1 Ne pashisha tshidi tshifundibua netshilua: Mukalenga udi wamba ne, Imba musambu, Ô mukaji wa nkumba, wewa udi kuyi mulela; tudika mu kuimba, ne bila bikola, wewa udi kuyi musâma munda mua kulela muana to; bualu bana ba mukaji mulekela badi ba bungi bapita ba bana ba mukaji musela.

2 Diundisha muaba wa ntenta weba, ne lekela bantu balabaja bilamba bikudika bia tshisombelu tshieba; kudikandi to, lepesha mionji yeba ne kolesha tukunji tueba;

3 Bualu neusampila ku tshianza tshia baluma ne ku tshia bakaji, ne ndelanganyi yeba neipiana Bena Bisamba bia Benda ne yenza ne bimenga bitupu biwujibua ne bantu.

4 Kutshinyi to, bualu kuakufua bundu to; anyi kupuekeshibu to, bualu kuakufuishibua bundu to; bualu bua neupua bundu bua ku bunsongakaji bueba moyo, ne kuakuvuluka lumu lubi lua bunsongakaji bueba to, ne kuakuvuluka kabidi lumu lubi lua bukamba bueba to.

5 Bualu bua mufuki weba, bayeba, Mukalenga wa Misumba ki dîna dienda; ne Musungidi weba, Wa Tshijila wa Isalele—ne bamubikila ne Nzambi wa buloba bujima.

6 Bualu Nzambi udi wamba ne, Mukalenga wakubikidi bu muntu mukaji mulekedibua ne kanyinganyinga mu mutshima, ne mukaji musela mu bunsongakaji buenda, pavuabu bakubenga.

7 Bua mutantshi mukesa mvua mukulekela, kadi ne lusa lunena nenkusangisha.

8 Mukalenga, Musungidi weba udi wamba ne, ne mvua musokoka mpala wanyi kûdi mutantshi mukesa bua tshiji tshikesa, kadi bua kalolu ka kashidi nenkufuila lusa.

9 Bualu etshi, tshidi bu mâyi a Noa kundi, bualu bu mungakaditshipa ne mâyi a Noa ka’akubuikila kabidi buloba nansha, ki mundi muditshipa ne ntshiakukufîkila tshiji to.

10 Bualu Mukalenga udi ne lusa kûdi udi wamba ne, mikuna neyumbuka ne tukuna netumbushibua, kadi kalolu kanyi kakakumbuka kûdi to, anyi tshipungidi tshia ditalala dianyi katshiakumbushibua to.

11 Ô wewa mutatshishibua, mutentakajibua kudi tshipepela tshikola, ne kuyi musambibua to! Monayi, nengâsa mabua eba ne mekala malengela, ne nengâsa bishimikidi bieba ne mabua a safire.

12 Ne nengâsa madidishi eba ne mabua a rubis, ne bibuelelu bieba ne mabua a escarboucle, ne mikalu yeba yonsu ne mabua a mushinga mukola.

13 Ne bana beba bonsu nebalongeshibua kudi Mukalenga; ne ditalala dia bana beba nedikala dinena.

14 Ne mu buakana neushikikibua; newikala kula ne dikengeshibua bualu kuakutshina to, ne kula ne luzakalu bualu kaluakufika pabuipi neba to.

15 Monayi, bushuwa nebadisangisha pamua bua kukuluisha, kabayi ne dianyisha dianyi to; bonsu badisangisha pamua bua kukuluisha nebapona bua bimpa bieba.

16 Monayi, ndi mufuka nsenda wa biamua udi upupula makala mu kapia, ne udi utuala tshiamu bua mudimu wenda; ne ndi mufuka munyangi bua kunyangakaja.

17 Mukalenga udi wamba ne, tshiluilu tshia mvita nansha tshimua tshidibu benza bua kukuluisha natshi katshiakulubuluka to; ne ludimi lonsu luakupenda mu tshilumbuluilu neulupîsha. Ebu budi bupianyi bua basadidi ba Mukalenga, ne buakana buabu budi bufumina kundi.