1 Cunan yalishca jipa Abinadí cai villaicunata tucuchishca jipa, jatun mandaj sacerdotecunata mandarca paita apachun, huañuchichunbash.

2 Ashtahuangari paicunahuan shuj tiarca paipaj shuti carca Alma, Nefipaj cati aillu carca. Shuj viñaj huambra carca, pai Abinadí parlashca shimicunata crirca, pai yacharca Abinadí testificashca paicunapaj na ali ruraicunamanda; chaimanda pai ninanda mañai callarirca jatun mandajta pai Abinadíhuan ama fiñashca cachun, ashtahuangari saquichun pai casilla ri ushachun.

3 Ashtahuangari jatun mandajca ashtahuan fiñashca carca, Almata paicunapamanda llujchishpa calpachirca, paipaj sirvij runacunata cacharca paita catishpa huañuchichun.

4 Ashtahuangari calpashpa pacajurca paita na tupai usharca. Tauca punllacunata pacajushca cashpa tucui Abinadí parlashca shimicunata quilcarca.

5 Yalishca jipa jatun mandaj paipaj ricujcunata muyundi cacharca Abinadíta japichun; paicuna huatarca cárcelman shitarca.

6 Quimsa punlla jipa, sacerdotecunata tapushca jipa, paipaj ñaupaman cutin apamuchirca.

7 Paita nirca: Abinadí, ñucanchi quiquinda imamanda juchachinata tarishcanchi, huañuitami charinacangui.

8 Nishcangui Dios paimandallata urai shamunga runacunapaj huahuacunapaman; cunan, caimanda quiquinba causaita quichushca canga ama shina cachunga ñucamanda, ñuca llactapuracunamandapash na ali tucui shimicunata imata parlashcata na nircanichu ni.

9 Cunan Abinadí nirca: Ninimi, ñuca na nircanichuta na nishachu, shimicunamanda imatami cai llactapuracunamanda parlashcata, caicuna na llulla can; ciertopacha cajta yachachun ñuca cangunapaj maquicunapi urmashcani.

10 Ari, llaqui yalishami huañuicamanbash, ñuca shimicunata na nircanichuta na nishachu, caicuna shayaringa testimonio laya cangunapaj contra. Ñucata huañuchishpaca, nimatapash na yachapaj yahuarta jichangui, caipash shayaringa testimonio laya cangunapaj contra chai tucuri punllapi.

11 Cunan jatun mandaj Noé ña cacharijrijurca, paipaj shimita manllaimanda; pai manllarca Diospaj ricushpa chasquichinacunata urmamunga paipaj jahuaman.

12 Ashtahuangari sacerdotecuna paicunapaj shimicunata alsarca paipaj contra, paita juchachi callarirca, nishpa: Jatun mandajta plitushca. Chaimanda jatun mandaj tangashca shina carca paita fiñangapa, huañuchichun curca.

13 Yalishca jipa paicuna japirca, huatarcapash, ninanda astirca paipaj cuerpota nina japirijujhuan, ari, huañuicaman.

14 Cunan ña nina japirishpa rupachi callarijpi, paicunata caparirca, nishpa:

15 Riqui, ñucata imashna ruranguichi, shinallata yalishca jipaman quiquinba cati aillucuna taucacunata llaquichinga ñuca yalijuj nanaicunata, ninahuan huañuna nanaicunatapash; paicuna Apunchij paicunapaj Diospaj quishpirinapi crimanda.

16 Yalishca jipa canguna llaquichishca canguichi tucui laya unguicunata cangunapaj na ali ruraicunamanda.

17 Ari, chugrichishca canguichi tucui ladocunapi, calpachishca, caiman chaiman shitai tucushca, shuj sacha ataju huagracunashna imasha calpachishca can sacha manllanayai animalcunahuan.

18 Chai punlla japi tucushca canguichi, japi tucushca cangunapaj na ricunayachijcunapaj maquicunapi urmanguichi, llaqui yalinguichi imashna ñuca llaqui yalijuni shinallata, ninahuan huañuipaj nanaicunata.

19 Cashna Dios venganzata ruran maijanguna paipaj llactapuracunata tucuchishcacunata. Oh Dios, ñuca almata chasqui.

20 Cunan, Abinadí cai shimicunata nishca cajpi, urmarca, ninahuan huañuita charirca; ari, huañuita curca Diospaj rurachunbacha saquishcacunata na negashcamanda, paipaj shimicuna ciertopacha cajta sellarca paipaj huañuihuan.