1 Cunan yalishca jipa tauca viñai miraicuna tiarca, jatun mandaj Benjamínpaj shimicunata na yuyaipi chasqui usharca, paipaj llactapuracunaman parlashca punlla uchilla huahuacuna carca; paicunapaj punda taitacunapaj yachachishcata na crirca.

2 Paicuna na crirca ima nishcata huañuimanda cutin causarinamanda, Cristopaj shamunamandapash na crirca.

3 Cunan paicuna na crimanda Diospaj shimita na yuyaipi chasqui usharca; paicunapaj shungucuna shinlliyashca carca.

4 Paicuna na bautizaringapaj munarca; iglesiamanbash na tandanajungapa munarca. Shican llactapuracuna carca paicunapaj femanda, cunanmanda shina catirca, paicunapaj aichapi, juchayu canapi; Apunchij paicunapaj Diosta na mañangapa munaimanda.

5 Cunan Mosíahpaj reinadopi yupaipica chaupipash na carca Diospaj llactapuracunashna; ashtahuangari huauquipuracunapi ninanda fiñarishpa rimaricunamanda paicuna ashtacapacha tucurca.

6 Yalishca jipa taucacunata umachirca paicunapaj llulla shimicunahuan, iglesiapi cajcunata, tauca juchacunapi urmachirca; chaimanda iglesiapi cajcuna juchapi urmajpica minishtirishca carca, iglesiahuan tacurishca cachun.

7 Yalishca jipa sacerdotecunapaj ñaupaman apai tucurca, yachachijcuna sacerdotecunaman curca; sacerdotecuna Almapaj ñaupaman aparca, pimi sumo sacerdote carca.

8 Cunan jatun mandaj Mosíah Almaman iglesiapa autoridad cushca carca.

9 Yalishca jipa Alma paicunamanda nimata na yachashca carca; ashtahuangari tauca paicunapaj contra ricushcacuna tiarca; ari, llactapuracuna ricuchirca, testificarca paicunapaj ashtacapacha na ali ruraicunamanda.

10 Cunan iglesiapi punda shinapacha cuzas na tiashca carca; chaimanda Alma paipaj espíritupi llaqui carca, jatun mandajpa ñaupaman paicunata apashca cachun saquirca.

11 Jatun mandajta nirca: Riqui, caipi can taucacuna quiquinba ñaupaman apamushca can, paicunapaj huauquicunahuan juchachi tucushca; ari, paicuna tauca na ali ruraicunapi japi tucushca. Paicunapaj na ali ruraicunamanda na arrepentirin; chaimanda ñucanchi quiquinba ñaupaman apamushcachi, paicunapaj ruraicunamanda quiquin ricushpa chasquichichun.

12 Ashtahuangari jatun mandaj Mosíah Almata nirca: Riqui, ñuca paicunata na ricushpa chasquichishachu; chaimanda paicunata cuni quiquinba maquicunapi ricushpa chasquichichun.

13 Cunan Almapaj espíritu cutin llaquiyarca; rirca tapurcapash Apunchijta cai cuzasmanda imata ruranamanda, pai manllarca Diospaj ricuipi na alita ruranata.

14 Yalishca jipa paipaj tucui almata Diosman jichajpi, Apunchijpaj shimi paiman shamurca, nishpa:

15 Achilyachishca cangui, Alma, achilyachishca can picuna bautizarishca carca Mormón yacucunapi. Achilyachishca cangui quiquinba ninan femanda ñuca sirvij runa Abinadípaj shimicunapilla.

16 Achilyachishca can paicunapaj ninan femanda imasha shimicunapilla paicunaman quiquin parlashcacunapi.

17 Achilyachishca cangui cai llactapuracunapi shuj iglesiata shayachishcamanda; paicunapash shayachishca canga, paicuna ñuca llactapuracuna canga.

18 Ari, achilyachishca can cai llactapuracuna picuna ñuca shutita apangapa munan; ñuca shutipi paicuna shutichishca canga; paicuna ñucapa can.

19 Ñucata na ali rurajmanda tapuimanda, achilyachishca cangui.

20 Ñuca sirvij runa cangui; ñuca conveniota quiquinhuan rurani quiquinga mana tucurina causaita charingui; ñucata sirvingui, ñuca shutihuan llujshingui, ñuca llamagucunata tandachingui.

21 Pi ñuca shimita uyajpi ñuca llamagu canga; iglesiapi chasquingui, ñucapash paitaj chasquisha.

22 Riqui, cai ñuca iglesia can; pipash bautizarishca cajpi, bautizarishca canga arrepentimientopa. Pitapash can chasquingui ñuca shutipi cringa; ñuca librella perdonasha.

23 Ñucami japishcani ñuca jahuapi cai pachapaj juchacunata; ñucami paicunata rurashcani; ñucami cusha shuj pushtuta ñuca ali lado maqui ladoman tucurinacaman crijcunaman.

24 Riqui, ñuca shutipi cayashca can; ñucata rijsishpaca paicuna llujshimunga, shuj pushtuta charinga ñuca ali lado maqui ladopi mana tucurinacaman.

25 Yalishca jipa imaura cati trompeta huacajpica imaura ñucata na rijsishcacuna llujshimunga, ñuca ñaupapi shayaringa.

26 Shina paicuna yachanga Ñuca cani Apunchij paicunapaj Dios, Ñuca cani paicunapaj Jatun Causachij; ashtahuangari paicuna na achil causaringapa munarca.

27 Shina paicunata nishami canguna nimaura na rijsircanichu; paicuna anchuringa mana tucurina ninaman, caitaca ayapa, paipa ángelcunapapash alichishcami.

28 Chaimanda canman nini, pi ñuca shimita na uyanayachijta, ñuca iglesiapi ama chasquinguichu, paitaca ñuca na chasquishachu chai tucuri punllapi.

29 Chaimanda canman nini, Ri; pi na alita rurashpa ñucapaj contra, pai ricushpa chasquichishca canga juchacunamanda pai rurashcamanda; paipaj juchacunata villajpi quiquinba, ñucapaj ñaupapipash, ciertopacha tucui shungu arrepentirijpi, paita perdonangui, ñucapash perdonasha.

30 Ari, mashna viaje ñuca llactapuracuna arrepentirijpi ñuca perdonasha paicunapaj ñucapaj contra na ali rurashcacunata.

31 Cangunapash perdonanguichi caishuta chaishuta cangunapaj na ali rurashcacunata; ciertopacha cangunata nini, pipash ladopi causajcunata paita na ali rurashcacunata na perdonashpa imaura arrepentirini nin, paillata apamushca canga ricushpa chasquichinata paipaj jahuaman.

32 Cunan cangunata nini, Ri; pipash paipaj juchacunamanda na arrepentirijpi ñuca llactapuracunapi na yupashca cangachu; caita ricushca canga cunan punllamanda ñaupaman.

33 Yalishca jipa Alma imaura cai shimicunata uyashpa caicunata quilcarca alichingapa, iglesiapaj llactapuracunata ricushpa chasquichi ushangapa Diospaj rurachunbacha saquishcacunahuan.

34 Yalishca jipa Alma rirca, ricushpa chasquichirca, na ali ruraicunapi japi tucushcacunata, Apunchijpaj shimi nishcashna.

35 Pipash paicunapaj juchacunamanda arrepentirishpa caicunata villashpa, iglesiapaj llactapuracunapi yupashca carca.

36 Pipash paicunapaj juchacunata villangapa na munaj, paicunapaj na ali ruraicunamanda na arrepentirijpash, iglesiapaj llactapuracunapi na yupashca carca, paicunapaj shuticuna fichashca carca.

37 Yalishca jipa Alma controlarca iglesiapaj tucui ruranacunata; cutin sumaj causaita chari callarirca, ninanda ali mirarca iglesia ruranacunapi, Diospaj ñaupapi aliguta purishpa, taucacunata chasquishpa, taucacunata bautizashpapash.

38 Cunan tucui cai cuzascunata Alma, iglesiapi trabajajpuracunahuan rurarca, purishpa tucui utsia ruranacunapi, yachachishpa Diospaj shimita tucui cuzascunapi, tucui laya llaquicunata yalishpa, Diospaj iglesiata na catijcunahuan na ricunayachi tucushpa.

39 Paicunapaj huauquicunata tacurirca; paicunapash tacuri tucurca, shujllangaman Diospaj shimihuan, paicunapaj juchacunamanda, nacashpaca juchacunata paicuna rurashcamanda, Diospaj mandashca caimanda na shayajushpa achil mañangapa, tucui cuzascunapi pagui nishpa.