1 Ne biakalua ne pakakula Yezu mêyi â kudi Nefi, ne kudi bavua babikidibua abu, (mpindiewu bungi bua bavua babikidibua, ne bakapeta bukola ne bukôkeshi bua kutambuisha, buvua dikumi ne babidi) ne monayi, wakôlola tshianza tshienda kudi musumba wa bantu, ne wakabila kudibu, wamba: Nudi babeneshibua binuateya ntema ku mêyi a bayidi aba dikumi ne babidi bandi musungula munkatshi muenu bua kunulongesha, ne bua kuikala basadidi benu; ne ndi mubapesha bukola bua ne banutambuisha ne mâyi; ne kunyima kua nuenu batambuishibua ne mâyi, monayi, nenutambuisha ne kapia ne ne Nyuma wa Tshijila; bua nanku nudi babeneshibua binuangitabuija ne kutambuishibua, kunyima kua nuenu bammona ne bamanya ne ndiku.

2 Ne kabidi, nangananga babeneshibua badi aba bitabuija mêyi enu bualu bua nenujadika ne nuamonyi, ne nudi bamanya ne ndi. Eyowa, babeneshibua badi aba bitabuija mêyi enu, ne bâpueka mu ndondu ya didipuekesha ne bâtambuishibua, bualu nebakumbudibua ne kapia ne ne Nyuma wa Tshijila, ne nebapeta dilekedibua dia mibi yabu.

3 Eyowa, babeneshibua badi bapela mu nyuma badi balua kundi, bualu bukalenga bua mu diûlu budi buabu.

4 Ne kabidi, babeneshibua badi bonsu badi badila, bualu nebasambibua.

5 Ne babeneshibua badi batudiji, bualu nebapiana buloba.

6 Ne babeneshibua badi bonsu badi ne nzala ne nyota ya buakana, bualu nebuwula ne Nyuma wa Tshijila.

7 Ne babeneshibua badi bena lusa, bualu nebapeta lusa.

8 Ne babeneshibua badi bonsu badi ne mutshima mukezuka, bualu nebamona Nzambi.

9 Ne babeneshibua badi bonsu benji ba ditalala, bualu nebabikidibua ne bana ba Nzambi.

10 Ne babeneshibua badi bonsu badi bakengeshibua bua bualu bua dîna dianyi, bualu bukalenga bua mu diûlu budi buabu.

11 Ne nudi babeneshibua pânupenda bantu ne pânukengeshabu, ne pânushiminyinabu malu mabi a mushindu onsu, bua bualu buanyi;

12 Bualu nenuikala ne disanka dinena ne nenusangala menamena, bualu difutu dienu mu diûlu nedikala dinena; bualu nanku ki muakakengeshabu bambi bavua kumpala kuenu.

13 Bulelela, bulelela, ndi nnuambila ne, ndi nutuma bua nuikala mukela wa buloba; kadi pikala mukela mujimija kutua kuawu, ne batuisha buloba ne tshinyi? Mukela kawakuikala muimpa bua tshintu kabidi to, kadi bua kuipatshibua ne kudiatakajibua mu makasa abu.

14 Bulelela, bulelela, ndi nnuambila, ndi nupesha bua kuikala bukenka bua bantu aba. Tshimenga tshiasa pa kakuna katshiena mua kusokokibua to.

15 Monayi, bantu badi batemesha muinda ne ba’uteka muinshi mua tshibondu anyi? To, kadi badi ba’uteka pa mensa a muinda, ne udi ufila bukenka kudi bonsu badi bikala mu nzubu;

16 Bua nanku lekelayi bukenka buenu buengelela bikola kumpala kua bantu aba, bua ne bamona midimu yenu mimpa ne batumbisha Tatuenu udi mu diûlu.

17 Kanuedi meji ne ndi mulua bua kushipa mikenji anyi miaku ya bambi to. Ntshiena mulua bua kushipa to kadi bua kukumbaja;

18 Bualu bulelela ndi nnuambila, katoba anyi kaleta nansha kamua kakena kajimina ku mikenji to, kadi kundi bionsu biakumbajibu.

19 Ne monayi, ndi munupesha mikenji ne mikandu ya Tatuanyi, ne nungitabuija, ne nukudimuna mutshima ku mibi yenu, ne nulua kundi ne mutshima mutshibuluka ne nyuma munyingalala. Monayi, nudi bikala ne mikenji kumpala kuenu, ne mikenji yakumbajibu.

20 Bua nanku luayi kundi ne nupandishibua; bualu bulelela ndi nnuambila ne, pa kumbusha nuenu balama mikenji yanyi, indi munupesha diba edi, kanuakubuela mu bukalenga bua mu diûlu to nansha bishi.

21 Nuvua bumvua ne bantu ba tshikondu tshia kala bakamba, ne bidi bifundibua kabidi kumpala kuenu ne, kushipi muntu to, ne ewu yonsu washipa muntu neikala mu njiwu wa dikosedibua dia tshibawu tshia Nzambi;

22 Kadi ndi nnuambila ne, ewu yonsu udi ufîkila muanabu tshiji neikala mu njiwu wa tshilumbuluilu tshienda. Ne ewu yonsu wambila muanabu ne, Laka, neikala mu njiwu wa kudi tshipangu; ne ewu yonsu wamba ne, Wewa mupota, neikala mu njiwu wa kapia ka mu ngena.

23 Bua nanku, biwalua kundi, anyi ujinga bua kulua kundi, ne uvuluka ne muanenu udi neba tshilumbu—

24 Ndâku kudi muanenu, ne diambedi ulengeja ne muanenu, ne pashisha ulua kundi ne kipatshila kajima ka mutshima, ne nenkuakidila.

25 Umvuangana ne muluishi weba lukasa pawutshidi muikala nenda mu njila, bua kalu kukukuata diba dionsu, ne newedibua mu buloko.

26 Bulelela, bulelela, ndi nkuambila ne, kuakupatukamu to nansha mushindu kayi tô ne pawikala mufuta ne senina wa ndekelu. Ne pawutshidi muikala mu buloko udi mua kufuta nansha senina umua anyi? Bulelela, bulelela, ndi nnuambila ne, To.

27 Monayi, bantu ba tshikondu tshia kala bakafunda ne, kuakuenda masandi to;

28 Kadi ndi nnuambila ne, ewu yonsu udi utangila mukaji, bua kumualakana, ukadi mumana kuenda nenda masandi mu mutshima wenda.

29 Monayi, ndi nupesha mukenji ne, kanulekedi bua tshintu nansha tshimua tshia ku bintu ebi tshibuela mu mutshima wenu to;

30 Bualu bidi bitamba buimpa ne nudibengela bintu ebi, bua nanku nenuambula mutshi wenu mutshiamakana, pa mutu pa nuenu kuedibua mu ngena.

31 Bidi bifunda ne, ewu yonsu wipata mukajenda, mulekelayi amupesha mukanda wa dishipa dia dibaka.

32 Bulelela, bulelela, ndi nnuambila, ewu yonsu wîpata mukaji wenda, amu bua buendenda, udi umuenzeja kuenda masandi; ne ewu yonsu udi usela mukaji udi mushipa dibaka udi wenda masandi.

33 Ne kabidi bidi bifunda ne, kuditshipi tshianana to, kadi wenzela Mukalenga mitshipu yeba;

34 Kadi bulelela, bulelela, ndi nnuambila ne, kanuditshipi nansha to; nansha kudi diûlu, bualu didi nkuasa wa butumbi wa Nzambi;

35 Anyi kudi buloba, bualu bua budi tshitekelu tshia makasa enda;

36 Kuditshipi nansha ku mutu weba, bualu bua kuena mua kuvuija lusuki lufîka anyi lutoka to;

37 Kadi diakula dieba dikala Eyowa, eyowa; To, to; bualu diakula dionsu didi ditentekeja pa ebi didi difumina ku bualu bubi.

38 Ne monayi, bidi bifunda ne, disu ku disu, ne dinu ku dinu;

39 Kadi ndi nnuambila ne, kanuluanganyi ne bubi to, kadi ewu yonsu wakutûta ku ditama dia tshianza tshia baluma, umuandamuina dikuabu kabidi;

40 Ne biaya neba muntu ku tshilumbuluilu ne kukunyenga tshilamba tshieba, lekela angata ne tshinkutu tshieba kabidi;

41 Ne ewu yonsu wakuendesha kilometre umua, enda nenda kilometre ibidi.

42 Upesha udi ukulomba, ne kupadi udi musua kukusomba tshintu to.

43 Ne monayi bifunda kabidi ne, neunanga mukueba ne ukina muena lukuna neba;

44 Kadi monayi ndi nnuambila, nangayi bena lukuna benu, beneshayi badi banutshipa, enzelayi badi banukina bimpa, ne sambilayi bua badi banumuenena ne badi banukengesha;

45 Bua ne nuikala bana ba Tatuenu udi mu diûlu; bualu udi ubandisha diba dienda bua babi ne bimpa.

46 Bua nanku malu awu avua mikala a mu tshikondu tshia kala, avua muinshi mua mikenji, kundi adi makumbajibua onsu.

47 Malu a kala ajiki, ne malu onsu alu mapia-mapia.

48 Nanku ndi musua ne nuikala bajalama bu mundi mema, anyi bu mudi Tatu wenu udi mu diûlu muikala mujalama.