1 Bulelela, bulelela, ndi nnuambila ne ndi musua ne nufila ka lusa kudi bapela; kadi dimukayi bua kanufidi ka lusa kenu kumpala kua bantu bua banumona; tshianana kanuena ne difutu dia kudi Tatu wenu udi mu diûlu to.

2 Bua nanku, panuafila ka lusa kenu, kanuedi mpungi kumpala kuenu to, bu mudi bantu ba mpala ibidi benza mu nsunagoga ne mu misêsu, bua bantu babatumbisha. Bulelela ndi nnuambila ne, bobu bakadi bapeta difutu diabu.

3 Kadi pawudi ufila ka lusa, kulekedi tshianza tshieba tshia bakaji tshimanya tshidi tshianza tshieba tshia baluma tshienza to;

4 Bua ne ka lusa keba kikala ka mu musokoku; ne Tatu weba udi umona mu musokoku, neakufuta patoka.

5 Ne pawudi usambila kuakuenza bu mudi bantu ba mpala ibidi benza to, bualu badi bananga kusambila, bimana mu nsunagoga ne mu mansangu a misêsu, bua ne bantu babamona. Bulelela ndi nnuambila ne, bobu bakadi bapeta difutu diabu.

6 Kadi wewa, pawudi usambila, buela mu kazubu keba ka tshisokomenu, ne pawinjila tshibi, usambila Tatu weba udi muikala mu musokoku; ne Tatu weba, udi umona mu musokoku, neakufuta patoka.

7 Kadi panudi nusambila, kanuakudi biakulakula to, bu bu mudi bampakanyi benza to, bualu badi bela meji ne nebabateleja bua bungi bua diakula diabu.

8 Kanuikadi bu mudibu to, bualu Tatu wenu udi mumanya bintu binudi nabi dijinga kumpala kua kanuyi banji kumulomba.

9 Ku mushindu ewu bua nanku nenusambila: Tatu wetu udi mu diûlu, dîna dieba ditumba.

10 Disua dieba dienzeka pa buloba bu mudidi dienzeka mu diûlu.

11 Ne utubuikidila mabanza etu, bu mutudi tubuikidila badi netu mabanza.

12 Ne kutufikishi ku ditêtshibua to, kadi utupatuisha mu bubi.

13 Bualu bukalenga, ne bukôkeshi, ne butumbi, bidi bieba bua kashidi. Amena.

14 Bualu, binuabuikidila bantu mapanga abu Tatu wenu wa mu diûlu neanubuikidila penu;

15 Kadi binuabenga kubuikidila bantu mapanga abu Tatu wenu kakunubuikidila mapanga enu to.

16 Menamena kabidi, panudi nujila kanuikadi ne mpala mibungama bu mudi bantu ba mpala ibidi benza, bualu bua badi bakudimuna mpala yabu bua bamueneka kudi bantu ne badi bajila to. Bulelela ndi nnuambila ne, bobu bakadi bapeta difutu diabu.

17 Kadi wewa, pawudi ujila, kulâba manyi pa mutu weba, ne usukula mpala;

18 Bua kumueneki kudi bantu ne udi ujila to, kadi kudi Tatu weba, udi muikala mu musokoku; ne Tatu weba, udi umona mu musokoku, neakufuta patoka.

19 Kanudibutshidi bintu bia mushinga pa buloba, padi musuasua ne dimomena bibipisha, ne bivi babuela ne bîba to;

20 Kadi nudibutshila bintu bia mushinga mu diûlu, mudi bishi anyi dimomena kabiyi bibipisha, ne bivi kabayi babuela anyi bîba to.

21 Bualu kudi bintu bueba bia mushinga, ki kuikala mutshima weba kabidi.

22 Disu didi muinda wa mubidi; bua nanku, bikala disu dieba dimona tshintu bimpa, mubidi weba mujima newikala muwula ntenta ne bukenka.

23 Kadi pikala disu dieba dibi, mubidi weba mujima neuwula ntenta ne mîdima. Bua nanku, pikala bukenka budi munda mueba buikala mîdima, bu mudiyi minena mîdima eyi!

24 Muntu nansha umua kena mua kusadila bamfumu babidi to; bualu neakina umua ne neananga mukuabu, anyi nansha nealamata kudi umua ne apetula mukuabu. Kanuena mua kusadila Nzambi ne Mamona to.

25 Ne mpindiewu biakalua ne pakakula Yezu mêyi â wakatangila bayidi dikumi ne babidi bavuaye musungula, ne wakabambila ne: Nuvuluka mêyi andi muamba. Bualu monayi, nuenu nudi bandi musungula bua kusadila bantu aba. Bua nanku ndi nnuambila ne, kanuedi meji bua moyo wenu, bua tshinuadia, anyi tshinuanua to; anyi nansha bua mubidi wenu, bua tshinuavuala to. Moyo kawena mutamba biakudia, ne mubidi kawena mutamba bivualu anyi?

26 Monayi nyunyi ya mûlu, bualu kayena ikuna, anyi kayena ipôla anyi kayena isangisha nteta mu bisaka to; kadi Tatu wenu udi mu diûlu udi uyidisha. Nuenu kanuena bayitamba anyi?

27 Nganyi wa munkatshi muenu udi ku dielangana meji dienda mua kulunga nkubita umua ku bula buenda?

28 Ne bua tshinyi nudi nuelangana meji a bivualu? Tangilayi bilongu bia mu mpata mudibi bisasa; kabiena bikuata mudimu, anyi kabiena bisala buanda to;

29 Ne kadi ndi nnuambila ne, nansha Solomo, uvua ne butumbi buenda bonsu, kabakamuvuadika bu mudi tshimua tshia ku bilongu ebi to.

30 Bua nanku, bikala Nzambi udi uvuadika mashinda a mu mpata nanku, adiku lelu, makelela adi edibua mu mfulu, mena nanku neanuvuadika, binuikala kanuyi ba ditabuija dikesa to.

31 Bua nanku kanuedi meji to, nuamba ne, Netudia tshinyi? anyi, Netunua tshinyi? anyi ne, Ntshinyi tshituadivuadika natshi?

32 Bualu bua Tatu wenu udi mu diûlu mmumanya ne nudi dijinga ne bintu ebi bionsu.

33 Kadi kebayi kumpala bukalenga bua Nzambi ne buakana buenda, ne bintu ebi bionsu nebanusakidilabi.

34 Bua nanku kanuelanganyi meji a malaba to, bualu malaba neadielelangana meji a bintu biawu. Dituku dionsu didi ne luadi lutatu ludi ludikumbanyina.