1 Yalishca jipa Limhi paipaj llactapuracuna Nefi llactaman tigrarca, sumaj causaihuan chai alpapi causai callarin.

2 Yalishca jipa tauca punllacuna jipa Lamanitacuna Nefitacunata tangaj shina cutin fiñangapa callarirca, yaicui callarirca manñacunaman muyundi alpacunata.

3 Cunan paicunata huañuchingapa manllarca, Limhihuan paicunapaj jatun mandaj juramentota rurashcamanda; ashtahuangari paicunapaj ñavichichucunapi huajtarca, paicunapapi autoridadta churashpa; paicunapaj huashacunapi llasha quipicunata churai callarirca, upa burrota apajshna pusharca—

4 Ari, tucui caicuna rurashca carca Apunchijpaj shimicuna pactashca cachun.

5 Cunan Nefitacunapaj llaquicuna jatun carca, Lamanitacunapaj maquicunamanda imashna cacharirina na tiarca, imashpa tucui ladocunapi muyushcacuna carca.

6 Yalishca jipa llactapuracuna jatun mandajhuan quijari callarirca paicunapaj llaquicunamanda; Lamanitacunahuan macanajungapa ringapa munai callarirca. Jatun mandajta ninanda llaquichirca paicunapaj quijaricunahuan; chaimanda saquirca paicuna munashcata rurachun.

7 Cutin tandanajurca, macanajunacunata churajurca, Lamanitacunata paicunapaj alpacunamanda llujchingapa rirca.

8 Yalishca jipa Lamanitacuna misharca, llujchishpa tigrachirca, taucacunata huañuchirca.

9 Tiarca jatun quijaricuna, huacaicuna Limhipaj llactapuracunapi, cusa huañushca huarmicuna paicuna cusacunamanda huacashpa, churi, ushi paicunapaj taitacunamanda huacashpa, huauquicuna paicunapaj huauquicunamanda.

10 Cunan alpapica tauca cusa huañushca huarmicuna tiarca, paicuna punllan punllan ninandapacha caparirca, Lamanitacunata ninan manllaita charimanda.

11 Yalishca jipa huacailla catimanda Limhipaj llactapuracunata tangaj shina yarichirca Lamanitacunata fiñachun; cutin rirca macanajungapa, ashtahuangari cutin mishai tucushpa tigramurca, ashtaca chingaicunata yalishpa.

12 Ari, cutin rirca quimsa viajecaman, shina layallata yali tucurca; maijan na mishai tucushcacuna Nefipaj llactaman cutin tigrarca.

13 Paicuna alpacaman humillarirca, huatai tucushcashnapaj yugoman paicunamandallata curishpa, paicunallata curirca macai tucushca cangapa, caiman chaiman apai tucungapa, quipicunata apangapa, imasha paicunapaj na ricunayachijcuna munashcata.

14 Paicuna humillarirca jatun humildadpi; Diosta ninandapacha mañarca; ari, tucui punlla paicunapaj Diosta mañarca, pai cacharichichun paicunapaj llaquicunamanda.

15 Cunan Apunchijca paicunapaj mañaicunata alimanda uyarca paicunapaj na ali ruraicunamanda; shina cashpapash Apunchijca uyarca paicunapaj mañaicunata, Lamanitacunapaj shungucunata amujyachi callarirca, paicunapaj llasha quipicuna fangalla cai callarirca; shina cashpapash Apunchijca nara ali canachu yarca huatai tucushcashnamanda cacharichina.

16 Yalishca jipa paicuna ali mirai callarirca asha asha alpapi, murucunata ashtacatapacha fucuchishpa mirachi callarirca, ataju llamacuna, huagracunatapash, na yarjai yalircachu.

17 Cunan llashajpacha huarmicuna tiarca, jaricunatapash yali; chaimanda jatun mandaj Limhi mandarca shujllangaman runa cusa huañushca huarmicunaman causangapa minishtishcacunata carachun, paicunapaj huahuacunamanbash, paicunapaj ama yarjai huañuchichun; caita rurarca ashtacapacha huañushca caimanda.

18 Cunan Limhipaj llactapuracuna tandanajurca shuj cuerpopi imashna usharishcacaman, paicunapaj murucunata ataju llamacunatapash ricungapa;

19 Jatun mandajpash paipacha na saquirircachu llactapaj pirca canllaman, paipaj ricuj runacuna paihuan cajpilla, Lamanitacunapaj maquicunapi ima layapash urmana manllaimanda.

20 Paipaj llactapuracunata muyundi ricuriachun churarca, ima layapash japi ushangapa jichushca pambaman pacajushpa calpashca sacerdotecunata, picuna Lamanitacunapaj ushicunata shuhuashca carca, picuna urmachishca carca Limhipaj llactapuracunapaj jahuapi jatun tucuchita.

21 Japingapa munarca paicunata castigangapa; Nefi alpaman tuta shamushpa apashca paicunapaj murucunata tauca juyailla cuzascunatapash; chaimanda paicuna chapashpa shuyanajurca.

22 Yalishca jipa Lamanitacuna Limhipaj llactapuracunahuan ashtahuan fiñanajuicuna na tiarca, imaura Ammón paipaj huauquicunahuan cai alpacunaman shamungacaman.

23 Jatun mandaj paipaj ricuj runacunahuan canlla pungupi cashpa, Ammónda, paipaj huauquicunandi tuparca; Noépaj sacerdotecuna can yarca chaimanda paicunata japishpa apamuchirca, huatashpa cárcelpi churarca. Noépaj sacerdotecuna cashca cajpica huañuchichun mandanman carca.

24 Ashtahuangari paicunaca na cajta yachashpaca, ashtahuangari paicunapaj huauquicuna cashcata, Zarahemla alpamanda shamushca cashcatapash, ninan cushijuihuan jundarca.

25 Cunan Ammón nara shamujpi jatun mandaj Limhi cachashca carca, huaquin runacunata Zarahemla alpata mascachun; ashtahuangari na tari usharca, jichushca pambapi chingashca carca.

26 Shina cajpipash, shuj alpata tarirca, causashca alpata; ari, shuj alpa chaquishca tullucunahuan quilpashca; ari, shuj causashca alpa, cai ña tucuchishca carca; Zarahemla alpami yarca, Nefi alpaman tigramurca, alpapaj manñacunaman chayamurca huaquin punllacuna nara Ammón shamujpi.

27 Shuj tandachishca quilcashcata paicunahuan apamurca, shuj tandachishca quilcashcata tullucunata tarishca llactapuracunamanda; caica quilcashca carca jirru fangacunapi.

28 Cunan Limhi cutin cushijuihuan junda carca Ammónpaj shimimanda yachaimanda, jatun mandaj Mosíah Diospaj carashca cashcamanda, imashpa pai ima nijta tigrachi ushaj caimanda chai quilcashcacunata; ari, Ammónbash cushijurca.

29 Shina cashpapash Ammón, paipaj huauquicuna llaquirinahuan junda carca tauca paicunapaj huauquicuna huañuchishca cajpi;

30 Jatun mandaj Noé, paipaj sacerdotecunapash llactapuracunata juchapi urmachishcamanda, Dios na munaj na ali ruraicunapi; llaquiyarcapash Abinadípaj huañuimanda; Alma rishcamandapash, llactapuracuna paihuan rishcamanda, pimi Diospaj iglesiata shayachishca carca Diospaj shinllicaihuan, Diospaj ushaihuan, Abinadí parlashca shimicunapi fehuan.

31 Ari, huacarca paicuna rishcamanda, pacajushpa maiman rishcata na yachaimanda. Cushijushpa paicunapaman quimirinman carca, paicuna Dios-huan shuj convenioman yaicushca carca, Diosta sirvingapa paipaj rurachunbacha saquishcacunata alichingapa.

32 Cunan Ammón shamushcamanda, jatun mandaj Limhipash Dios-huan shuj convenioman yaicushca carca, tauca paipaj llactapuracunapash, Diosta sirvingapa paipaj rurachunbacha saquishcacunata alichingapa.

33 Yalishca jipa jatun mandaj Limhi tauca paipaj llactapuracunapash bautizarishca cangapa munarca; ashtahuangari pipash na tiarca alpapi Diospaj autoridadta charij. Ammón caita ruranata na nirca, na ali sirvij runa canichu nishpa.

34 Chaimanda paicuna shuj iglesiata chai punlla na shayachircachu, Apunchijpaj Espírituta shuyaimanda. Cunan Almashna, paipaj huauquicunashna tucungapa munashca carca, pimi jichushca pambaman pacajushpa calpashpa carca.

35 Paicuna bautizarishca cangapa munashca carca shuj testigo cangapa, shuj testimonioshna tucui shungu Diosta sirvingapa munashca caimanda; shina cashpapash paicuna ashtaca punllacunata saquirca; paicunapaj bautismota shuj tandachishpa quilcashca canga jipaman.

36 Cunan Ammónpaj, paipaj huauquicunapaj, jatun mandaj Limhipaj, paipaj llactapuracunapaj tucui munai carca cachariringapa Lamanitacunapaj maquicunamanda, huatai tucushcashnamandapash.