1 Cunan, yalishca jipa Abinadí cai shimicunata parlashca jipa paipaj maquita chutashpa nirca: Punlla shamunga imaura tucuicuna ricunga Apunchijpaj quishpichinata; imaura shujllangaman jatun llactacuna, reinocuna, shimi rimaicuna, llactapuracunapash ñavi ñavi ricunga, yacharcanimi ningapash Diospaj ñaupapi paipaj ricushpa chasquichinacunaca alimi.

2 Shinaca na alita rurajcunaca shitashca canga, imashpa aullanata charinga, huacanga, caparinga, paicunapaj quirucunata caniringa; caica Apunchijpaj shimita na uyaimanda; chaimanda Apunchijca paicunata na jatun causachinga.

3 Paicuna aichacuna can, ayaman tigrajcunapash, aya ushaita charin paicunapaj jahuapi; ari, chai punda culebra pimi ñucanchi callari taitacunata umachirca, caimanda paicuna urmarca; caimanda tucui runacuna aichaman, sensualman, ayaman tigrarca, yachashpa na alita alimanda, paicunallata ayaman curin.

4 Shina tucui runacuna chingashca carca; riqui, tucuillapacha chingashca canman carca Dios na jatun causachijpica chai chingashca, urmashca canamanda.

5 Ashtahuangari yarichi pimi atirin paipaj aicha canapi, juchacunapaj ñangunata, Diosta na cazushpa catijpi, paipaj urmashca canapillata catin, aya charin tucui ushaita paipaj jahuapi. Chaimanda, nima jatun causachinata na rurashca laya catin, Diosta na ricunayachij cashpa; ayapash Diosta na ricunayachij can.

6 Cunan Cristo cai pachaman na shamunma carca, jipaman shamuna cuzascunata parlashpa, ña shamushca layapi, jatun causachina na tianman carca.

7 Cristo huañushcacunamanda na cutin jatarijpica, nacashpaca huañuipaj huatanacunata na fitinman carca pambana pushtu ama mishachun, huañuipash tujsinata ama charichun, cutin causarina na tianman carca.

8 Ashtahuangari shuj cutin causarina tian, chaimanda pambana pushtu na mishanga, huañuipaj tujsina Cristopi puchucashca can.

9 Paimi micha can, cai pachapaj causai; ari, mana tucurina micha, nimaurapash na amsayangachu; ari, causaipash imami na tucurin, ashtahuan na huañui tiangachu.

10 Cai huañuna na huañunata churajunga, cai ismuna na ismunahuan churajunga, Diospaj jatun shayarina ñaupaman apamushca canga, paihuan ricushpa chasquichi tucungapa paicunapaj rurashcacunamanda caicuna alicuna, na alicuna cajpipash—

11 Caicuna ali cajpica, cutin causarinaman mana tucurina, cushilla causaiman; na alicuna cashca cajpica cutin causarinaman mana tucurinapaj condenaciónman, ayaman cushca canga, pimi paicunata quimirishca charin, caimi condenación can—

12 Paicunapalla aicha munashcacunata rurashca caimanda; Apunchijta nimaura na mañashca caimanda paipaj llaquinapaj rigracunata paicunapaman chutashca cajpipash; paipaj llaquinapaj rigracunata paicunapaman chutashca cajpipash, na munarca; paicunapaj na ali ruraicunamanda cayachishca carca shinapash paicuna na anchurircachu; mandashcapash carca arrepentirichun ashtahuangari paicuna na arrepentiringapa munarca.

13 Cunan, nachu chujchuna canguichi, nachu cangunapaj juchacunamanda arrepentirina canguichi, yarichi Cristopi, Cristomandami quishpirita ushanguichi.

14 Chaimanda, Moiséspaj catichunbacha saquishcacunata yachachishpaca, imashna canata shuj llandu laya canga ima cuzascuna shamunamanda yachachipash—

15 Paicunaman yachachichi jatun causachinaca Cristo Apunchijmanda shamun, pimi ciertopacha Mana Tucurina Taita. Shinacapashcachun.