1 Yalishca jipa Ammón, jatun mandaj Limhi llactapuracunahuan tapui callarirca imashna paicuna huatai tucushcashnamanda cacharirinamanda; tucuilla llactapuracunata paipura tandachirca; shina rurarca llactapuracunapaj shimita yachangapa cai parlarimanda ima canata yachangapa.

2 Yalishca jipa ima laya canatapash na tari usharca paicunallata huatai tucushcashnamanda cachariringapa, paicunapaj huarmicunata, paicunapaj huahuacunata, paicunapaj ataju llamacunata, paicunapaj huagracunata, paicunapaj facha huasicunata, jichushca pambaman japishpa pacajushpa rishpalla; Lamanitacuna taucapacha caimanda, Limhipaj llactapuracuna napacha ushana carca paicunahuan macanajungapa, espadahuan huatai tucushnamanda cachariri ushashun yashpa.

3 Cunan yalishca jipa Gedeón rishpa jatun mandajpaj ñaupapi shayarirca, nirca: Cunan Oh jatun mandaj cunangaman ñuca shimicunata uyahuashcangui tauca viaje imaura ñucanchipaj Lamanita huauquicunahuan macanajushca caimanda.

4 Cunan Oh jatun mandaj, ñucata na valij sirvij runa cajta ricushpaca, nacashpaca cunangaman ñuca shimicunata ashallatapash uyashca cashpaca, quiquinda sirvishca cajpica, ñuca munani cai viajepash ñuca shimicunata uyahuai, quiquinba sirvij runa casha cai llactapuracunata huatai tucushcashnamanda cacharichingapa.

5 Jatun mandaj saquirca pai parlai ushachun. Gedeón paiman nirca:

6 Riqui huasha quichiji ñan, huasha pircaman, llactapaj huasha ladopi. Lamanitacuna, nacashpaca Lamanitacunapaj ricuj runacuna, tutapi machashca canga; chaimanda shuj tucui yachachun villanata cachashun tucui llactapuracunaman, paicuna tandachichun paicunapaj ataju llamacunata, huagracunata, tutapi jichushca pambaman apangapa.

7 Ñuca quiquinba mandado risha Lamanitacunaman, Lamanitacunaman tucuri vino tributota pagasha, paicuna machanajunga; ñucanchi yalishun pacalla quichiji ñanda paicunapaj campamentopaj lluquita imaura machashca puñunajujpi.

8 Shina ñucanchi llujshishpa rishun jichushca pambaman ñucanchipaj huarmicunahuan, ñucanchipaj huahuacunahuan, ñucanchipaj ataju llamacunahuan, ñucanchipaj huagracunahuan; Shilom alpata muyushpa rishunchi.

9 Yalishca jipa jatun mandajca Gedeónpaj shimicunata uyarca.

10 Jatun mandaj Limhi paipaj llactapuracunata tandachirca paicunapaj ataju llamacunata paipura; Lamanitacunaman vino tributota cacharca; ashtahuan vinotapash cacharca, paicunaman carana layapi; munashca vinota ufiarca imata jatun mandaj cachashcata.

11 Yalishca jipa jatun mandaj Limhipaj llactapuracuna tuta jichushca pambaman llujshishpa rirca paicunapaj ataju llamacunahuan, paicunapaj huagracunahuan, Shilom alpata muyushpa rirca jichushca pambapi, Zarahemla alpaman derecharca paicunapaj purinacunata, Ammón, paipaj huauquicunahuan pushanajurca.

12 Paicuna japishca carca tucuilla paicunapaj curita, culquita, juyailla cuzascunata, imata apai ushashcata, micunacunatapash, jichushca pambaman catirca paicuna purishpa rinata.

13 Tauca punllacunata jichushca pambapi cashca jipa Zarahemla alpaman chayarca, Mosíahpaj llactapuracunahuan tandanajurca paipa munashcaman curirca, paipaj munashcaman curirca.

14 Yalishca jipa Mosíah cushijuihuan chasquishca jipa; paicunapaj tandachishca quilcashcacunatapash chasquirca, Limhipaj llactapuracuna tarishca tandachishca quilcashcacunatapash.

15 Cunan yalishca jipa imaura Lamanitacuna Limhipaj llactapuracuna tuta llujshishpa rishcata yachaj chayashpa, macanajuj runacunata jichushca pambaman mascachun cacharca;

16 Ishcai punllacunata mascashca jipa, paicunapaj sarushcacunata ñana ashtahuan cati ushaimanda; jichushca pambapi chingarca.