1 Ciertopacha, ciertopacha, ñuca nini ñuca munani canguna huajchacunaman limosnata carachun; ashtahuangari cuidarichi cangunapaj limosnata ama caraichi runacunapaj ñaupapi paicunamanda ricushca cangapa; na shina cajpica canguna na charinguichi randi carashcata cangunapaj Taitapajmanda pimi jahua pachapi can.

2 Chaimanda, imaura cangunapaj limosnata carashpa ama shuj trompetata huacachi canba ñaupapi, imashna hipócritacuna ruran tandanajuna huasicunapi, ñangunapipash, paicuna runacunapaj cushijuita chari ushangapa. Ciertopacha ñuca nini cangunaman, paicunapaj randi carashcata charin.

3 Ashtahuangari imaura cangunapaj limosnata carashpa canba lluqui maqui ama yachachun saqui imata ali lado maqui rurajta;

4 Cangunapaj limosna pacalla cachun; quiquinba Taita pimi pacalla ricun, pai randi carachun quiquinman tucuipash yachajta.

5 Imaura quiquin achil mañashpa ama ruranguichi hipócritacunashna, paicuna ninanda achil mañan, tandanajuna huasicunapi shayarishpa, ñangunapaj esquinacunapipash, runacunahuan ricui tucushca cangapa. Ciertopacha ñuca cangunaman nini, paicuna charishca can paicunapaj randi caraita.

6 Ashtahuangari quiquin, imaura achil mañashpa, yaicui quiquinba huasiman, imaura punguta vichashpa, achil mañai quiquinba Taitata pimi pacallapi can; quiquinba Taita, pimi ricun pacallapi, randi caranga tucuipash yachajta.

7 Ashtahuangari imaura quiquin achil mañajpi, ama yanga chaillata ninacunata ningui, Diosta na crijcunashna, imashpa paicuna uyashca cashun yuyan paicunapaj ashtaca parlaicunamanda.

8 Ama paicunashna caichi, imashpa cangunapaj Taita yachan ima cuzascunata minishtijta nara canguna mañajpillata.

9 Cashna laya canguna achil mañaichi: Ñucanchi Taita pimi jahua pachapi cangui, achilyachishca cachun quiquinba shuti.

10 Quiquinba munai rurashca cachun cai pachapi jahua pachapipash.

11 Perdonai ñucanchi dibita, imashna ñucanchi dibijcunata perdonanchi.

12 Tentaciónman ama urmachu saquichu, ashtahuangari na alimanda cacharichi.

13 Quiquinba reinoca can, ushaipash, punchapambapash, mana tucurinacaman. Shinacapashcachun.

14 Canguna runacunata paicunapaj na alita rurashpa faquishcacunata perdonajpica cangunapaj jahuapachamanda Taita cangunatapash perdonanga;

15 Ashtahuangari canguna runacunata paicunapaj na alita rurashpa faquishcacunata na perdonajpica cangunapaj Taitapash cangunapaj na alita rurashpa faquishcacunata na perdonangachu.

16 Ashtahuanbash, imaura canguna ayunanajushpa ama hipócritacunashna caichu, llaquilla ricunajuihuan, imashpa paicunapaj ñavicunata llaqui cajta ricuchin runacunaman ayunanajujta ricuchingapa. Ciertopacha ñuca cangunaman nini, paicuna charin paicunapaj randi carashcata.

17 Ashtahuangari quiquinga, imaura ayunashpa, quiquinba umata ungi, quiquinba ñavita maillai;

18 Ama runacunaman ayunajujta ricuchi, ashtahangari quiquinba Taitaman, pimi pacallapi can; quiquinba Taita, pimi pacallapi ricun, randi caranga tucuilla ricujta.

19 Ama mirachi cangunapaj charijyanacunata cai pachapi, maipi polilla, mohopash tucuchin, shuhuacunapash utujushpa shuhuan;

20 Ashtahuangari mirachi cangunapaj charijyanacunata jahua pachapi, maipi polillapash, mohopash na tucuchin, maipi shuhuacunapash na utujun, na shuhuanbash.

21 Maipi cangunapaj charijyanacuna can, chaipi canga cangunapaj shungucunapash.

22 Cuerpopaj micha can ñavi; chaimanda, quiquinba ñavi puro cajpica, tucuilla cuerpo micha junda canga.

23 Ashtahuangari quiquinba ñavi na ali cajpica, tucuilla cuerpo yanapamba canga. Chaimanda, micha quiquinbapi caj yanalla cajpica, imashna jatun can chai yanalla!

24 Maijan runapash na sirvi ushan ishcai yachachijcunata; millanayachinga shujta, caishutaca juyanga, nacashpa shujtaca sirvinga caishutaca na ricunayachinga. Canguna na sirvi ushanguichichu Diosta, Mamóndapash.

25 Cunan yalishca jipa imaura Jesús parlashca cajpi cai shimicunata ricurca chunga ishcaicunata maijangunata pai ajllashca carca, paicunaman nirca: Yarichi shimicunata imata ñuca parlashcani. Riqui, canguna canguichi maijanguna ñuca ajllashcani cai llactapuracunata achil yachachingapa. Chaimanda ñuca cangunaman nini, ama yapata yaichichu cangunapaj causaimanda, imata canguna micunamanda, nacashpa imata canguna ufianamanda; nacashpa cangunapaj cuerpopaj imata churajunata. Nachu causaica micunata yali, cuerpoca churajunata yali?

26 Ricuichi jahuata rij alas-huan animalcunata, paicuna na tarpun, na fucushcatapash na tandachin nacashpa na tandachinbash murucunata; ashtahuangari cangunapaj jahuapachamanda Taita paicunaman micuchin. Nachu paicunata ashtahuan yali canguichi?

27 Pita cangunamanda yapata yashpa shuj codota mirachi ushan paipaj viñaita?

28 Imashpata churajunamanda yapata yanguichi? Ricuichi liriocunata tarpuj pambapi paicuna viñan; paicuna na trabajan, paicuna na puchanbashchu;

29 Ashtahuangari ñuca cangunaman nini, Salomónbash, tucui paipaj punchapambapi, caicuna laya na churajurca.

30 Caimanda, Dios pambapaj jihuata shina churachin, imami cunan can, cayapa jurnuman shitashca can, shina pai cangunata churachinga canguna na ashalla fehuan cajpica.

31 Chaimanda ama yapata yaichichu, nishpa, Imatashi micushun? Nacashpa, Imatashi ufiashun? Nacashpa, Imahuanshi churajushca cashun?

32 Cangunapaj jahuapachamanda Taita yachan cangunapaj tucui minishtirishca cuzascunata.

33 Ashtahuangari callaripi mascai Diospaj reinota paipaj ali ruraicunatapash, tucui cai cuzascuna cangunaman mirachishca canga.

34 Ama yapata yaichichu caya punllamanda, cayaca apamunga yapata yaita chai cuzascunamandallata. Chailla ali can cunan punlla na alipa.