1 Ne biakalua ne kuvua dîyi diumvuika munkatshi mua bena mu buloba bonsu, pa mpala onsu wa bulaba ebu, dibila:

2 Diakabi, diakabi, diakabi kudi bantu aba; diakabi kudi bena mu buloba bujima pa kumbusha bobu bakudimuna mutshima; bualu diabulu udi useka, ne banjelu benda badi basanka, bua ba ku bana ba baluma ne bana ba bakaji balenga ba bantu banyi bavuabu bashipa; ne baponyi bua malu abu mabi ne malu mapita bubi abu!

3 Monayi, ndi môsha tshimenga tshinena tshia Zalahemela ne kapia, ne benamu.

4 Ne monayi, ndi muenzeja ne tshimenga tshinena tshia Moloni tshidîna mu ndondu ya mbuwa, ne benamu bafua mu mâyi awu.

5 Ne monayi, ndi mubuikila tshimenga tshia Moloniha ne buloba, ne benamu, bua kusokoka malu mabi ne malu mapita bubi abu kumpala kua mpala wanyi, bua ne mashi a bambi ne a bansantu ka’abandi kabidi kundi bua kubaluisha to.

6 Ne monayi, ndi muenzeja ne tshimenga tshia Gilegala tshidîna, ne benamu bajîkibua mu ndondu ya buloba;

7 Eyowa, ne tshimenga tshia Oniha ne benamu, ne tshimenga tshia Mokume ne benamu ne tshimenga tshia Yelushalema ne benamu; ne mvua muenzeja ne mâyi alua pa muaba wabi, bua kusokoka bubi buabu ne malu mapita bubi abu kumpala kua mpala wanyi, bua ne mashi a bambi ne a bansantu ka’abandi kabidi kundi bua kubaluisha to.

8 Ne monayi, tshimenga tshia Gadiandi, ne tshimenga tshia Gadiomana, ne tshimenga tshia Yakoba, ne tshimenga tshia Gimigimino, bionsu ebi ndi muenzeja ne bidîna, ne muenza tukuna ne bibanda pa miaba yabu; ne ndi mujîka benamu mu ndondu ya buloba, bua kusokoka bubi buabu ne malu mapita bubi abu kumpala kua mpala wanyi, bua ne mashi a bambi ne a bansantu ka’abandi kabidi kundi bua kubaluisha to.

9 Ne monayi, tshimenga tshinena tshia Yakobugata atshi, muvua bantu ba mfumu Yakoba basomba, ndi môshisha ne kapia bua mibi yabu ne malu mapita bubi abu, buvua bupita bubi bonsu bua mu buloba bujima, bua bipungidi ne dishipa dia bantu biabu bia mu musokoku; bualu bobu bakanyangakaja ditalala dia bantu banyi ne bukalenga bua mu bulaba; bua nanku ngakabôshisha, bua kubabutula kumpala kua mpala wanyi, bua ne mashi a bambi ne a bansantu ka’abandi kabidi kundi bua kubaluisha to.

10 Ne monayi, tshimenga tshia Lamana, ne tshimenga tshia Yosha, ne tshimenga tshia Gada, ne tshimenga tshia Kishikumena, ndi môshisha ne kapia, ne benamu, bua bubi buabu mu dipata dia bambi, ne diasa dia mabua dia bangakatuma abu bua kubamanyisha bitangila bubi buabu ne malu mapita bubi abu.

11 Ne bualu bakabipata bonsu, bua ne kakuvua muakana nansha umua munkatshi muabu to, ngakatuma kapia panshi ne ngakababutula, bua kusokoka bubi buabu ne malu mapita bubi abu kumpala kua mpala wanyi, bua ne mashi a bambi ne bansantu bamvua mutuma munkatshi muabu ka’abeledi lubila kundi lufuma ku buloba to.

12 Ne mvua muenzeja bua dibutuka dinena dia bungi dilua pa mutu pa bulaba ebu, ne pa mutu pa bantu aba, bua bualu bua bubi buabu ne bua malu mapita bubi abu.

13 Ô nuenu bonsu badi bepeleshibua bualu bua nuvua bakana kubapitshila, kanuena mpindiewu nupingana kundi, ne kukudimuna mutshima ku mibi yenu, ne kukudimuna moyo, bua ne nnôndopa anyi?

14 Eyowa, bulelela ndi nnuambila ne, nuenu balua kundi ne nupeta moyo wa tshiendelela. Monayi, diboku dianyi dia lusa didi dinôluela, ne ewu yonsu walua, yeya nemmuakidila: ne babeneshibua bobu badi balua kundi.

15 Monayi, ndi muyidi wa Yezu Kilisto, Muana wa Nzambi. Ngakafuka diûlu ne buloba, ne bintu bionsu bidi mômu. Mvua ne Tatu kumbukila ku mbangilu. Ndi munda mua Tatu, ne Tatu udi munda muanyi; ne kundi Tatu watumbishi dîna dienda.

16 Ngakalua kudi bantu banyi, ne bantu banyi kabakangakidila to. Ne mifundu ya Nzambi idi mitangila dilua dianyi yakumbajibu.

17 Ne bonsu badi bangakidila, ndi mubapesha bukola bua kulua bana ba Nzambi; ne nengenza mena momumua bua bonsu bitabuija mu dîna dianyi, bualu monayi, disungila didi diluila kundi, ne kundi mikenji ya Mose idi mikumbajibua.

18 Ndi bukenka ne moyo wa ba pa buloba. Ndi Alpha ne Omega, mbangilu ne ndekelu.

19 Ne kanuakundambula kabidi dimatshisha dia mashi to; eyowa, milambu yenu ne milambu yenu miôsha neijika, bualu tshiakuitaba nansha umua wa ku milambu yenu ne milambu yenu miôsha to.

20 Ne nenundambula mulambu ne mutshima mutshibuluka ne nyuma munyingalala. Ne ewu yonsu udi ulua kundi ne mutshima mutshibuluka ne nyuma munyingalala, yeya nentambuisha ne kapia ne ne Nyuma wa Tshijila, mena bu Bena Lamana, bua bualu bua ditabuija diabu kundi tshikondu tshia dikudimuna dia moyo diabu, bavua batambuishibua ne kapia ne ne Nyuma wa Tshijila, ne kabavua bamanya nanku to.

21 Monayi, ngalu pa buloba bua kutuala disungila kudi ba pa buloba, bua kupandisha ba pa buloba ku mibi.

22 Bua nanku, ewu yonsu udi ukudimuna mutshima ne ulua kundi bu mudi muana muteketa, yeya nemmuakidila, bualu bua wa nanku bukalenga bua Nzambi budi buenda. Monayi, bualu bua wa nanku ngateki moyo wanyi panshi, ne ngawangatshi kabidi; bua nanku kudimunayi mutshima, ne luayi kundi nuenu ndekelu ya buloba, ne pandishibuayi.