1 Cunan, yalishca jipa imaura jatun mandaj Benjamín parlaicunata tucuchishca carca chai shimicunata Apunchijpaj ángel cushca carca, pai ashtacapacha tandanajushcacunaman tigrarishpa muyundi ricujpi, riqui alpaman urmashca carca imashpa Apunchijpaj manllai paicunaman shamushca carca.

2 Paicunallata ricurishca carca paicunapaj aicha canapi, alpamanda alpatapash yali uchilla caita. Tucui paicuna shujlla shimi shinlli caparirca, nishpa: Oh llaquihuai, Cristopaj yahuarta shujpa juchacunamanda huañui ña churapai ñucanchi chasqui ushangapa ñucanchi juchacunamanda perdónda, ñucanchi shungucuna mapa illacuna cachun; ñucanchi crinchimi Jesucristopi, Diospaj Churi, pimi jahua pachata alpatapash rurarca, tucui cuzascunatapash; pimi shamugrin runacunapaj huahuacunapaman.

3 Yalishca jipa paicuna cai shimicunata parlashca jipa Apunchijpaj Espíritu paicunapaman shamurca, cushijuihuan junda carca, paicunapaj juchacunata anchuchita chasquishca caimanda, yuyaipi sumaj caita charishpa, paicunapaj ninan femanda Jesucristopi pimi shamugrin, jatun mandaj Benjamínpaj shimicunamanda imata parlashca carca.

4 Jatun mandaj Benjamín cutin shimita pascashpa parlai callarirca, nishpa: Ñuca rijsicuna ñuca huauquicuna, ñuca reino ñuca llactapuracuna, cutin canguna uyachun cayani, uyaichi yuyaipipash chasquichi ñuca shimicuna yarinata cangunaman parlagrini.

5 Riqui, Diospaj alicaita yachai cai punllapi imapash nacanichu yaicunata rijchachishca, na alicani yaita cangunapaj urmashca caita—

6 Cangunaman nini, Diospaj alicaita yachaiman shamushca cashpaca, paipaj shujhuan na pactana ushai, paipaj yachai, paipaj paciencia, paipaj longanimidad runacunapaj huahuacunaman; shujpa juchacunamanda huañunapash maijan cai pacha rurashcamanda alichishca can, caimanda quishpirina shamunga maijan Apunchijpi confianzata churajpi, paipaj rurachunbacha saquishcacunata utsia mascashpa cajpi, paicuna causai tucurinacaman fehuan catirianajushpalla, ñuca nini mortal cuerpo causai—

7 Ñuca nini, cai runami quishpirita chasquinga, shujpa juchacunamanda huañuna cai pacha rurashcamanda alichishca caimanda tucui runacunaman, Adán urmashcamanda causajcuna, cunan tian, tiangapash, cai pacha tucurinacaman.

8 Caimandami quishpirinaca shamun. Na cutishuj quishpirina tianllu caita ña parlashcamanda; cutishuj laya shuj runa quishpiri ushaipash na tianllu imashnalla ñuca ña parlashca cani.

9 Diospi crichi; pai cajta crichi, pai tucuita rurashcatapash, ishcandi jahua pachata cai alpatapash; crichi pai tucui yachaita charin, tucui ushaitapash, jahua pachapi cai alpapipash; crichi runaca na yuyaipi chasqui ushangachu tucui cuzascunata maijan Apunchij yuyai chasqui ushajta.

10 Cutin, crichi cangunapaj juchacunamanda arrepentirina canguichi saquinapash canguichi Diospaj ñaupapipash humillarina canguichi; tucui shungu mañaichi cangunata perdonachun; cunan, tucui cai cuzascunata crishpa ricushpa ruraichipacha.

11 Cutin nini punda nishcashna, Diospaj punchapanba caita yachanaman chayamushca cashpa, nacashpa paipaj alicaica rijsishca cashpa, paipaj juyaita malishca cashpa, cangunapaj juchacunata anchuchita chasquishca caimanda, cangunapaj almacunata ninan jatunda cushijuchun, yarichunbash munaiman, mana cacharishpa punllan punllan yariashpa, Diospaj jatun caita, cangunapaj imapash na caipi, cangunaman paipaj alicai longanimidad, imapash na valij viñaicuna, humillarichi jatun humildadpi, punllan punllan Apunchijpaj shutipi cayashpa, na shaijushpa shinlli cashpa fepi imami shamuna can, maijan parlashca carca ángelpaj shimihuan.

12 Riqui, cangunata nini caita rurashpaca punllan punllan cushijunguichi, Diospaj juyaihuan junda canguichi, punllan punllan mana cacharinguichi cangunapaj juchacunata anchuchinata; yachajuipi miranguichi ushaipi pipapi cangunata rurarca, nacashpa yachaipi imami alipi ciertopachapi.

13 Caishuhuan chaishuhuan juchachina munaita na charinguichi, ashtahuangari sumajlla causanata, shujllangaman runacunaman cushpa ima canata.

14 Na saquinguichichu cangunapaj huahuacuna yarjai purichun, churajuna illa; na saquinguichichu paicuna na ali rurashpa Diospaj catichunbacha saquishcacunata, caishuhuan chaishuhuan macanajushpa fiñanajushpa, ayata sirvishpa, pimi juchapaj maestro, pimi can aya espíritu caimanda ñucanchi taitacuna parlashca can, tucui alita ruranacunapaj na ricunayachij can.

15 Ashtahuangari paicunata yachachinguichi ciertopacha shungumanda shinlliyashpa ñangunapi purichun; caishuhuan chaishuhuan juyarichun yachachinguichi, caishuhuan chaishuhuan sirvirichun.

16 Cangunallatapash ayudanguichi picunami cangunapaj ayudata minishtijcunata; minishtishcacunaman cangunapaj minishtirishcapachata caranguichi; ama saquinguichichu mañajcuna paicunapaj yanga mañaita rurachun, paita calpachishpa huañuchun.

17 Imashpapash ninguichiman: Runami apamushca paimandallata cashnapacha llaqui; chaimanda ñuca maquita jarcasha, ñuca micunata na carasha, ñuca minishtirishcapachata na carasha pai ama llaqui yalichun, paipaj castigocuna ali can—

18 Ashtahuangari cangunaman nini, Oh runa, pipash caita rurashpa arrepentirina minishtirishca can; imata rurashcamanda pai arrepentirishpallami na tucurinacaman tucuringa, Diospaj reinopi na pushtuta charinga.

19 Riqui, nachu tucuicunallata mañajcuna canchi? Nachu tucuillata chai Achiltalla tucuipa shuyanchi, Diosmanda, tucui minishtirishcapachamanda, ishcandi micunamanda, churajunamandapash, curimanda, culquimanda, tucui valishca tucui laya charinacunamanda?

20 Riqui, cunan punllallata, paipaj shutipi mañanajushca canguichi, cangunapaj juchacunata anchuchichun. Saquishcachu pai canguna yanga mañashca cachun? Na; pai Espírituta cangunaman jichamushca, cangunapaj shungucunapash cushijuihuan junda cachun saquishca, chashnallata cangunapaj shimicuna upallayachirca chaimanda na parlai usharcanguichi, ninanbacha jatun cushijui carca cangunapa cushijui.

21 Cunan, Dios, pimi cangunata rurashca, pimandami ñucanchi causaicunatapash charinchi tucui charishcacunapash tiashcapash, cunpashmi imatapash alita mañajpi, fehuan, crishpa chasquisha yashpa, Oh, imashna carana canguichi minishtirishcapachacunamanda caishuman chaishuman.

22 Runata can ricushpa chasquichishpaca pai ama huañungapa minishtirishcapachata mañajpi, paita imatapash ningui, ashtahuan yali ali canga cangunapa ricushpa chasquichishca minishtirishcapachacunata na nishcamanda, maijan cangunapaj na cajta ashtahuangari Diospami, cangunapaj causaipash paipallata; tucui caicunahuanpash nima mañaita na rurangui na arrepentiringuichipash ima rurashcacunamanda.

23 Cangunaman nini, ay chai runa, paipaj ministirishcapachacuna paihuan tucuringa; cunan, ñuca cai cuzascunata nini picunami charijcuna canguichi cai alpa cuzascunapa.

24 Cutin, huajchacunaman nini, canguna picunami na charijcuna, shinapash charinguichi pactanallata shuj punllamanda cutishuj yalingapa; ninimi tucui canguna mañajcunata negajcunata, na charimanda; ñuca munani cangunapaj shungucunapi nichun: Ñuca na carani na charimanda, ashtahuangari ñuca charishpa caraimanmi.

25 Cunan, cangunapaj shungucunapi caita nishpaca, culpa illa saquiringuichi; nacashpaca, ricushpa chasquichishcacuna canguichi; cangunapaj ricushpa chasquichishca ali can na chasquishcata ñucapa cashcanman yaimanda.

26 Cunan, cai cuzascunamanda parlashca caimanda—nishpaca, cangunapaj juchacunata anchuchinata mana cacharinamanda punllan punllan, Diospa ñaupapi culpa illa puringuichi—munaiman cangunapaj minishtirishcapachacunata huajchacunaman carashcanguichiman, shujllangaman runa imashna charishca, yarjaita micuchishpa, lluchullata churachishpa, ungushcata ricungapa rishpa ayudashpa paicunapaj minishtishcacunapi, ishcandi espiritual temporalmente, paicuna minishtishcapi.

27 Ricui tucui cai cuzascunata rurashca cachun yachaihuan alipi churashpa; na minishtirinllu shuj runa ashtahuan calpachun paipaj shinllicaita yalishpa. Cutin, minishtishca can utsia mascashca cachun, caimanda mishashpa galardónda charichun; chaimanda, tucui cuzascuna alipi churashca rurashca canga.

28 Ñuca munani yarichun, picashpapash ladopi causajta mañachi nishpaca tigrachingui imata mañashcata, imashna nishca laya, na shina rurashpaca juchanguimi shinallata quiquinba ladopi causajtapash juchata rurachinguimi.

29 Tucuripi, na ni ushanichu tucui cuzascuna imamanda juchata ruranacunata; tauca layacuna tian imalayacunapash, taucapacha na yupaita ushanichu.

30 Ashtahuangari caita ni ushani, cangunallata na cuidarishpaca, cangunapaj yuyaicunata, cangunapaj shimicunata, ruraicunata, Diospaj rurachunbacha saquishcacunata na alichishpa, na catiriajushpalla fehuan imata uyashcapi cangunapaj Apunchij shamunapi, cangunapaj causaicuna tucurinacaman, tucuringuichipachami. Cunan, Oh runa, yari, ama tucurichu.