1 Yalishca jipa jatun mandaj Limhi paipaj llactapuracunaman parlaicunata tucuchichishca jipa, tauca cuzascunata parlarca chaicunamanda huaquinlla cai quilcashcapi ñuca quilcashcani, paipaj llactapuracunaman pai villarca tucui cuzascunata paicunapaj huauquicuna picunami Zarahemla alpapi canajurca.

2 Pai Ammónta ashtacapacha tandanajushcacunapaj ñaupapi shayachirca, paipaj huauquicunata tucui imacunatalla rurashcacunata villachun imaura Zeniff chai alpamanda rishcamanda imaura paillata chai alpamanda llujshimushcacaman.

3 Ammón villarcapashmi tucuri shimicunata jatun mandaj Benjamín paicunaman yachachishcata, jatun mandaj Limhipaj llactapuracunaman aliguta villarcapashmi, pai parlashcata tucui shimicunata yuyaipi chasquichun.

4 Yalishca jipa cai tucuita rurashca jipa, jatun mandaj Limhi ashtacapacha tandanajushcacunata cacharca, shujllangaman paicunapaj huasicunaman tigrachun.

5 Yalishca jipa Ammónpaman apamuchirca jirru fangacunata paipaj llactapuracunapaj tandachishpa quilcashcata charirca paicuna Zarahemla alpata llujshimushca punllamanda, caicunata pai liichun.

6 Cunan, tandachishca quilcashcacunata Ammón liishca jipalla, jatun mandaj tapurca yachangapa shimirimaicunata ima nijta villai ushaipapash, Ammón na ushanichu nirca.

7 Jatun mandaj nirca: Llaquilla cashpa ñuca llactapuracunapaj llaquicunamanda, chuscu chunga quimsa ñuca llactapuracunata cacharcani jichushca pambapi purishpa richun, shinalaya paicuna Zarahemla alpata tupachun, ñucanchi huauquicunata mañachun huatai tucushcashnamanda ñucanchita cacharichichun.

8 Chingashca carca jichushca pambapi tauca punllacunata, shina cashpapash mascanajurcapash, Zarahemla alpata na tarircachu ashtahuangari cai alpaman tigramurca, acha yacucunahuan alpata purishca jipa, shuj alpata tarishca carca maipimi jundashca carca runacunapaj, sacha animalcunapaj tullucunahuan, tucui laya jatun huasicunamanda faquirishcacuna, tupashca carca shuj alpa maipi causashca carca llactapuracuna ashtacapacha Israelpaj huestes laya.

9 Cai cuzascunata nishca ciertopacha can testimonio cachun paicuna apamushca ishcai chunga chuscu jirru fangacunata caicunaca quilcashcacunahuan jundachishca carca, curicashca carca.

10 Riqui, apamushcapash carca pechopaj jirrucunatapash, caicuna jatun carca, broncehuan, cobrehuan rurashcacuna, tucui aliguta alichishcacuna.

11 Cutin, apamushcapash carca espadacunata, maquijapinacuna tucurishcacuna carca, filocunapash jirrunbrashca carca; pipash cai alpapi na tianllu cai shimirimaita tigrachi ushaj na cashpaca cai jirru fangacunapi quilcashcacunata. Chaimanda quiquinda nircani: Ushanguichu ima nijta tigrachita?

12 Cutin quiquinda nini: Yachanguichu pipash ima nijman tigrachijta? Ñuca munani cai quilcashcacuna ñucanchi shimirimaiman tigrachishca cachun; imashpapash, caicuna ñucanchiman cungapashchari yuyaipi chasquinata llactapuracuna tucuchi tucushcamanda puchushcacunata, maimandami cai quilcashcacuna shamurca; imashpapash, ñucanchiman cungapashchari yuyaipi chasquinata chai llactapuramandapacha picunami tucuchi tucushca carca; ñuca munani yachangapa imashpa paicuna tucurirca.

13 Cunan Ammón nirca: Quiquinda ciertopacha nini, Oh jatun mandaj, shuj runa cai tandachishpa quilcashcacunata tigrachi ushanmi; pai charin imatachari ricui ushangapa, tucui tandachishpa quilcashcacunata tigrachinpash pundacuna cajta; Diospaj don can. Cai cuzascunapaj shutica can yalichinacuna, caicunapi pipash na ricui ushan mandashca cashpalla, napashcanata mascaipapash chaica huañunga. Pitami chaicunata ricuchun mandashca, paipaj shutica vidente can.

14 Riqui, Zarahemla alpapi llactapuracunapaj jatun mandajmi chai runa can cai cuzascunata rurachun mandashca can, paimi cai Diospaj jatun donda charin.

15 Jatun mandajca nirca videnteca achil villachijta yali jatunllu.

16 Ammón nircapash videnteca achil yachaj chayachij achil villachijpashmi; ashtahuan jatun don na tianllu shuj runa charij, Diospaj ushaita charimandalla, pipash na chari ushan; shina cashpapash shuj runaca chari ushan chai jatun ushaita Diosmanda cushcata.

17 Ashtahuangari shuj videnteca yachai ushanmi yalishca cuzascunata, shamugrin cuzascunatapash, caimanda tucui cuzascuna yachaj chayachishca canga, nacashpaca pacalla cuzascuna ricuchishca canga, pacashca cuzascunapash michaman llujshimunga, na yachashca cuzascuna paicuna yachaj chayachinga, paicuna ricuchishcapash canga cuzascuna shuj layapi na yachai ushanacuna.

18 Shinami Dios cushca shuj layata imashna runa, paipaj femanda, jatun juyailla ruraita ricuchinacunata rurai ushachun; chaimanda shuj jatun minishtishcaman tigran paipaj runapuracunapa.

19 Cunan, imaura Ammón cai shimicuna parlashpa tucuchijpi jatun mandajca ninanda cushijurca, Diosta pagui nirca, nishpa: Na dudashpa shuj jatun na villashca cai jirru fangacunapi tian, cai yalichinacuna na dudashpa huacaichishca shuj munaipa yachaj chayachingapa tucui cashna Diospaj na villashcacunata runacunapaj huahuacunapa.

20 Oh ima juyaillapacha Apunchijpaj rurashcacuna can, mashnatashi paipaj llactapuracunahuan aguantanga; ari, ima ñausa, na yalinalla runacunapaj huahuacunapaj yuyaipi chasquinacuna can; paicuna yachaita na mascan, na munanbash cai paicunata mandachun!

21 Ari, paicunaca sacha llamacunashna michijmanda calpan, chajchurinbash, cati tucushca micui tucushcapash can sacha animalcunahuan.