1 Yalishca jipa imaura Jesús Nefiman cai shimicunata palarshca cajpi, maijan achil cayashcacunamanbash (cunan maijan achil cayashcacuna, ushaita chasquishca autoridadtapash bautizangapa paicunata yupajpi carca chunga ishcai) riqui, paipaj maquita taucapachacunaman chutarca, caparircapash, nishpa: Achilyachishca canguichi canguna yashpapacha uyanguichi cai chunga ishcaipaj shimicunata picunata ñuca cangunapamanda ajllashcani achil yachachichun cangunata, cangunapaj sirvij runacuna cachun; paicunaman ñuca cushcani ushaita paicuna cangunata bautizachun yacuhuan; canguna yacuhuan bautizarishca jipa, riqui, ñuca cangunata bautizasha ninahuan, Espíritu Santohuanbash; chaimanda achilyachishca canguichi canguna ñucapi crishpa, bautizarishpa, ñucata ricushca, yachashca jipa, ñuca cajta.

2 Cutin, ashtahuan achilyachishca can maijan cringa cangunapaj shimicunapi imashpa canguna testificanguichi ñucata ricushcata, canguna yachajtapash ñuca cajta. Ari, achilyachishca can maijan cringa cangunapaj shimicunapi, jatun humildadman urai shamushpa, bautizarishpa, imashpa paicuna ricui tucunga ninahuan Espíritu Santohuanbash, chasquinga paicunapaj juchacunapaj anchuchita.

3 Ari, achilyachishca can espíritupi huajchacuna maijanguna ñucapaman shamun, paicunapaj jahua pachapaj reino can.

4 Cutin, achilyachishca can tucui llaquirijcuna, paicuna cushichishca canga.

5 Achilyachishca can mansocuna, paicuna chasquinga pambata.

6 Achilyachishca can tucui maijan yarjachin, yacunayachin alita ruranata, paicuna jundachishca canga Espíritu Santohuan.

7 Achilyachishca can shungumanda llaquijcuna, paicuna chasquinga shungumanda llaquinata.

8 Achilyachishca can tucui shungupi mapa illacuna, paicuna Diosta ricunga.

9 Achilyachishca can tucui sumaj causaita rurajcuna, paicuna cayai tucushca canga Diospaj huahuacuna.

10 Achilyachishca can tucui maijanguna ñucapaj shutimanda na ricunayachishpa cati tucujcuna, paicunapaj can jahua pacha reino.

11 Achilyachishca canguichi runacunahuan plitui tucushpa, na ricunayachishpa catij tucujpi, tucui laya na alicunata nishpa cangunapaj contra, ñuca cauzamanda;

12 Canguna charinguichi jatun cushijuita, ninandapacha cushijushca canguichi, imashpa jatun canga cangunapaj randi chasquina jahua pachapi; shina na ricunayachishpa cati tucurca achil villachijcuna maijanguna cangunata ñauparca.

13 Ciertopacha, ciertopacha, ñuca cangunaman nini, ñuca cuni cangunaman alpapaj cachi cachun; ashtahuangari cachi chingachijpi caipaj malinata imashnashi alpaca cachiyachishca canga? Cachica chaimanda caiman nimapa na ali canga, ashtahuangari shitashca canga, runacunapaj chaquicunahuan sarui tucushca canga.

14 Ciertopacha, ciertopacha, ñuca cangunata nini, ñuca cangunata mandani cai llactapuracunapaj micha cachun. Shuj llacta shuj uchilla urcu jahuapi churashca na pacalla caita ushanllu.

15 Riqui, runacuna japichinllu shuj velata, caita churanllu almud ucupi? Na, ashtahuangari shuj candelabropi, cai cun michata tucui maijan huasipi cajcunaman;

16 Chaimanda saquichi cangunapaj micha shina punchapamba cachun cai llactapuracunapaj ñaupapi, paicuna ricui ushachun cangunapaj ali ruraicunata, punchallayachichun cangunapaj Taitata pimi jahua pachapi can.

17 Ama yuyaichichu ñuca shamujta catichunbacha saquishcacunata tucuchingapa nacashpa achil villachijcunata. Ñuca na tucuchingapa shamunichu ashtahuangari pactachingapa;

18 Ciertopacha ñuca cangunaman nini, shuj jotallapash nacashpa shuj tildellapash na yalishcachu catichunbacha saquishcamanda, ashtahuangari ñucapi cai tucui pactachishca canga.

19 Riqui, ñuca cangunaman cushcani catichunbacha saquishcacunata, ñuca Taitapaj rurachunbacha saquishcacunatapash canguna ñucapi crichun, canguna arrepentirichun cangunapaj juchacunamanda, ñucapaman shamuchun shuj faquirishca shunguhuan shuj cazuj amujlla espírituhuan. Riqui, cangunapaj ñaupapi charinguichi rurachunbacha saquishcacunata, catichunbacha saquishcacuna pactachishca can.

20 Chaimanda ñucapaman shamuichi quishpirishca caichi; ciertopacha ñuca cangunaman nini, imashpapash canguna na alichinguichi ñucapaj rurachunbacha saquishcacunata, imata ñuca cunan mandashcani, nimashnaman na yaicunguichichu jahua pachapaj reinoman.

21 Canguna uyashcanguichi paicuna nishca cashca punda punllacunapi, cai quilcashcapash can cangunapaj ñaupapi, ama huañuchinguichita, maijanbash huañuchijpi Diospaj ricushpa chasquichinapi llaquichinapi canga;

22 Ashtahuangari ñuca cangunaman nini, maijanbash fiñashca cajpi paipaj huauquihuan paipaj ricushpa chasquichinapaj llaquichinapi canga. Maijanbash paipaj huauquita ninga, Tundu, conciliopaj llaquichinapi canga; maijanbash ninga, Muspa, ucu pacha ninapaj llaquichinapi canga.

23 Chaimanda, canguna ñucapaman shamujpica, nacashpa ñucapaman shamungapa munajpi, yarishpa quiquinba huauqui imatachari charijta quiquinba contra—

24 Ri quiquinba huauquipaman, ali tucui quiquinba huauquihuanra, shinashpa shamui ñucapaman tucui shungupaj munaihuan, ñuca canda chasquisha.

25 Ñapash ali tucui quiquinda napacha ricunayachijhuan ñanbi cashpallata paihuan, nacashpa japitucunguiman, cárcelpi shitai tucushca canguiman.

26 Ciertopacha, ciertopacha, ñuca quiquinman nini, nimashnaman chaimanda na llujshingui imaura tucuri senineta pagangacaman. Cárcelpi cashpaca shuj seninetapash pagai ushanguicha? Ciertopacha, ciertopacha, ñuca canman nini, Na.

27 Riqui, cai quilcashca can paicuna punda punllacunapaj, ama adulteriota rurangui;

28 Ashtahuangari ñuca nini cangunaman, maijanbash ricujpi shuj huarmita paita munashpa, ña adulteriota rurashca can paipaj shungupi.

29 Riqui, ñuca cangunaman shuj rurachunbacha saquishcata, nima cai cuzascunata yaicuchun saquingui cangunapaj shungupi;

30 Ashtahuan ali canga cangunamandallata cai cuzascunata negai, caimanda canguna japinguichi cangunapaj cruzta, ucu pachaman shitai tucushca cana randi.

31 Cai quilcashca can, maijanbash paipaj huarmita jichun, saqui pai cuchun divorciopaj shuj quilcashcata.

32 Ciertopacha, ciertopacha, ñuca cangunaman nini, maijanbash jichun paipaj huarmita, imashpapash fornicaciónmanda, paita adulteriota rurachin; maijanbash paihuan cazaran divorciarishcahuan, adulteriota ruran.

33 Cutin cai quilcashca can, ama juranguichichu quiquingunallata, ashtahuangari Apunchijman ima juramentocunata pactachinguichi;

34 Ashtahuangari ciertopacha, ciertopacha, ñuca cangunaman nini, ima layapash ama juranguichi; jahua pachamandapash, imashpa cai can Diospaj jatun tiarina;

35 Alpamandapash, imashpa cai can paipaj chaquisaruna;

36 Ama juranguichi quiquinba umamanda, na rurai ushanguichi shuj ajchata yana nacashpa yura;

37 Ashtahuangaricangunapaj parlaicuna cachun Ari, ari; Na, na; imapash caita ashta yalica na ali can.

38 Riqui, cai can quilcashca, shuj ñavimanda cutishuj ñavita, shuj quirumanda cutishuj quiruta;

39 Ashtahuangari ñuca cangunaman nini, canguna na jarcanguichichu na alita, ashtahuangari maijanbash quiquinda chugrichijpi quiquinba ali lado ñavi chichuta, paiman cutishuj ladotapash ricuchi;

40 Maijan runapash demandan quiquinda catichunbacha saquishcapaj ñaupaman quiquinba túnicata quichujpipash, paiman capatapash saqui;

41 Maijanbash shuj millata richun mandajpi, ishcaitapash paihuan ri.

42 Quiquinda mañajpi paiman cuilla, quiquinda mañachi nijpi ama na nichu.

43 Riqui cai quilcashcapash can, juyanguichi quiquinba ladopi causajta, millanayachi quiquinda napacha ricunayachijta;

44 Ashtahuangari riqui ñuca cangunaman nini, juyai cangunata napacha ricunayachijcunata, achilyachi cangunata llaquichijcunata, alita rurai cangunata millanayachijta, paicunamanda achil mañai, cangunata catiriashpa llaquichijcunamandapash;

45 Cai ushangapa cangunapaj Taitapaj huahuacuna pimi jahua pachapi can; pai indita llujshichin na alita rurajcunapa, alita rurajcunapapash;

46 Chaimanda chai cuzascuna ima carca punda punllacunapaj, ima carca catichunbacha saquishcacunapi, ñucapi tucui pactashca can.

47 Rucu cuzascuna tucurishca can, tucui cuzascuna mushujman tigrashca.

48 Chaimanda ñuca munani canguna alipacha cachun imashna ñuca cani, nacashpa cangunapaj Taitashna pimi can jahua pachapi alipacha can.