1 Ne mpindiewu biakalua ne bilondeshila ku miandiku yetu, ne tudi bamanya ne mifundu yetu idi milelela, bualu monayi, muntu mululama ki uvua mulama miandiku—bualu bulelela wakenza bishima bia bungi mu dîna dia Yezu; ne kakuvua muntu nansha umua uvua mua kuenza tshishima mu dîna dia Yezu to amu pa kumbusha katupa kenda konsu kikala katokeshibua ku malu mabi enda—

2 Ne mpindiewu biakalua ne, bu koku kakuyi tshilema tshienza kudi muntu ewu to mu mushindu wetu wa kubala kua diba, tshidimu tshia makumi asatu ne tshisatu tshikavua tshipita;

3 Ne bantu bakabanga kutekemena ne bikola tshimanyinu tshivua tshifidibua kudi muambi Samuele, Muena Lamana, eyowa, bua diba dikala mîdima pa mpala wa bulaba bua mutantshi wa matuku asatu.

4 Ne kuakabanga kuikala dielangana mpata dinena ne matandu manena munkatshi mua bantu, nansha nanku Mukalenga uvua muleja bimanyinu bia bungi.

5 Ne biakalua ne mu tshidimu tshia makumi asatu ne tshinayi, mu ngondu wa kumpala, mu dituku dinayi dia ngondu, kuakalua mvula wa tshipepela mukola, wa mushindu uvua kawuyi muanji kumona mu bulaba bonsu to.

6 Ne kuvua kabidi tshipepela tshinena ne tshitshinyisha; ne kuvua makubakuba avua atshinyisha, mua ne akanyungusha buloba bujima bu ne buvua bua kuabuluka pankatshi-nkatshi.

7 Ne kuvua mipenyi mikola menamena, wa mushindu utu kawuyi muanji kumona mu bulaba bonsu to.

8 Ne tshimenga tshia Zalahemela tshiakakuata kapia.

9 Ne tshimenga tshia Moloni tshiakadîna mu ndondu ya mbuwa, ne benamu bakafua mu mâyi awu.

10 Ne buloba buakimana pa mutu pa tshimenga tshia Moloniha, ne pa muaba wa tshimenga pakalua mukuna munena.

11 Ne kuvua dibutuka dinena ne ditshinyisha mu bulaba bua ku sude.

12 Kadi monayi, kuvua dibutuka dinena ne ditshinyisha mu buloba bua ku node; bualu monayi, pa mpala mujima wa bulaba pavua pashintuluka, bua tshipepela ne mvunda, ne makubakuba ne mipenyi ne dinyungana dikola menamena dia buloba bujima;

13 Ne bibeba bivua bikosoloka, ne njila mibatalala yakanyanguka, ne miaba ya bungi ivua milandakana yakalua ne binabina.

14 Ne bimenga binena ne bia bunema bia bungi biakadîna, ne bia bungi biakôshika, ne bia bungi biakanyungakana tô ne pakupuka bibakilu biabi panshi, ne benamu bakashipibua, ne miaba yakashala mitupu.

15 Ne kuvua bimua bimenga bivua bishala; kadi dinyanguka diabi divua dinena menamena, ne kuvua ba bungi munda muabi bavua bashipibua.

16 Ne kuvua bamua bakaya ne mvunda; ne muntu kena mumanya kuakayabu to, amu pa kumbusha ne mbamanya ne bavua baya nabu.

17 Ne nanku pa mpala wa buloba bujima pakalua panyanguka, bua bipepela, ne makubakuba, ne mipenyi, ne dinyungana dia buloba.

18 Ne monayi, mabua akapandika mu bipesa bibidi; avua mapanduluka pa mpala wa buloba bujima, mua ne bakasangana mapanduluka mu bipesa, ne mishonyi ne ne mitanta, pa mpala onsu wa bulaba.

19 Ne biakalua ne pakajika makubakuba, ne mipenyi, ne mvula mukola wa tshipepela ne wa muvimbi, ne manyungana a buloba—bualu monayi, biakanenga mutantshi wa meba asatu; ne bamua bavua bamba ne bivua binenga mutantshi mula mupita; nansha nanku, bintu ebi bionsu binena ne bitshinyisha biakenzeka mu pabuipi ne mutantshi wa meba asatu—ne pashisha monayi, kuvua mîdima pa mpala wa bulaba.

20 Ne biakalua ne kuvua mîdima mikola pa mpala onsu wa bulaba, mua ne benamu bavua kabayi bafua to bavua mua kumvua dibungibungi dia mîdima;

21 Ne kakuvua muakuikala bukenka to, bua bualu bua mîdima, anyi minda, anyi bimunyi to; anyi kakuvua mua kuikala kapia katema ne nkunyi miuma menamena to, bua ne kakuvua mua kuikala bukenka nansha to;

22 Ne kakuvua bukenka nansha bumua bumueneka to, anyi kapia, anyi katoditodi, anyi diba, anyi ngondu, nansha mitoto to, bualu mabungi a mîdima avua mikala pa mpala wa bulaba avua mikala mapita bukola.

23 Ne biakalua ne yakanenga bua mutantshi wa matuku asatu kakuyi bukenka nansha bumua bumueneka to; ne kuvua didila ne mikunda ne miadi bikola bitungunuka munkatshi mua bantu bonsu; eyowa, mikemu ya bantu ivua mikala mikola, bua mîdima ne dibutuka dinena biakabaluila.

24 Ne mu muaba umua bakumvuibua babila, bamba: Ô bu tuetu bakudimuna mutshima kumpala kua dituku edi dinena ne ditshinyisha, ne nanku bana betu bavua mua kuepeleshibua, ne kabavua bôshibua mu tshimenga tshinena atshi Zalahemela.

25 Ne mu muaba mukuabu bakumvuibua babila ne badila, bamba ne: Ô bu tuetu bakudimuna mutshima kumpala kua dituku edi dinena ne ditshinyisha, ne katuyi bashipa ne bâsa bambi mabua, ne babipata to; nanku bamamuetu ne bana betu ba bakaji balenga, ne bana betu bavua mua kuepeleshibua, ne kabavua mua kujîkibua mu tshimenga tshinena atshi Moloniha to. Ne nanku ki muvua mikunda ya bantu mikala minena ne itshinyisha.