1 Cunan jatun mandaj Mosíah tucui llactapuracunata tandanajuchirca.

2 Cunan Nefipaj huahuacuna na tauca tiarca, nacashpa tauca Nefipaj cati aillucuna cajcuna, Zarahemlapaj llactapuracunamandashna picuna Mulekipaj cati aillucuna carca, paihuan jichushca pambaman llujshirca.

3 Nefipaj llactapuracuna na tauca carca, Zarahemlapaj llactapuracunapash Lamanitacuna caj laya; ari, chaupipash na carca.

4 Cunan tucui Nefipaj llactapuracuna tandanajushca carca, Zarahemlapaj tucui llactapuracunapash, paicuna tandanajushca carca ishcai tandanajushcapi.

5 Yalishca jipa Mosíah liirca, paipaj llactapuracunata Zeniffpaj tandachishca quilcashcacunata liichirca; ari, Zeniffpaj llactapuracunapaj tandachishca quilcashcacunata pai liirca, paicuna Zarahemla saquishca punllamanda imaura paicuna cutin tigramushcacaman.

6 Almapaj, paipaj huauquicunapaj tandachishpa quilcashcacunatapash liirca, tucui paicunapaj llaquicunata, Zarahemla alpata saquishca punllamanda imaura paicuna cutin tigramushcacaman.

7 Cunan, imaura Mosíah quilcashcacunata liishpa tucuchirca, paipaj llactapuracuna picuna chai llactapi carca ninan manllarihuan junda carca.

8 Cutin paicuna na yacharca imata yuyanata; imaura paicuna ricushpa picuna huatai tucushcashnamanda cacharichishcacunata ninan jatun cushijuihuan junda carca.

9 Cutin, imaura yuyashpa paicunapaj huauquicunata picuna Lamanitacunahuan huañuchi tucushcacunata, llaquirinacunahuan junda carca, llaquirinapaj viqui ninanda shitarirca.

10 Cutin, imaura Diospaj alicaita ñapash yuyarishpa, paipaj ushaita cacharichingapa Almata, paipaj huauquicunatapash Lamanitacunapaj maquicunamanda, huatai tucushcashnamanda, paicunapaj shimicunata alsarca Diosta pagui nirca.

11 Cutin, imaura Lamanitacunamanda yuyarishpa, picuna paicunapaj huauquicuna carca, paicunapaj juchayu, na ali canamanda, nanaihuan, llaquihuan jundarca paicunapaj almacuna ali capashcanman yarca.

12 Yalishca jipa Amulónpaj huahuacuna, paipaj huauquicuna cajcuna, picuna japishca carca huarmipa Lamanitacunapaj ushicunata, na alicachishca carca paicunapaj taitacunapaj ruraicunamanda, paicuna taitacunapaj shuticunahuan ñana ashtahuan shutichishca cangapa munarca, chaimanda paicunamandallata Nefi shutita shutichirirca, Nefipaj huahuacuna shutichishca cangapa Nefitacunahuan yupai tucushca cangapa.

13 Cunan tucui Zarahemlapaj llactapuracuna Nefitacunahuan yupai tucushca carca, caita rurarca reinota nipiman na cushca carca ashtahuangari Nefipaj cati aillucuna cajcunaman.

14 Cunan yalishca jipa imaura Mosíah llactapuracunaman parlaita, liita tucuchishca cajpi, pai munarca Almapash llactapuracunaman parlachun.

15 Alma paicunaman parlarca, imaura jatun tandanajuipi tandanajushca cajpi, pai rirca shuj tandanajushcamanda cutishujman, llactapuracunaman yachachishpa arrepentimientota, Apunchijpi fetapash.

16 Cutin yarichirca Limhipaj llactapuracunata, paipaj huauquicunatapash, tucuicuna huatai tucushcashnamanda cacharichishca cashcata, yarichun Apunchijmi paicuna cacharichishca carca.

17 Yalishca jipa Alma tauca cuzascunata llactapuracunaman yachachishca jipa, parlaicunata tucuchirca, jatun mandaj Limhi munashca carca bautizarishca cangapa; tucui paipaj llactapuracunapash munashca carca, paicunapash bautizarishca cangapa.

18 Chaimanda, Alma yacuman rishpa paicunata bautizarca; ari, pai bautizarca paipaj huauquicunata imashna rurarca Mormón yacucunapi; ari, mashna bautizashcacuna Diospaj iglesiata catij carca; caica Almapaj shimicunata crimanda.

19 Yalishca jipa jatun mandaj Mosíah Almata saquirca iglesiacunata shayachi ushachun tucui Zarahemla alpacunapi; paiman ushaita curca sacerdotecunata ordenachun, yachachijcunatapash shujllangaman iglesiacunapa.

20 Cunan caita rurarca tauca llactapuracuna tiajpi imashpa shujlla yachachij na ushan ñaupachita; tucuillapash na uyai ushan tandanajushcapi Diospaj shimita;

21 Chaimanda paipuracuna tandanajurca shuj shuj tandanajuicunapi, iglesiacuna nishpa shutichirca; shujllangaman iglesiacuna paicunapaj sacerdotecunata, yachachijcunata charishpa, tucui sacerdotecuna yachachirca Almapaj shimihuan cushca achil shimita.

22 Shina, masqui tauca iglesiacuna cashpapash tucuilla shujlla iglesia carca, ari, Diospaj iglesia; tucui iglesiacunapi nimata na yachachirca nacashpaca arrepentimiento, Diospi fetalla.

23 Cunan canchis iglesiacuna tiarca Zarahemla alpapi. Yalishca jipa pipash paicunapaj jahuapi Cristopaj shutita japingapa munashpa, nacashpaca Diospajta, Diospaj iglesiacunaman tandanajurca;

24 Paicuna shutichishca carca Diospaj llactapuracuna. Apunchijpash paipaj Espírituta paicunaman jicharca, achilyachishca carca, pambapi ali mirarca.