1 Cunan yalishca jipa Zeniff reinota curca Noéman, paipaj churicunamanda shuj churi carca; chaimanda Noé reinai callarirca paipaj pushtupi; pai na purirca paipaj taitapaj ñangunata.

2 Riqui, Dios rurachunbacha saquishcacunata na alichirca, ashtahuangari paipaj shungu munashcata catishpa purirca. Pai tauca huarmicunata chaishu huarmicunatapash charirca. Paipaj llactapuracunata juchata rurachirca, Apunchijpaj ñavipi millanayai cajcunata rurachirca. Ari, paicuna fornicacióncunata rurarca, tucui laya na ali ruraicunatapash.

3 Pai shuj tributota churarca tucui charishcamanda picha parteta cuna, paicunapaj curicunamanda picha parteta paicunapaj culquicunamandapash, paicunapaj ziff picha parteta, paicunapaj cobremanda, paicunapaj broncemanda, hierromanda, huasipi charina animalcunamanda; tucui muyucunamandapash picha parteta.

4 Tucui caicunata rurarca paipaj causaipa minishtirishcapa, paipaj huarmicunapa paipaj chaishu huarmicunapapash; paipaj sacerdotecunapa, paicunapa huarmicunapa chaishu huarmicunapapash; cashna reinopaj ruranacunata shujman tigrachishca carca.

5 Tucui sacerdotecunata paipaj taitapaj achil ajllashcacunata anchuchirca, paicunapaj pushtupi mushujcunata cayashpa achil ajllarca, paicunapaj shungucuna jariyashpa alsarishcacunata.

6 Ari, shina paicunapaj quillapi mantenerishcacuna carca, paicunapaj yanga dioscunata cunguripi, paicunapaj fornicacióncunapi, tributocunahuan imata jatun mandaj Noé paicunapa llactapuracunaman churashca carca; ninanda trabajarca na ali ruraicunata mantenengapa.

7 Ari, paicuna yanga dioscunata adorajcunaman tigrarca, paicuna uyanayaita llullai tucushca caimanda jatun mandajpa, sacerdotecunapaj yanga uyanayai shimicunamanda; paicuna uyanayaita llullashpa cuzascunata parlarca.

8 Yalishca jipa jatun mandaj Noé tauca juyailla lugarlla jatun huasicunata huasichirca; ashtahuan juyailla tucuchun churarca caspihuan fino rurashcacunata, tucui laya juyailla cuzascunata, curita, culquita, hierrota, bronceta, ziff, cobretapash.

9 Paipaj causana jatun huasitapash huasichirca, chaupipica shuj jatun tiarinata, tucui fino caspihuan carca, ashtahuan juyailla tucuchishca curihuan, culquihuan, juyailla cuzascunahuanbash.

10 Maquihuanlla ruraj runacunatapash tucui laya fino rurashcacunata rurachirca achil huasipaj pirca ucucunapi, fino caspihuan, cobrehuan, broncehuanbash.

11 Sumo sacerdotecunapa churashca tiarinacunataca, caicuna tucui tiarinacunatapash jahuaman yalishcacuna carca, pai ashtahuan juyailla tucuchirca curicashcahuan; shuj pechoman ñaupata rurachirca paicunapaj ñaupaman, chaipi paicunapaj cuerpocunata, rigracunandi charirichun imaura paicuna llulla yanga shimicunata llactapuracunaman parlanajujpi.

12 Yalishca jipa shuj jatun torreta huasichirca achil huasi ladolla; ari, shuj ninan jatun jatun torreta, jatunpacha chai jahuapi shayarishpa Shilompaj alpata ricui usharirca, Shemlón alpatapash, maijan Lamanitacuna charinajurca; tucui muyundi alpacunatapash ricui usharirca.

13 Yalishca jipa tauca jatun huasicunata huasichirca Shilom alpapi; shuj jatun jatun torreta huasichirca Shilom alpa vichai lado uchilla urcupi, maipi Nefipaj huahuacunapaj pacajuna pushtu cashcarca alpamanda llujshishpa rishca punllapi; shina caicunata rurarca valishca charishcacunata japishcacunahuan llactapuracunapaj tributota chasquishpa.

14 Yalishca jipa paipaj shunguta valishca charishcacunapi churarca, paipaj causaita tucuchirca huagli causaicunapi huarmicunahuan, chaishu huarmicunahuanbash; sacerdotecunapash paicunapaj punllacunata tucuchirca rameracunahuan.

15 Yalishca jipa uvas chagracunata muyundi alpacunapi tarpurca; uvas capijtapash rurarca, ashtacapacha vinota rurarca; chaimanda pai vino ufiajman tigrarca, llactapuracunapash.

16 Yalishca jipa Lamanitacuna paipaj llactapuracunapaman shamui callarirca, ashalla tandanajushcaman, paicunapaj pambacunapi huañuchingapa, ataju llamacunata michinajujpi.

17 Jatun mandaj Noé ricujcunata cacharca muyundi alpacunaman macanajuchun; ashtahuangari na taucacunata cacharca, Lamanitacuna macanajungapa shamushpa paicunata huañuchirca, alpamanda llujchishpa calpachircapash; shina Lamanitacuna paicunata tucuchi callarirca, na ricunayachina yuyaicunatapash viñachi callarirca.

18 Yalishca jipa jatun mandaj Noé macanajuj runacunata cacharca, Lamanitacunata calpachirca, huashaman tigrachirca, huaquin punllacaman; chaimanda, cushijushpa tigramurca paicunapaj mishaicunapi.

19 Cunan, cai jatun macanajushpa mishaimanda paicunapaj shungucuna jariyaipi vichai alsarishca carca; paicunapaj shinllicaipi ninanda jariyarca, nishpa picha chungacuna huaranga Lamanitacunata usharca; shina ninanda jariyarca, yahuarpi cushijurca, paicunapaj huauquicunapaj yahuarta jichaipi, caica paicunapaj jatun mandajcunapa sacerdotecunapapash na ali ruraicunamanda.

20 Yalishca jipa shuj runa tiarca paipuracunapi paipaj shutica Abinadí carca; paicunapaman rirca achil villachi callarirca, nishpa: Riqui, Apunchica shina nin, shina ñucata mandashca can, nishpa, Ri, cai llactapuracunata ni, Apunchijca shina nin—Ay cai llactapuracuna canga, paicunapaj millanayaicunata ricushca cani, na ali ruraicunatapash, fornicacióncunatapash; paicuna na arrepentirijpica ñuca ricuj shamusha ñuca fiñaipi.

21 Paicuna na arrepentirijpica Apunchij Diospaman na tigrarijpica, Riqui, paicunata na ricunayachijpa maquicunapi cusha; ari, huatai tucushcahnaman apashca canga; llaquichishcapash canga paicunata na ricunayachijcunapaj maquihuan.

22 Yalishca jipa paicuna yachangami ñuca cani Apunchij paicunapaj Dios, ninanda munashca Dios cani, ñuca llactapuracunapaj na ali ruraicunata ricuj shamuni.

23 Yalishca jipa cai llactapuracuna na arrepentirishpa Apunchij paicunapaj Diospaman na tigrarijpi, paicuna huatai tucushcashnaman apashca canga; pipash na cacharichingachu, Apunchij Tucui Ushaita Charij Dioslla ushanga.

24 Ari, yalishca jipa paicuna imaura mañajpi ñuca uyangapa alimanda casha paicunapaj mañaicunata; ari, ñuca llaquichisha chugrichishapash paicuna na ricunayachijcunahuan.

25 Paicuna na arrepentirijpica ciliciopi, uchufapi, ninandacha mañajpi Apunchij paicunapaj Diosta, ñuca paicunapaj achil mañaicunata na uyashachu, llaquicunamandapash na cacharichishachu; Apunchijca shina nin, shina pai mandahuashca.

26 Cunan yalishca jipa Abinadí cai shimicunata parlashca jipa paicuna ninanda fiñarca, paipaj causaita quichungapa munarca; ashtahuangari Apunchij paicunapaj maquicunamanda cacharichirca.

27 Cunan jatun mandaj Noé cai shimicunata uyashca cashpa imatami Abinadí llactapuracunaman parlashca carca, paipash ninanda fiñarca; nirca: Pita can Abinadí, ñucata ñuca llactapuracunatapash paihuan ricushpa chasquichishca cangapa, nacashpaca pita Apunchij can, ñuca llactapuracunapaman cashna jatun llaquita apamungapa?

28 Ñuca mandani Abinadíta caiman apamuichi, ñuca huañuchingapa, paica cai cuzascunata nishca can ñuca llactapuracunata caishuhuan chaishuhuan tangaj shina fiñachingapa, paipura fiñanajui jatarichun; chaimanda ñuca paita huañuchigrini.

29 Cunan llactapuracunapaj ñavicuna ñausacuna carca; chaimanda paicunapaj shungucuna shinlliyarca Abinadípaj shimicunapaj contra, chai punllamanda Abinadíta japingapa munarca. Jatun mandaj Noé paipaj shunguta shinlliyachirca Apunchijpaj shimipaj contra, pai na arrepentirirca paipaj aya ruraicunamanda.