1 Ne biakalua ne Yezu wakapesha bayidi benda mukenji ne batuala diampa ne mvinyo kudiye.

2 Ne patshivuabu baya kukeba diampa ne mvinyo, wakapesha musumba wa bantu mukenji ne basomba pa buloba.

3 Ne pakalua bayidi ne diampa ne mvinyo, yeya wakangata diampa ne wakadikosolola ne wakadibenesha; ne wakadipesha bayidi ne wakabapesha mukenji ne badia.

4 Ne pakadiabu ne pakûkutabu, wakabapesha mukenji ne bapesha musumba wa bantu.

5 Ne pakadia musumba wa bantu ne pakûkutawu, wakambila bayidi ne: Monayi nekuikala umua munkatshi muenu wajididibua, ne nemmupesha bukôkeshi bua ne akosa diampa ne adibenesha ne adipesha bantu ba mu ekelezia wanyi, kudi bonsu bitabuija ne bâtambuishibua mu dîna dianyi.

6 Ne nenutangila bua kuenza nanku diba dionsu, mena bu mungenji, mena bu mungakosolodi diampa ne mungadibeneshi ne munganupeshidi.

7 Nenuenza nanku bua kuvuluka mubidi wanyi, unganuleji. Ne nebikala bujadiki kudi Tatu ne nudi numvuluka diba dionsu. Ne panuikala numvuluka diba dionsu, nenuikala ne Nyuma wanyi kunudi.

8 Ne biakalua ne pakambaye mêyi â, wakapesha bayidi benda mukenji ne bangata mvinyo uvua muikala mu dikopu ne bamunua, ne bapesha pabu musumba wa bantu bua ne banua.

9 Ne biakalua ne bakenza nanku, ne bakamunua ne bakûkuta; ne bakapesha musumba wa bantu, ne bakanua, ne bakûkuta.

10 Ne pakenza bayidi nanku, Yezu wakabambila ne: Nudi babeneshibua bua tshintu etshi tshinuenji, bualu etshi tshidi tshikumbaja mikenji yanyi, ne etshi tshidi tshijadika kudi Tatu ne nudi bitaba bua kuenza tshindi munupeshela mukenji.

11 Ne nenuenzela nanku diba dionsu badi bakudimuna mutshima ne batambuishibua mu dîna dianyi; ne nenuenza nanku bua kuvuluka mashi anyi, andi mumatshisha buenu, bua nujadika kudi Tatu ne nudi numvuluka diba dionsu. Ne panuikala numvuluka diba dionsu nenuikala ne Nyuma wanyi kunudi.

12 Ne ndi nupesha mukenji ne nuenza bintu ebi. Ne panuikala nuenza bintu ebi diba dionsu nudi babeneshibua, bualu nudi bibakibua pamutu pa dibua dianyi.

13 Kadi bonsu ba munkatshi muenu bikala benza kupita anyi kushadila ebi kabena bibakibua pa mutu pa dibua dianyi to, kadi badi bibakibua pa mutu pa tshishimikidi tshia lusenga; ne padi mvula uloka, ne mâyi a nkoka alua, ne tshipepela tshipepa, netshidikuma kudibu, nebadishinda, ne bibuelelu bia ku ngena nebikala pabuipi biunzuluka bua kubakidila.

14 Bua nanku nudi babeneshibua binualama mikenji yanyi, idi Tatu mumpesha mukenji ne nnupesha.

15 Bulelela, bulelela, ndi nnuambila ne, nudi ne tshia kudimuka ne kusambila diba dionsu, bua kanulu kutêtshibua kudi diabulu, ne anukuata bakuatshibu.

16 Ne bu mungasambidi munkatshi muenu mena ki munuasambila mu ekelezia wanyi, munkatshi mua bantu banyi badi bakudimuna mutshima ne badi batambuishibua mu dîna dianyi. Monayi ndi bukenka; nganuleji tshilejilu.

17 Ne biakalua ne pakambila Yezu bayidi benda mêyi â, wakakudimuka kabidi kudi musumba wa bantu ne wakabambila ne:

18 Monayi, bulelela, bulelela, ndi nnuambila, nudi ne tshia kudimuka ne kusambila diba dionsu bua kanulu kukuluka mu ditêtshibua; bualu Satana udi ujinga bua kunupeta, bua ne anusengulula bu mponda.

19 Bua nanku nudi ne tshia kusambila Tatu diba dionsu mu dîna dianyi;

20 Ne tshionsu tshinualomba kudi Tatu mu dîna dianyi, tshidi tshikala tshiakana, nuitabuija ne nenupeta, monayi netshipeshibua kunudi.

21 Sambilayi kudi Tatu mu mêku enu, diba dionsu mu dîna dianyi, bua ne bakaji benu ne bana benu balela babeneshibua.

22 Ne monayi, nutuilangana pamua misangu mivula; ne kanuakukandika muntu nansha bua kulua kunudi panuatuilangana pamua to, kadi balekelayi ne balua kunudi ne kanubakandiki to;

23 Kadi nenusambila buabu, ne kanuakubipata to; ne pikalabi ne badi balua kunudi misangu mivula nenusambila Tatu buabu, mu dîna dianyi.

24 Nanku, ambululayi bukenka buenu kûlu bua bukenkesha ba pa buloba. Monayi mema ndi bukenka bunuambulula kulu—nuenzayi tshinudi bammona ngenza. Monayi nudi numona ne ngasambidi Tatu, ne nuakamona bonsu.

25 Ne nudi numona ne ntshiena muela mukenji ne muntu nansha umua wa kunudi umbuka kundi to, kadi pa mutu pa nanku ngedi mukenji ne nulua kundi, bua ne nulenga ne numona mputa yanyi; ne nuenzela ba pa buloba mushindu ewu; ne ewu yonsu udi ushipa mukenji ewu udi udilekela bua kukuatshibua mu ditêtshibua.

26 Ne mpindiewu biakalua ne pakamba Yezu mêyi â, wakakudimuna mesu enda kabidi kudi bayidi bavuaye musungula, ne wakabambila:

27 Monayi bulelela, bulelela, ndi nnuambila ne, ndi nupesha mukenji mukuabu, ne pashisha ndi ne tshia kuya kudi Tatu wanyi bua ne nkumbaja mikenji mikuabu idiye mumpesha.

28 Ne mpindiewu monayi, ewu udi mukenji undi nnupesha, panudi nuabanya musunyi wanyi ne mashi anyi, kanulekedi ne muntu nansha umua abiangata nuenu bamanya ne kena mukumbana to;

29 Bualu ewu yonsu udi udia musunyi wanyi ne udi unua mashi anyi kayi mukumbana to udi udia ne udi unua dipîshibua dia anyima wenda; bua nanku binuikala bamanya ne muntu kena mukumbana bua kudia mubidi wanyi ne kunua mashi anyi to nenumukandika.

30 Nansha nanku, kanuakumuipata munkatshi muenu to, kadi nenumusadila ne nenusambila Tatu buenda, mu dîna dianyi; ne pikalabi ne mmukudimuna mutshima ne mutambuishibua mu dîna dianyi, pashisha nenumuakidila, ne nenumuabanyina musunyi ne mashi anyi.

31 Kadi pikalaye kayi mukudimuna mutshima to kakubadibua munkatshi mua bantu banyi to, bua ne kafuishi bantu banyi to, bualu monayi ndi mumanya mikoku yanyi, ne yoyi mmibadibua.

32 Nansha nanku, kanumuipatshi ku nsunagoga yenu to, anyi mu miaba yenu ya tshitendelelu to, bualu nenutungunuka kusadila bantu ba nanku awu; bualu kanuena bamanya to nebakudimuka ne nebakudimuna mutshima, ne nebalua kundi ne kipatshila kajima ka mutshima, ne nembôndopa; ne nenuikala njila wa kubatuadila lupandu.

33 Nanku, lamayi mêyi â andi munupeshela mukenji bua ne kanulu kuikala ne dipîshibua to; bualu diakabi kudi udi Tatu upîsha.

34 Ne ndi nupesha mikenji eyi bua matandu avua mikala munkatshi muenu. Ne nudi babeneshibua binuikala kanuyi ne matandu munkatshi muenu to.

35 Ne mpindiewu ndi nya kudi Tatu, bualu bidi bikengedibua ne nya kudi Tatu bua bimpa bienu.

36 Ne biakalua ne pakashikija Yezu miaku eyi, wakalenga bayidi bavuaye musungula ne tshianza tshienda, ku muntu ku muntu, mena tô ne pakabalengaye bonsu, ne uvua wakula kudibu pavuaye ubalenga.

37 Ne musumba wa bantu kawakumvua mêyi avuaye wakula to, bua nanku kabakajadika to; kadi bayidi bakajadika ne wakabapesha bukôkeshi bua kupesha Nyuma wa Tshijila. Ne nennuleja kunyima ne miandiku eyi idi milelela.

38 Ne biakalua ne pakabalenga Yezu bonsu, kuakalua ditutu ne diakabuikila musumba wa bantu mushindu wa ne kabavua mua kumona Yezu to.

39 Ne patshivuabu babuikidibua, wakabashiya ne wakabanda mu diûlu. Ne bayidi bakamona ne bakajadika ne wakabanda mu diûlu kabidi.