1 Cunan yalishca jipa na ricunayachishpa catinacuna imata na crijcuna iglesiapi churashca ninanbacha carca, iglesiamandacuna paicunapaj pushajcunaman huasharimai, quejarishpapash callarirca, cai cuzascunamanda; Almaman quejarirca. Alma paicunapaj jatun mandaj, Mosíahman cai cuzascunata ricuchirca. Mosíah paipaj sacerdotecunahuan tapurirca.

2 Yalishca jipa jatun mandaj Mosíah tucui muyundi llactaman shuj tucuiman villachinata cacharca, maijan na crijcunapash Diospaj iglesiata catijcunata na na ricunayachishpa cati ushana carca.

3 Tucui iglesiacunapaj ruranapacha mandashca tiarca caica paipura na ricunayachishpa catina na tiana carca, tucui runacuna igual cana carca;

4 Paicunapaj jariyaicuna, jatun jariyaicuna paicunapaj sumaj causaita ama fiñachichun; shujllangaman runacuna paipaj ladopi causajta juyachun paitashnallata, trabajashpa paicunapaj maquicunahuanllata paicunapaj causangapa minishtishcacunata charingapa.

5 Ari, tucui paicunapaj sacerdotecuna, yachachijcunapash trabajana carca paicunapaj maquicunahuanllata paicunapaj causangapa minishtishcacunata charingapa, tucui canacunapi, unguipilla ninan minishtishca na carca; tucui cai cuzascunata rurashpa, Diospaj ninan juyaipi jundarca.

6 Ninan sumaj causai cutin tiai callarirca alpapi; ashtacapacha llactapuracuna cai callarirca, caiman chaiman rirca alpa jahuallapi, ari, vichaiman, uraiman, indi llujshij ladoman, indi huashajuj ladoman, tucui lado alpacunapi jatun llactacunata uchilla llactacunatapash huasichishpa.

7 Apunchij paicunata ricugrirca, paicuna charijyarca, taucapacha, charij llactapuracuna tucurca.

8 Cunan Mosíahpaj churicuna na crijcunapuracunapi carca; Almapaj churicunamanda shuj churipash paicunahuan carca, paipaj shuti Alma carca, taitashnallata; shina cashpapash, na ali ruraj runa carca, yanga diosta adoraj runa. Ali parlaj runa, ashtaca uyanayai shimicunata llactapuracunaman parlarca; chaimanda tauca llactapuracunata paipaj na ali ruraicunatashnallata rurachun pusharca.

9 Diospaj iglesia miranapaj jatun jarcajman tigrarca; llactapuracunahuan tucui shungu juyai tucushpa; llactapuracunapi ashtaca ninanda fiñarishpa rimarishpa; Diosta na ricunayachijman curca paicunapaj jahuapi pai ushaita charichun.

10 Cunan yalishca jipa imaura pai rijurca Diospaj iglesiata pacalla tucuchingapa, Mosíahpaj churicunahuan iglesiata tucuchinata mashcashpa, Apunchijpaj llactapuracunata pandachingapa, Diospaj rurachunbacha saquishcacunapaj, jatun mandajpatapash contra—

11 Imashna cangunaman nishcani, paicuna caiman chaiman Diosta na cazushpa rinajujpi, riqui, Apunchijpaj ángel paicunaman ricurimurca; uriajumurca fuyupishna; parlarca culun nina shimicunahuanshna, paicuna shayanajuj alpata chujchuchirca;

12 Paicunapaj manllai jatunbacha carca, alpaman urmarca, pai parlashca shimicunata na yuyaipi chasquirca.

13 Shina cajpi cutin caparirca, nishpa: Alma, jatari quimirimuipash, imashpata Diospaj iglesiata na ricunayachishpa catingui? Apunchijca nishcami: Cai can ñuca iglesia, ñuca shayachisha; nimapash na urmachingachu, ñuca llactapuracunapaj na ali rurailla tucuchinga.

14 Cutin, ángel nirca, Apunchij uyashca paipaj llactapuracunapaj mañaicunata, sirvij runapaj achil mañaicunapash, Alma, pimi quiquinba taita; pai achil mañashca quiquinmanda ashtaca fehuan ciertoman yachanaman pushamushca cachun; chaimanda, caimandami shamushcani quiquinman Diospaj autoridad, paipaj ushaita crichingapapacha, sirvij runacunapaj achil mañashcacuna tigrachishca cachun paicunapaj femanda.

15 Cunan riqui, tapunguirachu Diospaj ushaita? Riqui, nachu ñuca shimi alpata chujchuchin? nachu ricuhuangui canba ñaupapi? Diospamanda cachamushcami cani.

16 Cunan quiquinda nini: Ri, yari quiquinba taitacuna huatai tucushcashcata Helam alpapi, Nefi alpapi; yari mashna jatun cuzascunata paicunaman rurashcata; huatai tucushcashnapi carca, paicunata cacharichirca. Cunan quiquinda nini, Alma, quiquinba ñanda cati, iglesiata tucuchinata ashtahuan ama mascai, paicunapaj achil mañaicuna tigrachishca cachun, quiquinmanda, quiquinllata llujchishpa cachashpa cangapa munashpapash.

17 Yalishca jipa caicunami tucuri shimicuna carca imata ángel Almaman parlarca, pai rirca.

18 Cunan Alma, paihuan cashcacunapash cutin alpaman urmarca, jatunbacha paicunapaj manllai carca; paicunapaj ñavicunahuanbacha Apunchijpaj ángelta ricushca carca; paipaj shimi culun ninashna carca imami cai alpata chujchuchirca; paicuna yacharca nimapash na cajta Diospaj ushailla cashcata alpata chujchuchi ushaj partirinashna chujchuchingapa.

19 Cunan Almapaj manllai jatunbacha carca upaman tigrarca, paipaj shimita na pascai usharca; ari, irquiyarcapash, paipaj maquicunatapash na cuyuchi usharca; chaimanda paihuan cashcacuna aparca, na cuyuri ushajpi aparca paipaj taitapa ñaupapi sirichingapa.

20 Paipaj taitaman ima tucushcata villarca paicunata tucui ima cashcacunata; paipaj taita cushijurca, pai yacharca caica Diospaj ushai cajta.

21 Ashtacapacha tandanajushcacunata tandachirca paicuna ricui ushachun Apunchij paipaj churita imata rurashcata, paihuan cashcacunatapash.

22 Sacerdotecunatapash tandachirca; ayunai callarirca, Apunchijpaj achil mañarcapash Almapaj shimita pascachun, parlai ushachun, paipaj cuerpo shinllicachun—llactapuracunapaj ñavicuna pascarishca cachun Diospaj punchapanba caita, alicaita ricui, yachai ushachun.

23 Yalishca jipa paicuna ayunashca, achil mañashca jipa ishcai punllata, ishcai tutata, Almapaj cuerpo shinlliyarca, shayarircapash paicunaman parlai callarircapash, paicuna animarichun mañarca:

24 Pai nirca, ñuca juchacunamanda arrepentirirshca cani, Apunchij jatun causachihuashca; riqui Espíritumanda nacirishca cani.

25 Apunchij nihuarca: Ama ninanda manllarichu, tucui runacuna, ari jaricuna, huarmicunapash, tucui jatun llactacuna, reinocuna, shimi rimaicuna, llactapuracunapash, cutin nacirinapacha can; ari, Diosmanda nacirina, paicunapaj aicha urmashcapash canamanda, ali rurai canaman yalina, Dios-huan jatun causachishca cana, paipaj churicuna, ushicunaman tigrangapa;

26 Shina paicuna mushuj causajcunaman tigran; caita na rurashpaca, nimamanda Diospaj reinota na chasqui ushangachu.

27 Cangunata nini, cai canapi cashpaca, paicuna llujchishpa cachashca canga; caita ñuca yachani, imashpa ñuca llujchishpa cachashca laya carcani.

28 Shina cajpipash, ashtaca llaquicunata yalishca jipa, ña huañunacaman arrepentirijpi, Apunchij paipaj llaquipi mana tucurina nina rupajujmanda anchuchingapa munahuarca, Diosmanda nacishca cani.

29 Ñuca alma jatun causachishca can llaqui jayamanda, na ali ruraicunapaj huatanacunamanda. Yana manllanayai ucupi carcani; ashtahuangari cunan ñuca ricuni ninan juyaillapacha Diospaj michata. Ñuca alma llaquiyajurca mana tucurina llaquihuan; ashtahuangari ñuca achil causarishca cani, ñuca alma ñana ashtahuan nanachishca can.

30 Ñuca Jatun Quishpichijta na cazurcani, ñucanchi taitacuna parlashcacunata na nircani; ashtahuangari cunan paicuna ñaupaman ricuchun pai shamunata, pai yarin shujllangaman causajcunata pai viñachishcacunata, paimandallata tucuiman ricurimunga.

31 Ari, shujllangaman cunguricuna pataringa, shujllangaman shimirimaicuna paipaj ñaupapi villanga. Ari, chai tucuri punllapi, imaura tucui runacuna shayaringa paipaj ñaupapi ricushpa chasquichi tucungapa, shina paicuna yacharcanimi ninga pai Dios cajta; shina paicuna yacharcani ninga, pipash cai pachapi Dios illa causajcunaca, ricushpa chasquichinaca shuj na tucurina castigo paicunapaj jahuapi alimi can; manllashpa chujchunga, chujchunga, uchillayanga paipaj tucui rijsina ñavi ricujuj ucupi.

32 Cunan yalishca jipa cunan punllamanda ñaupaman Alma, picunami paihuan carca imaura ángel paicunaman ricurijpi llactapuracunaman yachachishpa callarirca, tucui alpacunapi muyundi purishpa, villachishpa tucui llactapuracunaman ima cuzascunata uyashcata, ricushcatapash, Diospaj shimita villachishpa ashtaca llaquicunata yalishpa, na crijcunahuan na ricunayachishpa catina jatunbacha carca, taucacuna paicunahuan llaquichi tucurca.

33 Tucui cai masqui shina cajpipash, iglesiaman ashtaca ali canata cararca, paicunapaj feta shinlliyachishpa, longanimidadhuan cutin yarichishpa Diospaj rurachunbacha saquishcacunata alichingapa ninanda munashpa.

34 Paicunamanda chuscumi Mosíahpaj churicuna carca; paicunapaj shuticuna carca Ammón, Aarón, Omner, Himni; Mosíahpaj churicunapaj shuticuna caicuna carca.

35 Purirca tucui Zarahemla alpacunata, tucui llactapuracunapaman picunami jatun mandaj Mosíahpaj reinadopi carca, ninan shinllipacha aliman tigrachishpa iglesiata tucui na ali rurashcacunata, tucui paicunapaj juchacunata yachanimi nishpa, villashpa tucui ricushca cuzascunata achil villachicuna aliguta yachachishpa, achil quilcashcacunatapash tucui uyangapa munajcunaman.

36 Shina Diospaj maquicunapi ima munashcata ruranacuna carca ciertopachata yachanaman taucacunata apamushpa, ari, paicunapaj Jatun Causachijpaj rijsinaman.

37 Paicuna achilyachishca can! Sumaj causaita villaimanda; ali cushijuna mushujcunata villarca; llactapuracunaman Apunchij reinan nishpa villarca.