Zeniffpaj Tandachishca Quilcashcacuna—Shuj tandachishpa quilcashca paipaj llactapuracunamanda, paicuna Zarahemla alpamanda llujshimushcamanda Lamanitacunapaj maquicunamanda cacharichishca punllacaman.
9 capítulomanda 22 capítulocaman charin.
9 Capítulo
Zeniff pushan shuj tandanajushcata Zarahemlamanda Lehi-Nefipaj alpata japingapa—Lamanita jatun mandaj paicunata saquin alpata chasquichun—Lamanitacunahuan Zeniffpaj llactapuracunahuan macanajui tian. Nara 200–187 C.Ñ.
1 Ñuca, Zeniff, tucui Nefitacunapaj shimirimaicunapi yachachishca caimanda, Nefipaj alpata yachaita charishca caimanda, nacashpa ñucanchi callari taitacunapaj chasquina alpamanda, pacalla ricuj runashna Lamanitacunapaman cachai tucushca caimanda paicunapaj macanajujcunata pacalla ricuchun, ñucanchipaj macanajuj runacuna paicunapaman macanajungapa rishpa tucuchichun—ashtahuangari paicuna alicuna cajta ricushpaca na munarcanichu paicuna tucuchishca cachun.
2 Chaimanda, ñuca fiñajurcani ñuca huauquicunahuan jichushca pambapi, imashpa munarcani ñucanchi mandaj paicunahuan shuj tratota rurachun; ashtahuangari paica fiñajlla yahuarta yacunayachishca runa caimanda ñucata huañuchichun mandarca; ashtahuangari ñuca cacharirishca carcani ashtaca yahuar jichaimanda; taita taitahuanllata macanajurca, huauqui huauquihuanllata, taucapacha ñucanchi macanajuj runacuna tucuchishca carca jichushca pambapi; ñucanchi tigrarcanchi, picunami cacharirircanchi, Zarahemla alpaman, cai yalishcacunata villangapa paicunapaj huarmicunaman paicunapaj huahuacunamanbash.
3 Ñuca ninanda munashca cashpa ñuca taitacunapaj alpacunata chasquingapa, tandachircani mashna munashca cajcunata alpata charingapa vichai ringapa, cutin callarircani ñucanchi puricunahuan jichushca pambapi alpaman vichai rishpa; ashtahuangari llaquichi tucushca carcanchi ninan yarjaihuan ninan llaquicunahuan; imashpa yaringapa alimandacuna carcanchi Apunchij ñucanchi Diosta.
4 Shina cashpapash, tauca punllacunata jichushca pambapi chingashpa purishca jipa ñucanchi facha huasicunata shayachircanchi pushtupi maipimi ñucanchi huauquicuna huañuchishca carca, maijan ñucanchi taitacunapaj alpa ladolla carca.
5 Yalishca jipa ñucapaj chuscu runacunahuan llactaman cutin rircani, jatun mandajpaman, yachai ushangapa jatun mandaj imata yuyajta, yachai ushangapa ñuca llactapuracunahuan ri usharingapashchari alpata sumaj causaihuan charingapa.
6 Ñuca rircani jatun mandajpaman, pai shuj pactachinata ñucahuan rurarca Lehi-Nefi alpata ñuca chari ushachun, Shilompaj alpatapash.
7 Pai mandarcapash paipaj llactapuracuna alpata saquishpa llujshichun, ñucapaj llactapuracunahuan chai alpaman rishpa chai alpata ñucanchi charichun.
8 Ñucanchi callarircanchi jatun huasicunata rurashpa, llactapaj pircacunata huaglishcacunata aliguta rurashpa, ari, Lehi-Nefi llactapaj pircacunatapash, Shilom llactacunamandapash.
9 Ñucanchi alpata tarpui callarircanchi, ari, tucui laya muyucunata, sara muyucunahuan, trigocunahuan cebadacunahuan, neascunahuan, sheumcunahuan, tucui laya fucuna muyucunahuanbash; ñucanchi mirari callarircanchi cai pambapi ali miraipash.
10 Cunan jatun mandaj Lamánpaj na alipa yachashca umachinacunahuan cashcarca, ñuca llactapuracunata huatai tucushcashnaman apamungapa, chaimanda cai alpata cushca carca ñucanchi charichun.
11 Chaimanda yalishca jipa, ñucanchi cai alpapi chunga ishcai huatacunata causashca jipa jatun mandaj Lamán manllai callarirca, ima layapash ñuca llactapuracuna cai alpapi shinllicunaman tigraipapash, shina paicuna na ushaita charinga ñucanchita apangapa huatai tucushcashnaman.
12 Cunan paicunaca carca quilla yanga llactapuracuna; chaimanda paicuna munarca ñucanchita huatai tucushcashnaman apangapa, ñucanchi maquicunahuan trabajashcacunahuan paicuna charijyangapa; ari, ñucanchi pambacunapaj llamacunata sumajta micungapa.
13 Chaimanda yalishca jipa jatun mandaj Lamán paipaj llactapuracunata ñuca llactapuracunahuan tangaj shina fiñanajuchi callarirca; chaimanda tiai callarirca macanajuicuna fiñanajuicunapash cai alpapi.
14 Chunga quimsa huatapica ñuca reinadopi Nefi alpapi, Shilompaj alpa caru urai ladopi, imaura ñuca llactapuracuna paicunapaj ataju llamacunaman yacuta ufiachinajujpi, michinajujpi, paicunapaj alpacunata tarpunajujpi, Lamanitacunapaj shuj taucapacha macanajuj runacuna paicunapaman shamurca, huañuchi callarirca, apai callarirca ataju llamacunata, pambacunamanda paicunapaj saracunatapash.
15 Ari, yalishca jipa tucui maijan na japi tucushcacunaca calparca, Nefipaj llactacaman, mitsahuai nishpami cayahuarca.
16 Yalishca jipa ñuca macanajunacunata churajuchun curcani arcocunahuan, flechacunahuan, espadacunahuan, cimitarracunahuan, llasha caspicunahuan, huaracacunahuan, tucui laya macanajunacunahuan imacunata ñucanchi yuyashpalla rurashcacunahuan, ñuca, ñuca llactapuracunapash Lamanitacunahuan macanajungapa llujshircanchi.
17 Ari, Apunchijpaj ushaihuan Lamanitacunahuan macanajungapa llujshircanchi; ñuca, ñuca llactapuracunahuan Apunchijta ninandapacha mañarcanchi, ñucanchita na ricunayachijcunapaj maquicunamanda pai cacharichichun, imashpa ñucanchi yuyaicunapi rijcharirca ñucanchi taitacunapaj cacharichishcacuna.
18 Dios uyarca ñucanchi mañaita, ñucanchi achil mañaicunatapash tigrachirca; paipaj ushaihuan llujshircanchi; ari, Lamanitacunapaj contra llujshircanchi, shuj punlla shuj tutapi huañuchircanchi quimsa huaranga chuscu chunga quimsata; huañuchircanchi ñucanchi alpamanda llujchishpa cachangacaman.
19 Ñuca, ñucallata, ñuca maquicunahuanllata huañushcacunata pambaita ayudarcani. Riqui, ñucanchipaj jatun llaquirina, shungumanda llaquipaca ishcai patsaj canchis chunga iscun ñucanchipaj huauquicuna huañushca carca.