1 Yalishca jipa ñucanchi cutin callarircanchi reinota shayachingapa cutin sumaj causaita alpapi charingapa. Tucui laya macanajungapa armacunata rurachircani, shina laya ñuca llactapuracunapa macanajungapa armacunata charingapa, ima punlla Lamanitacuna ñuca llactapuracunahuan macanajungapa cutin tigramujpi.

2 Ricujcunata muyundi churarcani, Lamanitacuna ama cutin cungashcapi macanajungapa shamushpa ñucanchita tucuchichun; shina ñuca llactapuracunata, ataju llamacunatapash ricurcani, paicunata huacaichircani na ricunayachijpa maquicunapi ama urmachun.

3 Yalishca jipa ñucanchi taitacunapaj alpacunata chasquircanchi tauca huatacunata, ari, ishcai chunga ishcai huatacunata.

4 Runacunataca alpata tarpuchircani, shina tucui laya muyucunata viñachirca, tucui laya fucushcacunatapash.

5 Huarmicunataca puchashpa yaipi trabajachircani, tucui laya fino linocunatapash ahuarca, tucui laya finducunatapash, ñucanchi cuerpota quilparingapa; shina pambapi ali mirarcanchi—catilla sumaj causaita charircanchi cai pambapi ishcai chunga ishcai huatacunata.

6 Yalishca jipa jatun mandaj Lamán huañurca, paipaj churi reinai callarirca paipaj pushtupi. Paica callarirca tangaj shina ñuca llactapuracunahuan ama cazurichun; paicuna callarirca macanajuipa ruraicunahuan, ñuca llactapurapaman macanajungapa shamungapa.

7 Ashtahuangari ñuca cachashca carcani Shemlón alpa muyundiman pacalla ricujcunata, paicuna tupachun macanajungapa ruraicunata, huacaichiringapa paicunamanda ñuca llactapuracunapaman ama paicuna macanajungapa shamushpa tucuchichun.

8 Yalishca jipa Shilom alpa vichai ladota shamurca, taupacacha macanajuj runacunahuan, macanajungapa churajushca arcocunahuan, flechacunahuan, espadacunahuan, cimitarracunahuan, rumicunahuan, huaracacunahuan; paicunapaj uma ajchacunata cuchurishcacuna, lluchu umacuna, paicunapaj lomocunapi cara chumbita pillurishcacuna.

9 Yalishca jipa ñuca llactapuracunapaj huarmicunata huahuacunandi jichushca pambapi pacajuchircani; tucui rucu runacunata picunami macanajunacunata apari ushajcunata, tucui viñaj runacunatapash, Lamanitacunahuan macanajungapa ringapa tandachircani; shayachircani shujllangaman paicunapaj huatacunata ricushpa.

10 Yalishca jipa Lamanitacunahuan macanajungapa vichai rircanchi; ñucapash, rucu cashpapash, Lamanitacunahuan macanajungapa vichai rircani. Yalishca jipa Apunchijpi shinlliyashpa macanajungapa rircanchi.

11 Cunan, Lamanitacunaca Apunchijmandaca nimata na yacharca, nacashpaca Apunchijpi shinlliyanata, chaimanda paicunaca paicunapaj shinllicaitalla shuyanajurca. Shina cashpapash paicunaca racu shinlli runacuna carca, runacunapaj shinllicaihuan.

12 Paicuna sacha runacuna carca, imamandapash millaillacuna, runacunapaj yahuarta yacunayachishcacuna, paicunapaj punda taitacunapaj yachachishcapi crijcuna, paicunaca cashnata crirca—Paicunapaj taitacunapaj na ali ruraicunamanda Jerusalénpaj alpamanda llujchi tucushcacuna, jichushca pambapi paicunapaj huauquicunahuan llaquichi tucushcacuna, jatun mama cochata chimbanajujpipash llaquichi tucushcacuna;

13 Cutin, paicunapaj callari chasquina alpapipash llaquichi tucushcacuna, jatun mama cochata chimbashca jipapash, tucui caicuna carcami Nefi ashtahuan fiel caimanda Apunchijpaj rurachunbacha saquishcacunata alichishpa—chaimanda Apunchijca paita achilyachishca carca, Apunchijca uyarca paipaj achil mañaicunata paicunaman tigrachircapash, pai ñaupaman pushanata japirca jichushca pambapi purinacunapi.

14 Paipaj huauquicuna paita fiñajcarca Apunchijpaj ruraicunata na yuyaipi chasquimanda; paita fiñarcapashmi yacu jahuacunapi paicunapaj shungucunata shinlliyachimanda Apunchijpaj contra.

15 Cutin, paita fiñarcapashmi cushapacha nishca alpaman chayamushca cashpapash, paicuna ninajurcami ñucanchi maquimanda quichun llactapuracunata mandanata; paicuna huañuchingapa munarca.

16 Cutin, paita fiñarca Apunchij mandashca shina jichushca pambaman llujshijpi, tandachishca quilcashcacunata imacunami bronce jirru fangacunapi quilcashcacunata paihuan aparcapash, chaimanda paicunaca nirca pai paicunata shuhuashca.

17 Shina paicunapaj huahuacunata yachachishca carca paipura na ricunayachichun, huañuchirichun, paicuna shuhuachun, quichurichun, tucui laya ruraicunata rurachun paicunata tucuchichun; chaimanda Nefipaj huahuacunata mana tucurina na ricunayachijta charin.

18 Caicunamanda jatun mandaj Lamán, paipaj na alipa yachaihuan, llullashpapash umashpa, uyanayai nishcapachacunahuan, ñucata umachihuarca, paipaj alpaman ñuca llactapuracunata apamuchihuarca, paicuna tucuchingapa; ari, ñucanchi cai tauca huatacunata llaqui yalishcanchi.

19 Cunan ñuca, Zeniff, ñuca llactapuracunaman Lamanitacunamanda tucui cai cuzascunata villashca jipa, macanajungapa rinayachita curcani paicunapaj ushaihuan, Apunchijpi confianzata churashpa; chaimanda, ñavi ñavi paicunahuan macanajurcanchi.

20 Yalishca jipa ñucanchi alpamanda llujchishpa cutin cacharcanchi; paicunata huañuchircanchi shuj jatun huañuchihuambacha, taucapacha shina caimanda na yupai usharcanchi.

21 Yalishca jipa cutin ñucanchi alpaman tigrarcanchi, ñuca llactapuracuna cutin ataju llamacunata michij callarirca, paicunapaj alpacunatapash tarpui callarirca.

22 Cunan ñuca, rucuyaimanda, ñuca churicunamanda shuj churiman reinota curcani; chaimanda ñana ashtahuan ninichu. Apunchijta achil mañani ñuca llactapuracunata achilyachichun. Shinacapashcachun.