1 Ne mpindiewu biakalua ne pakabanda Yezu mu diûlu, musumba wa bantu wakatangalaka, ne muntu yonsu wakangata mukajenda ne bana benda ne wakapingana ku nzubu kuenda.

2 Ne lumu luakenda kula munkatshi mua bantu katataka, kumpala kua butuku kabuyi buanji kuila to, ne musumba wa bantu uvua mumona Yezu, ne uvua mubasadila, ne neadileja kabidi kudi musumba wa bantu patshiabu.

3 Eyowa, ne lumu luvua lutangila Yezu luakenda kula mena butuku bonsu; ne bakatuma dîyi kudi bantu mua ne bavua ba bungi, eyowa, bungi bunena menamena, buakakuata mudimu butuku abu bonsu menamena, bua ne bikala patshiabu ku muaba wadileja Yezu kudi musumba wa bantu.

4 Ne biakalua ne pakatshiabu, pavua musumba wa bantu musangisha pamua, monayi, Nefi ne muanabu wa baluma uvuaye mujula ku bafua, muena dîna dia Timote, ne muanenda wa baluma kabidi, muena dîna dia Yona, ne Matoni kabidi, ne Matoniha, muanabu wa baluma, ne Kumeni, ne Kumenonohi, ne Yelemiya, ne Shemenona, ne Yona, ne Sedekiya, ne Yeshaya—mpindiewu â avua mêna a bayidi bavua Yezu musungula—ne biakalua ne bakasemena ne bakimana munkatshi mua musumba wa bantu.

5 Ne monayi, musumba wa bantu uvua mupita bunena bua ne biakenzeka ne bawutapulula mu bisumbu dikumi ne bibidi.

6 Ne bayidi dikumi ne babidi bakalongesha musumba wa bantu; ne monayi, bakenzeja ne musumba wa bantu utua binu panshi pa mpala wa buloba, ne usambila Tatu mu dîna dia Yezu.

7 Ne bayidi bakasambila Tatu kabidi mu dîna dia Yezu. Ne biakalua ne bakajuka ne bakalongesha bantu.

8 Ne pakabalongeshabu ne mêyi a momumua avua Yezu muakula—kakuyi dikudimuka ku mêyi avua Yezu muakula to—monayi, bakatua binu panshi kabidi ne bakasambila Tatu mu dîna dia Yezu.

9 Ne bakasambila bua tshivuabu bajinga kupita; ne bavua bajinga ne Nyuma wa Tshijila afidibua kudibu.

10 Ne pakasambilabu nanku bakapueka ku muelelu kua mâyi, ne musumba wa bantu wakabalonda.

11 Ne biakalua ne Nefi wakabuela mu mâyi ne wakatambuishibua.

12 Ne wakatundubuka mu mâyi ne wakabanga kutambuisha. Ne wakatambuisha bonsu bavua Yezu musungula.

13 Ne biakalua ne pakatambuishibuabu bonsu ne pakapatukabu mu mâyi, Nyuma wa Tshijila wakabatulukila, ne bakuwula ne Nyuma wa Tshijila ne ne kapia.

14 Ne monayi, bavua banyunguludibua ku mpenga yonsu bu ne bivua kudi kapia; ne kavua kalua panshi kafumina mu diûlu, ne musumba wa bantu wakamona bualu ebu, ne wakajadika; ne banjelu bakapueka panshi bapatukila mu diûlu ne bakabasadila.

15 Ne biakalua ne ne patshivua banjelu basadila bayidi, monayi, Yezu wakalua ne wakimana munkatshi muabu ne wakabasadila.

16 Ne biakalua ne wakakula kudi musumba wa bantu, ne wakabapesha mukenji ne batua kabidi binu panshi pa buloba, ne bayidi benda kabidi batua pabu binu panshi pa buloba.

17 Ne biakalua ne pakatuabu binu panshi pa buloba, wakapesha bayidi benda mukenji ne basambila.

18 Ne monayi, bakabanga kusambila; ne bakasambila Yezu, bamubikila ne Mukalenga wabu ne Nzambi wabu.

19 Ne biakalua ne Yezu wakumbuka munkatshi muabu, ne wakaya pabuipi kula nabu ne wakinama pa buloba, ne wakamba ne:

20 Tatu, ndi nkuela tuasakidila bua ne udi mupesha bandi musungula aba Nyuma wa Tshijila; ne bidi bua bualu bua ditabuija diabu kundi mbudi musunguila ku ba pa buloba.

21 Tatu, ndi nkulomba ne upesha Nyuma wa Tshijila kudi bonsu bitabuija mêyi abu.

22 Tatu, udi mubapesha Nyuma wa Tshijila bualu badi bangitabuija; ne udi umona ne badi bitabuija kundi bualu udi ubumvua, ne badi bansambila; ne badi bansambila bualu ndi nabu.

23 Ne mpindiewu Tatu, ndi nkusambila buabu, ne kabidi bonsu bitabuija mêyi abu, bua ne bangitabuija, bua ne ngikala munda muabu bu mûdi, Tatu, munda muanyi, bua ne tuikala umua.

24 Ne biakalua ne pakasambila Yezu kudi Tatu nanku, wakalua kudi bayidi benda, ne monayi, batshivua batungunuka, kabayi balekela to, ne kumusambila; ne kabavua bavudija mêyi a bungi to, bualu bakapeshibua bivuabu ne bua kusambidila, ne bavua buwula ntenta ne dijinga.

25 Ne biakalua ne Yezu wakababenesha bu muvuabu bamusambila; ne mpala wenda wakabafuisha mimuemua, ne bukenka bua mpala wenda buakakenka pa mutu pabu, ne monayi bavua batoka bu muvua mpala ne bilamba kabidi bia Yezu; ne monayi butoka buabi buvua bupita butoka bonsu, eyowa, kakuvua mena tshintu nansha tshimua pa buloba tshivua tshitoka bu muvua butoka buabi.

26 Ne Yezu wakabambila ne: Tungunukayi ne kusambila; ne kabakalekela kusambila to.

27 Ne wakabashiya kabidi, ne wakaya pabuipi kula ne wakinama pa buloba; ne wakasambila kabidi Tatu, wamba ne:

28 Tatu, ndi nkuela tuasakidila bua ne udi mukezula bandi musungula abu, bua ditabuija diabu, ne ndi nsambila buabu, ne kabidi bua aba bitabuija mêyi abu, ne bakezudibua kundi, ku ditabuija ku mêyi abu, bu mudibu balengejibua kundi.

29 Tatu, ntshiena nsambila bua ba pa buloba to, kadi bua ba ku ba pa buloba, bua ditabuija diabu, ne bakezudibua kundi, ne ngikala munda muabu bu wewa, Tatu, muikala munda muanyi, ne tuikala tshintu tshimua, ne ntumbishibua kudibu.

30 Ne pakakula Yezu mêyi â wakalua kabidi kudi bayidi benda; ne monayi bavua bamusambila ne disuminyina, kabayi balekela to; ne wakabafuisha mimuemua kabidi; ne monayi, bakatoka, mena bu muvua Yezu.

31 Ne biakalua ne wakaya kabidi pabuipi kula ne wakasambila Tatu;

32 Ne ludimi kaluena mua kuamba mêyi avuaye musambila nawu to, anyi muntu nansha umua kena mua kufunda mêyi avuaye musambila nawu to.

33 Ne musumba wa bantu wakumvua ne udi ujadika; ne mitshima yabu ivua miunzuluka ne bakumvua mu mitshima yabu mêyi akasambilaye nawu.

34 Nansha nanku, mêyi avuaye musambila nawu avua mapita manena ne a dikema bua ne kayina mua kufundibua, anyi kuambibua kudi muntu to.

35 Ne biakalua ne pakashikija Yezu kusambila wakalua kabidi kudi bayidi, ne wakabambila ne: Tshitu muanji kumona ditabuija dinena nanku munkatshi mua Bena Yuda bonsu to; bua nanku ntshivua mua kubaleja bishima binena nanku to, bua bualu bua dipanga ditabuija diabu.

36 Bulelela ndi nnuambila ne, kakuena nansha bamua ba ku bobu bakamona bintu binena nanku bu binudi bamona to; anyi kabavua bumvua bintu binena nanku bu binudi bumvua.