1 Cunan Alma, Apunchij villashca caimanda Noé jatun mandajpaj macanajuj runacuna paicunapaman macanajungapa shamujta, paipaj llactapuracunaman ña villashca caimanda, tandachirca paicunapaj ataju llamacunata, japirca paicunapaj murucunata, jichushca pambaman llujshishpa rirca jatun mandaj Noépaj macanajuj runacunata ñaupashpa.

2 Apunchij paicunata shinlliyachirca, chaimanda jatun mandaj Noépaj llactapuracuna tucuchingapa na japi usharca.

3 Pusaj punllacunata jichushca pambapi pacajushpa rirca.

4 Paicuna alpaman chayamurca, ari, juyailla alpaman, mapa illa yacuhuan alpaman.

5 Paicunapaj facha huasicunata shayachirca, alpata tarpui callarirca, jatun huasicunata huasichi callarirca; ari, ninan trabajajcuna carca, ninanda trabajarcapash.

6 Llactapuracunapaj munai carca Alma paicunapaj jatun mandaj cachun, imashpa paita paipaj llactapuracuna juyaimanda.

7 Ashtahuangari paicunaman nirca: Riqui, na alichu shuj jatun mandajta charina; Apunchijca shina nin: Shuj aichata cutishujta yali ama alicachinguichi, nacashpaca shuj runa cutishujta yali cani na yanachu; chaimanda ñuca nini na alichu shuj jatun mandajta charina.

8 Shina cajpipash, ushashpa punllan punllan ali runacunata cangunapa jatun mandajcunapa charishpaca, ali cangami shuj jatun mandajta charina.

9 Ashtahuangari yarichi jatun mandaj Noépaj na ali ruraicunata, paipaj sacerdotecunapajpash; ñucallatapash trampapi urmarcani, tauca cuzascunata rurarcani maijan millanayaicuna carca Apunchijpaj ricuipi, nanaihuan arrepentichihuarca;

10 Shina cajpipash, ninan llaqui yalishca jipa Apunchijca ñuca mañaicunata uyarca, ñuca achil mañaicunatapash tigrachirca, ñucata rurahuashca paipaj maquicunapi shuj imatalla rurana cachun, cangunamanda taucacuna paipaj na llullata yuyaipi chasquichun.

11 Shina cajpipash, caipi ñuca na jariyani, ñucamanda jariyangapa na sirvini.

12 Cunan cangunaman nini, jatun mandaj Noé cangunata llaquichishca can, paihuan, paipaj sacerdotecunaman huatai tucushcashna cashcanguichi, paicuna na ali ruraicunaman apashca can; chaimanda canguna huatashca cashcanguichi paicunapaj na ali ruraicunapaj huatanacunahuan.

13 Cunan cai huatanacunamanda cacharichishca canguichi Diospaj ushaihuan; ari, jatun mandaj Noépaj maquicunamanda, paipaj llactapuracunamandapash, na ali ruraicunapaj huatanacunamandapash, ñuca munani canguna cai libertadpi shinlli cachun imahuan libre churashca canguichi, maijan runatapash ama confianguichichu cangunapa shuj jatun mandaj cachun.

14 Pitapash ama confianguichichu cangunapa yachachij cachun nacashpaca cangunapa achil yachachijcuna, Diospaj runa cajpilla, paipaj ñangunata purijpi paipaj rurachunbacha saquishcacunata alichijpi.

15 Shina Alma paipaj llactapuracunata yachachirca, shujllangaman paicunapaj ladopi causajcunata juyachun paicunashnallata, paicunapurapi ama randimanda plituri tiachun.

16 Cunan, Alma paicunapaj sumo sacerdote carca, iglesiata shayachij caimanda.

17 Yalishca jipa pipash na chasquinllu autoridadta villachingapa nacashpaca yachachingapa Diosmanda Alma chasquishcamanda. Chaimanda pai achil ajllarca paicunapaj tucui sacerdotecunata, tucui yachachijcunatapash; pipash na achil ajllashca carca ali runacuna caimandalla.

18 Chaimanda paicunapaj llactapuracunata cuidarca, paicunaman ali ruraicunapaj cuzascunahuan micuchirca.

19 Yalishca jipa paicuna ninanda ali mirai callarirca alpapi; paicuna Helam alpata shutichirca.

20 Yalishca jipa ninanda mirarirca, ninanda ali mirarca Helam alpapi; shuj llactata shayachirca, caita Helam llactata shutichirca.

21 Shina cajpipash Apunchijca paipaj llactapuracunata castigai ali cajta ricurca; ari, pai ricungapa paicunapaj pacienciata, paicunapaj feta.

22 Shina cajpipash—pipash paipi confianzata churajpica chai tucuri punllapi vichai alsashca canga. Ari, shina carca paipaj llactapuracunahuan.

23 Riqui, cangunaman ricuchisha paicuna huatai tucushcashnaman apai tucushca carca, paicunataca pipash na cacharichi ushaiman ashtahuangari Apunchij paicunapaj Dios, ari, Abrahampaj, Isaacpaj, Jacobpaj Dios.

24 Yalishca jipa paicunata cacharichirca, paicunaman ricuchirca paipaj jatun ushaita, paicunapaj cushijuicuna jatun carca.

25 Riqui, yalishca jipa paicuna Helam alpapi cajpica, ari, Helam llactapi, muyundi alpata tarpunajujpi, riqui Lamanitacunapaj macanajuj runacuna alpapaj manñacunapi carca.

26 Cunan yalishca jipa Almapaj huauquicuna paicunapaj pambacunamanda pacajushpa calparca, Helam llactapi tandanajurca; paicuna ninanda manllarishcacuna carca Lamanitacuna ricurishcamanda.

27 Ashtahuangari Alma paicunapaman rirca, ama manllachun cutin yarichirca, ashtahuangari Apunchijta paicunapaj Diosta yarichun, pai quishpichichun.

28 Chaimanda na yapa manllarca, Apunchijta mañai callarirca Lamanitacunapaj shungucunata amujyachichun, paicunata llaquichun, paicunapaj huarmicunata, paicunapaj huahuacunata.

29 Yalishca jipa Apunchijca Lamanitacunapaj shungucunata amujyachirca. Alma, paipaj huauquicunapash rirca paicunallata Lamanitacunapaj maquicunapi curca; paicuna Helam alpata japirca.

30 Cunan Lamanitacunapaj macanajuj runacuna, picunami jatun mandaj Limhita catishca carca, jichushca pambacunapi chingashca carca tauca punllacunata.

31 Riqui, jatun mandaj Noépaj sacerdotecunata tupashca carca, shuj pushtu paicuna Amulónda shutichishcapi; Amulón alpata japi callarirca, alpatapash tarpui callarirca.

32 Cunan chai sacerdotecunapaj pushajpaj shuti Amulón carca.

33 Yalishca jipa Amulón ninanda mañarca Lamanitacunahuan; paicunapaj huarmicunata cacharcapash, paicuna Lamanitacunapaj ushicuna carca, paicunapaj huauquicunata ninanda mañachun, ama tucuchichun paicunapaj cusacunata.

34 Lamanitacuna Amulónda, paipaj huauquicunatapash llaquirca, na tucuchirca, paicunapaj huarmicunamanda.

35 Amulón, paipaj huauquicuna Lamanitacunahuan tandanajurca, paicuna purirca jichushca pambacunapi Nefipaj alpata mascashpa, Helam alpatara tuparca, maipi Alma, paipaj huauquicunahuan causanajurca.

36 Yalishca jipa Lamanitacuna nircapacha Almata, paipaj huauquicunata, Nefi alpaman rina ñanda ricuchijpica paicunapaj causaita, paicunapaj libertadta saquishun.

37 Ashtahuangari Alma Nefi alpaman rina ñanda ricuchishca jipa Lamanitacuna paicunapaj nishcapachata na alichirca; ashtahuangari churarca ricuj runacunata Helam alpata muyundi, Almapa, paipa huauquicunapa jahuapi.

38 Paicunamanda puchucuna Nefi alpaman rirca; huaquinguna Helam alpaman tigrarca, paicunahuan aparcapash ricuj runacunapaj huarmicunata, huahuacunatapash llactapi saquishcacunata.

39 Lamanitacunapaj jatun mandaj Amulónman saquirca shuj jatun mandaj cachun paipaj llactapuracunata mandachun, picuna Helam llactapi carca; shina cajpipash pai na ushaita charirca nimata rurangapa Lamanitacunapaj jatun mandajpaj munaitalla rurana carca.