1 Cunan Abinadí paicunaman nirca: Ñuca munani yuyaipi chasquichun Dios paillata urai shamunga runacunapaj huahuacunapi, paipaj llactapuracunata jatun causachingapash.

2 Pai aichapi causaimanda Diospaj Churi nishpa shutichishca canga, paipaj aichata curca Taitapaj munaiman, Taita cashpa, Churipash—

3 Taita, Diospaj ushaihuan vijsapi viñachishca carca; Churi, aichamanda; shina Taita, Churipash cashpa—

4 Paicuna Shuj Dios can, ari, ciertopacha jahua pachapaj, cai alpapaj Na Tucuri Taita.

5 Shina aicha Espírituman curin, nacashpa Churi Taitaman, shujlla Dios cashpa, tentaciónda llaqui yalin, na saquin tentación yalichun, ashtahuangari saquin na cazushpa asichun, macachun, llujchishpa cachachun, na ricunayachichun paipaj llactapuracunahuan.

6 Tucui caicuna jipa, tauca jatun juyailla ruraita ricuchinacunata runacunapaj huahuacunaman rurashca jipa, pai apai tucunga, ari, Isaías nishca laya, shuj llamagushna paipaj milma cuchujcunapa ñaupapi upa can, paipaj shimita na pascarca.

7 Ari, shinami pai apai tucunga, chacatarishca, huañuchishca, aichaca huañuiman curishcapash canga, Churipa munai Taitapaj munaipi puchucashca caimanda.

8 Shina Dios huañuipaj huatanacunata fitin, huañuita mishashca caimanda; Churiman ushaita cushpa runacunapaj huahuacunamanda shayarichun—

9 Jahua pachaman vitsiashca caimanda, ali shungu caimanda; ninanda llaquina junda caimanda runacunapaj huahuacunamanda; paicunapaj, alicaipash chaupipi shayaringa; huañuipaj huatanacuta fitishca caimanda, paicunapaj na ali ruraicunata, na alita ruraicunatapash japin paipalla, paicuna jatun causachishca canga, alicai mañajta pactachirca.

10 Cunan cangunaman nini, pita paipaj miraicunata villachinga? Riqui, cangunaman nini, imaura paipaj alma juchacunamanda achil cushca cajpi pai ricunga paipaj cati aillucunata. Cunan ima ninguichita? Pita cagrin paipaj cati aillu?

11 Riqui, cangunaman nini, ashtahuan imata uyashcanguichi achil villachijcunapaj shimicunata, ari, tucui achil villachijcunata pimi Apunchijpaj shamunamanda achil villachishca can—Cangunaman ninimi, tucuicuna picuna uyashca canguichi paicunapaj shimicunata, crishpa Apunchij paipaj llactapuracunata jatun causachinga yashpa, ninanda shuyashca chai punllata paicunapaj juchacunata anchuchichun, cangunaman nini, caicunami pai cati aillucuna, nacashpaca Diospaj reinota chasquijcuna.

12 Paicunami pimanda juchacunata pai japishca; paicunami pimanda pai huañushca, jatun causachingapa paicunapaj na alita rurashcacunamanda. Cunan, nachu paicuna can paipaj cati aillucuna?

13 Ari, nachu achil villachijcuna, shujllangaman paicunapaj shimita pascashca can achil villachingapa, na urmashca na ali ruraipi, tucui achil achil villachijcuna cai pacha callarimanda? Cangunaman nini paicunami paipaj cati aillucuna.

14 Paicunami sumaj causaicunata tucuiman villashca can, picunami ali mushuj villaicunata apamushca can, picunami quishpirinata tucuiman villashca can; Siónman nirca: Quiquinba Dios reinan!

15 Juyaillamari urcucunapa jahuapi chaquicuna can!

16 Cutin, juyaillamari urcucunapa jahuapi chaquicunaca can picunapaj sumaj causaita tucui yachachun villachinajunra!

17 Cutin, juyaillamari urcucunapa jahuapi chaquicuna can pimi jipa punlla sumaj causaita tucui yachachun villanga, ari, cunan punllamanda ñaupaman na tucurinacamanbash!

18 Riqui, cangunaman nini, cai na tucuillachu. Juyaillamari urcucunapaj jahuapi chaquicuna can pimi apamun ali mushuj villaicunata, sumaj causaita shayachij, ari, Apunchij, pimi paipaj llactapuracunata jatun causachishca can; ari, pimi paipaj llactapuracunaman quishpirinata cushca;

19 Jatun Causachina na tiajpica paipaj llactapuracunamanda rurashca cajpica, imatami cai pacha rurashcamanda alichishca can, cangunaman nini, cai na cashna cajman carca, tucui runacuna tucurinmanbacha carca.

20 Ashtahuangari riqui, huañuipaj huatanacuna fitirishca canga, Churi reinanga ushaitapash charinga huañui jahuapi; chaimanda, huañui yalichun pai apamunga huañushcacunapaj cutin causachinata.

21 Shamun shuj cutin causachina, callari cutin causachina; ari, cutin causarina picunami tiashca, tian, tiangara, Cristopaj cutin causarinacaman—pai shina shutichishca canga.

22 Cunan, tucui achil villachijcunapaj cutin causarina, tucui picunami paicunapaj shimicunapi crishcacuna, nacashpaca tucui picunami Diospaj rurachunbacha saquishcacunata alichishcacuna, jataringa callari cutin causarinapi; chaimanda, paicuna can callari cutin causarinamanda.

23 Paicuna jatarichishca canga Dios-huan causangapa pimi paicunata jatun causachishca; shina paicuna mana tucurina causaita charin Cristomanda, pimi fitishca huañuipaj huatanacunata.

24 Paicunami charin ashaguta callari cutin causarinapi; caicuna huañushca carca nara Cristo shamujpi, paicunapaj nimata na yachaipi, quishpirinata paicunaman yachachun na villashca cajpi. Shina Apunchijca caicunapaj cutinlla apamunata ruran; paicuna charin ashaguta callari cutin causarinapi, nacashpaca mana tucurina causai, Apunchijmanda jatun causachishca cashpa.

25 Uchilla huahuacunapash mana tucurina causaita charin.

26 Ashtahuangari riqui, manllai, chujchuichipash Diospa ñaupapi, imamanda chujchungapa charinguichimi; Apunchijca na jatun causachinllu nipita pimi paita na cazujcunata, paicunapaj juchacunapi huañujcunatapash; ari, tucui picunami huañushcacuna paicunapaj juchacunapi cai pacha callarimanda, yachashpata Diosta na cazujcuna, Diospaj rurachunbacha saquishcacunata yachashpata na alichijcunata; paicuna na charinllu ashaguta callari cutin causarinapi.

27 Chaimanda nachu chujchuna canguichi? quishpirinaca na shamunllu caicunaman; Apunchijca na jatun causachishcachu caicunata; ari, caicunata na jatun causachi ushanllu; paillata negaita na ushanllu; alicaita na negai ushanllu imaura cai mañajpi.

28 Cunan cangunaman nini punlla shamun Apunchijpaj quishpichina tucui yachachun villashca canga shujllangaman jatun llactaman, reinoman, shimi rimaiman, llactapuracunamanbash.

29 Ari, Apunchij, quiquinba cuidashpa chapaj runacuna shimi rimaita vichai alsanga; tandanajushpa shujlla shimihuan paicuna cantanga; ñavi ñavi ricunga imaura Apunchij Siónda cutin tigrachimujpi.

30 Llujshichi cushijuipi; cantaichi tandanajushpa Jerusalénpaj jichushca pushtucuna; Apunchijca paipaj llactapuracunata cushichin, Jerusalénda pai jatun causachishca can.

31 Apunchijca paipaj achil rigrata llujchishpa ricuchishca tucui jatun llactacunapaj ñavicunapi, tucui alpa tucurinacaman ricungapacha ñucanchi Diospaj quishpichita.