1 Ne biakalua ne pakamba Yezu mêyi â, wakambila bayidi benda, ku muntu ku muntu, ubambila ne: Nudi nujinga tshinyi kundi, kunyima kua pangikala muya kudi Tatu?

2 Ne bakamba bonsu, amu pa kumbusha basatu, bamba ne: Tudi tujinga ne kunyima kua tuetu bashala ne moyo tô ne ku bidimu bia bu muntu, ne disadila dietu, uwudi mutubikidila, ujika, bua tulua kûdi lukasa mu bukalenga bueba.

3 Ne wakabambila ne: Nudi babeneshibua bualu nuajingi tshintu etshi kundi; bua nanku, kunyima kua nuenu bakumbaja bidimu makumi muanda muteketa ne bibidi nenulua kundi mu bukalenga buanyi; ne nenupeta dikisha kundi.

4 Ne pakabambilaye nanku, wakakudimuka kudi basatu, ne wakabambila ne: Nudi basua ne nnuenzela tshinyi, pangikala muya kudi Tatu?

5 Ne bakanyingalala mu mitshima yabu, bualu kabakakima bua kumuambila tshintu tshivuabu bajinga to.

6 Ne wakabambila ne: Monayi, ndi mumanya meji enu, ne nudi nujinga tshintu tshivua Yone, munanga wanyi, uvua nanyi mu disadila dianyi, mujinga kundi kumpala kua mema kubandishibua kûlu kudi Bena Yuda.

7 Bua nanku, nudi babeneshibua nangananga, bualu kanuakulabula lufu nansha; kadi nenuikala ne moyo bua kumona malu onsu adi Tatu wenzela bana ba bantu, mena tô ne pâkumbajibua bintu bionsu bilondeshila ku disua dia Tatu, pangalua mu butumbi buanyi ne bukola bua mu diûlu.

8 Ne kanuakukenga ne makenga a lufu nansha; kadi pangalua mu butumbi buanyi nenushintuludibua mu mupodi wa disu kumbuka ku mubidi wa tshifuaka kulua ku mubidi udi kawuyi ufua; pashisha nenubeneshibua mu bukalenga bua Tatuanyi.

9 Ne kabidi, kanuakukenga panutshidi ne moyo mu musunyi to, anyi kanyinganyinga amu pa kumbusha bikala bua mibi ya ba pa buloba; ne nengenza bionsu ebi bua tshintu tshinuajingi kundi, bualu nuajingi ne nutuala anyima ya bantu kundi, pikala buloba butshidiku.

10 Ne bua bualu ebu nenupeta tshiwudi tshia disanka; ne nenusomba mu bukalenga bua Tatu wanyi; eyowa, disanka dienu nedikala diwula ntenta, mena bu muakampesha Tatu tshiwudi tshia disanka; ne nenuikala mena bu mundi muikala, ne ndi muikala bu mudi Tatu muikala; ne Tatu ne mema tudi tshintu tshimua;

11 Ne Nyuma wa Tshijila udi ujadikilamu bua Tatu ne buanyi; ne Tatu udi bana ba bantu Nyuma wa Tshijila, bua bualu buanyi.

12 Ne biakalua ne pakamba Yezu mêyi â, wakalenga muntu wa kudibu yonsu ne munu wenda amu pa kumbusha basatu bavua ne tshia kushala, ne pashisha wakaya.

13 Ne monayi, diûlu diakunzuluka, ne bakabandishibua mu diûlu, ne bakamona ne bakumvua bintu bintu bivuabu kabayi mua kuamba to.

14 Ne bavua bakandikibua ne kabakudi to; anyi kabavua bapeshibua bukôkeshi bua kuakula malu akamonabu ne kumvuabu to;

15 Ne kabavua bamanya to ne bavua mu mubidi anyi ne kabavua mu mubidi; bualu bivua bimueneka kudibu bu mudi dikudimuka diabu, bua ne bakashintuluka kumbuka ku mubidi wa musunyi ewu ne kuya mu ngikadilu udi kayi ufua, bua ne bavua mua kumona malu a Nzambi.

16 Kadi biakalua ne bakalongesha kabidi pa mpala wa buloba; nansha nanku kabakalongesha bintu bivuabu bumvua ne bamona to, bua mukenji uvua mubapeshibua mu diûlu.

17 Ne mpindiewu, ne bavua ba tshifuaka anyi kabayi bafua, kumbukila ku dituku dia dikudimuka diabu, ntshiena mumanya to;

18 Kadi ndi mumanya nanku, bilondeshila ku miandiku ivua mifidibua—bavua baya pa mpala wa bulaba, ne bavua basadila bantu bonsu, basangisha bantu bonsu bavua bitabuija ku diyisha diabu mu ekelezia; babatambuisha, ne bonsu bakatambuishibua bakapeta Nyuma wa Tshijila.

19 Ne bakedibua mu buloko kudi bavua kabayi bikala bena mu ekelezia to. Ne maloko kayivua mua kubakuata to, bualu yakapanduluka mu bipesa bibidi.

20 Ne bakabela munda mua buloba; kadi bakatûta buloba ne dîyi dia Nzambi, mu mushindu ne ku bukola buenda bakapatuishibua mu ndondu wa buloba; ne bua nanku kabavua mua kumbula bina bila bivua bikumbana bua kubakuata to.

21 Ne bakabela misangu isatu mu tshikutu tshia kapia ne kabakôshika nansha kakesa to.

22 Ne bakabela misangu ibidi mu buina bua nyama ya lonji; ne monayi bakanaya ne nyama bu mudi muana ne muana wa Mukoku utshidi wamua, ne kabakapetakana ne bualu nansha bumua to.

23 Ne biakalua ne bakaya nanku munkatshi mua bantu bonsu ba Nefi, ne bakayisha lumu luimpa lua Kilisto kudi bantu bonsu pa mpala wa bulaba; ne bakakudimuna moyo kudi Mukalenga, ne bakadisangisha ku ekelezia wa Kilisto, ne nanku bantu ba tshikondu atshi bakabeneshibua, bilondeshila ku dîyi dia Yezu.

24 Ne mpindiewu mema, Molomo, ngajikiji kuakula bitangila bintu ebi bua mutantshi wa diba mukesa.

25 Monayi, mvua pabuipi ne kufunda mêna a bavua kabayi ne tshia kulabula lufu nansha abu, kadi Mukalenga wakakandika; bua nanku ntshiena ngafunda to, bualu adi masokokibua kudi ba pa buloba.

26 Kadi monayi, ngakabamona, ne bakansadila.

27 Ne bulelela nebikala munkatshi mua Bena Bisamba bia Benda, ne Bena Bisamba bia Benda kabakubamanya to.

28 Nebikala kabidi munkatshi mua Bena Yuda, ne Bena Yuda kabakubamanya to.

29 Ne nebilua ne, pamona Mukalenga mu lungenyi luenda ne bidi bikumbana ne basadila bisa bionsu bia Isalele bidi bikala bitangalaka, ne bisamba bionsu, bisa bionsu, miakulu yonsu, ne bantu bonsu, ne nebatuala anyima ya bungi kudi Yezu, bua ne dijinga diabu dikumbajibua, ne kabidi bua bukola budi buitabujija bua Nzambi budi buikala munda muabu.

30 Ne badi bikala bu mudi banjelu ba Nzambi, ne pikalabu basambila Tatu mu dîna dia Yezu badi mua kudileja kudi muntu yonsu mudibi bibalengelela.

31 Bua nanku, nebenza midimu minena ne ya dikema, kumpala kua dituku dinena ne dilualua diba dikala bantu bonsu bushuwa ne tshia kuimana kumpala kua nkuasa wa tshilumbuluilu wa Kilisto;

32 Eyowa nebenza mena mudimu munena ne wa dikema munkatshi mua Bena Bisamba bia Benda, kumpala kua dituku dia tshilumbuluilu.

33 Ne bu nuenu ne mifundu yonsu idi ilonda mulubu wa dikema wa Kilisto, nuvua kumanya bushuwa ne malu â adi ne tshia kulua, bilondeshila ku miaku ya Kilisto.

34 Ne diakabi dikala kudi udi ubenga kumvuila miaku ya Yezu, ne kabidi ya aba badiye musungula ne mutuma munkatshi muabu; bualu ewu yonsu udi kayi witaba miaku ya Yezu ne miaku ya badiye mutuma to kena umuitaba to; ne bua nanku kakubitaba ku dituku dia ndekelu to;

35 Ne bivua bua kuikala bimpa buabu bu bobu kabayi baledibua to. Bualu nudi nutshinka ne nudi mua kumbusha bululama bua Nzambi udi mufika munda, udibu badiatakaja mu makasa a bantu, bua nanku lupandu lulua anyi?

36 Ne mpindiewu monayi, bu mumvua ngamba bitangila bavua Mukalenga musungula, eyowa, mena basatu bavua babandishibua mu diûlu, ne ntshivua mumanya ne bavua bakezudibua ku moyo wa tshifuaka bua kulua ku moyo udi kawuyi ufua to—

37 Kadi monayi, katshia ngafunda, ndi muebeja Mukalenga, ne wakandeja ne dishintuluka divua ne tshia kuenzeka pa mibidi yabu, anyi bivua bikengela ne bavua ne tshia kulabula lufu;

38 Bua nanku, bua ne kabalabudi lufu to kuvua dishintuluka divua dibenzekela pambidi pabu, bua kabakengi anyi kabanyingaladi to, amu pa kumbusha bua mibi ya ba pa buloba.

39 Mpindiewu dishintuluka edi kadivua dia momumua ne dienzeka ku dituku dia ndekelu to; kadi kuvua dishintuluka diakenzeka kudibu, mua ne Satana kavua mua kuikala ne bukola pa mutu pabu to, bua ne kavua mua kubatêta to; ne bavua bajididibua mu musunyi, bua ne bakalua bansantu, ne bua ne makola a pa buloba ka’ikadi mua kubakanda to.

40 Ne mu ngikadilu ewu bavua ne tshia kushala tô ne dituku dia tshilumbuluilu dia Kilisto; ne dituku adi bavua ne tshia kupeta dishintuluka dipita bunena, ne bua kubakidilabu mu bukalenga bua Tatu kabayi bua kumupatuka kabidi to, kadi bua kusomba ne Nzambi tshiendelela mu diûlu.