1 Yalishca jipa Jesús mandarca paipaj discípulocunata apamuchun paipaman tandata, vinotapash.

2 Paicuna ringacaman tandaman, vinoman, taucapachacunata mandarca alpapi tiarichun.

3 Imaura discípulocuna shamujpi tandahuan, vinohuan, japirca tandata faquircapash caita achilyachircapash; discípulocunaman cararca mandarcapash caita micuchun.

4 Imaura paicuna micushpa, jundashca carca, mandarca taucapachacunaman carachun.

5 Imaura taucapachacuna micushpa, jundashca carca, discípulocunaman nirca: Riqui tianga shuj ordenashca cangunapurapi, paiman ñuca cusha ushaita pai faquinga tandata, achilyachingapash caita, carangapash caita ñuca iglesiapaj llactapuracunaman, tucui maijan crishpa, bautizarishca canga ñuca shutipi.

6 Caita canguna punllan punllan ricunguichi rurachun, imashna ñuca rurashca laya, imashna ñuca faquishcani, achilyachishcani caita cangunaman carashcanipash.

7 Caita canguna ruranguichi ñucapaj cuerpota yaringapa, imata ñuca cangunaman ricuchishcani. Cai canga shuj testimonio Taitaman canguna punllan punllan yarihuanguichita. Canguna punllan punllan ñucata yarishpaca charinguichi ñuca Espírituta cangunahuan cachun.

8 Yalishca jipa cai shimicunata nishca jipa, paipaj discípulocunata mandarca japichun vinota copamanda, caita ufiachunbash, paicuna carachunbash taucapachacunaman caita paicunapash ufiachun.

9 Yalishca jipa paicuna shina rurarca, caita ufiarca, jundashcapash carca; paicuna taucapachacunaman cararca, paicunapash ufiarca, jundashcapash carca.

10 Discípulocuna caita rurashca jipa, Jesús paicunaman nirca: Achilyachishca canguichi cai cuzasta imata rurashcamanda, caica can ñuca rurachunbacha saquishcacunata pactachingapa, cai testifican Taitaman canguna rurangapa munanajunguichita imata ñuca cangunaman mandashcata.

11 Caita punllan punllan rurana canguichi maijan arrepentirin, bautizarinbash ñuca shutipi; caita ruranguichi ñuca yahuarta yarimanda, imata ñuca cangunamanda jichashcani, canguna testificachun Taitaman canguna punllan punllan yarihuanguichita. Punllan punllan ñucata yarishpaca canguna charinguichi ñuca Espírituta cangunahuan cachun.

12 Ñuca cangunaman cuni shuj rurachunbacha saquishcata cai cuzascunata rurachun. Canguna punllan punllan cai cuzascunata rurashpaca achilyachishca canguichi, imashpa canguna huasichishca canguichi ñuca rumi jahuapi.

13 Ashtahuangari maijanbash cangunapurapi yalita nacashpa ashallata cajpi caicuna na can huasichishca ñuca rumi jahuapi, ashtahuangari can huasichishca tʼiyu shayachina jahuapi; imaura manllanayai tamia urai shamun, yacucuna jatarishpa shamun, huairacuna huajtamun, urmachinbash caicunata, paicuna urmanga, ucu pachapaj pungucunapash ña pascashca can paicunata chasquingapa.

14 Chaimanda achilyachishca canguichi canguna ñuca rurachunbacha saquishcacunata alichishpaca, imata Taita ñucaman mandashca can caita ñuca cangunaman cuchun.

15 Ciertopacha, ciertopacha, cangunaman nini, velana canguichi, achil mañaichipash punllan punllan, ayahuanra tentai tucunguichiman, paihuan huatai tucushcashna apai tucunguichiman.

16 Imashna ñuca cangunapurapi achil mañashcani shina canguna ñuca iglesiapi achil mañanguichi, ñuca llactapuracunapi maijan arrepentirin bautizarinbash ñuca shutipi. Riqui ñuca cani micha; ñuca cangunaman ejemplota cushcani.

17 Yalishca jipa Jesús paipaj discípulocunaman cai shimicunata parlashca jipa, cutin tigrarirca taucapachacunaman paicunaman nircapash:

18 Riqui, ciertopacha, ciertopacha, ñuca cangunaman nini, velana canguichi, achil mañaichipash punllan punllan tentaciónpira yaicunguichiman; Satanás munan cangunata charingapa, trigotashna cangunata shushungapa.

19 Chaimanda canguna punllan punllan achil mañana canguichi Taitata ñuca shutipi;

20 Imatapash canguna Taitata mañanguichi ñuca shutipi, ali cajpi, chasquisha yashpa, riqui caita cangunaman cushca canga.

21 Achil mañai Taitata cangunapaj aillucunapi, punllan punllan ñuca shutipi, cangunapaj huarmicuna, cangunapaj huahuacunapash achilyachishca cachun.

22 Riqui, catilla tandanajuichi; pi runatapash na na ninguichichu shamuchun imaura canguna tandanajushcaman, ashtahuangari paicunata cangunaman shamuchun saquichilla na na ninguichichu paicunata;

23 Ashtahuangari paicunamanda achil mañaichi, paicunata na calpachinguichichu; catilla paicuna cangunapaman shamujpi Taitata paicunamanda achil mañaichi, ñuca shutipi.

24 Chaimanda, vichai alsaichi cangunapaj michata cai pachata punchallayachichun. Riqui ñuca cani micha imata canguna vichai alsanguichi—imata canguna ricuhuashcanguichi rurajta. Riqui canguna ricuichi ñuca achil mañashcani Taitata, canguna tucui testigo cashcanguichipash.

25 Ricushcanguichi ñuca mandashcani cangunamanda nipipash caruyachun, ashtahuangari chai randi mandashcani canguna ñucapaman shamuchun, senti ushachun, ricuchunbash; shina ruranguichi cai pachata; maijanbash cai rurachunbacha saquishcata faquijpi paimandallata tentaciónman apai tucushca canga.

26 Cunan yalishca jipa Jesús cai shimicunata parlashca jipa, cutin tigrachirca paipaj ñavicunata discípulocunapaman maijangunata pai ajllashca carca, nircapash:

27 Riqui ciertopacha, ciertopacha, cangunaman nini, ñuca cangunaman cutishuj rurachunbacha saquishcata cuni, jipaman ñuca rina cani ñuca Taitapaman ñuca pactachi ushangapa cutishuj rurachunbacha saquishcacunata imata pai ñucaman cuhuashca.

28 Cunan riqui, cai can rurachunbacha saquishca imata ñuca cangunaman cuni, ama saquinguichi pipash yachashpata ñucapaj aichata micuchun, yahuartapash na digno cashpata, imaura caita canguna achil yachachijpi;

29 Maijan micun, ufianbash ñuca aichata, yahuartapash na digno cashpa micun, ufianbash condenación paipaj almapa; chaimanda canguna yachashpa shuj runa na digno cajta, micuchun ufiachunbash ñuca aichata ñuca yahuartapash paita ama chasquichun saquinguichi.

30 Shina cajpipash, canguna paita cangunapuramanda na calpachinguichi, ashtahuangari canguna achil yachachinguichi paita, Taitata achil mañanguichi paimanda, ñuca shutipi; pai arrepentirijpi bautizarijpipash ñuca shutipi, jipaman paita chasquinguichi, paiman achil yachachinguichi ñuca aichamanda, yahuarmandapash.

31 Ashtahuangari pai na arrepentirijpica ñuca llactapuracunapi na yupai tucushca cangachu, ama pai tucuchichun ñuca llactapuracunata, riqui ñuca rijsini ñucapaj llamagucunata, paicuna yupashca can.

32 Shina cajpipash, canguna paita na calpachinguichichu cangunapaj tandanajuna huasicunamanda, nacashpa adorana huasicunamanda, shinacunaman achil yachachishpa catina canguichi; na yachanguichichu ashtahuangari paicuna tigramuipapash, arrepentiripapapsh, ñucapaman shamun tucui shungu munaihuan, paicunata jambisha; canguna canguichi imashna apamujcuna paicunapaj quishpirinaman.

33 Chaimanda, cai nishcacunata alichichi imata canguman mandashcani ama ricushpa chasquichinaman yaicunguichi; ay pitami Taita ricushpa chasquichin.

34 Cai rurachunbacha saquishcacunata cuni randimanda plituricunamanda imami cangunapurapi tiashca. Achilyachishca canguichi cangunapurapi yali canchi ninajuicuna na tiajpi.

35 Cunan Taitapaman rini, cai minishtirishca can ñuca richun Taitapaman canguna alicachun.

36 Yalishca jipa cai nishcacunata Jesús tucuchishca jipa, paipaj maquihuan tacarirca discípulocunata maijangunata pai ajllashca carca, shujllangaman, imaura paicunata tucuilla tacarishca cangacaman, paicunaman parlarca pai imashna tacarijushpa.

37 Taucapachacuna na uyarca shimicunata imata pai parlarca, chaimanda paicuna na testimoniota curca; ashtahuangari discípulocuna testimoniota curca paicunaman pai cushcata ushaita Espíritu Santota cungapa. Ñaupaman ñuca rijsichisha cai testimonio ciertopacha cajta.

38 Yalishca jipa Jesús tucuilla paicunata tacarishca jipa, shuj fuyu shamurca, llanduyachircapash taucapachacunata chaimanda paicuna na Jesústa ricui usharca.

39 Paicuna llanduyachishca cajpi pai rirca paicunapamanda, jahua pachaman vitsiarca. Discípulocuna ricurca testimoniota curcapash jahua pachaman cutin pai vitsiashcata.