Jesucristo Nefipaj llactapuracunaman ricurimurca, imashna taucapachacuna tandanajushca carca Ashtacapacha Tiaj pambapi, paicunaman achil yachachirca; cashna paicunapaman ricurimurca.
11 capítulomanda 26 capítulocaman charin.
11 Capítulo
Taita testifican paipaj Juyashca Churimanda—Cristo ricurimun shujpa juchamanda huañunamanda villan—Llactapuracuna tacarin chugri marcacunata paipaj maquicunapi, chaquicunapi costadopipash—Paicuna caparin Hosanna—Pai yachachin imashna, ima laya cana bautismo—Randimanda pliturinapaj espíritu ayapaj can—Cristopaj yachachishca can runacuna crinapacha, bautizarishca cana, Espíritu Santota chasquina. Nara C.H. 34.
1 Cunan yalishca jipa tiarca shuj jatun ashtacapacha tandanajushca, Nefipaj llactapuracuna, templota muyushca cai carca Ashtacapacha Tiaj pambapi; paicuna ninanda cushijushca, cushijushca carca, caishuhuan chaishuhuan, ricuchirishpa caishuman chaishuman jatun ninan cushijui cambio ima yalishcata.
2 Paicuna parlanajurcapash cai Jesucristo, pimanda señal cushca carca paipaj huañuimanda.
3 Yalishca jipa imaura paicuna shina caishuhuan chaishuhuan parlanajujpi, paicuna uyarca shuj shimita jahua pachamanda shamujtashnalla; paicuna muyundi ricurca, na entendirca shimita imata paicuna uyarca; cai na carca áspera shimi, shinlli shimipash na carca; shina cajpipash, masqui cai alillagupacha shimi cashpapash uyajcunapaj ucumanbacha yaicurca, shinashpa na tiarca paicunapaj cuerpopi nima na chujchuna; ari tucui almacunaman yaicurca, rupachirca paicunapaj shungucunata.
4 Yalishca jipa cutin uyarca shimita, paicuna na entendircachu.
5 Cutin quimsa viaje shimita uyashpa, paicunapaj rinricunata pascarca uyangapa; paicuna ricunajurca maimanda bulla shamujta; shinlliyashpaca ricurca jahua pachata, maimanda bulla shamurca.
6 Riqui, quimsa viajepi paicuna entendirca shimita imata paicuna uyarca; cai nirca paicunaman:
7 Riqui ñuca Juyashca Churi, pipapi ninanda cushijushca cani, pipapi ñuca shutita punchallayashca can—paita uyapaichi.
8 Yalishca jipa, paicuna entendishpaca jahua pachaman cutin paicunapaj ñavicunata churarca; riqui, paicuna ricurca shuj Runa jahua pachamanda uriajumujujta; pai churajushca carca yuraj churajunapi; urai shamushpa paicunapaj chaupipi shayarirca; tucuilla tandanajushcacuna paipaman tigrarirca, paicuna manllarca paicunapaj shimicunata pascangapa, caishu chaishumanbash, na yacharca ima cai canata, paicuna yuyarca caica shuj ángel cashcata pimi paicunaman ricurimujujta.
9 Yalishca jipa paipaj maquita chutarca parlarcapash llactapuracunaman, nishpa:
10 Riqui, ñuca Jesucristo cani, pimanda achil villachijcuna testificarca cai pachaman shamunata.
11 Riqui, ñuca cani micha, cai pachapaj causai; ñuca ufiashcani jaya copamanda imata Taita ñucaman carashca, Taitata punchallayachishcani cai pachapaj juchacunata ñucapi japishpa, imahuan ñuca curishcani Taitapaj munaiman tucui cuzascunapi callarimanda.
12 Yalishca jipa imaura Jesús cai shimicunata parlashca cajpi tucui tandanajushcacuna alpaman urmarca; imashpa, paicuna yarirca caita paicunaman achil villachishca cashcata Cristo ricurimunata paicunapaman jahua pachaman vitsiashca jipa.
13 Yalishca jipa Apunchij paicunaman parlarca nishpa:
14 Jatarichi ñucapaman shamuichi, huashajuchinguichi ñuca costadopi cangunapaj maquicunata, tacaringuichipash clavocunapaj marcacunata ñuca maquicunapi, ñuca chaquicunapipash, canguna yachai ushachun ñuca cajta Israelpaj Dios, tucui alpapaj Dios, huañuchi tucushcanipash cai pachapaj juchacunamanda.
15 Yalishca jipa taucapachacuna ñaupaman rirca, huashajuchirca paicunapaj maquicunata paipaj costadopi, tacarircapash clavocunapaj marcacunata paipaj maquicunapi, paipaj chaquicunapi; cai rurarca, rishpa shuj shujlla imaura tucuilla chayangacaman, ricurca paicunapaj ñavicunahuan tacarircapash paicunapaj maquicunahuan, ciertopacha yacharca testificarcapash, pai cajta, pimanda achil villachijcuna quilcashca carca, pimi shamuna carca.
16 Imaura tucuilla rishca, paicunallata ricushca cashpa, tucuilla caparirca, nishpa:
17 Hosanna! Achilyachishca cachun Jahua Jahua Pacha Diospaj shuti! Paicuna Jesúspaj chaquicunapi cungurishpa, paita adorarca.
18 Yalishca jipa pai Nefiman parlarca (imashpa Nefi taucapachacunapi carca) pai mandarcapash paita shamuchun.
19 Nefi jatarirca, rircapash, cungurirca Apunchijpaj ñaupapi paipaj chaquicunata mucharcapash.
20 Apunchij paita mandarca jatarichun. Jatarirca, paipaj ñaupapi shayarircapash.
21 Apunchij paiman nirca: Ñuca canman cuni ushaita can bautizangui cai llactapuracunata imaura ñuca cutin jahua pachaman vitsiashca cajpi.
22 Cutin Apunchij cutishujcunata cayarca, paicunaman shinallata nirca; paicunaman curca ushaita bautizachun. Paicunaman nirca: Cai laya bautizanguichi; na tiangachu cangunapuracunapi yali canchi ninajuicuna.
23 Ciertopacha cangunaman nini, maijanguna paicunapaj juchacunamanda arrepentirin cangunapaj shimicunamanda, bautizarishca cangapa munajpi ñuca shutipi, paicunata cai laya bautizanguichi—Riqui, canguna urai ringuichi yacupi shayarishpa, ñuca shutipi paicunata bautizanguichi.
24 Cunan riqui, caicuna can shimicuna imata ninguichi, paicunapaj shutipi cayashpa, ninguichi:
25 Jesucristopaj autoridadta cushcata charimanda, ñuca canda bautizani Taitapaj shutipi, Churipajpash, Espíritu Santopajpash. Shinacapashcachun.
26 Shina canguna paicunata yacupi huashajuchinguichi, yacumanda cutin llujchinguichipash.
27 Cashna laya canguna ñuca shutipi bautizanguichi; riqui, ciertopacha ñuca cangunaman nini, Taita, Churipash, Espíritu Santopash shujlla can; ñuca Taitapi cani, Taitapash ñucapi, Taitapash ñucapash shujlla canchi.
28 Imata ñuca mandashcamanda shina canguna bautizanguichi. Na tianga yali canchi ninajuicuna cangunapurapi, cunangaman tiashcashna; na tianga yali canchi ninajuicunapash cangunapurapi ñuca yachachishcapaj puntocunamanda, cunangaman tiashcashna.
29 Ciertopacha, ciertopacha cangunaman nini, pi fiñanajuipaj espírituta charijca na ñucapaj can, ashtahuangari ayapaj can, pimi fiñanajuipaj taita can, pai runacunapaj shungucunata tangachin fiñaihuan macanajuchun, caishuhuan chaishuhuan.
30 Riqui, cai na canllu ñuca yachachishca, tangachina runacunapaj shungucunata fiñaihuan, caishu chaishupaj contra; ashtahuangari cai can ñuca yachachij, shina cuzascuna tucurichun.
31 Riqui, ciertopacha, ciertopacha, ñuca cangunaman nini, ñuca villasha cangunaman ñuca yachachinata.
32 Cai can ñuca yachachij, cai can yachachij imata Taita ñucaman cushca can; ñuca testificani Taitamanda, Taitapash testifican ñucamanda, Espíritu Santopash testifican Taitamanda, ñucamandapash; ñuca testificani Taita mandashca tucui runacunata, maipipash, arrepentirichun, ñucapi crichunbash.
33 Maijanbash ñucapi crin, bautizarishca cajpipash, pai quishpirishca canga; paicuna can maijanguna chasquinga Diospaj reinota.
34 Maijanbash ñucapi na crin, na bautizarishca cajpipash, llaquichi tucushca canga.
35 Ciertopacha, ciertopacha, ñuca cangunaman nini, cai can ñuca yachachij, ñuca testificani Taitamanda; maijanbash crin ñucapi crin Taitapipash; paiman Taita testificanga ñucamanda, imashpa paita ricugringa ninahuan, Espíritu Santohuanbash.
36 Shina Taita testificanga ñucamanda, Espíritu Santopash paiman testificanga Taitamanda, ñucamandapash; Taitaca, ñucapash, Espíritu Santopash shujlla canchi.
37 Cutin cangunaman nini, arrepentichipacha, uchilla huahuagucunashna tigraichi, bautizarishca caichi ñuca shutipi, nacashpa canguna nimamanda cai cuzascunata chasquinguichi.
38 Cutin ñuca cangunaman nini, arrepentirichipacha, bautizarishca caichi ñuca shutipi, shuj uchilla huahuagucunashna tigraichi, nacashpa canguna nimamanda Diospaj reinota chasquinguichi.
39 Ciertopacha, ciertopacha, ñuca cangunaman nini, cai can ñuca yachachij, maijanbash caipi shayachijpi ñuca rumi jahuapi shayachinguichi, ucu pachapaj pungucuna na mishangachu paicunapaj contra.
40 Maijanbash ashtahuanda nacashpa caita yali ashalla yachachijpi, caita shayachijpipash ñuca yachachijshna, chaicuna na alipaj can, na shayachishcapash can ñuca rumipi; ashtahuangari pai shayachin shuj tʼiyulla pushtupi, ucu pachapaj pungucunapash pascashca canga chasquingapa shina imaura yacu jundaicuna shamujpi, huairacuna paicunata huajtajpipash.
41 Chaimanda, richi cai llactapuracunapaman, villaichi shimicunata imata ñuca parlashcani, alpa tucurinacunacaman.