1 Yalishca jipa paicunata mandarca quilcachun shimicunata imata Taita Malaquíasman cushca carca, imata paicunaman villarca. Yalishca jipa paicuna quilcashca jipa pai aliguta villarca. Caicuna can shimicuna imata paicunaman villarca, nishpa: Shina nirca Taita Malaquíasman—Riqui, ñuca cachamusha ñuca villachijta, pai alichinga ñanda ñucata ñaupashpa, Apunchij pitami mascanguichi ñapash shamunga paipaj temploman, conveniopaj villachij, paipi canguna cushijunguichi; riqui, pai shamunga, nin Tucuita Mandaj Apunchij.

2 Ashtahuangari pishi aguantanga paipaj shamuna punllata, pishi shayaringa imaura pai ricurimujpi? Pai can shuj ajllaj nina laya, tajshaj jabón layapash.

3 Pai tiaringa culquita shuj ajllangapashna, mapata anchuchijshna; pai mapata anchuchinga Levípaj churicunata, mapa illata saquinga curitashna, culquitashna, paicuna caranga Apunchijman shuj ofrendata ali ruraicunapi.

4 Shina Judápaj, Jerusalénpaj ofrenda Apunchijpaj ali canga, punda punllacunapi laya, yalishca huatacunapi laya.

5 Ñuca cangunapaman quimirisha ricushpa chasquichingapa; ñuca casha ñapash testigo hechicerocunapaj contra, adúlterocunapaj contra, llullashpa jurajcunapaj contra, maijan paipaj trabajajcunaman umashpa pagajcunapaj contra, cusa huañushca huarmicunaman, taita illacunaman, na ayudangapa munajcunata chaira shamujcunata, ñucata na manllajcunatapash, Tucuita Mandaj Apunchij nin.

6 Imashpa ñuca Apunchij cani, na shujman tigranichu; chaimanda canguna Jacobpaj churicuna na tucuchishca canguichichu.

7 Cangunapaj taitacunapaj punllacunamanda ñuca ordenanzacunamanda caruyashcacuna canguichi, caicunata na alichishcanguichi. Ñucapaman tigramuichi, ñuca cangunapaman tigrasha, nin Tucuita Mandaj Apunchij. Ashtahuangari canguna ninguichi: Imashnata ñucanchi tigramushun?

8 Shuhuangachu shuj runa Diosta? Shinapash canguna ñucata shuhuashcanguichi. Ashtahuangari canguna ninguichi: Imapita ñucanchi quiquinda shuhuashcanchi? Diezmocunapi, ofrendacunapipash.

9 Canguna llaquichishca canguichi shuj llaquihuan, canguna ñucata shuhuaimanda, tucui cai jatun llacta.

10 Apamuichi tucui diezmocunata alichishpa charina huasiman, micuna tiachun ñuca huasipi; caihuan ricuhuai, nin Tucuita Mandaj Apunchij, nacashpa ñuca na pascasha cangunaman jahua pachapaj ventanacunata, jichashapash shuj achil yachita caita chasquingapa pushtu na tiangacaman.

11 Ñuca jarcashpa rimasha tucuchijta cangunapa ali cachun, pai na tucuchinga cangunapaj pambacunapi fucushcacunata; uvas chagrapash nara punlla cajpi na fucungachu, Tucuita Mandaj Apunchij nin.

12 Tucui jatun llactacuna achilyachishca canguichi ninga, imashpa juyailla pamba canguichi, Tucuita Mandaj Apunchij nin.

13 Cangunapaj shimicuna shinlli cashca ñucapaj contra, Apunchij nin. Shina cajpipash canguna ninguichi: Imata ñucanchi parlashcanchi quiquinba contra?

14 Canguna nishcanguichi: Cai can yanga Diosta sirvi, imapata ali cashca paipaj ordenanzacunata alichi, ñucanchi purishcanchi llaquiyashpa Tucuita Mandaj Apunchijpaj ñaupapi?

15 Cunan ñucanchi shutichinchi jariyashca cushilla; ari, na alita rurajcuna ali mirashca can; ari, Diosta tentangapa munajcunapash cacharishca can.

16 Shina maijan Apunchijta manllajcuna catilla parlarca caishuhuan chaishuhuan, Apunchij uyashpa uyarcapash; yuyarinapaj shuj quilcashca paipaj ñaupapi quilcashca carca maijan Apunchijta manllajcunapa paipaj shutita yuyarijcunapapash.

17 Paicuna ñucapaj canga, Tucuita Mandaj Apunchij nin, chai punlla imaura ñuca tandachini ñuca juyaillacunata; ñuca huacaichisha paicunata imashna shuj runa huacaichin paipaj propio churita pi paita sirvin.

18 Shina canguna tigramunguichi alita rurajcunata na alita rurajcunamanda yachai ushanguichi, maijan Diosta sirvij maijan na paita sirvijmandapash.