1 Ne mpindiewu biakalua ne kuvua musumba munena wa bantu ba Nefi wakadisangisha pamua, ku mpenga yonsu ya ntempelo uvua mu bulaba bua Buvula; ne bavua bakema ne bakatshila munkatshi muabu, ne balejangana dishintuluka dinena ne dia dikema divua dienzeka.

2 Ne bavua bayukila kabidi bua Yezu Kilisto ewu, uvua tshimanyinu tshifidibua bitangila lufu luenda.

3 Ne biakalua ne patshivuabu bayukilangana nanku, bakumvua dîyi bu difumina mu diûlu; ne bakakupa mesu abu ku mpenga yonsu, bualu kabakumvua dîyi diakatelejabu to; ne kadivua dîyi dia tshikisu, anyi kadivua dikola; nansha nanku, bu muvuadi dikala dîyi diteketa diakatubula munda mua bavua badiumvua, bua ne kakuvua tshitupa tshia mubidi wabu tshiakapangatshi kukankisha to; eyowa, diakabatubula munda mua anyima mena, ne diakenzeja ne mitshima yabu yôsha.

4 Ne biakalua ne bakateleja kabidi dîyi, ne kabakadiumvua to.

5 Ne bakateleja kabidi dîyi musangu muisatu, ne bakakangula matshi abu bua kuditeleja; ne mesu abu avua matangila ku luseka luvua mutoyi wadi uluila; ne bakatangila ne disuminyina mu diûlu, muvua mutoyi ufumina.

6 Ne monayi, musangu muisatu bakumvua dîyi diakatelejabu; ne diakabambila:

7 Monayi Muananyi Munanga, yeya udi unsankisha bikola, wa kundi mutumbishila dîna dianyi—mumvuilayi.

8 Ne biakalua ne, pakumvuabu bakabandisha kabidi mesu abu mu diûlu; ne monayi, bakamona Muntu ufuma mu diûlu; ne uvua muvuala nkanzu mutoka; ne wakapueka panshi ne wakimana munkatshi muabu; ne mesu a musumba mujima akakudimuka kudiye, ne kabakakima kubulula mikana yabu to, nansha bua kuyikilangana bobu nkayabu, ne kabavua bamanya tshivuabi biumvuija to, bualu bua bakela meji ne muanjelu ki uvua mubamuenekela.

9 Ne biakalua ne wakôlola tshianza tshienda ne wakambila bantu, wamba ne:

10 Monayi, ndi Yezu Kilisto, uvua bambi bajadika ne nealua pa buloba.

11 Ne monayi, ndi bukenka ne moyo wa ba pa buloba; ne ngakanua dikopu dia bululu diakampesha Tatu, ne ngakatumbisha Tatu mu diambula dia mibi ya ba pa buloba, mu diodi ngakitaba disua dia Tatu mu bintu bionsu kumbukila ku mbangilu.

12 Ne biakalua ne pakakula Yezu mêyi â musumba mujima wa bantu wakapona pa buloba; bualu bakavuluka ne bavua bamba ku Nyuma munkatshi muabu ne Kilisto neadileja kudibu kunyima kua dibanda dienda mu diûlu.

13 Ne biakalua ne Mukalenga wakabambila wamba ne:

14 Jukayi ne luayi kundi, bua nuela bianza bienu mu badi yanyi, ne kabidi bua ne numvua bibangu bia misonsu mu bianza bianyi ne mu makasa anyi, bua ne numanya ne ndi Nzambi wa Isalele, ne Nzambi wa buloba bujima, ne mvua mushipibua bua mibi ya ba pa buloba.

15 Ne biakalua ne musumba wa bantu wakasemena, ne kuela bianza biabu mu badi yenda, ne kumvua bibangu bia misonsu mu bianza bienda ne mu makasa enda; ne etshi bakenza, basemena ku muntu ku muntu tô ne pakasemenabu bonsu, ne kumona ne mesu abu ne kulenga ne bianza biabu, ne kumanya bua bushuwa ne kujadika ne, uvua yeya, uvuabi bifundibua kudi bambi, walua.

16 Ne pakayabu bonsu ne pakadimuenenabu, bakabila ne dîyi dimua, bamba:

17 Hozana! Dibeneshibua dikala dîna dia Nzambi Mutamba Bunena! Ne bakapona panshi ku makasa a Yezu, ne bakamukukuila.

18 Ne biakalua ne wakambila Nefi (bualu Nefi uvua munkatshi mua musumba wa bantu) ne wakamupesha mukenji ne asemena.

19 Ne Nefi wakajuka ne wakasemena, ne wakinama kumpala kua Mukalenga ne wakatua makasa enda mishiku.

20 Ne Mukalenga wakamupesha mukenji ne ajuka. Ne wakajuka ne wakimana kumpala kuenda.

21 Ne Mukalenga wakamuambila ne: Ndi nkupesha bukôkeshi bua utambuisha bantu aba pangikala mubanda kabidi mu diûlu.

22 Ne kabidi Mukalenga wakabikila bakuabu, ne kuamba kudibu momumua; ne wakabapesha bukola bua kutambuisha. Ne wakamba kudibu: Ku mushindu ewu nenutambuisha; ne kakua kuikala matandu munkatshi muenu to.

23 Bulelela ndi nnuambila ne, ewu yonsu udi ukudimuna mutshima ku mibi yenda bua mêyi enu, ne ujinga kutambuishibua mu dîna dianyi, mushindu ewu nenumutambuisha—Monayi, nenupueka ne nenuimana mu mâyi, ne mu dîna dianyi nenumutambuisha.

24 Ne mpindiewu monayi, â adi mêyi anuamba, nubabikila mu dîna, nuamba:

25 Muikala mupeshibua bukôkeshi kudi Yezu Kilisto, ndi nkutambuisha mu dîna dia Tatu, ne dia Muana, ne dia Nyuma wa Tshijila. Amena.

26 Ne pashisha nenubina mu mâyi, ne kubapatula kabidi mu mâyi.

27 Ne ku mushindu ewu nenutambuisha mu dîna dianyi; bualu monayi, bulelela ndi nnuambila ne, Tatu, ne Muana, ne Nyuma wa Tshijila badi tshimua; ne ndi munda mua Tatu, ne Tatu udi munda muanyi, ne Tatu ne mema tudi tshimua.

28 Ne nenutambuisha nanku bilondeshila bu mundi munupesha mukenji. Ne kakuikadi matandu munkatshi muenu to, bu muvuabi bikala tô ne mpindiewu; kakuikadi matandu munkatshi muenu bitangila malu a dilongesha dianyi to, bu muvuabi bikala tô ne mpindiewu.

29 Bualu bulelela, bulelela ndi nnuambila, udi ne nyuma wa dikokangana kena wanyi to, kadi udi wa diabulu, udi muikala tatuenda wa dikokangana, ne udi usonsola mitshima ya bantu bua kutandangana ne tshiji.

30 Monayi, edi kadiena dilongesha dianyi to, bua kusonsola mitshima ya bantu bua kuluishangana ne tshiji; kadi edi didi dilongesha dianyi, bua bintu bia nanku bijika.

31 Monayi, bulelela, bulelela, ndi nnuambila ne, nennumanyisha dilongesha dianyi.

32 Ne edi didi dilongesha dianyi, ne didi dilongesha didi Tatu mumpesha; ne ndi njadika bua Tatu, ne Tatu udi ujadika buanyi, ne Nyuma wa Tshijila udi ujadika bua Tatu ne buanyi; ne ndi njadika ne Tatu udi upesha bantu bonsu mukenji, muaba onsu, bua kukudimuna mutshima ne kungitabuija.

33 Ne ewu yonsu udi ungitabuija, ne udi utambuishibua, awawu neapandishibua; ne badi aba bâpiana bukalenga bua Nzambi.

34 Ne ewu yonsu udi kayi ungitabuija, ne udi kayi utambuishibua, neapîshibua.

35 Bulelela, bulelela, ndi nnuambila, edi didi dilongesha dianyi, ne ndi njadika buadi bua Tatu; ne ewu yonsu udi ungitabuija udi witabuija Tatu kabidi; ne kudiye Tatu neajadika buanyi, bualu neamukumbula ne kapia ne ne Nyuma wa Tshijila.

36 Ne nanku Tatu neajadika buanyi, ne Nyuma wa Tshijila neamujadikila bua Tatu ne buanyi; bualu Tatu, ne mema, ne Nyuma wa Tshijila tudi umua.

37 Ne ndi nnuambila kabidi ne, nudi ne tshia kukudimuna mutshima, ne kulua bu mudi muana muteketa, ne kutambuishibua mu dîna dianyi, tshianana kanuena mua kupeta bintu ebi to nansha bishi.

38 Ne ndi nnuambila kabidi ne, nudi ne tshia kukudimuna mutshima, ne kutambuishibua mu dîna dianyi, ne kulua bu mudi muana muteketa, tshianana kanuena mua kupiana bukalenga bua Nzambi to nansha bishi.

39 Bulelela, bulelela, ndi nnuambila ne, edi ki dilongesha dianyi, ne ewu yonsu udi wibaka pa mutu padi udi wibaka pa mutu pa dibua dianyi, ne bibuelelu bia ku ngena kabiakubatshimuna to.

40 Ne ewu yonsu wayisha bipita anyi bishadila edi, ne kubishikika ne dilongesha dianyi, yeya udi ufumina ku bubi, ne kena muibaka pa mutu pa dibua dianyi to; kadi udi wibaka pa mutu pa tshibangilu tshia lusenga, ne bibuelelu bia ku ngena bidi bikala biunzulula bua kuakidila muntu awu palua mâyi a nkoka ne pabatûta mpepela.

41 Nanku, ndayi kudi bantu aba, ne yishayi mêyi angakudi, ne ku ndekelu ya buloba.