1 Cunan, jatun mandaj Benjamín minishtirishca can yarca, llactapuracunaman parlashpa tucuchishca jipa, japingapa shuticunata tucuimanda picunami Dios-huan shuj convenioman yaicushca carca paipaj rurachunbacha saquishcacunata alichingapa.

2 Yalishca jipa shuj almapash na tiarcachu, uchilla huahuacunalla, ashtahuangari picunami yaicushca conveniopi Cristopaj shutita paicunahuan japishca.

3 Cutin, yalishca jipa imaura jatun mandaj Benjamín tucui cai cuzascunata tucuchishpaca, paipaj churi Mosíahta achil ajllarca mandaj cachun jatun mandaj paipaj llactapuracunapi, paiman cushca carca reinopaj tucui ruranacunata, sacerdotecunatapash cayashca carca llactapuracunata yachachichun, shina paicuna uyai ushachun yachachunbash Diospaj rurachunbacha saquishcacunata, juramentota maijan paicuna rurashcata tangaj shina paicunata yarichingapapash, cacharca ashtacapacha tandanajushcacunata, paicuna tigrarca, shujllangaman paicunapaj aillucunahuan, paicunapaj huasicunaman.

4 Mosíah reinai callarirca paipaj taitapa pushtupi. Reinai callarirca quimsa chunga huatata charishpa, tucuillamanda, chuscu patsaj canchis chunga sujta huatacuna Lehi Jerusalénmanda llujshimushcamanda.

5 Jatun mandaj Benjamín causarca quimsa huatacunata ashtahuanbash pai huañurca.

6 Yalishca jipa jatun mandaj Mosíah Apunchijpaj ñangunapi purirca, paipaj ricushpa chasquichinacunata catichunbacha saquishcacunata, paipaj rurachunbacha saquishcacunatapash alichirca tucui cuzascunata mandashcacunata.

7 Jatun mandaj Mosíah paipaj llactapuracunata alpata trabajachirca. Paipash, paillata trabajarca alpata, shina ama llactapuracunata shinlli mandajlla cangapa, rurangapa imashna paipaj taita rurashca laya tucui cuzascunapi. Na tiarca randimanda plituri tucui paipaj llactapuracunahuan quimsa huatacunapi.