Shapita 7
Badi bashipa mulumbuluishi munena, badi banyangakaja bukalenga, ne bantu badi babulukangana mu bisa—Yakoba, mubengi wa Kilisto, udi ulua mfumu wa tshipungidi tshia mu musokoku—Nefi udi uyisha dikudimuna dia mutshima ne ditabuija mu Kilisto—Banjelu badi bamusadila dituku ne dituku, ne udi ubisha muanabu wa baluma ku bafua—Ba bungi badi bakudimuna mutshima ne badi batambuishibua. Pabuipi ne 30–33 p.d.K.
1 Mpindiewu monayi, nenuleja ne kaba kashikika mfumu mu bulaba to; kadi mu tshidimu tshia momumua etshi, eyowa, tshidimu tshia makumi asatu, bakashipa mulumbuluishi munena wa mu bulaba, eyowa, bakamushipa pa nkuasa wa tshilumbuluilu.
2 Ne bantu bavua babulukangana muntu kudi mukuenda; ne bakatapulukangana muntu kudi mukuenda mu bisa, muntu yonsu bilondeshila ku dîku dienda ne malela enda ne balunda benda; ne nanku bakanyangakaja bukalenga bua mu bulaba.
3 Ne tshisa tshionsu tshiakasungula kapita anyi mulombodi ku mutu kuatshi; ne nanku bakalua bisa ne balombodi ba bisa.
4 Mpindiewu monayi, kakuvua muntu nansha umua munkatshi muabu uvua mupanga dîku dinena ne malela ne balunda ba bungi to; bua nanku bisa biabu binena menamena.
5 Mpindiewu bionsu ebi biakenzeka, ne kakuvua kabidi mvita munkatshi muabu to; ne malu mabi onsu â akakuata bantu bualu bakadifila ku bukôkeshi bua Satana.
6 Ne bakanyangakaja mikandu ya bukalenga, bua bualu bua tshipungidi tshia mu musokoku tshia balunda ne malela bavua bashipa bambi.
7 Ne biakajula dikokangana dikola mu bulaba, mua ne tshitupa tshivua tshipita buakana tshia bantu tshivua pabuipi ne tshionsu tshilua tshibi; eyowa, kuvua amu bakana bakesa munkatshi muabu.
8 Ne nanku bidimu bisambombo kabivua bipita to kadi tshitupa tshinena tshia bantu tshikavua tshilekela buakana buatshi, bu mudi mbua upingana ku bilushi bienda, anyi bu mudi nguluba udibonda mu bitotshi.
9 Mpindiewu tshipungidi tshia mu musokoku etshi, tshivua tshituadila bantu malu mabi makola kupita, tshiakadisangisha pamua, ne tshiakateka muntu uvuabu babikila ne Yakoba ku mutu kuatshi;
10 Ne bakamubikila ne mfumuabu; bua nanku wakalua mfumu wa tshisumbu tshibi etshi; ne uvua umua wa tupita tutamba wakafila dîyi dienda bua kuluisha bambi bavua bajadika bua Yezu.
11 Ne biakalua ne kabavua ba bungi bu muvua bisa bia bantu, bivua bidisanga pamua to amu pa kumbusha ne balombodi babu bakashikika mêyi abu, muntu yonsu bilondeshila ku tshisa tshienda; nansha nanku bavua bena lukuna; nansha muvuabu kabayi bikala bantu bakana to, kadi bavua badisanga bua kukina bavua babuela mu tshipungidi bua kunyangakaja bukalenga abu.
12 Nanku, bualu Yakoba wakamona ne bena lukuna babu bavua babapita bungi, bualu uvua mfumu wa tshisumbu, bua nanku wakapesha bantu benda mukenji ne banyemena ku tshitupa tshia ku node menamena tshia bulaba, ne badiashila koku bukalenga, tô ne padisangisha kudi batapuluki, (bualu uvua ubabomba ne kuikala batapuluki ba bungi) ne bobu nebapeta makanda makumbana bua kukokangana ne bisa bia bantu; ne bakenza nanku.
13 Ne luendu luabu luvua lua lubilu bua ne muntu kavua mua kubakuata to tô pavuabu bamana kushiya bantu. Ne ki muakajika tshidimu tshia makumi asatu nanku; ne ki muvua malu a bantu ba Nefi nanku.
14 Ne biakalua ne mu tshidimu tshia makumi asatu ne tshimua bavua babuluka mu bisa, muntu yonsu bilondeshila ku dîku dienda, malela enda ne balunda benda; nansha nanku, bavua bafika ku diumvuangana dia ne kabakuluishangana mvita to; kadi kabavua ne bobumua bitangila mikenji yabu to, ne mushindu wa bukalenga buabu to, bualu bavua bishikikibua bilondeshila ku meji a bavua bikala tupita tuabu ne balombodi babu. Kadi bakateka mikenji mikola menamena bua ne tshisa tshimua katshivua bua kuenzela tshikuabu bibi to, mua ne ku tshimua tshipimu bavua ne ditalala mu bulaba; nansha nanku, mitshima yabu ivua mibenga Mukalenga Nzambi wabu, ne bakâsa bambi mabua ne bakabipata munkatshi muabu.
15 Ne biakalua ne Nefi—muikala mukumbudibua kudi banjelu ne kabidi dîyi dia Mukalenga, bua nanku mumona banjelu, ne muikala mujadiki ne mesu, ne muikala ne bokola bupeshibua kudiye bua ne amanya bitangila disadila dia Kilisto, ne kabidi muikala mujadiki ne mesu dia diumbuka lukasa ku buakana kupinga ku bubi buabu ne malu mapita bubi;
16 Nanku, bualu uvua ne dibungama bua bupapa bua mitshima yabu ne bua bumpofu bua meji abu—wakaya munkatshi muabu mu tshidimu tshia momumua atshi, ne wakabanga kujadika, ne dikima, bua dikudimuna dia mutshima ne dilekedibua dia mibi ku njila wa ditabuija dia Mukalenga Yezu Kilisto.
17 Ne wakabalongesha bintu bia bungi; ne bionsu kabiena mua kufundibua to, ne tshitupa tshiabi katshiakukumbana to, bua nanku kabiena mua kufundibua mu mukanda ewu to. Ne Nefi wakalongesha ne bukola ne ne bukôkeshi bunena.
18 Ne biakalua ne bakamufîkila tshiji, mena bualu bua uvua ne bukola bunena kubatamba, bualu kabivua bikumbana bua kubenga kuitabuija mêyi enda to, bualu ditabuija dienda kudi Mukalenga Yezu Kilisto divua dinena bikola bua ne banjelu bakamusadila dituku ne dituku.
19 Ne mu dîna dia Yezu wakipata badiabulu ne nyuma ya bukoya; ne wakabisha mena muanabu wa baluma ku bafua, kunyima kua muashibua mabua ne mukengeshibua ne lufu kudi bantu.
20 Ne bantu bakamona bualu ebu, ne bakabujadika, ne bakamufîkila tshiji bua bukola buenda; ne wakenza kabidi bishima bikuabu bia bungi, ku mesu a bantu, mu dîna dia Yezu.
21 Ne biakalua ne tshidimu tshia makumi asatu ne tshia kumpala tshiakapita, ne kuvua amu bakesa bakakudimuna moyo kudi Mukalenga; kadi bonsu bavua bakudimuna moyo bulelela bakaleja kudi bantu ne bavua bakumbudibua kudi bukola ne Nyuma bia Nzambi bivua mu Yezu Kilisto, uvuabu bitabuija.
22 Ne bonsu bavua badiabulu bipatshibua kudibu, ne bavua bôndopibua ku mabêdi abu ne ku bulema buabu, bulelela bakaleja bantu ne Nyuma wa Nzambi uvua muenza mudimu kudibu, ne bavua bôndopibua; ne bakaleja kabidi bimanyinu ne bakenza bimua bishima munkatshi mua bantu.
23 Ka muakapita kabidi tshidimu tshia makumi asatu ne tshibidi nanku. Ne Nefi wakabila kudi bantu ku ntuadijilu kua tshidimu tshia makumi asatu ne tshisatu ne wakabayisha dikudimuna dia mutshima ne dilekedibua dia mibi.
24 Mpindiewu ndi musua bua nuvuluka kabidi, kakuvua nansha umua uvua mufikishibua ku dikudimuna dia mutshima uvua kayi mutambuishibua mu mâyi to.
25 Bua nanku, kuvua bantu bavua bajididibua kudi Nefi ku disadila edi, bua ne bonsu bâlua kudibu batambuishibua mu mâyi, ne nanku bu mudi njadikilu ne bujadiki kumpala kua Nzambi, ne kudi bantu, ne bavua bakudimuna mutshima ne bavua bapeta dilekedibua dia mibi yabu.
26 Ne kuvua ba bungi ku ntuadijilu kua tshidimu etshi bavua batambuishibua bua dikudimuna dia mutshima; ne ki muakapita tshitupa tshinena tshia tshidimu nanku.