla shamujpi, cai yalinga jatun mandajcuna paicunapaj shimicunata vichanga; paicunaman na villashcacunata ricunga; na uyashcatapash yanga.

9 Chai punlla, ñucamanda Taita ruranga shuj ruraita, ima canga shuj jatun, shuj juyailla rurai paicunapapi; tianga paipuracunapi maijan na caita crijcuna, masqui shuj runa paicunaman caita villajpipash.

10 Ashtahuangari riqui, ñuca sirvij runapaj causai ñuca maquipi canga; chaimanda paita na chugrichinga, masqui paicunamanda manllanayai cashpapash. Shinapash ñuca jambisha, ñuca ricuchisha ñuca yachai jatun cajta ayapaj yachaita yali.

11 Chaimanda cai yalinga maijan ñuca shimicunapi na crin, Jesucristo canita, imacuna Taita shinanga pai apachun Gentilcunaman, paiman cunga ushaitapash apachun Gentilcunapaman, (cai rurashca canga imashna Moisés nirca) paicuna anchuchi tucushca canga ñuca llactapuracunamanda picuna conveniomanda can.

12 Ñuca llactapuracuna picuna can Jacobpaj shuj puchu Gentilcunapi canga, ari, paicunapaj chaupipi shuj león laya bosque animalcunapi, shuj león laya ataju llamacunapi, pimi chaupita rijpi sarungapash, uchillacunapi fitingapash, pipash na cacharichi ushanga.

13 Paicunapaj maqui vichai alsashca canga paicunapaj na ricunayachijcunapaj jahuapi, tucui paicunapaj na ricunayachijcuna huañuchishca canga.

14 Ari, ay Gentilcuna imashpapash paicuna arrepentirishpalla na; cai yalinga chai punllapi, Taita nin, ñuca huañuchisha quiquinba caballocunata quiquingunapaj chaupipi, ñuca tucuchisha quiquingunapaj carretacunata;

15 Ñuca urmachisha jatun llactacunata quiquinba pambamanda, anchuchishapash tucui shinlli pushtucunata;

16 Ñuca anchuchishapash brujeríacunata quiquinba pambamanda, na ashtahuan yachajcuna tianga;

17 Imamanbash rijchata rurashcacunata ñuca anchuchisha, quiquinba chaupipi shayachishca imaman rijchacunatapash, na ashtahuan adoranguichu quiquinba maquicunahuan rurashcacunata;

18 Fitishapash quiquinba chaupimanda bosquecunata; shina ñuca tucuchisha quiquinba llactacunata.

19 Yalishca jipa tucui llullacuna, umaicuna, envidiacunapash, fiñanajuicuna, superchería sacerdotalcuna, fornicacióncuna, tucurishca canga.

20 Yalingami, nin Taita, chai punllapi pipash na arrepentirij, ñuca Juyashca Churipaman na shamuj, paicunata anchuchisha ñuca llactapuracunamanda, Oh Israelpaj huasi;

21 Ñuca rurasha venganzata, millaitapash paicunapaj jahuapi, Diosta na crijcunapaj jahuapipash, imashna paicuna na uyashcashna.

22 Ashtahuangari paicuna arrepentirijpica, uyajpipash ñuca shimicunata, paicunapaj shungucunata na shinlliyachijpi, ñuca iglesiata paicunapurapi shayachisha, shamui ushangapash convenioman, yupai tucushca canga cai Jacobpaj puchucunapi, picunaman cushcani cai pambata paicunapaj chasquina cachun;

23 Paicuna ayudanga ñuca llactapuracunata, Jacobpaj puchu, Israelpaj huasipaj taucacunatapash imashna shamunga, paicuna shuj llactata huasichichun, cai shutichishca canga Mushuj Jerusalén.

24 Shina paicuna ñuca llactapuracunata ayudanga paicuna tandanajuchun Mushuj Jerusalénpi, picuna caiman chaiman chajchushca can tucui pambacunaman.

25 Shina jahua pachapaj ushai paicunapaman urai shamunga; ñucapash chaupipi casha.

26 Shina Taitapaj rurai callaringa chai punllapi, imaura ña cai quishpiringapa villaicuna yachachishca cajpi cai llactapuracunapaj puchupi. Ciertopacha ñuca nini cangunaman, chai punlla Taitapaj rurai callaringa tucui ñuca llactapuracunapaj chajchurishcacunapi, ari, tribucunapipash maijanguna chingashca carca, picunata Taita Jerusalénmanda llujchimushca.

27 Ari, rurai callaringa ñuca llactapuracunapaj tucui chajchurishcacunapi, Taita ñanda alichinga maita ñucapaman shamuchun, paicuna Taitata mañachun ñuca shutipi.

28 Ari, shina rurai callaringa, Taita ñanda alichinga tucui jatun llactacunapi maita paipaj llactapuracuna huasiman tigrai ushachun paicuna chasquina pambaman.

29 Tucui jatun llactacunamanda llujshimunga; paicuna na ñapash ringa, calpashpapash na ringa, imashpa ñuca paicunapaj ñaupata risha, nin Taita, ñuca paicunapaj ñaupata cuidaj casha.